Capitol 7: La cotel

La tribu dormi.

Presada en junta per resta calda, e envolveda en tal peles cual los ave, la popla de la cavas dormi, soniante sur foco, atentante oblida la fria matante cual filtri tra la cavas – la fria cual va deveni plu ferose, plu forte, a cada note. Si la foco no va reveni pronto, matinas va ariva cuando la debiles, la femes e la enfantes e la veas, no va velia. Cuando la fria es la plu ferose, an omes forte mori en la note.

Sola Madre Vea no dormi ancora. Foco salta ance en sua mente, ma no como un salvor, un protejor. Per Madre Vea, foco es un demon malvolente. Sua mente confusada asosia lo con la mori de sua sposo, Gor, e con tota la malfortunas cual ia aveni a la tribu.

La stranjeres menasa crea foco. La stranjeres es ance malvolente. Madre Vea pensa tra un tempo longa, demandante como el pote salva la tribu de la menasa de foco. Final, el descovre un metodo.

El leva cuieta se, rampente per traversa la cava silente a la loca do Za reclina en dormi, con Hur a sua lado. La cotel valuosa de Za reposa prosima a sua mano estendeda. La cotel es un ageta longa e magra de petra, con un borda agida. Madre Vea estende sua mano a lo.

Za spasma e murmura en sua dormi, como si el suspeta sua intende, e la vea retira sua mano. Za dormi denova. Madre Vea saisi la cotel e core a via.

Hur oserva el tra oios partal abrida, e demanda a se como el debe reata.

---

Ian posa sua manos liada ante se, estendente sua lias en espera de libri se de los par lisca, ma la bandas de pel cru es dur e tendonosa, e noncapas de ajusta sua forma.

Susan xerca petras de bordas agu sur la tera de la cava. “Me ave asi un otra con un borda ru.” El prende lo e brinca denova a Ian, impedida par la fato ce ambos de sua manos e pedes es liada.

Ian prende la petra en sua propre manos liada, e move se a Barbara, ci plati sua manos liada sur la tera. Ian comensa sieri la bandas con la petra. “Ma lo no vade. La petra es tro mol. La borda fa no plu ca desintegra.”

“La situa intera es sin espera.” – la Dotor ronca. “An si tu ta pote libri nos, nos ta susede nunca move la petra cual bloci la porte.”

Ian leva sua testa, ensoflante. “Aira entra en esta cava de alga loca – de alga loca otra ca la porte, me vole dise.”

“Lo es vera tal.” – Barbara dise. “Me senti lo sur mea fas.”

“Cisa lo es no plu ca un abri peti, an tal. No espera tro…”

“Perce no? Es evidente ce lo fa ce tu espera.” – la Dotor murmura.

“Ma natural. Cualce espera es plu bon ca zero. Tu no aida par reclina ala mera criticante nos. Fa alga cosa. Aida nos a evade esta loca, si tu es tan astuta!” Ian lansa la petra a via. “Lo es sin espera.” – el dise, contradisente direta se.

“No sede, Ian, per favore.” – Barbara prea.

“Oce. Veni, Susan, ta ce nos xerca un peso plu bon de roca.”

Reproxada par Ian, la Dotor es silente. A la ves prima, el perde sua aira usual de superioria autosasiada. Alga embarasada, el dise – “No peri vosa tempo con petras. Proba un de la cranios rompeda. Un bon peso agu de oso va es plu usosa.”

“Bon idea.” – Ian dise. El comensa esplora la monton macabre de cranios.

La Dotor pare intera preparada per deveni denova la gidor. “Nos nesesa consentra nosa labora, mea joven. Ta ce tota de nos alterna en atenta libri tua manos per talia.”

“Ma esce nos no debe comensa par libri la femes?”

“No, no. Ta ce tu es la prima. Tu es la plu forte. Cisa tu va nesesa proteje nos…”

Ian acorda con sua testa, impresada no sola par sua propre encarga, ma ance par la manera nonemosiosa en cual la Dotor ordina la nesesas. El trova un cranio cual es fendeda cuasi a du partes, con un borda sasiante agu a sua punto de rompe. Silente, el dona lo a la Dotor e estende sua manos liada.

La Dotor comensa sieri la bandas de Ian. Tra un tempo longa, el labora enerjiosa. Final, el para, respirante laborosa. “Susan, ta ce tu atenta tra alga tempo. Mea brasos es fatigada.”

“Si, Avo.” Susan prende la peso de cranio, e comensa ocupa se par sieri.

La Dotor move a Barbara, ci fisa la oscuria con un regarda vacua, con fas pal e tensada. “Iniora la posiblia de fali.” – la Dotor dise jentil. “Nos va libri nos, e tota de nos va evade esta loca xocante.”

“Como?” Barbara pare apena comprende el.

“Atenta recorda la via par cual tu e la otras ia veni asi. Consentra sola sur acel. Refa cada paso de la viaja en tua mente.”

“Si, oce, si me pote.” Barbara regarda el con surprende. “Tu atenta aida me, no?”

“La teme fa ce cadun deveni un bon acompanior, Seniora Wright.”

“Me ia suposa ce tu teme nunca, Dotor.”

“Tota de nos teme. Lo va es sempre tal.” – la Dotor dise cuieta. “Ma cadun senti ance la otra emosia cual esiste sempre a lado de lo.”

“Cual emosia?”

“Tua acompanior ia refere a lo, ante un tempo corta. La espera, Seniora Wright. La espera!”

Susan continua sieri la bandas de Ian asta cuando el deveni ance fatigada, e Barbara emprende alora la taxe. Lo pare ce tota sua labora ia fa sola un impresa debil sur la bandas spesa de cuoro – lo es evidente ce un tempo longa resta ancora ante cuando los va deveni tan debilida ce on pote rompe los.

