A UN SERA, UN TREN
Capitoles 1 ⋅ 2 ⋅ 3 ⋅ 4 ⋅ 5 ⋅ 6 ⋅ 7 ⋅ 8 ⋅ 9 ⋅ 10 ⋅ 11 ⋅ 12 ⋅ 13 ⋅ 14 ⋅ 15 ⋅ 16 ⋅ 17 ⋅ 18 ⋅
19 ⋅ 20 ⋅ 21 ⋅ 22 ⋅ 23 ⋅ 24 ⋅ 25 ⋅ 26 ⋅ 27 ⋅ 28 ⋅ 29 ⋅ 30 ⋅ 31 ⋅ 32 ⋅ 33
Val misca la cartas con destrosia, vadente a la servor, ci ia parti de lor table. El prende el par sua braso e forsa ce el reveni a nos. Pos esta, el pone la cartas ante el, como per convinse el ce lo es un jua onesta e no falsida, el misca los a un ves nova e pone la paceta sur la borda de nosa table.
— Esce tu ta dui lo ? Du-i ? Val spele con un vose forte, e el mostra a el como on fa.
La om pare comprende lo cual on demanda a el, car el prende un cuantia de cartes e pone esta colie peti a lado de la paceta. Val demanda alora, par jesti, ce el prende la carta prima de un de la pilas, ma no lasante ce Val vide lo.
La om, ci pare perfeta conose esta maneja, fa lo cual on desira, regarda la carta, teninte lo ascondeda en sua palma, e, prosiminte a nos, el mostra lo a Hernhutter e a me, e ance a nosa visinas e a la xica, ma preveninte ce Val vide lo.
— Repone lo sur la paceta », la studiante comanda alora, indicante a el lo cual el debe fa. La om anui con bonomia e repone la carta, sempre reversada, sur un de la pilas. Val recolie la du pilas per refa un jua completa, misca lo con zelo e repone lo sur la table.
— Acel a supra ! » el dise, levante sua dito e dirijente lo a la table.
Obedinte, la servor returna la carta prima, inclina como per loda la studiante e mostra la carta a totas : la pajo de spada !
— Lodas ! » Hernhutter esclama, con un tono jovenin ; e, riente, la xica e la visinas mostra sua amira.
Esce la erudita es vera sinsera o cisa la vino monta pico a sua testa, plu pos la emosias e la fatigas de esta dia strana ? Per me, an si me es nonesperta, me amira la destrosia de Val ma, ultima, lo ia es mera un truco de cual la punto xef es la reuni de la du pacetas con la carta elejeda poneda a supra.
Con destrosia, on nesesa conserva la carta a esta loca en cuando on misca la otras, donce manteni lo fisada en la palma de mano, con algas teninte lo si nesesada, en modo ce la resta de la jua ta es miscada. Me no ia controla la cosa – en pasa, la juores nunca tradi an sua trucos la plu simple –, ma en mea opina, esta truco ia es manejada tal.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 maio 2024 (12:42 UTC).