Capitol 4

Brigitte Tardevenida ia ariva a la Vileta de la Marci en sua jip Wrangler Unlimited Polar. Esta fem, eritor de un fortuna nonconoseda, ia es un de la plu conosedas en Frans. El ia desende de un familia tre rica, liada a la monarcia en Frans (an si los ia ave no titulo nobil) e a pos a la politicistes de la Republica. De los sola un cosa ia manca: ce los ta es nobil. Par esta causa, Brigitte Tardevenida ia es en la Vileta de la Marci: el ia leje en la jornales franses sur la aresta de Baron LaForesta e, cuando el ia leje ce el ci ia aida la polisia es Joan Tardevenida, la eritor de la titulo de marci, el ia deside vade ala per conose sua “familia distante”.

Brigitte Tardevenida ta pote es malreconoseda como un model: alta, blonde, oios azul, con un surie perfeta. El ia vesti se en Chanel, Prada e Gucci. El ia es un fem de mundo. Par causa de esta, vide el en la Vileta de la Marci ia es multe bizara.

“Esce esta es la casa?” el ia demanda a sua gardacorpo.

“Si,” esta ia responde.

La fem ia avansa a la porte e ia bateta lo. Joan ia vade per abri lo.

“Alo! Tu debe es Joan,” Brigitte ia dise, con pronunsia franses.

“E tu es ci?” Joan ia demanda.

“O, pardona, me es Brigitte Tardevenida.”

La fas de Joan ia blanci. “Pardona?”

“Me es Brigitte Tardevenida. Me crede ce nos es familia. Esce tu no va invita me a entra?”

“Ci es ala?” la avo ia cria de la cosina.

“Avo, veni aora,” ia es la sola parolas cual Joan ia pote dise.

La avo ia apare en la porte e ia demanda: “Ci es tu?”

“Me es Brigitte Tardevenida. Me crede ce nos es familia.”

---

Brigitte ia sorbe delicata la tas de te cual la avo de Joan ia prepara.

Sur la table, el ia lasa la jornales franses cual ia parla sur la aresta de Baron LaForesta. Pos un pausa, el ia comensa parla. “Bon, me es un person multe direta e me no vole perde tempo,” el ia comensa. “Me ia veni car me aparteni a la Familia Tardevenida e me crede ce me ave la mesma direto como Joan a la titulo de marci.”

“Me ia sabe lo,” la avo ia dise. “Pos tan multe tempo, aora la otra parte de la familia recorda ce nos ave la mesma nom familial.”

“Lo no importa,” el ia continua. “Lo cual importa es ce me ia parla con mea avocatos e me ave un direto a la titulo e a un parte de la teras de la Marcia.”

Joan ia comensa parla: “Si me es coreta, tu desende de la parte de la familia ci ia separa de la nosa cuando la familia Tardevenida ia ariva a la Vileta de la Marci.”

“Coreta,” Brigitte ia responde.

“Do, cuando la Marci ia mori, e nosa familia ia reseta la titulo, tua parte de la familia ia es en Frans; donce, tu ave no direto a la titulo.”

“U, la viletanes no es tan stupida como me ia crede,” Brigitte ia comenta con un surie.

“Brigitte, nos es familia – no usa tal parolas,” Joan ia dise con tono sarcasmosa.

“Turbosa, tu no sabe ci me es, e si me desira la titulo de la marci, me va oteni lo. Mea ramo de la familia Tardevenida es en la parte la plu alta de la sosia, contra ce la vosa vive en un vileta de merda.”

“Un vileta de merda cual tu vole reseta como parte de la titulo de marci,” Joan ia responde. “Lo no pare ce tu ama la teritorio cual tu esije.”

“Me no desira la marcia,” el ia dise. “Sola la titulo.”

“Me crede ce tota vade unida,” Joan ia dise.

Brigitte ia pausa ante dise: “Pardona, me crede ce me no ia espresa coreta me. Me no vole prende la titulo cual tu ave. Me crede ce nos du pote ave la titulo. Me no desira la teras – tu pote reteni los, car me vole reveni a Frans, tan temprana como posible.”

“La problem es ce on no pote ave du marcis, e ance, ce tua parte de la familia ia separa ante reseta la titulo. De la momento cuando vos ia separa, vos ia atende nunca nos, ma sola aora, cuando tu pensa ce tu pote reseta alga benefica, tu veni asi. Tu no es mesma un parte de nosa país, ma de un otra, e tu ave no direto a la titulo. Si tu vole parla sur alga otra cosa, bon; si no, au revoir madame!” Joan ia dise.

“Bon, me ia atenta ata en bon forma,” el ia dise.

“Esce tu crede ce nos va teme tu?” Joan ia dise. “Nos es persones de vileta, nos teme sola Dio. Me crede ce tu sabe ja do es la porte, madame.”

Brigitte ia sta se e ia sorti de la casa. “Como me ia pensa, on debe fini con esta du,” el ia dise a la gardacorpo ante entra en la auto. “Me no ia debe porta mea Jimmy Choo,” el ia comenta.