Vici nova

La servador cual ospita esta vici es lenta e noncapas. En febrero 2026 nosa contrata va fini, e me intende move a un ospiteria plu bon. Me labora aora per prepara un sistem nova de vici cual sasia esata la desiras de nosa comunia.

Taxes xef

✓ Sistem de securia: crea de contas nova; nomes de usor; parolas secreta; reinisia de parola secreta par un lia spesial enviada par eposta; niveles de permetes; usores va nesesa un conta an per leje la vici, car cuasi tota la contenida va es automata publicida estra la vici
- ✓ Me veni de dejeta completa mea atenta prima a la sistem de securia e rescrive lo en modo multe plu clar e simple. Aora la sistem no nesesa sabe nosa adirijes de eposta. Cualcun pote crea un conta: on debe mera responde a du demandas acaso elejeda sur la vocabulo de elefen, per indica ce (probable) on es un elefeniste. Un usor nova pote fa no plu ca posta en la foro de bonveni, presentante se e solisitante plu permetes. E si algun oblida sua clave, el pote simple crea un conta tempora e demanda per aida en acel mesma foro: un manejor de la vici pote sutrae la conta vea, permetente ce la person recrea lo. — Simon 2025/07/05 19:40
✓ Desinia de vicitesto nova, fundida sur lo de DokuWiki
✓ Sistem per edita pajes, con un spelador e un previde dinamical de la resulta; asede esta editador par un boton sur la paje normal
- ✓ La editador nova es aora final capas de fisa la testo! Me ia crea ance un editador simple, simil a lo cual nos usa en la vici presente. Me ia scrive ance la codigo nesesada per paneles flotante: per esemplo, cuando on fisa un paje, un tal panel apare afin on tape ala un resoma de la cambias. E me ia spende tempo (tro multe!) per developa un bara de botones cual aspeta bon sin depende de la largia de la scermo – pe. lo es fasil usable en telefonetas. — Simon 2025/08/15 17:56
- ✓ Aora la editador pote edita partes individua de pajes. Me ia ajunta ance un boton per previde la paje intera cuando on edita sola un parte, e un otra boton per envia la previde tra la servador (alora cosas pesosa como videos e matematica opera como estra la editador – los carga tro lenta per la previde instante cuando on tape). On ave aora un panel con la numeros de la linia e colona corente en la editador; ala un icon de averti apare si on ia fa no ativia tra 15 minutos e un otra usor ia comensa edita la mesma paje (o parte de paje). E me ia fa alga bonis a la banco de datos (usores, sesiones, semafores de edita, etc) per no confusa lo si du o plu usores atenta scrive a lo a la mesma momento. — Simon 2025/08/19 17:21
- ✓ Oji me ia ajunta du cosas usosa a la editador: un sistem de xerca e cambia, cual Mixel ia solisita, e un modo de inserta stensiles comun, pe. un article per la disionario o un panel de naviga. — Simon 2025/08/31 18:03
- ✓ Un plu cosa usosa: cuando on edita un paje, aora cada titulo en la panel de previde ave un boton peti cual mostra acel titulo en la editador. Esta es un plu modo de sincroni la du paneles. — Simon 2025/09/01 16:24
✓ Sistem per converti la vicitesto nova a HTML per leje en la vici, e (pico diferente) per leje estra la vici en la mundo publica
- ✓ Me ia fa un rescrive completa ance de esta parte de la codigo. Aora, en loca de usa un marania de sentos de regexes complicada, lo leje la sinias de la vicitesto en ordina, grupinte los en simboles spesial e parolas comun. Esta funsiona multe plu rapida, e lo es plu fasil per proba automata. Mea paso seguente va es scrive codigo per converti cada simbol e parola a sua forma HTML – probable un paso fasil. — Simon 2025/07/16 16:08
- ✓ No tan fasil, en fato, ma mea codigo pote aora converti vicitesto a HTML. En la pasos veninte, me va ajunta esta a la editador nasente, e reali la sistem de fisa cambias. La sistem progresa bon. — Simon 2025/07/20 17:07
- ✓ Vos pote aora vide la sistem nova de leje la vicitesto, integrada en la paje de proba per la editador. Lo es multe plu rapida ca la presedente, e la spelador iniora testo cual no es scriveda en elefen, como adirijes de lias, la testo orijinal de un tradui, e parolas marcada como stranjer, como los en la linia “Linguas” en la sesion “Listas e tipografia” de la paje de proba. E aora la paje mostra se en colores oscur, si tua surfador dise ce tu prefere estas. — Simon 2025/07/22 13:21
- ✓ On pote aora indica ce un bloco de codigo conteni entradas per la disionario, si on ajunta un dupunto pos la cuatro apostrofes a la comensa ('''':). La spelador iniora la parolas en la campos cual tradui a otra linguas. Plu, la spelador marca la nom de un campo de disionario si lo no es coreta (per esemplo si on tape po: en loca de pt: per “portuges”). La campos de metadatos (#.autor etc) es ance aora marcada en modo simil. Tota de esta es vidable en la paje de proba. — Simon 2025/07/23 19:34
Sistem per converti tota pajes a la vicitesto nova
Sistem nova per publici automata la cambias a estra la vici
- Esta es aora funsionante. Afin un paje es automata publicida, on debe ajunta la comanda #.publici en la vicitesto. Esta es car si on labora gradal sur un tradui longa, probable on no ta vole publici lo ante la completi. En la semana veninte, me va atenta scrive un program per converti nosa pajes esistente a la sintatica nova, e lo va inserta #.publici en cada paje de leteratur. Me ia reali ance la comanda #.contenidas cual la vici cambia a un table (o vera un arbor) de contenidas, pd. lias a la titulos en la paje. On pote pone esta comanda a cualce loca en la paje (an a plur locas!) per eleje do la table apare. — Simon 2025/09/06 11:39
Sistem per clui pajes – e partes de pajes – contra editas cuando algun edita ja; du persones va pote edita partes diferente de la mesma paje a la mesma tempo
- Me ia reali esta sistem oji. — Simon 2025/08/17 17:44
Sistem de foro: un paje per cada tema; cada mesaje va crea un parte nova de la paje, ma esta “partes” va es presentada en modo min pesosa ca partes normal; usores comun va pote edita sua propre mesajes, o responde a cualce mesaje esistente; manejores va pote edita la paje intera; cisa on va pote marca un mesaje como editable par cualcun, pe. cuando on proposa un parola nova per la disionario, esperante ce otra persones va completi la entrada
Sistem de istoria de pajes: varias vea va es retenida e consultable per 49 dias; “cambias resente” va mostra la istoria de acel 49 dias, usante un paje per cada 7 dias; pos 49 dias sola la datas e resomas de la editas va es conservada
- Oji me ia reali la parte la plu grande de esta sistem. On pote aora vide un table de la varias vea de cualce paje, o un table de la cambias resente. Mea taxe seguente va es mostra la diferes entre cualce du varias 🙂 — Simon 2025/08/25 18:17
Sistem de mostra la diferes entre varias de un paje
- Aora on pote regarda fasil la diferes. — Simon 2025/08/26 18:29
Sistem per xerca en la vici
Sistem per maneja imajes, epubes, fixes audio e simil: estas va es tenida estra la vici, afin la pajes publica pote lia a los sin ce nos ave du copias en la servador
Sistem de preferes de usor: grandia de la leteras, grandia de la editador etc
- Me ia programi oji la funda de esta sistem. Usores pote defini sua nom de suscrive e sua zona de ora. Probable plu campos va es ajuntada en la futur. Me ia crea ance la sistem de permetes: ci pote fa cua. — Simon 2025/08/30 18:05

Un vici plu rapida

En labora oji sur la fixes de gramatica, me ia comprende subita perce nosa vici deveni riable lenta per alga secondos pos fisa un paje. La HTML de DokuWiki inclui un clama a la catalogador per nota la contenida nova de la paje. Ma nosa servador pare ave tro poca recursos per tolera esta, donce me ia sutrae acel linia de codigo. Me pensa ce nos no usa multe la xercador integrada de la vici, car la xercador de nosa corpo de testos es plu rapida e usosa per nos. — Simon 2025/05/20 16:28

