Capitol 7

La tre amis ia ariva a la castel e ia entra.

“E como nos va sabe do Joan es?” Eneko ia demanda.

“Ta ce nos pensa,” Elisenda ia dise. “La castel no ave tan multe salas, e la plu moderna es en la zona ueste. Si on regarda ala, sola tre salones ave lus, do me crede ce Joan es en un de acel locas.”

“Atende, Joan, mea ama,” Luca ia dise con vose femin.

“Silenti! Esta es seria,” Elisenda ia dise.

“No ansia!” Eneko ia ajunta. “Nos va salva el.”

“Ta ce Dio aida nos!” Elisenda ia dise.

E la tre xicos ia dirije se a la zona ueste de la castel.

---

“Un demanda,” Luca ia dise. “Cisa los ave pistoles. Esce nos ave alga cosa?”

“Me ave la cotel composada cual me ia porta a la escurso,” Eneko ia responde. “Me ia lasa lo en mea pox.”

“Me ave… no cosa,” Elisenda ia dise.

“Me ave… ance no cosa,” Luca ia ajunta.

“Bon,” Eneko ia dise. “Me gusta tan vide ce vos es preparada!”

“Ta ce nos vade, Dio va aida nos!” Elisenda ia dise.

“Ta ce El escuta tu,” Luca ia responde.

La tre ia entra en la zona ueste de la castel e ia comensa asende la scalera.

“Como lo aveni ce nun es asi?” Luca ia demanda.

“Los no sabe multe sur securia,” Eneko ia ajunta.

“Silenti, la du!” Elisenda ia dise.

“Atende, asconde vos!” Eneko ia dise. E la tre ia vade pos un cortina.

Brigitte ia sorti de un sala e ia vade a un otra.

“Ta ce nos segue el,” Eneko ia dise.

La tre ia resta pos la porte, cual ia es pico abrida, e ia escuta lo cual ia aveni a interna.

---

“Bon, stupida, esce tu va suscrive la documento?” Brigitte ia dise a Joan.

“Parla con tu es sempre un plaser, Brigitte,” Joan ia ajunta. “Me ia es sentinte tua manca.”

El ia bate Joan denova.

Elisenda ia covre sua boca per no cria.

“Cual nos va fa?” el ia demanda a la du otras. “La fas de Joan es covreda de sangue.”

“Me ia imajina esta situa en un otra forma,” Eneko ia dise.

“E cual nos va fa?” Luca ia dise.

“Cisa vos debe entra e presenta vos a Brigitte,” un vose ia dise.

La gardacorpo de Brigitte ia es ala, con un pistol en sua mano.

“Me ia dise a vos,” Luca ia comenta, “ce nos va trova algun con un pistol.”

“A interna de la sala,” la om ia cria.

La tre ia entra.

“Surprende!” Eneko ia dise a Joan.

“Estas es la amis ci ta aida tu?” Brigitte ia dise, comensante rie.

“La idea ia es salva tu, ma clar lo no ia aveni como nos ia pensa,” Luca ia dise.

“Esce tu ia ave un projeta?” Elisenda ia demanda. “E tu dise lo aora?”

“Me no ia ave un projeta, ma me no ia vole resta como un fol ante esta fem tan bela,” Eneko ia dise regardante Brigitte.

“O, tua amis es tan adulante!” Brigitte ia dise. “Tu va es la ultima ci mori.”

“Me ta mori per un besa de tu,” Eneko ia dise.

“Ma cual merda Eneko dise?” Elisenda ia xuxa a Luca.

“Me no sabe,” Luca ia responde. “Me crede ce el es pico desperada.”

“Bon, vos pote senta sur la sofa,” Brigitte ia dise.

Los ia fa tal e Brigitte ia parla: “Michel, tu pote retira tu.” E la gardacorpo ia vade a esterna de la salon. “Bon, Joan, esce tu vole vide como me va mata tua amis la un pos la otra asta ce tu suscrive la documento?”.

“Cual fia de —” Luca ia comensa dise.

Brigitte ia punta sua pistol a el: “Si? Cual tu vole dise?”

