Joan Nontemosa

A un ves pasada, un sposia ia ave du fios. La plu grande ia es timida e noncorajosa. An tal, la plu peti, Joan, ia es corajosa e osante. Totas ia nomi el Joan Nontemosa, car no cosa ia asusta el.

Con la tempo, Joan ia deveni noiada e ia deside xerca aventuras per esperia teme.

Pos pasea alga tempo, el ia entra a un bosce do el ia deside dormi.

A la dia seguente, el ia entra en un vileta, do la mesajor de la re ia es lejente un mesaje: Acel ci osa dormi per tre notes en la castel encantada, va reseta un caxon plenida con monetas de oro.

La xico ia presenta se como bonvolor e ia es gidada a la castel. El ia deside resta en la sala con ximine, car la castel ia es multe fria. El ia ensende un foco e ia adormi.

Pos alga tempo, un ruido ia velia el. Lo ia es un fantasma ci ia es prosiminte. An tal, la telon de la fantasma ia prosimi tro a la ximine, e lo ia comensa arde. La fantasma ia fuji. Joan ia adormi denova.

A la dia seguente, Joan ia deside limpi la salon do el ia es, car lo ia es con multe polvo. El ia spende tota la dia con esta e ia adormi denova.

Un ruji ia velia el e el ia vide du leones a lado de el. El ia prende un palo e ia colpa los. Los ia comensa muta asta deveni du gatetas. Joan ia adormi denova.

A la dia seguente, Joan ia visita la castel. Lo ia es multe vea e el ia vide alga depintas de la persones ci ia abita lo alora.

Cuando la note ia ariva, Joan ia adormi denova. A esta ves, un otra ruido ia velia el. Un monstro ia es prosiminte a el. Joan ia dise:

- Esce tu ia vide tu en un miror? Vade e duxi tu, per favore e lasa ce me dormi.

La monstro, ci no es abituada a acel reata, ia retira se a un otra salon de la castel.

A la dia seguente, Joan ia vade a la castel de la re ci, merveliada, ia dona a el la premio.

Con esta, Joan ia reveni a sua casa e ia nara sua aventuras a sua familia.

- An tal, me no ia esperia teme e me va parti denova per xerca aventuras nova.

La madre de Joan no ia vole ce sua fio sorti denova e, en cuando el ia es dorminte, el ia lansa acua fria sur sua fio, ci ia velia criante e multe asustada.

Pos cuando sua madre ia calmi ja el, Joan ia dise:

- Me sabe ja cual es teme, e me no vole esperia lo per alga tempo.