La tre porcos peti

Tre porcos peti ia vive con sua madre en un casa. A un dia, sua madre ia deside ce los debe parti per deveni nondependente. Tal, la tre frates ia parti.

Pos pasea per alga tempo, un de los, la plu peti, ia vide un monton de feno e ia deside construi sua casa ala con lo. Pos un dia, el ia fini sua casa.

La otra du frates ia continua sua via asta cuando los ia trova un monton de lenio. Un de los, la numero du, ia deside construi un casa con acel lenio. Pos alga dias, el ia fini.

La frate ultima, la plu vea, ia continua asta ce el ia trova un monton de brices. El ia deside construi sua casa con acel brices.

A la otra dia, un lupo ia es paseante e ia vide la casa de feno. El ia prosimi e ia ole la porco. El ia bate sur la porte e ia demanda:
- Lasa ce me entra, mea ami.
- No, nunca tu va entra asi.
- Donce me va sofla e sofla e me va destrui tua casa.

Alora el ia sofla e sofla e el ia destrui la casa.

La porco ia fuji rapida a la casa de lenio de sua frate.
- Mea frate! Aida me! La lupo ia destrui mea casa!
- No cura par esta, mea frate. Resta asi.

La lupo ia segue sua pasea asta ariva a la casa de lenio. El ia bate sur la porte e ia dise:
- Porcetas, mea amis, lasa ce me entra.
- No, tu nunca va entra a esta casa.
- Donce me va sofla e sofla e me va destrui vosa casa.

Alora el ia sofla e sofla e el ia destrui la casa de lenio.

La du porcos ia fuji rapida a la casa de sua frate plu vea. La tre porcos ia teme car la lupo ia es multe faminte (car el ia labora tra tota la dia soflante e xasante los).

La lupo ia prosimi a la porte de la casa de brices, cual ia ave un ximine multe bela e grande e ance ia ave colonas en sua porte. El ia bate sur la porte e ia dise:
- Lasa ce me entra, mea amis.
- No, tu nunca va entra a esta casa.
- Donce me va sofla e sofla e me va destrui vosa casa.

E la lupo ia sofla, e sofla, e no cosa ia aveni. El ia es multe fatigada e ia deside reposa e pensa. El ia vide la ximine e ia comensa trepa.

La frate la plu vea ia descovre la idea de la lupo e ia comensa boli un casola con acua. Cuando la lupo ia salta tra la ximine, la porco ia abri la teto de la casola e la lupo ia cade a en la acua e ia es scaldada.