Videos de la vici nova

En esta paje me presenta alga videos corta cual mostra la state de la vici en cuando me developa lo.

Crea un conta

On crea un conta par usa un formulario estra la vici. La pausa “Un momento, per favore …” es per descoraji robotes e spamores, an preveninte ce los trova la formulario. En fato, los va pensa ce los leje mera un paje de demandas comun sur elefen: me espera ce esta va sasia lor curiosia e los va parti rapida. La formulario no esiste en la HTML de la paje. Lo apare par un tipo de majia negra pos du o tre secondos…
Un otra modo de defende contra robotes es ce, per crea un conta, on debe responde coreta a du demandas simple sur vocabulo elefen, acaso elejeda.
Un modo tre es simil a nosa pratica presente en DokuWiki. Pos crea sua conta, un usor nova pote vide sola sua propre paje de usor. Esta paje es automata creada e conteni inisial la mesaje de bonveni cual vos pote leje en la video.
Visitores ci no ave un conta pote vide no parte de la vici. Esta es importante per evita rampes constante de ajentes IA tra la vici, ruinante la esperia per la usores vera. Donce nosa pajes publica va debe clari a visitores interesada ce si los crea un conta, los va trova en la vici mera la pajes publica denova, ma en forma editable, e ance un foro per discute los.

La turi prima

En esta video me mostra la funsionas xef cual esiste aora:

La menu. Cada paje (va) ave lo. On pote opera la menu egal par la mus (o par toca la scermo) e par la teclador. La tecla de cansela (Esc) abri e clui la menu, la teclas de flexa naviga tra lo, e la tecla de entra ativi un comanda. Lo funsiona (con la mus) an sin JavaScript. Cada comanda en lo es un lia, donce on pote eleje abri la paje corespondente en un oreta nova de sua surfador.
Me mostra como on revela la table de metadatos per un paje de leteratur, e como on mostra la testo orijinal.
Cambias resente, e un paje resomante la diferes fada en un cambia a alga dias ante aora.
La paje do on ajusta sua preferes.
La menu de la rejiones xef de la vici. Esta es mera per fasili naviga.
La istoria de un paje.
La editador lejera. Me fa un cambia peti e previde lo. Esta editador es completa usable sin JavaScript.
Un esemplo de un paje nonesistente, cual ofre un lia per crea lo. (Me intende ajunta un comanda a la menu per crea un paje nova. Esta va es plu fasil per usa, car lo va presenta un formulario cual va gida la usor tra la prosede, con un paragraf esplicante.)
La paje “Proba la vicitesto”, cual conteni esemplos de cuasi tota cosas cual la vicitesto pote fa.
La mesma paje en la editador xef. Per comensa, me mostra ce cada titulo en la previde ave un boton cual trova la linia corespondente en la editador.
On pote abri un oreta nova per vide la paje cual on edita, en sua forma normal, sin cualce cambias ja fada en la editador.
On pote descomuta la spelador, e ance la colori sintatical.
On pote regarda sola la editador, o sola la previde, o ambos. (Si la scermo es tro streta, pe. en alga telefonetas, on no pote regarda ambos paneles a la mesma tempo.)
On pote sincroni la rola de la du paneles.
Normal, la previde es dinamical, pd. lo refresci direta cuando on tape en la editador. Lo es jenerada en la surfador, sin contata la servador. Ma si la paje conteni un video, la video no es disponable en la previde dinamical – on vide sola un imaje statical en loca. Esta es car la carga de un video ta ocupa tro multe tempo. Ma on pote tempora descomuta la previde dinamical e reseta alora un previde de la servador mesma, en cual tota efetos funsiona.
Me sorti de la editador e reabri lo, editante sola un parte de la paje a esta ves. Me mostra ce on pote eleje previde la paje intera, an tal.
Me inserta un stensil per un entrada de disionario, e un panel de naviga.
Me usa la mesma fenetra flotante per aplica alga efetos tipografial a parolas esistente. (Me ia oblida mostra ce on pote move cualce fenetra flotante a un otra loca sur la scermo, liscante lo par sua bara de titulo.)
Final, me mostra la sistem de xerca en la paje editada. Me trova la apares de la parola “sona”. A pos, me cambia alga de los a “ruido”, e final tota de los. Me fisa esta cambia stupida e regarda lo en la istoria de la paje, e en la lista de cambias resente.

(A veses en esta video, vos va vide la simbol × en un sirculo negra, a alta de la scermo. Lo no parteni a la vici. Lo es un parte de la surfador en cual me ia rejistra la video, e lo apare sola car me ia usa la surfador en scermo plen.)

Moda oscur

Video

Esta es un presenta rapida de la colores en la moda oscur (moda de note). Me mostra ance ce on pote move la fenetras flotante.

Convertida

Video

Pos completi la prosede de converti tota pajes a la strutur nova, me pote mostra:

Pajes de la gramatica, con juador audio, e con istoria importada de DokuWiki
La arciveria, do nosa foro presente va abita
Move e sutrae de pajes, e la capasia de restora pajes sutraeda de la baldon
Leteratur (aora nomida Obras), con testo orijinal
La comandas la plu usosa en la menu ave aora teclas rapida, pe. Esc, T per mostra la testo orijinal
Pajes de usores
Pajes de la disionario, en cual la editador iniora la spele de la traduis stranjer
Cambias resente, importada de DokuWiki