La xercador de corpo es multe usosa, ma cuando me maratoni sujestas a disionario me usa multe la xercador de vici per vide si alga parola o espresa ia apareta ja en la discutes de foro. Me esta no nesesa alga corenti instante. — Marc 2025/05/20 16:59
La foros e la pajes de usor es ja incluida en la corpo, en fato. (E si alga paje no es incluida – cisa car lo asconde en un suarcivo – me pote fasil ajunta lo.) En febrero 2026, esta servador (cual es en la SUA) va ateni la fini de sua contrata, e me espera lua un servador plu rapida e potiosa en Europa. Pos la move, me intende rescrive la xercador de la corpo como simple un xercador per la vici intera. (Me ta scrive la program en un lingua min deplorable ca la sola suportada par nosa servador presente.) — Simon 2025/05/20 17:10
En fato, probable me va rescrive la xercador de corpo pos sola alga semanas. Lo va funsiona en plu o min la mesma modo como la xercador esistente: pd. tota la testo de la vici va es asemblada a ante, en un fix grande, per rapidi la xercas, e esta fix va reteni sola la parolas e no la sinias spesial de vicitesto. Me va atenta trova un modo plu clar per presenta la frases trovada. Si vos ave cualce sujestas sur cosas spesial cual vos ta vole pote fa – per esemplo modos avansada de filtri – me va bonveni oia los. — Simon 2025/05/29 10:19
Me vide ce lo es un labora grande cuando on deside cambia la forma de un parola (per esemplo, cambia ijenia a ijien causa ce on cambia par mano cada forma trovada) tra tota la vici. Esce, con esta xercador nova, on ta pote ave un funsiona cual pote cambia automata un forma a un otra tra tota la vici? — Mixel 2025/05/29 10:48
Lo es tecnical posible, ma perilosa, no? La problem xef ta es ce lo no ta sabe en cual lingua un parola es scriveda. Donce lo ta “coreti” parolas stranjer (do nos ia presenta los per compara en un discute, per esemplo), o formas como ijenia en nosa conversa resente, o formas vea en la arciveria. Un plu problem es ce la capasia de recambia tota testos par un sola colpa conteni un risca grande de desastre si on fa un maltape en spesifa la modifia desirada. On ave ance la complica de pajes cual conteni la parola cambiada en sua titulo. Con ijien me ia debe move du pajes a titulos nova. Fortunosa, la vocabulo es multe stable, e nos no debe frecuente fa tal cambias. — Simon 2025/05/29 11:04
Un otra razona per no reali un tal sistem de recambia es ce la utiles cual me scrive asi es vidable per tota la mundo, no sola per usores autenticida en la vici. Lo ta es estrema mal si cualcun ta pote visita e fa cambias acaso a nosa labora. En teoria, me ta pote aprende la metodos per scrive programetas ajuntable a DokuWiki, e usa tal sua sistem de autentici – ma esta ta consuma tro multe tempo. Si nos ta vole fa un cambia a un cuantia enorme de pajes, me ta descarga la pajes, edita los con utiles oportun en mea propre computador, e recarga los a pos. — Simon 2025/05/29 11:52
Evidente, sola tu ta pote usa un tal funsiona. On ta debe ave un direto spesial. 🙂 — Mixel 2025/05/29 15:13
Me ta pote asconde la funsiona pos un parola secreta, me suposa. Ma ancora plu fasil ta es descarga e fa cambias estralinia. — Simon 2025/05/29 15:17
Ta es usosa un lia, de la paje vici a la paje html. Me vade frecuente de la paje vici a sua paje html relatada, e reversa. Lo es fasil vade de html a vici con la lia a basa de paje (“Lo ia es automatada jenerada de la paje corespondente en la Vici de Elefen…”), e lo ta es usosa ce un lia reversada esiste sur la paje vici (“Esta paje va jenera un paje html a esta loca pos publici”). Si la paje html no esiste ancora, on ta ariva a un paje indicante alga cosa como “Esta paje no esiste ancora (o no es ancora jenerada). Publici lo a ante.” — Mixel 2025/06/03 08:42
Lo ta es usosa, ma difisil per reali, car me no controla la codigo de DokuWiki. Pos oto menses, cuando nos move a un servador plu eficas, me imajina ce nos pote abandona la sistem de publici e usa simple la vici. Orijinal nos ia ave multe pajes scriveda par Jorj, direta en HTML, estra la vici. Me ia inventa la sistem de publici la vici a HTML afin persones otra ca el e me ta pote edita acel pajes. Aora tota tal contenida esiste en la vici, en fato. Un otra problem ia es la lentia de esta servador a veses, ma me ia descovre resente ce un causa xef de acel ia es la catalogador de DokuWiki, e un servador plu bon no va sufri esta torpia. La benefica tre de pajes HTML es ce me ia pote ajunta codigo en JavaScript per permete ce lejores asconde o revela partes de la testo – ma me espera pote trova un modo de fa esta en la vici mesma. An tal, a la otra lado, si vos prefere reteni la sistem de publici, acel es an plu fasil! La dupli de la testo no ocupa multe spasio, lo es vera. (Me veni oji de descovre ce nosa servador peri cuasi 4 GB de spasio per conserva un rejistra detaliosa de visitores en la ses anios presedente. Par contrasta, nosa vici intera – testos e imajes – ocupa min ca 100 MB en soma.) — Simon 2025/06/03 09:05
En pasa, me pensa ce automatada es un ereta per automata (o, cisa, per “automatida”), en la nota “Lo ia es automatada jenerada de la paje corespondente en la Vici de Elefen…” — Mixel 2025/06/03 11:22
Esta es vera. Me pensa ce automata ia es orijinal un verbo. Me veni de coreti esta e publici tota! Ance, me ia trova un fix de 1,3 GB en la servador, conteninte mera la mesma mesaje de era a miliones de veses. La era ia es en la codigo de publici la disionario vea. Pos la repara, acel program ia continua asta sua fini e ia revela ce multe articles ia es malordinada. Me ia coreti ance los. — Simon 2025/06/03 11:59
Ma cua tu pensa en relata a tua demanda orijinal? Como tu dise, lo es alga nonoportun ce nos debe (a presente) ave cada paje en du locas, e recorda refresci la varia publica. Esce la sistem de HTML publicida ave cisa vantajes cual me ia oblida? — Simon 2025/06/03 11:59
Per me, la pajes html es usosa cuando me intende crea epub-es o pdf-es de los; ance, cuando nos ave videos Youtube en un caxa, en un paje html. — Mixel 2025/06/03 16:47
Bon puntos! Me va esperimenta e vide cua es posible. Me ave ja alga ideas 🙂 — Simon 2025/06/03 17:06
En esta periodo presente, nosa vici es surprendente ativa! Lo va nesesa es vera multe rapida! — Mixel 2025/06/04 16:21
En la fini de semana pasada, me ia crea un conta con un compania ospitante en Europa e ia fa multe esperimentas. Acel servador es multe flexable e potiosa. Lo pote publici nosa disionario en mera 5 secondos, no en 90 como en nosa servador presente. Aora me senti cuasi serta ce acel loca va deveni nosa ospiteria nova. Me esperimenta ance per vide esce me pote scrive un sistem plu simple de vici (DokuWiki es un program jigante) cual sasia esata nosa nesesas. Per esemplo, un tal sistem ta publici pajes a HTML direta pos la edita, si nos ta desira lo. E la editador ta pote conteni un spelador. E nos ta pote instante esclui robotes ci atenta visita tota pajes en un tempo tro corta. Mea pasos inisial pare prometosa. — Simon 2025/06/09 08:08
Me imajina ance ce la editador va ofre un previde dinamical: on va pote vide como la paje va aspeta sin debe clica un boton “Previde”. E me ta vole introdui un sistem plu normal de foro, tal ce nos pote posta mesajes e respondes individua sin clavi la paje intera en cuando nos tape. — Simon 2025/06/09 11:19
E nos pote ave un sintatica plu simple en loca de <WRAP orijinal> etc. — Simon 2025/06/09 18:23
Un idea veni a me: cisa lo ta es usosa ce la lejor o la usor de la vici ta pote aumenta o an redui la grandia de la leteras a vole. Algunes vide bon, algunes vide mal, e, a veses, on ta pote vole ave la totalia de un testo en la scermo. — Mixel 2025/06/10 10:21
Acel es un bon idea, notada. Me pote permete ce on eleje no sola la grandia de la leteras ma ance la nom de la tipo, en fato. — Simon 2025/06/10 11:07

Xerca-cambia

Me ta sujesta ce on ave un util per xerca-cambia un parola a un otra tra tota un paje direta en la vici (corespondente a “ctrl H” en un editador). — Mixel 2025/06/19 10:05

Grasias per un idea briliante! — Simon 2025/06/19 10:59

Lias sur imajes

Me veni de pensa a la posiblia de pone un lia sur un imaje? Per aora, lo no es posible estra sur un grupo de parolas, ma esce lo ta es fasible sur un imaje en la vici nova? — Mixel 2025/06/19 10:55

Si, me ia espeta lo. On pote fa lo ja en DokuWiki, en fato: imaje_00.jpg — Simon 2025/06/19 10:59
Lo pare no funsiona per asede a un paje html. Esemplo (la imaje ta debe apare, ma… no 🙁 : — Mixel 2025/06/19 11:23
Tu ia ave un fini de linia pos la bara vertical. La lia intera debe ocupa no plu ca un linia de vicitesto. — Simon 2025/06/19 18:28
Multe grasias per la solve! — Mixel 2025/06/19 19:25

Cualias desirable?

DokuWiki suporta “retrolias”: per cualce paje, on pote produi un lista de la pajes liante a lo. Esce cualcun de nos usa esta funsiona? Me pote programi lo, serta, ma si nos no nesesa lo, me no vole peri mea tempo. — Simon 2025/06/17 13:27

Me no usa esta funsiona. — Mixel 2025/06/17 13:51

DokuWiki suporta “avisas” enviada par eposta cuando pajes spesifada es cambiada. Esce cualcun de nos usa esta? Me espera ce no, car la ospiteria nova ave la regula ce on no pote envia plu ca 60 epostas per ora. La sistem de avisas ta risca envia tro multe epostas cuando nos ia fa un cambia tra tota la pajes de gramatica, per esemplo. Si nos nesesa un tal sistem, me va crea un varia de “cambias resente” cual mostra sola la cambias a pajes “oservada” par la usor. — Simon 2025/06/17 13:27

Sistem de foro

Esce tu intende programi de nova un sistem de foro? Me ia senti sempre ce la “foro” esistente no es tan fasil lejeda como un foro plu tradisional, pe. phpBB, MyBB etc. car on forsa un vici (edita colaborante un paje) a ata como un foro. En la sistem corente, la respondes ta pote apare acaso en partes diferente de la mesma paje, en loca de un serie cronolojial de mesajes, cisa incluinte sitas per contesto. — Isaac 2025/06/18 09:06

