Capitol 1

Acel estate ia es multe calda. Joan ia sorti de la casa de sua avo, e ia vade a la casa de Elisenda. Cuando el ia ariva, el ia bateta la porte e el ia abri lo, lansante se a la brasos de Joan. “Final me pote revide tu!” Elisenda ia dise.

“Final,” Joan ia responde, e ia abrasa el.

“Esce tu sabe do la otras es?” Elisenda ia demanda.

“No, me ia ariva ier a la note, e tu es la person prima ci me visita, en ajunta a mea avo.”

“Me ia espeta no otra cosa,” Elisenda ia responde.

Ambos ia vade a la fonte e a la bancas en la sentro de la vileta, do Irati e Itxaso ia senta.

“Alo,” Irati ia dise, salutante con sua mano.

“Alo, xicas,” Elisenda ia responde en cuando el e Joan ia prosimi a los.

“Esce vos ia encontra Luca e Eneko?” Itxaso ia demanda.

“Tu es multe interesada per encontra los, no?” Joan ia demanda con tono spesial.

“Silenti!” Itxaso ia dise.

En acel momento, la otra du xicos ia apare.

“Tota es asi!” Eneko ia dise.

“Alo!” Joan ia saluta e ia abrasa los.

“Como vos ia es?” Elisenda ia demanda.

“Bon, bon…” Luca ia dise. “Ma nos ia vole veni asi per un aventura nova.”

“Vos ia abitua a ave un aventura a cada estate?” Joan ia demanda.

“Si!” la otras ia dise.

“Bon…” Joan ia comensa dise. “Me ave un proposa.”

“Cual? Cual?” Irati ia responde.

“On pote vade a la lago,” el ia dise. “Me ia vade ala a un ves e me ia trova un tesoro.”

“Me crede ce lo es un bon idea,” Elisenda ia dise.

“Esce vos vole vade ala per picnica, como un duple enamada?” Itxaso ia demanda.

“Tu es multe venjosa,” Joan ia esclama riente.

Itxaso ia surie.

“Bon,” Luca ia comensa parla, “la idea es bon. Ma me prefere no vade per sumerji, ma sola per picnica, a la min a esta ves.

“Donce, nos ave ja un projeta per fa oji,” Eneko ia ajunta.

“Cisa lo va es plu bon si nos vade a la ora ses, car a ante, lo va es tro calda,” Joan ia dise.

“E me nesesa dormeta,” Luca ia comenta.

“Donce, asta ses,” Elisenda ia dise. “On va asembla asi, e no veni tarda.”

“Si, padron,” Joan ia dise. E tota la grupo ia rie.

---

A la ora ses, la grupo ia es preparada per vade. La lago no ia es multe distante. An con la venteta, la dia ia es multe calda, e la manca de nubes no ia aida.

“Me crede ce lo es plu calda en esta anio,” Irati ia dise.

“Asoluta,” Joan ia ajunta.

La acuas turcesa e la campaneria ia saluta los. Lo ia sembla ce la tempo ia para en acel loca.

“U!” Elisenda ia comenta. “Lo es impresante!”

“Vera multe,” Luca ia ajunta.

“Ma la acua es multe plu basa ca en la anio cuando me ia veni,” Joan ia dise.

El ia regarda la lago. A ante, la campana de la campaneria ia es cuasi la sola cosa vidable, ma aora la campaneria ia protende. El ia comensa xerca un loca de picnica, ma a un lado el ia vide un cava.

“Xicos!” el ia dise. “Regarda ala.”

“Do?” Elisenda ia demanda.

“Ala,” e Joan ia indica la cava con sua dito.

“Un cava!” Irati ia dise.

“Me crede,” Luca ia comenta, “ce nos ave ja un aventura per esta estate.”