La bela dorminte

A un ves pasada on ia ave un re e un rea ci ia vole ave un enfante de multe tempo a ante. Cuando, a fini, un prinsesa ia nase, los ia pensa ce un fe bon ia cura los.

“Me va invita tota la fes de la rena a la batiza de nosa enfante!” - la re ia dise contente.

Cuando la tempo de la batiza ia ariva, des fes de la rena ia veni. Cada de los ia dona un donada a la xica.

“Tu va ave un fas bela” - la prima ia dise.

“Tu va es amable” - la du ia dise.

Totas ia fa esta asta cuando, pos cuando la numero des-un ia parla, un vose furiosa ia es escutada en la castel.

- Me suposa ce tu pensa ce me es tro vea per fa majia - la vose ia dise. Un fe vea ia apare. - Aora tu va vide. Cuando la prinsesa ave des-sinco anios, el va es picada par un fuso e va mori. - E la fe ia fuji de la palasio.

La re ia es multe triste.

- Como me ia oblida el? - el ia dise.

Me ta pote aida - un vose ia dise.

Lo ia es lo de la numero des-du.

- Me no pote desfa un encanta ma me pote suavi lo. La prinsesa va es picada par un fuso ma el no va mori. El va adormi per sento anios.

La re ia grasia la fe ma, temente la encanta de la fe vea, los ia comanda ce tota la fusos de la rena es destruida.

En la matina de sua aniversario des-sinco, el ia es vagante tra la palasio e el ia ariva a un tore en cual el nunca ia es a ante. El ia vide un fem vea en la tore con un macina de fili.

- Bon matina! Cual tu fa?

- Me es filinte - la fem vea ia dise. - Regarda! - e el ia dona la fuso a la prinsesa. En acel momento, la prinsesa ia pica sua dito.

Direta el ia adormi en un sonia profonda. La parolas de la fe malvolente ia deveni real.

En acel momento, totas ia adormi. En cuando la tempo ia pasa, spinas e rubo ia crese a sirca la palasio.

La nara de la prinsesa dorminte ia estende ultra la rena e el deveni conoseda como la bela dorminte.

Multe prinses ia vade a la palasio per salva la prinsesa ma nun ia pote abri sua via tra la spinas e la rubo.

Cuasi sento anios ia pasa de cuando la prinsesa ia pica sua dito, cuando un prinse joven de un rena distante ia vade prosima a la spinas e la rubo.

El ia encontra un om vea ci ia nara a el la fable cual sua avo ia nara a el. E tal la prinse ia aprende la nara de la bela dorminte.

“Me no va reposa asta cuando me vide el e velia el” - el ia jura.

Cuando la prinse ia vide la spinas e la rubo, el ia estrae sua spada e la spinas ia deveni rosas e la sepe de spinas ia lasa ce el pasa.

En la palasio tota ia es calmida. Totas ia es dorminte. La prinse ia xerca tra la castel e ia trova la re e la rea dorminte. El ia trova la prinsesen la tore la plu alta. El ia curvi e ia besa la xica, ci ia velia e, cuando el ia vide la prinse, el ia es enamada.

Tra la palasio totas ia velia e la prinse e la prinsesa ia sposi. A esta ves, la re ia invita totas a la rituo de spos.