“No cosa, no cosa.”

“El ia vole dise ce tu es multe bela,” Eneko ia ajunta.

“Esce Eneko es drogida?” Joan demanda a sua amis.

“No,” los ia ajunta.

“E ci es esta xica tan bela?” Elisenda ia dise, prosiminte a Elisenda.

“Me es Nemesis, diva de venja, ci veni per visita tu,” Elisenda ia responde.

“O, tu condui tan elinica oji, cara,” Brigitte ia dise. “E tua fas es tan bela, lo es tan triste ce lo va fini como lo de tua ami.”

E el ia leva sua mano per bate el. Elisenda, profitante de ce Brigitte ia leva la mano con la pistol, ia lansa rapida se contra la fem, tal ce ambos ia fini sur la solo. Con un colpa, el ia lansa la pistol a un angulo de la salon e ia comensa bate se contra Brigitte.

“Esta es un sonia,” Eneko ia dise.

“Silenti e aida el,” Luca ia dise, en cuando el ia comensa deslia Joan.

Eneko ia vade per securi Brigitte con la corda cuando la gardacorpo ia entra en la sala. “Lasa Brigitte,” el ia dise.

Eneko ia estrae sua cotel composada e ia pone la lama a la colo de la franses. “Esce tu vole fini sin labora oji?” el ia demanda con un fas de fol cual ia asusta ance Elisenda e Luca.

“Tu no va fa lo,” el ia dise.

Eneko ia comensa feri Brigitte, ci ia vide como un pico de sangue comensa cade longo sua colo.

“Stupida! Lasa la pistol!” el ia cria.

La gardacorpo ia lasa la pistol sur la solo e ia leva la manos.

“Reversa tu!” Eneko ia dise.

Luca ia vade a la gardacorpo, ia prende la pistol e ia colpa el a la testa, e el ia cade a la solo.

“Ma cual cosa tu fa?” Elisenda ia dise.

“Un min preocupa,” el ia dise.

“E cual nos va fa?” Joan ia dise, pos ce los ia lia Brigitte a un seja.

En acel momento, la polisia ia entra en la salon, e pos los, Irati e Itxaso. “Esce vos es oce?” los ia demanda. “O, mea Dio! Joan, regarda tua fas!”

“Si, me sabe. Me no recomenda la clinica de la cosmeticiste Brigitte Tardevenida: la resultas no es multe bon.”

La amis ia surie en cuando la polisia ia securi la polsos de Brigitte.

“Vos no sabe ci me es. La Ministreria de Esternas de Frans va comensa un prosede contra vos. Vos no sabe ci es mea contatas.”

“Brigitte, tu es en la Vileta de la Marci, en un vileta de persones fol ci no es interesada par tua contatas, tua ricia o cualce otra cosa. Nos teme sola Dio. E, un plu cosa, acel no es la forma coreta de parla a un marci,” Joan ia dise.

La polisia ia porta Brigitte a la auto.

“Do es tua avo?” Eneko ia demanda.

“El debe es en la otra salon,” Joan ia dise. E tota ia core a la otra salon, do la polisia ia deslia ja la avo de Joan.

“Esce tu es oce, avo?” el ia demanda.

“Clar ce me es bon,” el ia dise. “On nesesa alga plu ca esta fem per fini la Tardevenida.”

“Si, lo es vera,” Joan ia ajunta.

“E cual ia aveni a tua fas?” la avo ia demanda.

“Ta ce nos vade a la vileta, e me va sani tu,” Elisenda ia dise.

“Tu ia es noncredable,” Joan ia dise el. “Tu es multe nontemosa.”

“Esce tu crede ce sola la omes de la Vileta de la Marci es corajosa?” el ia responde con un surie.

La amis ia reveni a la vileta, do los ia vade per come de sera en la casa de Joan.

“Bon, a cada estate nos ave un aventura nova,” Eneko ia dise.

“Me espera ce la prosima no va ave pistoles,” Irati ia dise.

“Ance me,” Itxaso ia ajunta.

E tota ia rie.