A UN SERA, UN TREN
Capitoles 1 ⋅ 2 ⋅ 3 ⋅ 4 ⋅ 5 ⋅ 6 ⋅ 7 ⋅ 8 ⋅ 9 ⋅ 10 ⋅ 11 ⋅ 12 ⋅ 13 ⋅ 14 ⋅ 15 ⋅ 16 ⋅ 17 ⋅ 18 ⋅
19 ⋅ 20 ⋅ 21 ⋅ 22 ⋅ 23 ⋅ 24 ⋅ 25 ⋅ 26 ⋅ 27 ⋅ 28 ⋅ 29 ⋅ 30 ⋅ 31 ⋅ 32 ⋅ 33
Final, me asede a un vagon de clase prima. Esta ave un coredor no media, ma ladal, bordante duples de bancas a retro de mures de vitro, sur un sola lado de la vagon.
Me persepi pronto ce, e en la compartes e en la coredor, on no ave an un raio pico de lus. An tal, ante ce me regardeta tra la porte vitrida de la compartes –, distante, a la otra fini de la vagon, me descovre algun !
La lus seral, an tan debil, sufisi revela a me un silueta a lado de un fenetra partal cluida, lo pare, car la viajor apoia ala sur sua codos. A la altia de la testa, prosima a acel, un punto incandesente brilia. Esta person fumi ! Con un spesie de joia estrema, me dirije a esta viajor veliada.
Esta om es vestida con un jacon sombre e un xapo ronda cabente con acel – un om de eda matur, ci fumi pasosa sua sigar plen en la venta, regardante tra la fenetra. El ave un barba gris. Esta om encanta me direta con sua aspeta dulse refinada, con sua sajia silente. La ansia lasa me : en me, sola la frescia, la encanta de poca a ante, con un fesur lejera, cisa, ma no desplasente; lo es la stimulante de la aventura, con la presentia securinte de esta acompanior padrin.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 maio 2024 (12:42 UTC).