Me intende reali un sistem plu simil a un foro normal, ma sur la dorso de pajes de vici. Cada mesaje sur un tema va crea un “parte” nova de la paje, ma la serie de mesajes va aspeta plu como un foro comun. Cisa lo pote usa du colonas: la suscrive pote ocupa un colona streta a sinistra, e la mesaje mesma pote apare a lado en la colona xef. Esce esta pare preferable ca la sistem presente de suscrive a fini de la paragraf? (En ambos posibles, la suscrive va aveni automata. On no va nesesa tape o clica alga cosa per ajunta lo.) — Simon 2025/06/18 11:09
Un demanda importante es: esce nos vole insiste ce tota mesajes apare en serie cronolojial? Aora me gusta ce nos pote responde direta su un comenta plu temprana, sin debe repete lo en un sita. Discutes longa aspeta confusante, ma xef par causa de sua presenta como listas (o arbores) de puntos. Si un paje de foro ta ave un aspeta plu “forin”, me pensa ce la flue de mesajes ta es multe plu clar, an si alga ta es indenteda. Probable un mesaje indenteda ta reseta ance un fondo pal gris, en loca de blanca. Ma cisa nos debe permete sola un nivel de indente, per claria? — Simon 2025/06/18 11:09
Per concreti esta ideas, me va atenta crea du o tre esemplos de aspetas posible e mostra los a vos asi. — Simon 2025/06/18 11:09
Bon, asi es tre esemplos. Me prefere numero 2. La lias [↩] ta es per responde a un mesaje. — Simon 2025/06/18 14:43
1. Simil a la presenta presente
2. Du colonas, con alga respondes entretexeda – la mesajes es numerida
3. Du colonas, en ordina cronolojial – alga mesajes comensa con “@” per indica a cual mesaje los responde
4. Como Iarve sujesta
- Me gusta la esemplo 1, car lo pote indica clar la relata entre la comentas. Me gusta ance la modo de du colonas, ma lo peri spasio ce un colona es ocupada sola per mostra un titulo de usor. Esce la titulo pote apare direta ante sua comenta (sin ocupa un colona)? O esce la colona pote conteni plu informas (pe. un icon)? — Iarve 2025/06/18 15:29
- Bon, cisa como la esemplo cuatro cual me veni de crea, si? — Simon 2025/06/18 15:58
- La presenta 4 permete gania spasio en largia. Evidente, on longi pico la paje en altia. Ma sin duta la gania ~~supera~~ suprapasa la perde. On pote ance imajina un colona un plu streta en la esemplo 2. — Mixel 2025/06/18 16:15
- A cual perde tu refere? — Simon 2025/06/18 16:57
  - Lo ia es sola un espresa per dise ce la vantaje (linia plu longa) es superior a la nonvantaje (paje lejera plu longa). Me balansi entre la du esemplos. Me gusta la du itemes. La idea de Isaac (pronto a su) consernante la icones de usor es plasente, ance. — Mixel 2025/06/18 18:24
  - Me ta pote permete usores a eleje sua largia de paje prefereda, si la spasio perida a la lados de la scermo disturba tu. — Simon 2025/06/18 18:50
- Me gusta esemplo 4. Me vide aora ce ordina cronolojial nesesa multe sitas per es min confusante. Ma si tu va ajunta un icon de usor, alora esemplo 2 ta conveni plu. — Isaac 2025/06/18 17:07
- Me acorda ce 4 es multe bon. De do la icones va veni? E si me ajunta los, mesajes corta va ocupa plu spasio sur la scermo. — Simon 2025/06/18 18:11
- Lo ta es bon ce usores pote deside cual modo los vole, me opina. — Iarve 2025/06/19 01:59
- Probable un bon idea. Inisial, me va segue la esemplo 4 (plu o min). Cuando la projeta es plu avansada, e lo es plu clar como la sistem de preferes de usores va funsiona, me va ajunta 2 per alternativa. — Simon 2025/06/19 06:38

Un plu demanda relatada es: esce nos vole reteni la posible de envia mesajes en pajes estra la foro, pe. en pajes de usor? En la foro, cada tema va ave sua propre paje, ma a presente nosa pajes de usor tende cumula un lista de discutes diversa. Plu, cuando un usor nova demanda cua es la difere entre mesajes de foro e mesajes de usor, me no ave un responde forte. On ave no razona tecnical contra permete un mesajeria peti a basa de cualce paje, ma me sujesta ce nos limita esta funsiona a la foro, a la min inisial. Si nos trova un bon motiva per lo en alga otra loca, me va pote reali lo ala. — Simon 2025/06/18 16:57

Me prefere limita mesajes a la foro. Cisa un paje de usor ta permete envia mesajes privata, como en alga otra foros. Ma me pensa ce la foro ta debe es la loca de discutes publica. — Isaac 2025/06/18 17:26
Me pensa ce on no nesesa un paje spesial “usor”, ma ce, en la foro mesma, cada usor ave un paje dedicada a el, do el presenta se, con sua motivas e sua creadas, e do on pote entra en relata con el. — Mixel 2025/06/18 17:59
Ma cua va aveni cuando un tal paje deveni multe longa? Me no intende permete ce pajes en la foro conteni partes titulida. A presente la pajes de usor es bon locas per cosas personal. Alga usores ave plu pajes su sua nom de usor: tu mesma, per esemplo, ave un tal paje listante tua multe traduis e creadas, e tua paje de usor conteni un presenta bela de tua albumes audio e alga otra partes. Estas no conveni a la foro. Donce me pensa ce la pajes de usor debe resta. Serta me no intende dejeta cualce pajes esistente – tota va transfere a la vici nova. A pos, nos va pote fa un reorganiza, si nos vole. — Simon 2025/06/18 18:04
Alora, la pajes de usor pote es simple pajes de presenta, sin nesesa vera de mesajes. Perce no? — Mixel 2025/06/18 18:24
Si, esta pare la via la plu bon. — Simon 2025/06/18 18:50

@Simon, como tu imajina la paje xef de “foro”? Esce lo va mostra la refrescis de temas o esce la “cambias resente” va continua servi per acel? — Marc 2025/06/22 15:43

Serta la postas de foro va apare en “cambias resente”, car los es ance editas de vici. A presente on pote filtri “cambias resente” tal ce lo mostra sola la postas de foro, e esta va continua es posible, car perce no? Me imajina ce la paje xef de la foro mesma va lista la temas la plu resente, en ordina desendente de ativia. Cisa cada tema en la lista va mostra cuanto postas lo conteni, la nom de la usor ci ia inisia lo, e la nom de la envior de la mesaje la plu nova. Per xerca en la foro, me va estende la xercador cual me ia scrive resente afin lo pote considera sola esta o acel ramo (pe. “leteratur” o “foro”). Xercante en la foro, cisa nos ta vole filtri postas ance par lor enviores. Me intende numeri la temas de la foro, en loca de nomi los longo la titulos, car titulos en la foro pote es alga longa, e titulos corta risca colide entre se. Ma me pensa ce “cambias resente” e la paje xef de la foro va pote mostra titulos en loca de (o en ajunta a) numeros de temas. E nos va pote cambia la titulo de un paje de foro si lo vaga rapida a via de sua tema inisial. — Simon 2025/06/22 16:00
- Si la idea persiste, un desirable de me: esce acel paje xef ta pote mostra cuando algun ia scrive @<mea_nom> en un posta o comenta - tal ce me sabe, algun nesesa mea responde? — Marc 2025/06/22 16:29
- Me va debe pensa. Como la vici ta sabe esce tu ia responde ja? Me no vole manteni un banco de datos con detalias complicada sur cada mesaje e responde. Ma… cuando on posta a la foro, on va ave un campo de resoma, como usual asi. On va pote lasa lo vacua, spesial si la posta es multe corta o mera un broma o simil. En temas longa, la resoma va pote aida otras a sabe a cual parte de la tema on ia responde, como ja en nosa discutes asi. Me mensiona esta car me pensa ce nos pote estende la sistem de [?] e [!] per inclui ance [@nom]. Poi “cambias resente” e la paje xef de la foro ta pote dona un asentua spesial a tal postas per sola la usor indicada. Bon? — Simon 2025/06/22 16:58
- Me comprende….. hmm….. Alga parte de mea mente no gusta la idea de [@nom] en resomas, ma cisa lo es un solve cui bonia me no vide ancora. Un otra idea (A): mostra sempre ce la @nom de algun es en la testo ala e no reteni/calcula esce el ia vide o responde (la caso de usa - me vole simple sabe ce me es mensionada). Un idea savaje (B): un marca de vici @nom va aspeta a me como un caxa de aproba, cual me pote clica, marcante ce me ia vide lo, per cambia acel a @ ✓ nom, desativante la avisa sur la paje xef. Pensas? — Marc 2025/06/22 18:03
- Nos no va nesesa tape [@nom] en la resoma: la sistem pote ajunta esta cuando nos posta un mesaje, detetante cualce @nom en la posta. (Lo va es oportun si nosa nomes de usor en la vici nova es corta…) Tua idea savaje es briliante: acel boton de aproba pote apare (per la usor consernada) en la mesaje mesma, e ance en la paje xef de la foro e en la cambias resente. Cuando tu clica la boton, acel paje de foro va es instante refisada con @✓nom en sua vicitesto, ma sin ajunta un entrada a la cambias resente. Ma a pos, la cambias resente no va atrae plu tua atende a acel posta. Eselente. — Simon 2025/06/22 18:33
Un otra demanda interesante es esce nos vole importa la pajes cual esiste ja en la ramo “foro”. Un program ta pote relativa fasil leje cada paje, estrae la temas e reorganiza la arbores de puntos longo la sintatica de postas en la vicitesto nova. En casos rara, esta program ta encontra puntos sin suscrive, ma la sintatica de postas pote tolera la manca de un nom de usor. Me ta pote spende un ora o du per regarda tra la pajes esistente (los es longa, ma no vera multe) per normali cualce formatos nonusual cual dormi ala. La alternativa es simple ce nos move la ramo “foro” a “foro_vea” o simil, per arcivi lo. Ma nos ta pote inclui ance la contenida de la arciveria e poi cisa on ta pote trova plu fasil discutes e desides antica. — Simon 2025/06/22 16:00
- Franca, no sabe. Tal discutes es multe interesante de leje, ma on ta trova los ance tra la xerca. La sola persones ci ta vole acel inclui de postas vea es necro-postores volente revive la discutes vea. (Me imajina deveni a alga veses un tal person.) — Marc 2025/06/22 16:29
- Ave los en la foro ta dona a la foro un aspeta plu impresante, un loca con multe istoria 🙂 Ma clar esta no es la taxe la plu importante a esta momento. — Simon 2025/06/22 16:58

