Capitol 5

Joan ia vade a la plaza a la dia seguente, do sua amis ia es ja.

“Como tu es?” Elisenda ia demanda. “Esce tu ia continua leje la libros cual nos ia trova?”

“No, ma me debe raconta a vos lo cual ia aveni ier.”

Pos raconta tota, la amis ia es surprendeda.

“Donce lo es vera,” Irati ia dise.

“Ma cual es importante,” Luca ia comensa demanda, “esce la franses ia es bela o no?”

“Si, esce el ia es bela?” Eneko ia ajunta.

“Esce esta informa es importante?” Irati e Itxaso ia demanda, regardante la du xicos.

“No…, no…” los ia dise. “Lo ia es un broma.”

“Me no gusta esta,” Joan ia dise. “Acel fem ia es rica e el ave potia per atenta cualce cosa, an per atenta mata nos.”

“Me no crede ce acel va aveni,” Elisenda ia ajunta.

“Lo ia aveni ja cuando on ia trova ce Joan es la eritor de la marci,” Eneko ia dise.

“Lo es vera,” Luca ia ajunta. “On debe es multe cauta.”

“Me ia pensa,” Eneko ia dise. “Oji es un dia bela, multe calda. Perce no nos ta vade a la lago?”

“Lo es un bon idea,” Luca ia ajunta.

“Si!” Elisenda ia dise.

La ses amis ia prepara la vestes de nada, la telas de bani e la sandaletas, e los ia vade a la lago. Ma – un tal surprende! – Brigitte ia es ala, baninte su sol.

“Esce el es la franses de ci tu ia parla?” Luca ia demanda.

“Si,” Joan ia responde.

“Si el vole fura tu, me va intercambia me per tu,” Eneko ia ajunta.

“Clui tua bocon!” Itxaso e Irati ia dise.

El ia porta un bicini de Emilio Pucci, sandaletas de Balenciaga, e oculos de sol de Dolce & Gabbana.

“Acel fem es multe rica,” Elisenda ia comenta.

“Tan rica como bela,” Luca ia ajunta.

“El no es taaan bela,” Itxaso ia dise.

“Lo es vera,” Joan ia comenta. “Me no crede ce el es tan bela.”

“Si, si, nun es tan bela como Elisenda,” Eneko ia ajunta, sarcasmosa.

“Esata,” ia es la responde de Joan.

La ses amis ia deside vade distante de acel fem, e los ia oblida el. Pos un ora, el ia desapare. La ses ia reveni a la vileta, do los ia duxi, ia fa la come de sera, e ia reuni per parla.

“Si el es ancora asi, el es conspirante,” Itxaso ia dise.

“Probable,” Joan ia ajunta, “ma me no sabe cual cosa.”

“Cual nos pote fa doman?” Luca ia dise.

“Esce vos vole vade a la castel?” Irati ia dise. “Aora la Baron no es ala.” E la otras ia rie.

“Si, lo es un bon idea.”

“Doman temprana,” Elisenda ia ajunta.

“Asta doman!” Joan ia dise.

“Asta doman,” ia es la responde de la otras.

---

Elisenda ia vade a la casa de Joan car tota la amis ia es espetante el. Joan ia ariva nunca tarda, e esta ia preocupa el. Elisenda ia bateta la porte, ma ia reseta no responde. El ia abri lo e ia entra en la casa. Nun ia es ala. El ia core a la plaza per trova sua amis. “No Joan e no sua avo es ala,” el ia dise.

“Ta ce nos vade a la polisia,” Eneko ia dise. E pos lasa sua bolsones en la casa de Joan (car lo ia es la plu prosima a la plaza), los ia vade con sua bisicles a la ofisia munisipal, do la maior ia es.

Pos oia la raconta de lo cual ia aveni, la major ia telefoni a la polisia, ci ia envia un auto con du polisiores a do la xicos ia es.

“E cuando vos ia vide el a la ves ultima?” un polisior ia demanda.

“Ier a la note,” Elisenda ia dise.

“No ansia,” la polisiores ia dise. “Nos va comensa un xerca per trova los.”

La polisiores ia vade e la xicos ia resta, estra la ofisia de site.

“E si la fem ia saisi los?” Eneko ia demanda.

“Esta no es un momento per broma,” Luca ia dise.

“A esta ves, lo no es un broma.” Eneko ia continua. “Cual otra esplica tu trova?”

La silentia de la otras ia mostra sua acorda con la idea.

“Bon,” Elisenda ia dise, “la Club de la Marcia ave ja un mision nova.”