A un sera, un tren – Capitol 33

— Un curor », ela responde lenta, amable, ma sin surie an tal. Me lasa la brasos, vade a retro de un paso, palpa me.

— Tu es salvada », el dise. « Tu ia es sola xocada. Tu no es ferida… La tren…

Me no nesesa oia plu. Lo es donce vera un asidente ferovial ! Me regarda a sirca. Nos sta en un sala vasta, vidable la sala de come de un otel de campania. Ma tota es desordinada. En urjentia, on ia fa de lo un cureria.

— Grasias », me balbuta, « grasias.

Denova, me regarda el. Me reconose el : multe blonde, con oios gris perlin, con la boca corin… E sua jaca blanca, rapida mal botonida, revela la bluseta blu con stelas, la falda oscur purpur.

Nonmovente, sua regarda sta fisada a me. Me forsa devia mea oios. Prosima a nos de alga pasos, algun senta en un sejon. Me core a el.

— Hernhutter », me esclama, « profesor !

Le vea aspeta misera, ma sua regarda surie. Con sua manos vacua, el jesti alga enfantin.

— Meccano ! Meccano ! » el xuxa.

Me ave la cor plen de larmas. La om ne leva. La curor pone un mano pasinte sur sua spala.

— Cuieti, padre peti », el dise, « veni…

E elo anui, sedente, e comensa rie misteriosa, como un povre misera.

Me turna, suspirante profonda. Como un automata me sorti de la sala acompaniada par la curor, a lado de portaferidas e letos pliable do feridas jemi, curada par omes e femes vestida blanca.

A la sorti, la mores es ordinada, reposante sur portaferidas o sur solo, algas, sin duta la plu mutilada, covreda con un tela o un covre de leto. La otras presenta sola feris esterna lejera, ma cuasi totas ave ancora a fondo de sua orbitas alga sangue no tota coagulada.

Direta, me reconose Val. El dormi, con oios abrida.

— Val », me murmura en un sanglota, « mea frate peti…

Nonmortal bela, el reposa ala, con linias de fas tan fina, tan amable, ancora con en sua oios esta claria cual, aora, es de un cristal valuosa. El no porta alga trasa de sangue, estra cisa, un gota, como un perla sur la pelos joven a supra de sua labio.

Con la respira impedida, me inclina supra el. E alora, sur la solo, me nota la cartas de jua cual ia debe lisca de sua pox. Los es totas reversada, estra un sola : la dama de cor !

Jeminte, me colie la carta. Stante a la otra lado de la portaferida, la curor segue cada de mea moves con un regarda grave. Lenta, me mostra a ela la carta. Sua oios brilia, ma el no jesti e resta muda.

Lenta, el estende la mano, prende la carta e lisca lo su la camisa, sur la cor de la studiante.

— Esce acel mor separa o uni nos ? » me demanda a me alora, en un demanda sin fondo.

Ma la curor simple dise a me :

— Esce lo no ta es la momento per telegrafi a casa ? », e sua regarda resta nonespresante.

Me tardi per un instante ultima. Final, rijida como un pupa de lenio, ma per sempre ferida, me turna e vade a via.