Discute de leteratur

La Vicipedia ave “pajes de discute” do on metadiscute la sujeto. Me ia ta desira ce lo esiste per nosa obras leteratural. Ma me no es serta sur sua reali concreta. Como si la obra mesma ave plur pajes - esce lo va nesesa plur “discutes”? O esce nosa “foro” va sufisi? — Marc 2025/06/21 06:14

Vicipedia ave plur spasios de nom, tal ce on pote ave un paje con la mesma nom en la spasio xef e en la spasio per discutes. Acel es plu complicada ca me ta desira. Tu indica ja la problem de obras cual ave plur pajes. E cua ta aveni si on move un paje? Donce me pensa ce la foro sufisi. Si un paje de foro lia a un obra, un lejor de la obra pote usa la sistem de retrolias per trova la discute – esta es un bon motiva per ave un tal sistem, en fato. (La retrolias va funsiona sola en la vici, no en la pajes HTML publicida. Ma esta es oce. Me suposa ce nos no vole publici nosa foro.) — Simon 2025/06/21 07:25
Nos pote permete ce cualce paje conteni alga lias “ascondeda” a pajes relatada. Esta lias no va formi un parte de la presenta normal de la paje, ma la interfas de la vici pote ave un boton per revela los en un panel spesial. Tal, un paje de leteratur pote lia a un o plu pajes de foro do on ia discute la obra, ma esta lias no va contamina la aspeta normal de la paje. Me sujesta usa un bloco de clase “relatada” per esta:

= Capitol 1

"Txa, fandango!" -- ia cexeta Auchoux ...

...

...

:::: relatada
  * [[/foro/1357|Ordina de sujeto e ojeto]]
  * [[/foro/1364|Festa e festi]]
::::

Cisa la solve. Nosa vici-tiquette ta debe permete otra usores a inserta tal relatadas a literatur de alga autor. — Marc 2025/06/22 06:28
Si. Lo es un tipo de maneja de casa, mera. — Simon 2025/06/22 06:34

La reatas

Me ia desgusta prima “reatas” cuando on ia introdui los a la mundo de conversas de interede, ma pos alga tempo mea aseta ia crese. A veses un “suriente” (smiley?) simple es plu lejera e spasial frugal. Esce los merita es ance en la foro? — Marc 2025/06/21 06:14

La demanda grande es como on va representa esta en vicitesto? Lo ta pare nesesa linias spesial su la titulo de cada mesaje cisa tal:

· · ◁ 1 ▷

simon 2025-06-14 13:55

@ :) marc
@ :( gusta_nunca

  * Ma alora on no ta pote "reata" a un mesaje si la autor ta es ancora editante lo. Me ta prefere la simplia de responde enviante un mesaje cual conteni sola un emoji. Nos ta pote ave un pico de botones en la titulo de cada mesaje, per posta emojis comun. --- //[[xef|Simon]] 2025/06/21 07:36//

=== Proba la editador

Me ia crea [[:lfn:/simon/vicinova/editador.html|un paje]] con un editador, un spelador integrada e un previde dinamical. La testo inisial mostra cuasi tota la posibles de la vicitesto nova. Per favore, esplora e dise esce vos gusta lo. Dise spesial si vos trova alga cosa cual no pare funsiona bon. Evidente on no pote fisa la paje, car la resta de la sistem ancora no esiste. Nos es en la dias temprana! --- //[[xef|Simon]] 2025/06/21 12:02//
  * Stonante! (La nesesa de presa constante un matajoin per vide lo es alga problem peti sur aparatos tocable car un dito va asconde lo...) --- //[[/usores/$o_gurevitx/xef|Marc]] 2025/06/21 12:58//
    * Acordada. Estra la editador (o en la HTML publicida), me intende organiza tal ce la matajoia resta revelada pos la toca o clica inisial. Ma acel es pico difisil per reali en un previde dinamical. --- //[[xef|Simon]] 2025/06/21 13:08//
    * Pos plu pensa, me ia trova un modo fasil per reali lo an en la previde -- proba aora. --- //[[xef|Simon]] 2025/06/21 14:15//
    * Lo labora! --- //[[/usores/$o_gurevitx/xef|Marc]] 2025/06/21 14:24//
  * Me no sabe la razona, ma cuando me entra a la paje, lo permane cargante e no boton funsiona. --- //[[/usores/$/xef|Iarve]] 2025/06/21 15:12//
    * Strana. Lo sona como si la program ia encontra un era e ia colasa, ante ateni la fini de sua codigo inisiante. Cual surfador tu usa? Si tu es a un computador vera (no un telefoneta o tabletin), proba trova un mesaje de era en la consol -- toca ''F12'' o ''Ctrl-Shift-J'' o ''Ctrl-Option-J'', e regarda su la oreta "Consol". --- //[[xef|Simon]] 2025/06/21 15:20//
    * O cisa JavaScript es descomutada en tua surfador per elefen.org? Me intende ultima ofre ance un editador multe simple cual va funsiona bon sin JavaScript, ma la paje de proba nesesa lo. --- //[[xef|Simon]] 2025/06/21 15:31//
  * La alinia de suscives de foro a destra no pare vera comfortosa a mea oio (sola me?). --- //[[/usores/$o_gurevitx/xef|Marc]] 2025/06/21 17:38//
    * O! Me ia prefere lo. Ma per esperimenta, los es aora aliniada a sinistra. Tu prefere tal? La mesajes pare min fasil scanable aora, car la suscrives e la mesajes mesma es miscada con lunlotra. Un otra idea ta es dona un otra color fondal a la suscrive. --- //[[xef|Simon]] 2025/06/21 17:55//
    * Me ia gusta la suscrives a lado sinistra car lo aspeta plu foro-in. Denova, sola me, amis? --- //[[/usores/$o_gurevitx/xef|Marc]] 2025/06/21 18:07//
    * ##Aora me ia repone los a destra car me opina forte ce ala los aspeta plu bon. Un otra idea ta es pone los a la //fini// de la mesaje, aliniada a destra.## Ance, me veni de refa la presenta. Aora lo usa la scermo intera. --- //[[xef|Simon]] 2025/06/21 19:15//
    * Me ia modifia la presenta de la suscrives denova. Aora la nom de la envior e la data es a sinistra, e la numero e boton de responde es a destra. E me ia pone un linia orizonal pal gris entre la suscrive e la mesaje mesma: esta ia es la truco mancante! Pos ajunta lo, la alinia sinistra de la envior ia deveni subita multe plu asetable a me :-) --- //[[xef|Simon]] 2025/06/21 19:52//
    * Lo pare oce. --- //[[/usores/$o_gurevitx/xef|Marc]] 2025/06/21 20:14//
  * Me debe confesa ce me no comprende la sistem de acel "notas basa". Cua on gania si la nota e sua testo es separada a du marcas de vici ''[[^]]'' e ''((^))''? --- //[[/usores/$o_gurevitx/xef|Marc]] 2025/06/21 20:14//
    * On pote eleje do la nota va apare en la paje. Per esemplo, si la paje conteni plur sesiones, e cada sesion conteni alga notas, cisa la autor ta vole pone la notas de cada sesion a la fini de acel sesion. O direta pos la paragraf pertinente, car alora la lejor no nesesa salta a la basa de la paje mera per vide la nota. (Me sabe ce on pote ance pone la mus a la refere per vide la nota en un peti bara flotante, ma ance acel es alga iritante si on vole simple senta comfortosa e leje la testo.) Ma tu fa ce me repensa pico. Cisa la sistem de notas ofre tro multe posibles: con ''[[^1]]'', ''[[^2]]'', ''[[^3]]'' ... o ''[[^*]]'', ''[[^**]]'', ''[[^***]]'' on pote mesma eleje un numero o simbol per cada nota -- e probable esta no es nesesada. (Lo permete ce on ave plur referes a la mesma nota, ma esta es estrema rara en la pratica, e on ta pote solve lo en otra modos creosa.) Probable me pote simpli la posibles a sola ''[[^]]'' liante a ''((^))'' (con numeros furnida par la sistem) e ''((...))'' per notas enlinia, como en DokuWiki. E cisa la notas enlinia debe es listada a la fini de la paje (como en DokuWiki) e no direta pos la paragraf cual defini los. Cua tu pensa? --- //[[xef|Simon]] 2025/06/21 20:26//
    * Si, salta a notas basa e resalta a retro es nonjoia, me acorda lo. Cisa acel sistem nova es bon. //(Pensante a vose:)// Esce on va vole a cualce ves ce la mesma paragraf conteni ambos ''[[^XXX]]''es e ''((YYY))''es? Me demanda lo car si //no//, on ta pote scrive sempre la notas basa como ''((...))'', ma ance //"catura"// los a cualce loca con... me no sabe... ''{mostra-asi-notas-basa-presedente}''. O ''{mostra-asi-notas-basa-presedente-per-sesion mea_sesion}'' --- //[[/usores/$o_gurevitx/xef|Marc]] 2025/06/22 06:04//
    * Acel ta pote funsiona, ma lo ta complica la vive de la usor (e de la programor!). Me imajina ce un autor ta eleje o la un o la otra e ta usa lo en modo coerente tra la obra intera. Personal, me no gusta scrive notas a media de paragrafes de vicitesto -- la resulta es alga difisil per leje, como si du paragrafes separada ia colide. Referes a notas es plu simil a lias en mea opina. Ma me vole suporta ance la sistem de ''((...))'', car cisa otra persones gusta lo, e car evidente lo es ja usada en nosa testos. --- //[[xef|Simon]] 2025/06/22 06:35//

