Ramos en la vici nova

Converti

Multe grasias, Mixel, per lejeri la WRAPes en un monton de pajes! Acel va aida serta la taxe de la convertador. En fato me veni de fini scrive lo. Sin duta lo conteni defetos, an tal. Donce me vade aora a asembla un paje orible malsonin, conteninte un esemplo de cada cosa en la sintatica de DokuWiki, e me va usa esta per coreti la program. Ma la converti prosimi! — Simon 2025/09/16 12:41

Me pote reporta susede. Me ia sutrae multe defetos e veni de converti la vici intera (cuasi 10.000 pajes, si on conta la mesajes Yahoo!) a la ves prima. La prosede ocupa sirca des secondos. Fu. Esperable esta ia es la taxe la plu difisil de la projeta intera 🙂 — Simon 2025/09/16 17:41
Aceles es bon novas! Los deleta me. 🙂 — Mixel 2025/09/16 18:14
Me ia sutrae alga plu defetos en la convertador. Converti la lias ia es spesial difisil, car lor sintatica en DokuWiki es bizara, confusante e nonaidosa. Ma aora tota de los pare funsiona e me es contente con la resulta. Me va atenta copia ance la istorias de la pajes a la vici nova. E me vole simpli la ramos afin nos ave sola Disionario, Gramatica, Leteratur, Linguistica, Foro e Usores. Per esemplo, Relijio, Aora Oji, Psicolojia e Divertis va move a su Leteratur. Leteratur va es la casa per testos en elefen. Linguistica va es per testos sur elefen (o sur otra linguas como tocipona e kotava). — Simon 2025/09/18 17:11
La redui a ses ramos xef es un bon cosa. Cisa on ta pote an redui a sinco ramos? Me ia demanda frecuente a me esce distingui Foro e Usor es usosa. Ma, posible – me no recorda bon –, tu intende cambia la foros individual a sola un Foro jeneral, con temas diversa? — Mixel 2025/09/19 08:38
Me intende abandona la foros individua, ma reteni la pajes de usores, do persones pote presenta se e sua projetas, o labora sur acel projetas. La foro nova va es un loca sentral per tota discutes. Me ancora no ia comensa labora sur lo, ma me espera reali lo en otobre. La foros esistente va es arcivida, probable en la ramo Linguistica, como un parte de la Arciveria. — Simon 2025/09/19 09:39
Donce, per esemplo, si me comprende bon, la paje la_dialetos_de_la_isoletas ta es poneda en usores/mixel/la_dialetos_de_la_isoletas e no plu en foro/mixel/la_dialetos_de_la_isoletas — Mixel 2025/09/19 17:40
A presente, seguente mea pensas en “Scema de ramos” a su, tota pajes en /foro/ va transfere se a /lingua/arciveria/, donce acel tua paje va emerji a /lingua/arciveria/foro/mixel/la_dialetos_de_la_isoletas. Si tu ave en /foro/ pajes cual es ancora ativa – tal ce arcivi los no es conveninte – lista los, e me pote move los a un otra loca (pe. la adirije cual tu ia sita en tua demanda). Un funsiona usosa de la convertador es ce lo repara lias rompeda, incluinte los cual lo ta crea par sua propre moves de pajes. — Simon 2025/09/19 17:52
En efeto, me nuri a alga veses esta paje con pensas nova. E donce sua contenida no es “cluida”. 😉 — Mixel 2025/09/19 18:01
No problem. E cua de la otra pajes su /foro/mixel/, pd. los listada en la panel de naviga (e ance notas sur la dialetos isoletan cual no es en la panel)? — Simon 2025/09/19 18:14
Notas sur la dialetos isoletan es un compila de comentas de Harri consernante la paje La dialetos de la isoletas. On pote considera lo como cluida. En fato, si me no era, sola du pajes es ativa: la paje La dialetos de la isoletas e mea lista de Traduis e creadas, cual es en la arcivo usor e cual me pote move e ajunta en la paje xef usor^es/mixel. — Mixel 2025/09/19 19:02
Me no intende combina pajes con lunlotra en la converti: lo ta pote deveni estrema complicada! Si tu vole combina “Traduis e creadas” con tua paje xef ante la converti, esta ta es un bon solve. Lias a lo es asi, asi, asi e asi (e en la paragraf direta a supra, natural 🙂) Ma me vide no bon razona per move lo. Lo es un lista alga longa – lo pote resta en sua propre paje sin problem en mea opina. — Simon 2025/09/19 19:16
Bon sera, Mixel. Grasias per tua labora sur “Traduis e creadas”! La convertador pote aora reorganiza tota a la strutur nova, incluinte an la imajes e la lias HTTP a la salon publica. Tota imajes senta en un arcivo /fixador estra la vici, a la radis de la servador, de do la vici e la salon pote asede los. Me intende (en otobre, probable) scrive un interfas par cual usores va pote carga e manipula la imajes en acel arcivo (e sua suarcivos). Me pensa ce nosa arcivos /epub, /mp3 e /pdf debe move a su /fixador. Tu acorda? En la servador nova, on ave no cPanel, donce sola par esta interfas tu va pote carga la varias belida de tua obras 🙂 — Simon 2025/09/20 17:30
Perfeta! Lo es un bon idea ce la fixes con formatos spesial es colieda en un arcivo spesial. Aora, la desinia de la vici intera pare es completa. Un labora gloriosa! En esta saleta de furnis, esce lo es usosa ce la imajes es compartida en plur suarcivos? Me recorda ce xercante un imaje, me no ia sabe plu en cual suarcivo me ia pone ja acel. — Mixel 2025/09/20 23:12
