Capitol 3

A la dia seguente, la ses amis ia vade a la lago per visita la cava. Lo ia pare es profonda, e los ia vade preparada con cordas e lampas per esplora.

“Oji va es un dia multe interesante!” Irati ia dise, emosiada.

“Ta ce on vade!” Itxaso ia dise.

La ses amis ia entra en la cava e ia comensa sua via. Pos alga minutos, los ia es en un loca tan oscur ce sola con grasias a la lampas los ia pote vide alga cosa. La cava ia ave stalatitas cadente de la teto, donante a lo un aspeta plu malvolente.

“Esce tu comensa ja repenti?” Eneko ia demanda a Elisenda.

“No,” el ia responde, “me no teme es en un cava. E tu?”

“Evidente no,” Eneko ia responde.

“Buh,” Luca ia dise, atentante asusta Eneko, ci no ia reata.

“Vera, on no va asusta me,” Eneko ia responde.

“Enfantes, esce vos pote para jua e comensa pasea, per favore?” Joan ia dise.

“Si, papa,” Irati ia dise.

Los ia segue la via tra alga oras cuando los ia comensa vide la fini de la cava. Lo ia es egal como la entra, e los ia crede ce lo es alga strana.

“A fini nos va sabe a do esta tunel gida,” Luca ia comenta.

Los ia sorti e ia vide ce los es en lo cual pare la fondo de la canion.

“U, me no pote crede ce la canion e la cava de la lago es liada!” Elisenda ia dise.

“Esta es vera noncredable,” Joan ia pensa. El ia comensa regarda la sielo. La avias ia es volante a interna e a esterna de la canion. Ma un corvo ia vola contra la mur de la canion e ia desapare.

Surprendeda, el ia prende sua binoculo e ia regarda. On ia ave un buco en la mur!

“Eh!” el ia cria. “Regarda ala,” Joan ia indica do la buco es. “Nos debe vade ala!”

Eneko ia prende la binoculo e ia regarda. “Vera, lo es un buco ala!”

Elisenda ia comensa estrae la cordas e la picones per trepa.

“Esce nos va vade ala?” Irati ia demanda.

“Clar!” Luca ia responde, en estrae sua cordas e picones.

“Ma ia pensa ce nos no va usa los,” Itxaso ia comenta.

“Oji es tua dia de fortuna!” Joan ia ajunta. “Tu va pote usa los.”

Los ia comensa trepa e, pos un ora, los ia ariva a la buco. Lo ia es bastante alta per lasa ce los entra sin flexe.

Joan ia asende la lampa e no ia pote vide la fini de la pasaje. El ia comensa pasea.

“Tota va segue me, e no resta separada de lunlotra,” el ia dise. Prima Eneko ia entra, a pos Luca, e a fini Irati e Itxaso.

“Dona a me tua mano, Itxaso,” Irati ia dise. Sua sore ia fa lo, car el ia es ance alga asustada. La ses amis ia segue sua via e, plu los ia pasea, plu Joan ia pensa ce esta tunel no ia es creada par acua de forma natural, ma ce lo ia es escavada par algun.

Los ia continua pasea asta ariva a un loca con coredores e salas diversa. “Lo pare ce lo es… un site suteran!” Luca ia dise.

La site ia es ja escavada en la roca. En un sala on ia pote vide un arco fada con petras, cual ia sembla la entra de un eglesa.

“Me demanda como los ia pote crea esta,” Itari ia demanda.

Luca ia entra en un sala do el ia vide un scafal siselida en la roca. En lo, el ia trova alga libros, tota covreda con polvo. “Veni asi,” el ia cria. “Me ia trova un cosa interesante.”

La otra ia core a la sala do el ia es. Luca ia dona un libro a Joan, ci ia abri lo e ia comensa leje. Lo ia es en un lingua antica, parente un dialeto, ma lo ia es simil a la varia antica de nosa lingua:

Io, Joan, scrive esta libro per fa conoser la nosa istoria e ance cual aveniva a la abitores de esta site. Nos fujiva cuando la pesta veniva a esta tera, car la popla de la Marcia desideva ce nos eseva culpable, ce nos traeva lo. Nos portava nunca la pesta, nos veniva asi plu tarda ca la otras. Un parte de nosa familia restava en la vileta, ma un otra parte desideva ce esta no esera un bon forma de vive, ce nos debe ave la mesma diretos ca la resta. Par esta causa, la familia Tardevenida separava en du partes: un ci restava en la Marcia, e un otra ci moveva asi.

Totas ia regarda Joan, de ci sua fas ia deveni blanca.

“On ave du otra libros asi,” Luca ia comenta. El ia prende los e ia pone los en sua bolson.

“Ta ce nos vade,” Elisenda ia dise.

Nun ia comenta en via a la buco, e Irati ia sujesta: “Ta ce nos vade a supra en loca de reveni a la cava.”

“Lo es un bon idea,” Elisenda ia ajunta.

Los ia fa tal e ia ariva en poca tempo a la fini de la abiso, de do los ia pote vide la vileta.

“Ta ce nos vade ala,” Eneko ia dise.

A fini, los ia ariva a la vileta, e Joan ia entra en sua casa, pos dise un simple “adio” a sua amis.

“Me crede ce esta estate va es alga diferente de la otras,” Luca ia comenta.

“E no car lo va es plu bon,” Eneko ia ajunta.

“Ta ce nos reposa,” Itxaso ia dise. “Doman el va nesesa nosa suporta.”

---

Cuando la avo ia vide Joan, el ia cambia sua espresa.

“Cual ia aveni?” el ia demanda.

Joan ia lasa la libros sur la table, e ia vade per duxi. Pos fini, el ia reveni e ia raconta tota cual ia aveni e ance lo cual el ia leje.

“Donce lo es vera,” la avo ia dise. “Me ia pensa ce mea avo ia inventa acel istoria de la separa de la familia en du partes, ma, parente, lo es vera.”

“Esce tu ia conose lo?” Joan ia demanda.

“Si, ma me ia pensa ce lo es un raconta inventada par mea avo, no un fato real cual ia aveni en la istoria.”

“Donce,” Joan ia comensa dise, “un parte de nosa familia ia deside abandona la Vileta de la Marci e ia vade per vive en un site suteran, do los ia vive asta me-no-sabe-cuando.”

“Si, esta es la situa,” la avo ia responde.

Ambos ia resta silente, e la avo ia sorbe alga te de ves a ves. La note ia cade e los ia senta asi, sin parla, sola lasante pasa la tempo.

“Esce tu vole la come de sera?” la avo ia demanda.

Joan ia sta se e ia dise: “Si, si, lo va es la plu bon.”