Me amira esta labora tua! Me no ave alga comenta, car tota es ##bon## eselente per me. Un demanda pico: esce, cuando on asende o desende la paje sinistra, la paje destra va move simultan, sur la vici nova? Lo ta es bon ce on pote vide automata a destra la resulta de lo cual on ave a sinistra. --- //[[/usores/$/xef|Mixel]] 2025/06/22 08:55//
  * La mesma pensa ia veni ance a me. Ma lo es difisil per reali. La testo en la panel sinistra es simple testo, sin marcas interna cual la surfador ta pote usa per sincroni la du paneles. Me usa frecuente un otra program cual sincroni sua du paneles, e lo es multe iritante cuando me vole rapida rola un de la paneles a supra o a su per regarda alga cosa per sola un momento. Ma cisa me pote suporta ce un clica a un titulo en la panel destra fa ce la loca corespondente apare en la panel sinistra. Jeneral on va vole trova sua loca per edita par rola la panel destra, car en acel panel on reconose plu fasil do on es. --- //[[xef|Simon]] 2025/06/22 10:37//
  * Me veni de ajunta un boton "Sincroni". Si on eleje lo e rola la panel destra, la panel sinistra va rola acompaniante lo. (Ma no la inversa. La paneles ta entra a un batalia nonsesante si cada de los ta pote rola la otra.) La sincroni prende la proportio de la rola de la panel destra e copia lo a la panel sinistra. En multe pajes, esta va sufisi, me pensa. La paje de proba ave un table en cual cada selula ocupa sua propre linia de vicitesto, e donce la proportios no es egal entre sua du paneles. Ma clica la boton "Casa de Usor" per carga acel obra en la editador, e alora la sincroni funsiona asetable bon, me pensa. --- //[[xef|Simon]] 2025/06/22 12:53//
    * Fresca! --- //[[/usores/$o_gurevitx/xef|Marc]] 2025/06/22 13:10//
  * Aora la boton "Sincroni" ofre tre posibles: no sincroni, sincroni de destra a sinistra, e sincroni de sinistra a destra. --- //[[xef|Simon]] 2025/06/22 16:57//
  * Lo funsiona bon! Merveliosa! --- //[[/usores/$/xef|Mixel]] 2025/06/22 17:15//

Esce lo ta es posible ave un ''-'' //ifen dependente// ([en] //soft hyphen// [fr] //trait d'union conditionnel//), per indica un loca de divide spesifada en un parola? Acel no apare cuando la parola es en curso de linia, ma sola cuando la parola nesesa es divideda en caso de fini de linia. --- //[[/usores/$/xef|Mixel]] 2025/06/22 09:15//
  * Serta. Me veni de ajunta ''(_)'' per esta, como ance un esemplo en la paje de proba. Me ia eleje ''(_)'' car acel serie de sinias es ancora no usada en nosa vici. ''(-)'' apare ja en multe locas, pico surprendente. --- //[[xef|Simon]] 2025/06/22 10:37//
  * @Mixel, Como tu intende usa aceles? --- //[[/usores/$o_gurevitx/xef|Marc]] 2025/06/22 11:45//
  * Cuando me suspeta ce un rejeta de un parola grande a la linia seguente va crea un linia prima tro corta, me ta prefere usa tal indica en la parola grande per divide lo a un loca spesifada, afin on ave un linia 1 coreta longa. --- //[[/usores/$/xef|Mixel]] 2025/06/22 11:58//
  * Me vole sabe **(A)** como acel ifen ta afeta la xerca de esta parola en la xercador de corpo e **(B)** como regulas de //silabi// de elefen ia ta pote aida automati acel inserta. --- //[[/usores/$o_gurevitx/xef|Marc]] 2025/06/22 12:11//
    * Lo es vera ce tal ifenes va afeta nosa capasia de xerca fasil la parola. Ma esta problem esiste ance con parolas como ''//Non//importante'' (cual apare en capitol 12 de Alisia). An tal, los es rara. Ma lo es ance vera ce la sistem cual converti la vicitesto a HTML va pote deteta parolas plu longa ca (cisa) 15 leteras e emete los con ifenes elejable longo alga regula simple. Probable un tal sistem es preferable. --- //[[xef|Simon]] 2025/06/22 12:45//
  * Lo pare a me ce a la min ifenes dependente no funsiona bon en foros, car la largia de un paje no es fisada entre fenetras con grandias diferente. --- //[[/usores/$/xef|Iarve]] 2025/06/22 12:33//
    * Tal ifenes apare sola cuando los es nesesada, per rompe un parola longa. Si par la grandia de la scermo la parola longa apare a media de sua linia, on no vide la ifen. Ma me debe dise ce la usa de tal ifenes es rara en la ueb. Me tende plu vide los en la prepara de articles per jornales primida, do la testo debe cabe a colonas alga streta. --- //[[xef|Simon]] 2025/06/22 13:17//

Lo es un idea vera multe usosa ce la spelador es integrada e marca direta la parolas nontrovable en la disionario! Lodas! --- //[[/usores/$/xef|Mixel]] 2025/06/22 10:00//
  * Grasias! --- //[[xef|Simon]] 2025/06/22 10:37//
  * Aora la spelador en la [[:lfn:/simon/vicinova/editador.html|paje de proba]] iniora linias marcada como testo orijinal (par '']'' o '']>'' a la comensa). Lo dona un color pal gris a estas, e un color pal jala a la titulos, per fasili reconose los cuando on rola la editador. --- //[[xef|Simon]] 2025/06/30 12:19//
  * Un resulta bela! Me proba esta paje con la mesma plaser ca con un jua nova. Lo funsiona multe rapida e la partes diversa es bon distinguable de lunlotra. Lodas! --- //[[/usores/$/xef|Mixel]] 2025/07/23 08:54//
  * Multe bon. Multe ia cambia ja en la mense pasada, pos mea nota a supra. Per esemplo, me ia deside ultima no dona un color spesial a titulos en la editador. --- //[[xef|Simon]] 2025/07/23 11:01//

=== sur matajoias

  * Lo pare ce matajoias no funsiona bon sur Edge per telefoneta. La contenidas es mostrada direta, sin covre. --- //[[/usores/$/xef|Iarve]] 2025/06/22 00:09//
    * Esta pare es un efeto ladal de //Dark Reader//. Me ia instala lo en Chrome e vide la mesma problem. Me va investiga. --- //[[xef|Simon]] 2025/06/22 06:32//
    * Me ia programi la matajoias en un otra modo. No tan sasiante per regarda, ma me espera ce lo va funsiona aora sur Edge en tua telefon. --- //[[xef|Simon]] 2025/06/22 07:17//
  * E, a ante me ia pensa ce la covre desapare mera cuando me pone mea cursor sur lo, ma presente lo pare ce la covre desapone se pos un clica e nunca apone la covre denova. --- //[[/usores/$/xef|Iarve]] 2025/06/22 00:12//
    * Como intendeda, en fato. Pos leje la matajoia, la joia es matada e on no pote revive lo... Ma oce, aora la clicas va alterna -- revelante, ascondente, revelante, ascondente, etc. --- //[[xef|Simon]] 2025/06/22 06:32//
    * Pfu, lo pare ce me ia malcomprende la sinifia de la parola //matajoia//. E, me no ia espeta ce lo deveni un boton con ''[clica per revela]'' :palma: La covre negra es plu bon, como cual lo es a ante. --- //[[/usores/$/xef|Iarve]] 2025/06/22 07:57//
    * O considera cambia ''clica per revela'' a tofus, como ''■■■■■■''? --- //[[/usores/$/xef|Iarve]] 2025/06/22 08:00//
    * Bon idea, aora fada. --- //[[xef|Simon]] 2025/06/22 08:40//
    * Me trae un cexeta peti: tofus "salta" en oio cuando on clica los par causa de sua largia nonegal a la largia de leteras ascondeda. --- //[[/usores/$o_gurevitx/xef|Marc]] 2025/06/22 14:12//
    * Cisa la presenta de matajoias va debe es elejable par la usor individua. La tofus es fea, me acorda. Me ia usa los sola car Dark Reader pare noncapas de mostra coreta un peso de testo con leteras e fondo de un mesma color. Esta no es la culpa de mea codigo. Me ia proba an con un paje de HTML multe corta e simple, con fondo blanca e testo negra, e conteninte un frase en cual un parola debe es negra sur negra (donce ascondeda). Dark Reader ia cambia la frase intera a blanca sur negra, an cuando me ia ajunta ''!important'' a la definis de la colores. Me ia proba ance "nebli" la matajoia afin lo aspeta tan desfocada ce on no pote leje lo. Dark Reader ia sutrae tal testo, an no lasante un spasio do lo ia es. Si un usor de la vici futur vole usa Dark Reader, el va debe eleje "tofus" en sua ajustas. --- //[[xef|Simon]] 2025/06/22 14:37//
    * Me ia restora la codigo plu simple cual fa no plu ca cambia la color fondal de la matajoia per revela o asconde lo. Ma me ia nota la problem de Dark Reader per considera a un tempo plu tarda, cuando plu de la otra taxes espetante va es ja fada. Iarve, esce tu pote dona un lia a un paje ueb cual conteni un matajoia cual funsiona bon con Dark Reader? --- //[[xef|Simon]] 2025/06/22 14:48//
    * Me ia fali trova cualce paje con matajoias cual pote funsiona bon con Dark Reader...:palma: Discord ave bon matajoias, ma lo mesma ave un modo per note; en otra pajes, cual no ave sua propre modo de note, matajoias no funsiona bon con Dark Reader, simil a la nosa. --- //[[/usores/$/xef|Iarve]] 2025/06/22 15:15//
    * Multe grasias per xerca, an tal. --- //[[xef|Simon]] 2025/06/22 15:24//
  * Me ia deside ajunta un moda con colores oscur. Lo no es difisil per reali, e lo va evita problemes con la matajoias (e cisa otra cosas ancora nonprevideda). --- //[[xef|Simon]] 2025/07/01 20:36//
    * Esta pare multe bon. --- //[[/usores/$/xef|Iarve]] 2025/07/02 00:12//

