A UN SERA, UN TREN
Capitoles 1 ⋅ 2 ⋅ 3 ⋅ 4 ⋅ 5 ⋅ 6 ⋅ 7 ⋅ 8 ⋅ 9 ⋅ 10 ⋅ 11 ⋅ 12 ⋅ 13 ⋅ 14 ⋅ 15 ⋅ 16 ⋅ 17 ⋅ 18 ⋅
19 ⋅ 20 ⋅ 21 ⋅ 22 ⋅ 23 ⋅ 24 ⋅ 25 ⋅ 26 ⋅ 27 ⋅ 28 ⋅ 29 ⋅ 30 ⋅ 31 ⋅ 32 ⋅ 33
— Sin duta, tu teme ce on ansia, a tua casa ? » mea visina demanda.
Me inisia un surie.
— O, no : la enfantes es a leto de longa, e mea sposa es, per dise tal, un camerada. El comprende perfeta ce me tardi, a veses, con colegas, en lor casas o a otra locas. Car me es pico un scrivor, en alga modo. Tu permete ce me presenta me a tu ?
— Con plaser », la senior dise, cuando me ia nomi me, e el presa manos con me. « Me es profesor de universia, jubilada. Me nomi Hernhutter.
Un erudita, me ia ta divina lo ! Serta, esta senior vea no ta pote es otra. E acel nom cabe a el merveliosa. Me no ia comprende pronto perce me pare oia ja lo. Plu tarda, esta ia reveni en mea memoria : Herrnhut, a Opper-Lausitz, do la ‘Frates moravsce’, en la sentenio 15, ia trova refuja en 1722 en la tera de la conte von Zinzendorf…
Acel hernhutteres ia es cristianes amable, con cor simple ; los ia valua multe la puria de sua vive plu ca la susede e la talento. Los ci ia viole sua regulas ia es reproxada con compatia, ante ce lo es escluida de la come seral e de la comunia. La martiri de Jan Hus, mor en 1415 a pira, ia es selebrada par los como un dia de festa formal.
La mori de lor propre membros ia es anunsiada de sur la tore con sona de trompas. Los no ia es en dol e trae la corpos de sua mores en un caxon pintida con colores vivosa, asta la semetero amirable decorada. A la matina de Pascua, tota de los reuni en esta loca ultima, afin los joia en la espera de la revive. Plu tarda, la Frates ia fundi ance un congrega a Zeist, e en la vilas la plu distante de la continente european, e sua misionores ia penetra en tota la partes de la mundo, en Africa, India, Australia, an en Tibet…
La profesor Hernhutter… ‘la proteje de la Senior’ ! Plu me vei, plu me es serta ce cadun de nos ave la nom cual el merita. (Regretable, me no ia susede esplica la etimolojia vera de la mea.)
E, denova, esta nom indica a me la este – la Boemia, e sua portes de oro a dirije de la Levante – como si, vera, tota la mervelias e tota la miracles ta debe veni a nos de ala.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 16 maio 2024 (21:09 UTC).