Susan senta prosima a la Dotor, oservante la labora de Barbara. El dormeta alga cuando el oia pos se un sona strana e xuxin. El turna. En la angulo distante de la cava es un strutur de ramos, decorada con plu de la cranios macabre suriente. La sona xuxin veni de acel angulo. En teror, Susan vide ce la cranios move. “Ala!” el xilia, e cadun turna per vide.

La monton de ramos es puiada a lado de pos, cual fa ce cranios rola bondinte en traversa de la tera. Un figur xocante apare: un fem vea e magra, con capeles blanca e desordinada. El ave un cotel longa de petra en sua mano.

Brandinte lo con menasa, el avansa a la prisonidas nondefendeda. “Foco es malvolente.” – el vosi. “Vos no va crea foco!”

---

Hur puieta Za per velia el. El abri sua oios, xercante instintosa sua axa. Hur pone sua dito a sua labios, e, gidante el entre la montones de figures dorminte, sorti de la cava. Los sta tremante en la venta de note. Za palpebri a el, frotante sua oios con sua punios per desapare la dormi. “Cual aveni? Perce tu velia me? Dise!”

“Me ia vide la fem vea prendente tua cotel.”

“Si tu ia vide – perce tu ia permete? El es vea. Tu pote freni el.”

Hur responde un otra demanda a sua demanda. “Perce el ia prende lo?”

“Ci sabe? Cisa el ia vade a la foresta per xasa!”

“No.” – Hur dise. “Me ia pensa longa sur esta. El ia vade per mata la stranjeres.”

“El ia dise esta?”

“El ia prende tua cotel. El teme foco.”

“Tu ia debe para el.”

“Kal ia es en la cava. Gidores vijila cuando otras dormi. Ta ce tu para el.” Hur pausa, fisante sua regarda a Za. “La tribu strana no va pote mostra a tu la metodo de crea foco si la fem vea ia mata los.”

“Ma si me preveni ce el mata los, los va dona foco a me – e no a Kal. Veni!”

Los freta a la boca de la cava de cranios – e vide ce la petra grande bloci ancora la porte.

“La fem vea no ia pote entra en la cava.” – Za dise coler. “La petra es ala. Perce tu dise esta menti a me?”

Hur vade a la boca de la cava. El presa sua orea a la buco peti entre la petra e la borda de la boca de la cava. El jesti afin Za veni. “Escuta!”

Za escuta. “Me oia la fem vea en la cava. El parla a los.” Cadente sua axa, Za comensa puxa la petra. Prima, lo resiste move, ma lo comensa gradal osila, sempre plu. Hur core per aida…

---

Alga tempo pasa ante cuando la Dotor comprende lo cual la fem vea desira. El babela isterica sur foco, brandinte la cotel a los en un modo menasante.

“Cual el vole, Dotor?” Barbara sanglota. “El va mata nos?”

“No, me no crede tal. Cuanto me pote comprende, el ave un teror de foco – el ofre lasa ce nos parti si nos promete no crea lo.”

La fem vea acorda zelosa con sua testa. “Me va libri vos si vos vade a via e no crea foco. Foco va trae turba e moria a la tribu.”

“Lasa ce nos parti.” – la Dotor dise sin pausa. “Lasa ce nos parti, e on va ave no foco.”

Los deveni consensa de un ruido molente de la boca de la cava. Algun osila la petra. On oia un ruji de furia.

“Algun veni.” – la Dotor dise. “Aora, rapida!” El estende sua polsos, e la fem vea sieri la bandas con la cotel de petra asta cuando los divide. “E mea pedes!” La fem vea basi se e talia la bandas sirca la pedes de la Dotor. La un pos la otra, el libri cadun de los.

Tra la tempo intera, la roca grande cual bloci la porte osila sempre plu.

La fem vea indica la via tra cual el ia entra – un abri streta es ascondeda pos la arboretas. “Vos vade rapida. Segue la tunel, e alora la curso a la foresta. Vos pote asconde ala.”

“Freta!” Ian cria. “Los va entra multe pronto.” La Dotor vade tra la tunel, segueda par Barbara, e Susan, e final Ian mesma.

A poca minutos pos sua desapare, la roca move sufisinte per lasa un buco a la porte. Za presa se tra lo, e Hur segue prosima.

“Do los es?” Za ruji.

Hur regarda la bandas dejetada sur la tera de la cava. “El no ia mata los. El ia libri los.”

Za vide sua cotel en la mano de Madre Vea, e saisi lo de el. “Perce, vea? Perce?”

“Los ta crea foco.” – Madre Vea jemi. “Los ta crea foco.”

La oios capas de Hur ia persepi la abri a retro de la cava. “Los ia vade sur esta via. Asi, Za!”

Za dirije se a la abri, e Madre Vea enrola sua brasos magra sirca el, atentante freni el. Coler, Za lansa el a lado. La vea tropeza e cade a la tera, do el reclina partal aturdida.

Za atenta regarda en la tunel, e esita. “Los ia vade a la note.”

Hur dise – “Los ia prende la secreta de foco con se.”

“La bestias va mata los. Los va mata nos si nos segue.”

Hur revade a la boca de la cava, reprende la axa de Za, e retrae lo a el. El presa lo en sua mano. “Tu es la gidor, Za.” – Hur dise dulse. “Tu es forte, tan forte como la bestias. Tu va es an plu forte cuando tu sabe como on crea foco. Plu forte ca Kal.”

Za regarda el tra un momento, e desapare alora en la tunel.

Hur segue el.