=== sur la formato de data

  * Me pensa ce esta pote reali juntada con la ora zonal: me abitua plu a la formato ''anio - mense - dia''. --- //[[/usores/$/xef|Iarve]] 2025/06/22 00:25//
    * Acordada. Per aora, me ia restora acel formato, car lo es la plu simple e fundal. --- //[[xef|Simon]] 2025/06/22 06:32//
    * Me no vole dise ce lo debe es ''anio - mense - dia'' --- me vole dise ce lo debe pote cambia como la prefere de la usor, simil a la prefere de la ora zonal. --- //[[/usores/$/xef|Iarve]] 2025/06/22 07:54//

=== Sutrae un paje html

Cuando on publici un paje sur la vici, un paje html es creada. Si me no era, cuando on sutrae la paje vici,  la paje html (per aora) no es sutraeda, e la idea ta es ce ance la paje html ta es automata canselada. --- //[[/usores/$/xef|Mixel]] 2025/06/18 15:38//
  * Un pensa eselente. Serta lo va es fasil per reali en la sistem nova. --- //[[xef|Simon]] 2025/06/18 15:58//

=== La ora zonal

Lo conveni serta ce on pote afisa automata la ora a pos un testo per clica la boton anteultima. Ma lo pare ce la ora mostra lo cuando me ia entra a la paje de edita, ma no lo cuando me clica la boton. (pe. me entra a la paje de edita a 11:58, ma me clica la boton a 12:15.) A alga veses me ia resta en la paje tra tro longa e me ia nesesa cambia la tempo par mano. Esce la afisa automata pote mostra la ora direta cuando me clica lo?
  * Si, acel disturba ance me. La tempo de suscrive debe coresponde a la momento de posta la mesaje. En la sistem nova, me intende ce suscrives en la foro va apare automata. Nos no va nesesa un boton separada. --- //[[xef|Simon]] 2025/06/19 12:38//

Un otra cosa: a alga veses me prefere usa la ora de mea rejion (UTC+8) (pe. cuando me ia atenta mostra ce me ia es usante la moda de note par //Dark Reader// alora), e me nesesa scrive lo par mano. Esce un usor ta pote ajusta cual zona de ora el prefere per ce (afin) tal ora pote es afisada automata?
  * Me ta prefere conserva tota oras en la mesma zona (UTC), e permete ce cada usor eleje sua propre zona. Alora cadun va vide la oras longa sua zona, como tu sujesta a su. Car suscrives en la foro va ave un sintatica formal, esta es posible. Ance en la paje de cambias resente lo va es posible. --- //[[xef|Simon]] 2025/06/19 12:38//

Un sujesta an plu direta: esce la ora pote converti per acorda direta la ora zonal de un usor, pos ce el eleje ja sua propre zona? --- //[[/usores/$/xef|Iarve]] 2025/06/19 12:15, o 20:15 - (UTC+8)//
  * Si, esta es un bon idea e importante. --- //[[xef|Simon]] 2025/06/19 12:38//

=== Leteratur

Esce ''/leteratur/xef'' pote es ance alga automatida, simil a la sistem de foro veninte? Me sinifia ce si la publicor ta ave un modo per pleni metadatos (autor, lingua orijinal, categoria(s), lisensa(s), esce la obra orijinal es incluida en WRAPes, etc.), alora acel paje xef ta pote mostra la representa, sin ce la publicor edita la sulista dedicada. On ta pote ancora cisa reteni un colie gardada (//curated//?) de obras recomendada e importante a supra acel representa automatida. --- //[[/usores/$o_gurevitx/xef|Marc]] 2025/06/22 20:45//
  * Un idea merveliosa. Esta ta es un boni vera grande. La metadatos pote senta a la comensa de la paje, usante la sintatica per comentas: ''#.autor: ...'', ''#.lingua: ...'' etc. Cuando on fisa un tal paje, la metadatos va es rapida copiada a un fix sentral, de do ''/leteratur/xef'' pote leje los per presenta los su filtros e ordinas diversa. --- //[[xef|Simon]] 2025/06/23 07:12//
    * Me pote pensa sur metadatos longa, como informa libre multilinial. O ''#.coretis_par:'' pote ave multe usores en se. Esce la formato de ''#.'' va pote trata los? --- //[[/usores/$o_gurevitx/xef|Marc]] 2025/06/23 08:09//
    * Perce nos va nesesa metadatos longa? Nos no ave tales en la tables presente. La motiva de la metadatos es per grupi e filtri la obras en la paje xef. Si nos ta ave metadatos con testo libre, la sistem no ta pote comprende los e ta debe iniora los. ''#.coretis_par:'' (''#.coretor:''?) pote ave un lista de usores, separada par virgulas. La mesma per ''#.autor:'' e ''#.traduor:'' --- //[[xef|Simon]] 2025/06/23 08:17//

  * Bon notada! Ance me vole demanda sur un caso cuando on tradui un //traduida// de algun (par causa de nonparlante la lingua orijinal de la obra). Imajina ce me vole tradui "Bagavad gita" (cual me no va osa fa) cui autor es crededa de es Viasa, ma me no sabe sanscrito e donce nesesa vade con alga tradui engles esistente par un de eruditas. --- //[[/usores/$o_gurevitx/xef|Marc]] 2025/06/23 08:27//
    * Lo ia es tipal mea caso cuando me ia tradui //La sanatorio de la clepsidra// sin conose la lingua polsce: sur la paje leteratur/xef lo es marcada como un tradui de polsce, an si me ia tradui lo de un tradui prima en franses… per dise, lo es un tradui de un tradui (o un tradui de grado 2 -- o… de mano 2 :-) )--- //[[/usores/$/xef|Mixel]] 2025/07/12 08:07//
      * Nos pote scrive ''#.lingua: polsce (tra franses)'' o simil. --- //[[xef|Simon]] 2025/07/12 08:57//
    * Ta ce la metadatos no deveni un burocratia complicada. Nos nesesa sola un pico de campos cual es vera usosa per organiza, grupi, filtri e xerca. Per notas sur traduis interveninte, o sur cualce otra detalia minor, nos pote ave un campo ''#.nota:''. Tota la metadatos va es lejable en un panel sur la paje mesma, inisial ascondeda. En fato, la metadatos va furni un solve plu bon ca '':•:•:•\:: relatada'' per la lias a discutes, no? Ance, nos pote permete ce la mesma campo apare a plu ca un ves, pe. per autores o coretores multiple, o per lias a plur discutes en la foro. --- //[[xef|Simon]] 2025/06/23 08:38//
    * Multe bon! Adio, burocratia. --- //[[/usores/$o_gurevitx/xef|Marc]] 2025/06/23 08:49//
  * Esce la categorias presente pote es bonida? --- //[[xef|Simon]] 2025/06/23 07:26//
    * Los es nonmal, ma me demanda a me cua ta aveni si "Poesias traduida" deveni du categorias - "Poesias" e "Traduis" cual on ta pote combina? --- //[[/usores/$o_gurevitx/xef|Marc]] 2025/06/23 08:00//
    * Me gusta la idea ce un obra pote parteni a plu ca un categoria. Lo dona flexablia a la sistem. --- //[[xef|Simon]] 2025/06/23 08:17//
    * Me no vide vera per cua on distingui "cantas" e "poesias" traduida (o orijinal)… --- //[[/usores/$/xef|Mixel]] 2025/06/23 09:00//
    * Vera. Nos pote fusa los en un sola categoria. La categorias major pare es: poesia/canta, drama, nara, esajo, scriveda santa. Ance la manca de un categoria es en alga modo un categoria. Categorias minor relata a temas e campos de ativia, pe. linguistica, politica, relijio, siensa. La distingui entre obras orijinal e traduida pote es espresada par la asentia o presentia de la metadato ''traduor''.  Cuando un obra consiste de plur pajes, nos va nesesa categori sola la paje xef. --- //[[xef|Simon]] 2025/06/23 13:52//

(Ance, perce nos ave libros estra ''/leteratur/'', como "Cultur clasica"?) --- //[[/usores/$o_gurevitx/xef|Marc]] 2025/06/22 20:45//
  * Bon demanda. La istoria de psicolojia par Jorj ia es la prima de los, ma me no recorda perce nos ia pone lo estra la ramo de leteratur (cual ia es multe plu peti a ses anios pasada). Me pensa ce nos pote move tota acel obras, e ance los su relijio, a leteratur en la vici veninte. --- //[[xef|Simon]] 2025/06/23 07:12//
  * Cisa ance "Aora oji" pote veni su leteratur. La tre ramos xef de nosa loca ueb es 1) la presenta de la lingua mesma (sua gramatica, disionario, istoria...); 2) testos scriveda en la lingua (pd. la leteratur); 3) discutes (pd. la foro). --- //[[xef|Simon]] 2025/06/23 13:52//

