Capitol 6

Joan ia velia e ia vide ce el es en la castel de Baron LaForesta. Brigitte ia es ala, parlante en franses per sua telefoneta.

“Cual tu ia fa, fia de —” el ia comensa dise.

“Atende tua vocabulo,” Brigitte ia responde, “o me va debe instrui tu como on parla con un dama.”

“Me vide no dama,” Joan ia responde.

Brigitte ia palmi el en la fas.

Joan ia regarda el. “Tu no sabe cual tu ia fa,” el ia dise. “Tu pote comensa prea ce la polisia va trova tu ante mea amis, car nos no va telefoni la polisia a esta ves.”

“O, me es asustada,” Brigitte ia dise, burlante. “Alga xicos de un vileta perdeda es xercante me.”

“Tu rie aora, car plu tarda, tu va recorda tua parolas,” Joan ia ajunta.

“Tu pote fini con tota esta, Joan,” el ia dise, prosiminte a el. “Tu debe sola suscrive la documento en cual tu sede la marcia a me.”

“A tua madre, fia de…”

A un plu ves Brigitte ia palmi el en la fas.

“Respeta mama, oce?” el ia dise.

Joan ia sputa sangue a la solo.

“Me fa pilates a cada semana,” el ia dise. “Lo va es plu bon si tu condui bon.”

“Me espera ce tu va reseta como tu merita cuando mea amis veni,” Joan ia ajunta.

“Me va lasa tu a pensa sur tua suscrive,” el ia dise, sortinte de la salon do Joan e sua avo ia es secuestrada.

“Un tal colpa!” Joan ia pensa. “Me espera ce los veni temprana: los va vole ancora reconose mea fas.”

---

“Clar el es en la vileta,” Elisenda ia dise, “car el desira la propria, e per oteni lo el debe mostra la documentos suscriveda par Joan en la ofisia de site.”

“La vileta es tro peti per asconde du persones…” Luca ia dise. “On nesesa alga cosa plu grande ca un casa.”

“Si,” Eneko ia ajunta sarcasmosa, “un castel o alga cosa simil, no?”

La fas de Elisenda ia brilia: “Eneko!, tu ia trova la solve! Los es en la castel!”

“A… si…” Eneko ia ajunta. “Como me ia dise…”

“Ta ce nos vade ala!” Elisenda ia dise.

“Per es denova secuestrada par un franses,” Irati ia dise.

“Vos du debe vade a la ofisia munisipal per dise a la maior do es Joan e sua avo.”

“Si,” Irati e Itxaso ia responde simultan.

“Nos tre, a la castel!” Elisenda ia dise, e la tre ia comensa vade en dirije a acel loca.

---

“Joan, perce tu desira la marcia?” Brigitte ia dise. “Lo va ave no valua per tu si tu va es mor.”

“Sin mea suscrive, tu no pote ave lo. Con mea suscrive, tu no nesesa me e tu va pote mata me. Par esta causa me no suscrive lo, e car me no vole,” Joan ia dise.

“Lo pare ce tu gusta mea bates,” Brigitte ia responde.

“Si, me crede ce me ave alga cosa con tua bates de me, me no sabe cual lo es,” Joan ia dise riente.

“Tu no vole jua con me, turbosa,” Brigitte ia dise, e el ia bate Joan en la fas denova.

“Esce tu ave alga cosa per dise?” el ia demanda.

Joan ia comensa rie, revelante sua dentes plen de sangue.

“Cual cosa?” Brigitte ia demanda.

Joan ia sputa a el en la fas e ia dise: “Pardona, normal mea sangue es azul – lo aveni a la marcis, tu sabe?” e el ia comensa rie.

“Esta persones de vileta, foles stupida!” Brigitte ia cria, e el ia lasa Joan ala.