Capitol 2

La cuatro amis ia prosimi a la cava.

“A do lo ta gida?” Eneko ia demanda.

“Cisa a un rena misteriosa…” Luca ia dise con vose oscur.

“Silenti,” Irati ia dise. “Como lo va gida a un rena misteriosa? La cava ia es ascondeda par la lago.”

“Lo pote ave un tesoro…” Eneko ia ajunta.

“Clar, un tesoro ascondeda de la eda medieval, cual nun ia trova car lo es ascondeda en la profondia de un presipe, de un canion, de un abiso…” Joan ia dise, sarcasmosa riente. Ma pos dise lo, sua fas ia deveni blanca.

Asustada, Elisenda ia prosimi a el. “Cual aveni?” el ia demanda a Joan.

“Nos debe reveni a la vileta,” Joan ia dise. “Me ia recorda alga cosa.”

“Esce on pote come a ante?” Irati ia dise.

“Si, evidente,” Joan ia dise, sortinte de sua pensas.

---

Cuando los ia reveni a la vileta, Joan ia vade direta per parla con sua avo. “Avo,” el ia cria cuando el ia entra en la casa. “Avo, do tu es?”

“Asi, en la cosina,” el ia responde. “E no cria. La casa no es tan multe grande.”

“Avo, me ia recorda ce tu, a un ves, ia parla a me sur un tesoro cual ia es en la abiso prosima a la vileta.”

“Cual tu ave en tua mente?” la avo ia demanda. “Esce tu vole vade a la abiso?”

“No…”

“Joan, me proibi tu de vade a la abiso. Lo es multe perilosa.”

“No, avo, me no va vade ala,” el ia dise.

“Serta?” la avo ia demanda. Sua fas ia ave un espresa grave.

“Serta,” Joan ia responde. El no ia vole preocupa sua avo.

“Bon, la lejenda dise ce pos cuando nosa familia, la familia Tardavenida, ia veni a la Vileta de la Marci, los no ia es multe bonvenida par la abitores. Ma, cuando los ia es atacada, un lampo ia colpa la solo e la abiso ia apare. La abitores de la vileta ia pensa ce lo es un sinia de Dio, avertinte los contra sua mal condui. Grasias a esta, nosa familia ia pote resta en la vileta, ma nos ia debe abita en la parte la plu esterna.”

“Esce tu dise ce la abiso ia apare par causa de un lampo?” Joan ia dise, nonconvinseda.

“Esta es lo cual la lejenda dise,” la avo ia responde. “Me no sabe ce lo es vera.”

“Oce,” Joan ia dise, e el ia senta per come la porco rostada cual sua avo ia prepara ja.