  * Me ta sujesta ce, en un paje jeneral, on trova un caxa de xerca par|de autores, afin tota la obras de un autor apare listada a su. An si alga autores, serta rara, ia scrive en plur linguas, lor obras ta pote apare colieda. Cisa, un boton "autor|linguas orijinal" ta permete ce la lista de tota la obras es ordinada longo o la nomes de la autores, o la linguas de aceles. --- //[[/usores/$/xef|Mixel]] 2025/06/23 09:02//
  * Me acorda. --- //[[xef|Simon]] 2025/06/23 10:13//
  * ... De vera on pote fusa "cantas" e "poesias"? Esta pare a me un idea alga strana, car en multe casos cantas e poesias difere multe. En canta moderna, la testo pote es cualce tipo de lingua, e lo nesesa mera un melodia o un ritmo; lo pote ave no rima, cual nunca manca en poesia. Un teoria interesante es, ce, en alga linguas con poca vocales, lor cantas tende ave no rima.  --- //[[/usores/$/xef|Iarve]] 2025/06/23 14:22//
  * En fato lo es multe comun ce poesias no rima. Ance comun es ce la testo de un canta orijina como un poesia. Ma nos pote reteni la du categorias. La demanda major per deside esce un categoria merita esiste es: esce lo es usosa per trova la paje? Ta ce nos no ave mil categorias pico, ma cisa sirca dudes con un bon cuantia de testos en cada. --- //[[xef|Simon]] 2025/06/23 14:39//
  * Cua de la poesias cual me (o otras) ia musici? Lo es la razona de mea sujesta de fusa ambos. Leonard Cohen es un poeta, e sua poesias ia es musicida par el (ance me ia musici alga poesias sua). Los resta poesias e es ance cantas. Me no vide vera alga difere. E cua de Paul Verlaine, con sua //Lus de luna//, cual ia es  miscada con la musica //Lus de luna// de Claude Debussy? Lo ta es difisil distingui cua es poesia e cua es canta… --- //[[/usores/$/xef|Mixel]] 2025/06/23 15:14//
    * Esce categorias multiple (''#.categorias: poesia, canta'') ta solve acel problem de eleje? --- //[[/usores/$o_gurevitx/xef|Marc]] 2025/06/23 18:22//
    * Serta: me ia ave ja en mente la posible de categorias multiple. E si on ajunta la categorias cual tu sujesta a su, lo deveni nonevitable. --- //[[xef|Simon]] 2025/06/23 18:36//
  * Si, me opina tal. Cantas e poesias consiste de //versos//. Esta es la cualia cual distingui los de prosa comun. Dramas (per teatro o televide/filma) es un otra caso spesial, distinguable par la forma. Donce nos ave categorias de //forma// e categorias de //tema//. Otras? --- //[[xef|Simon]] 2025/06/23 15:30//

Ta ce nos serebri plu categorias. Me va comensa: --- //[[/usores/$o_gurevitx/xef|Marc]] 2025/06/23 18:35//
  - Testos bon per comensores
  - Con audio
  - Con video
  - Testos cui autor mendica un leje coretinte de on
  - Testos cui autor ia abandona o pausa la labora sur los
  - Testos nesesante corentis longo la regulas nova de LFN
  - Testos per enfantes (zerenianes (hehehe) )
  - Testos per desenianes
  - Testos NO per edas jentil (con txa's e tal cosas)
    - An tal, **txa** no es un parola ofendente en elefen. --- //[[xef|Simon]] 2025/06/24 05:50//
  - Manuales / fa-comos / libros de aprende
  - Jeneros: teror, comedia, crimines, fable, fantasia siensal
  - Testos de cual un libro de paper ance esiste

Bon ideas, spesial la indicas de la completia e coretia de un obra. La categorias esistente en ''/leteratur/xef'' pote es automata aplicada, ma no oblida ce per la otras, algun va debe ajunta los. E autores ajuntante obras nova va debe eleje categorias (o algun otra va debe eleje los pos leje la obra). Si nos ave tro multe categorias, cisa autores va es dezelida par la burocratia de la cataloga. Esta es un fundambuli difisil! --- //[[xef|Simon]] 2025/06/23 18:36//
  * Acordada. Min buro' - plu bon. Ma a fini, cisa algun pote omete la metadato ''#.categoria'' si el no es serta. (Me divina ce "fundambuli" es funambuli cual nesesa un ambulansia pos se :plora:) --- //[[/usores/$o_gurevitx/xef|Marc]] 2025/06/24 05:14//
  * :-) --- //[[xef|Simon]] 2025/06/24 05:50//

=== Votas

Si, me vole (ce Simon) recrea la //Discord// plen asi. Me sujesta la funsiona de //votas / sondas//, pe. en casos cuando nos discute parolas nova per la disionario. --- //[[/usores/$o_gurevitx/xef|Marc]] 2025/06/24 05:14//
  * Vera? Votas va esije un banco de datos per teni los, e alga metodo complicada per integra los en la vicitesto. Sin la banco de datos, la pajes no va funsiona. (A presente lo es un cualia estrema bon e usosa ce on pote descarga la contenida intera de la vici como testo simple. Me desira forte reteni esta.) Me opina ce on pote posta simple un emoji 👍 o 👎 ("diton alta", "diton basa"?) per rejistra un vota favorente o no. E suposable cuando on vota desaprobante, on ta vole dona ance un esplica. --- //[[xef|Simon]] 2025/06/24 05:52//
  * Me vide. Razonable. --- //[[/usores/$o_gurevitx/xef|Marc]] 2025/06/24 06:08//
  * Ance me opina tal: cada vota ta debe es argumentada. --- //[[/usores/$/xef|Mixel]] 2025/06/24 09:58//

=== Emojis

A presente la vicitesto nova suporta la emojis seguente. Esce cualce otras es desirable? Natural, on pote copia e cola cualce emoji cual on vole usa, car los es mera sinias. Ma cisa du o tre otras merita es espresable en vicitesto, per oportunia?

🙂 🙂 🙂
😆 😆 😆
🤣 🤣
😉 😉 😉
🤪 🤪
😎 😎
🙁 🙁 🙁
🤔 🤔
😐 😐
😕 😕
:surprende: 😮 😮
😢 😢
🤦 🤦
👍 👍
👎 👎

  * On pote entra direta la emojis, no?  --- //[[/usores/$/xef|Iarve]] 2025/06/26 11:44//
  * Si, me ia dise esta en la demanda :-) Ma tape emojis no es sempre fasil, donce me pensa ce la sistem debe suporta modos plu tradisional per entra la plu comunes. --- //[[xef|Simon]] 2025/06/26 11:48//
  * Me pote asede los en mea metodo de tape (//IME//, en engles), donce me ia pensa ce vos ta pote fa fasil la mesma... Pardona :-X --- //[[/usores/$/xef|Iarve]] 2025/06/26 12:03//
  * Esce vos conose un modo fasil de codigi :grasias: 🙏 e :lodas: 👏 ?  --- //[[/usores/$/xef|Mixel]] 2025/06/30 20:10//
  * La modos cual tu sujesta ta es multe fasil per codigi. Me va ajunta los. 🙏 per la sujesta. --- //[[xef|Simon]] 2025/06/30 20:43//

=== Marca per improvisadas

A veses on (me) ta vole esperimenta con parolas e/o espresas nonesistente. Cua si on ta ave un modo de marca acel parolas (''<improvisada>cui</improvisada>'') afin los apare diferente, cisa suliniada con puntos o linietas per mostra ce lo es intendeda? --- //[[/usores/$o_gurevitx/xef|Marc]] 2025/06/30 13:13//
  * Vera no un mal idea. Tota tal estendes cabe bon a la sintatica ''\::(stilo) testo\::'', pe. ''\::(esperimental) cui\::'' o simil. --- //[[xef|Simon]] 2025/06/30 13:24//
  * Mea abitua personal ia es, asta aora, ce me pone un *steleta (tal como acel) o tal como esta ^^٭^^steleta ante la parola esperimental usada en la isoletas franca. Ma cualce otra modo de indica va es bon per me. --- //[[/usores/$/xef|Mixel]] 2025/06/30 20:04//
  * Un steleta es normal per indica tal cosas en linguistica, lo es vera. Personal, me ta es contente con un *steleta comun. Lo no pare nesesada ce on usa un steleta spesial e modifia lo con ''<sup>''. An tal, si nos vole usa ''\::(esperimental) xyz\::'', la pajes pote usa un steleta como (un parte de) sua presenta de esta. --- //[[xef|Simon]] 2025/06/30 20:47//
  * Proba otra ﹡steleta (U+FE61). ⭑steleta (U+2B51). Ma un *steleta comun conveni. --- //[[/usores/$/xef|Mixel]] 2025/06/30 21:01//
  * Lo debe es simple per tape, per cadun ci vole usa lo. --- //[[xef|Simon]] 2025/07/01 06:11//
    * Me veni de ajunta suporta per ''\::(alt) textu\::''. Esta pone un steleta ★ pal gris ante la parola indicada, e un linia ondosa de la mesma color su la parola. Esta (como probable ance otra cambias futur) no es vidable en la paje de proba, car mea codigo ia progresa aora ultra acel: me edita aora pajes direta en la servador nova. --- //[[xef|Simon]] 2025/07/01 20:08//
  * En pasa, la parola **steleta** no es trovable en nosa disionario. Cisa on ta pote ajunta lo? --- //[[/usores/$/xef|Mixel]] 2025/07/01 06:47//
  * Posible. Ma me vide ce nos ave ja **stela** per la mesma sinifia, e ance la verbo **steli** per "pone un stela a". Esta ta debe deveni **steleti**, cual es fea. Cisa esta ia es la motiva de no ajunta **steleta** en tempos plu temprana. Me recorda neblosa ce me ia sujesta lo a Jorj a multe anios pasada. --- //[[xef|Simon]] 2025/07/01 07:09//
  * Como la spelador va condui, ante un tal parola? Esce la spelador va considera ce **steleta** es un parola nonelefen, e va marca lo como tal, o esce lo va considera ce lo es un parola elefen (**stela**) con la sufisa **-eta**? --- //[[/usores/$/xef|Mixel]] 2025/07/01 07:31//
  * La spelador no vide **-eta** como un sufisa jeneral produinte: lo ta aseta tro multe eras como coreta si lo ta fa esta. E la gramatica dise ce **-eta** "es usada sola con parolas spesifada, como definida en la disionario". La spelador no debe es perfeta, e no pote. Lo es mera un gida. En teoria, me ta pote ajunta un regula ce (per esemplo) cada serie de leteras introduida par un sola ''*'' es iniorada par la spelador, ma en pratica tal regulas ta lenti la spelador: e la spelador funsiona aora a cada ves cuando on tape un letera! --- //[[xef|Simon]] 2025/07/01 07:56//
    * An tal, me ia susede reali esta: aora la spelador iniora cualce testo marcada con ''\::cisa|...\::'' :-) --- //[[xef|Simon]] 2025/07/22 18:55//
      * Lo es perfeta tal ! Grasias ! --- //[[/usores/$/xef|Mixel]] 2025/07/23 08:52//

