A un sera, un tren – Capitol 30

Entre du dansas, la bande pausa per un momento. Val reveni a nos, con la fas focosa. El despone sua cravata e pone lo en la pox de sua jacon, oncida a la panel de lenio.

— Profesor », el declara con un sertia comica, pasante sua teleta su la colo dur de sua camisa de cual el ia abri la boton superior, « me no intende plu reparti : me diverti tan multe asi !

— Joia ! », la profesor farfulia, e el atenta vacui sua vitro. « Un dama de cor tan madrin, capelbrun como la note…

— Capelbrun ?

Me vide la gotas de suo briliante supra la labios umida de Val.

— Ma ela es blonde como la sol a lus prima, profesor, e vera joven ! » la studiante dise riente forte. Cual tu opina ? » el dise, turnante a me. Cauta, me anui, ma, vidable, esta es ancora tro difisil suportable.

Subita, nos oia como alga cosa rompente en Hernhutter. Lo orijina de sua garga, de sua peto, ma el ia pone sua testa entre manos, con la codos apoiante sur la table, el pasa sua ditos en sua capeles, intermiscante los pronto.

— Profesor, profesor ! » nos cria ambos simultan, ma el no dise plu alga parola estra – esce lo es vera un parola :

— Tut, tut, tut… », el repete sin sesa.

Nos ia freta per veni a el, nos ia prende sua braso, atentante aida el, ma como on ta pote fa ? Futil, nos regarda sua oios, sua oios bela e emosiante ; sin duta ance el vide nos, ma no cosa comprendable traversa sua labios, no plu mesaje umana es lejable sur la linias de sua fas. El resta sentante, ondante sua testa, noncomprendable, cisa sin alga sinifia. Nos ia perde el ! Cualce media per comunica con el pare nonremediable rompeda con acel om vea amable, acel erudita con cor sentosa, acel acompanior de viaja tan bon, tan valuada…