  * Me ance trova ce me usa frecuente ''//engles: ...//''. Como de inserta un iconeta spesial cuando on scrive ''\::(lingua=en) hello world\::''? --- //[[/usores/$o_gurevitx/xef|Marc]] 2025/07/01 19:09//
  * Eselente! Me veni de ajunta esta a mea codigo cresente, con la forma simple seguente: ''\::(en) words\::''. Lo aseta cualce corti de lingua con du leteras. --- //[[xef|Simon]] 2025/07/01 20:06//

=== Boton de entrada de parola

Desirable: Un boton cual jenera un bloco ''<file> ... </file>'' conteninte un model per un parola nova en la disionario con linias per la linguas de Ecipon. Me copia e coli multe acel blocos. --- //[[/usores/$o_gurevitx/xef|Marc]] 2025/07/02 19:18//
  * Bon idea! --- //[[xef|Simon]] 2025/07/03 06:44//

parola nova – categoria
defini:
ca:
en:
eo:
es:
fr:
it:
pt:


=== Parolas nova

Esce la vici pote oji autojenera la resoma de parolas nova per la mesajes cual Mixel posta a Reddit? Si no, esce lo pote reali en la vici nova? --- //[[/usores/$o_gurevitx/xef|Marc]] 2025/07/05 18:50//
  * Acel no ta es fasil, car la disionario es ultima mera un colie de fixes de testo. Lo no es un banco de datos (estra cuando on publici lo a la xercador). Vera lo cual nos debe fa es manteni un lista de cambias en un paje dedicada sempre cuando nos fa un ajunta o modifia major. Nos ta pote organiza la lista en anios e menses, e publici lo a HTML estra la vici. --- //[[xef|Simon]] 2025/07/05 19:36//

=== Ramo "Projetas"

Nos va ave la ramos tradisional "Leteratur" e "Foro" a nosa vici nova. Como ance sur un //index de projetas// do persones ta pote posta o/e xerca publicis e avenis de jeneros diversa (juas, videos, jornales de paper, grupos en redes sosial, reunis IRL, etc)? --- //[[/usores/$o_gurevitx/xef|Marc]] 2025/07/09 17:45//
  * Donce simil a alga de la materia en pajes de usor, ma pertinente a la comunia intera? Un bon idea. --- //[[xef|Simon]] 2025/07/09 19:10//

=== Mostra vicitesto

Un desirable: capasi usores de vide vicitesto sin entra la modo de edita. Aora, sola anonimes pote fa acel, car los no pote edita. Motiva: rexerca la vicitesto sin clave la paje o introdui potensial cambias nonvoleda. --- //[[/usores/$o_gurevitx/xef|Marc]] 2025/07/13 05:56//
  * Me acorda completa. Grasias per la idea. --- //[[xef|Simon]] 2025/07/13 06:18//

=== Un disionario fasil descargable

Bon dia, Simon. Me pensa ce, consernante la paje web nova, lo ta es usosa ce on ta pote usa estralinia nosa disionario. Lo implica un fasilia de descarga un paceta incluinte 1. la program **Xercan** + 2. la fix de la **vocabulo** + (nonobligante) 3. la fix de **imajes** + (nonobligante) 4. la program de la **spelador**. --- //[[/usores/$/xef|Mixel]] 2025/08/19 09:46//
  * Bon dia, Mixel. Esta es un idea multe bon. En fato, nos ta pote reali lo an en la sistem presente: la paje ta nesesa mera ofre un fix zip de la imajes. --- //[[xef|Simon]] 2025/08/19 13:30//

=== Moves e sutraes

Me pensa oji sur la prosede de move e sutrae pajes en la vici nova. Esce la ideas seguente pare bon?
  * Ta ce nos ave un rejion nomida ''baldon''. Cuando on sutrae un paje, vera on move lo a la baldon. Per esemplo, si on sutrae la paje ''leteratur/obra/prefasa'', lo move a ''baldon/leteratur/obra/prefasa''. Si on fa un sutrae erante, on pote trova la paje en la baldon e restora lo. Ance la istoria de cambias a la paje move, e donce ance lo es restorable. Usores la plu fidada pote vacui la baldon (o cisa sola la contenidas plu vea ca un semana).
  * Cuando on move (o sutrae) un paje, esta move ance la varia publica de la paje, si un tal esiste. Esta //no// depende de la presentia o manca de la comanda ''#.publici'' en la vicitesto de la paje. Cada paje publica debe coresponde a un paje en la vici, ma la inversa no es vera. On ajunta ''#.publici'' cuando un paje ateni un state tan bon ce on vole publici lo.
  * Cisa me va reali ance un sistem per move (o sutrae) obras cual conteni plur pajes. Alora en efeto la arcivo intera va move. Probable la interfas la plu simple per esta es ce, cuando on vade a move o sutrae la paje ''xef'' de un arcivo, la sistem demanda esce on vole aplica esta ata a la arcivo intera.
  * Moves e sutraes apare en la istoria de la paje. La comandas per move e sutrae es en la menu de la editador. Ma si on ia fa cambias a la testo en la editador, on no pote move o sutrae la paje -- on debe fisa lo a ante. Esta simpli la presenta de la diferes entre varias istorial -- la sistem no debe considera diferes cuando on move o sutrae un paje.
  * Relatada, me vole ce la pajes publica abita un arcivo dedicada, su la radis de ''elefen.org''. (Acel arcivo de radis va conteni ultima ance alga otra arcivos, sin relata a la vici, e me no vole complica la vici par codigo spesial per evita nomes cual ta conflita con estas.) Per esemplo, la paje publica corespondente a ''elefen.org/vici/leteratur/obra/prefasa'' va es ''elefen.org/publica/leteratur/obra/prefasa''. Ma "publica" es un parola noiante funsionin. Esce nos pote trova un parola plu divertinte creosa per nomi esta parte de nosa loca ueb? --- //[[xef|Simon]] 2025/09/07 10:50//
    * **Salon**? **Gala**? **Aveneria**? **Bolevar**? En pasa, tota la ideas cual tu sujesta pare bon. La idea de usa la paje xef de un arcivo per move tota la arcivo es injeniosa. --- //[[/usores/$/xef|Mixel]] 2025/09/07 13:03//
    * **Salon** es un idea multe bon, per cual me grasia tu, ma lo fa ce me pensa ance a **atrio** o **galeria**. --- //[[xef|Simon]] 2025/09/07 14:45//
      * E **atrio** fa ce me ia pensa ance a **agora**… **Galeria** ta pote es usada per un arcivo de imajes? --- //[[/usores/$/xef|Mixel]] 2025/09/07 16:09//
      * Un agora ia es un loca plu interatante ca un pajeria statica. Plu simil a un foro, en fato. **Galeria** ta es eselente per un arcivo de imajes, ma nos no ave un tal. Me intende conserva la imajes per cada obra con acel obra, plu o min como en DokuWiki (ma con un interfas min orible per carga e manteni los). --- //[[xef|Simon]] 2025/09/07 16:17//
    * An tal, me veni de esperimenta con tota tre, e me trova ce me prefere ultima la simplia bela de la parola **salon** :-) --- //[[xef|Simon]] 2025/09/07 14:54//
    * Ta ce nos senta ala per regarda la spetaculo! --- //[[/usores/$/xef|Mixel]] 2025/09/07 15:37//
  * Usores la plu fidada va pote republici tota pajes en un arcivo o rejion indicada, per solve la situa cuando alga problem nonespetada ia aveni, o simple per serti ce la ''salon'' es completa corente. --- //[[xef|Simon]] 2025/09/07 14:59//
  * Bon, aora la sistem de move, sutrae e restora es programida e funsionante. --- //[[xef|Simon]] 2025/09/09 16:56//
    * :grasias: 🙏 e :lodas: 👏 --- //[[/usores/$/xef|Mixel]] 2025/09/09 19:09//

=== Ordina titulos en un lista

Me no sabe cual es la metodo usada en la Ecipon (Ecipo + engles + esperanto). Ma me demanda a me esce lo no ta es usosa ce on ordina la titulos de la obras longo un regula tipografial cual sutrae la parola **La** o cisa an **Un** cuando los es poneda al comensa de un titulo, car lo es un caso vera multe frecuente, e repone los pos la titulo entre brasetas. Per esemplo, en franses, si on xerca la titulo //L'Invitation au voyage//, de Charles Baudelaire, en un lista, on xerca a la letera **I** -- la titulo, en la lista, apare tal: //Invitation au voyage (L')//. Tal, en nosa lista, on ta ave la tre entradas colieda su lunlotra.
  - Invita a la viaja (L')
  - Invita de viaja (L')
  - Invita per viaja

--- //[[/usores/$/xef|Mixel]] 2025/09/19 08:52//
  * Un bon idea, relativa fasil per reali. A presente, la tables de leteratur en la vici nova aspeta esata como asi, ma me intende scrive un sistem per presenta tota obras en un lista xercable e filtrable (usante metadatos cual va es codigida en la obras mesma). Per esemplo, on va pote reseta un lista de sola nosa traduis de Baudelaire. Acel es un plu taxe per la fase 2, en otobre :-) --- //[[xef|Simon]] 2025/09/19 09:43//
  * Como tu ia vide oji, me ia ataca esta ja en la fase prima :) Me veni de reali ance tua bon idea de move la parolas **la** e **un** a la fini de tal titulos. --- //[[xef|Simon]] 2025/09/28 19:34//
  * Me vide. Eselente. Tu ia susede perfeta, e me pensa ce aora la xerca pote es plu fasil. --- //[[/usores/$/xef|Mixel]] 2025/09/28 20:04//
  * Sola aora me vide ce lo ave la nonvantaje ce si on tape "La can" per trova //La can de la Baskervilles//, on trova no cosa. Hm... Probable me va debe fa esta reordina de la titulos en la table mesma, e no en la fix sentral de metadatos en la servador. Un taxe per doman. --- //[[xef|Simon]] 2025/09/28 20:22//
  * En fato, esta ia es fasil, donce me ia coreti ja lo. --- //[[xef|Simon]] 2025/09/28 20:41//