Si, la fixador ave suarcivos. La imajes e imajetas de la disionario va es tal suarcivos, per esemplo. Ance la multe imajes acompaniante obras como Alisia, La prinse peti e Wini-la-Pu debe ave sua suarcivos, per evita suprafoli la arcivo xef. Ma me ia simpli ier alga de la suarcivos. Per esemplo, lo no pare nesesada ce on dise leteratur/... o obras/... a comensa de cada via de imaje pertinente a un obra. En la vicitesto nova, cuando on inserta un imaje, on scrive sempre la via completa, per redui la confusa. Ma lo es alora oportun si la vias no es enorme longa. — Simon 2025/09/21 09:26
Me esperimenta con la sistem de metadatos per la leteratur. Me pensa ce nos debe usa plu suarcivos per organiza la obras. Multe de tua albumes ave ja un suarcivo, ma La flor del deserto no ave. Me proposa ce la convertador move lo a un suarcivo. E obras no parteninte a albumes pote move a suarcivos longo sua autores orijinal. En esta modo, on va evita conflitas de nomes. A presente, nos ave sirca 500 pajes en la radis de leteratur: e lo es alga caososa. — Simon 2025/09/22 13:07
Me no recorda bon perce me no ia crea un suarcivo per La flor del deserto. Cisa car me no ia es serta consernante la contenida de esta album. Ma, aora, si tua convertador pote crea acel suarcivo, lo es multe bon. — Mixel 2025/09/22 13:50
Nota, per favore, ce la ajustas minor cual me fa presente a pajes e lias esiste en relata prosima con la convertador. Si tu reorganiza cosas a la mesma tempo, la convertador rompe. Per esemplo, la convertador sabe ce lo debe move usor:michel_gaillard:carta_postal a obras/carta_postal/naviga, e leteratur:carta_postal_album (cual me ia ajunta oji) a obras/carta_postal/xef. — Simon 2025/09/23 15:49
E no preocupa tu sur esce on nesesa ../ en la lias de leteratur a usor:.... Me ia vide esta problem a alga dias pasada e la convertador solve lo sin problem! An tal, si un lia es vera erante, pe. lo vade a la panel de naviga en loca de la paje xef de un album (o inversada), me bonveni tal coretis 🙂 — Simon 2025/09/23 16:10
Per favore, no modifia la strutur de la lias!!! Me deveni loco en repara constante la problemes cual esta crea en la convertador. — Simon 2025/09/23 16:19
Comprende: me ia spende aora multe dias de mea tempo per scrive un program per converti la vici en la forma cual lo ia ave. Cuando acel forma cambia, mea labora es perdeda e la taxe intera comensa pare nonfininte e futil. — Simon 2025/09/23 16:21
Bon, aora la convertador ajunta metadatos a la comensa de cada obra, usante la detalias en nosa tables de leteratur (pos alga modifias e simplis cual me ia fa asi). La paso seguente va es presenta tota obras en un lista filtrable/xercable como la paje xef nova de la rejion Obras. Me es ance contente con la organiza de suarcivos: cada obra cual consiste de plu ca un paje ave sua propre suarcivo; tota la otra traduis apare en suarcivos longo la lingua orijinal (pe. obras/traduis/fr/la_arbor_de_juda); e tota la otra obras orijinal apare en suarcivos longo la autor (pe. obras/autores/gc/ta_ce_me_es).
- Me comensa pensa ce acel organiza de suarcivos es plu ca nesesada. Lo aspeta bela e bon organizada cuando me regarda la fixes en mea computador, ma per usores de la vici lo es probable tro complicada. Cuando algun vole ajunta un obra nova, el va debe comprende esata do el debe fisa lo. Donce probable la sistem presente de sola du niveles es plu pratical: pajes individua, e un suarcivo per cada obra con plur pajes. — Simon 2025/09/27 10:10
- Lo pare en efeto alga complicada; du niveles es plu simple. Lo va sufisi ce cada obra ave sua metadatos — Mixel 2025/09/27 16:01
E pardona me, Mixel, si me ia reata forte a supra cuando lo ia pare a me ce tu interfere con mea laboras. Evidente tu ia desira mera aida e boni la pajes, sin intende crea problemes, e vera me ia ta debe esplica multe plu clar mea intendes en mea ajustas peti de lias e locas asi e ala. 🙏 — Simon 2025/09/23 17:44
O! me es vergoniante per dona un plu labora futil a tu! Asi es lo cual ia aveni: me ia vide ce un lia cual ia debe adirije a la album Carta postal ia es adirijente (erante) a la peso eponim Carta postal, e me ia vole coreti lo, ma me no ia pote publici esta coreti par causa de un lia de naviga a usor/michel_gaillard/etc. cual, cuando me ia vole publici, ia adirije strana a esta lia bizara leteratur/usor/michel_gaillard/etc. — Me jura ce, de aora, me no vade plu a coreti alga otra lia ante ce la convertador ia fini intera sua labora. E me escusa me a ves nova per acel disturba nonvolente. — Mixel 2025/09/23 18:41
No problem, Mixel! Vera, la sintatica de lias en DokuWiki es riable confusante. Lias es asoluta si los mensiona un arcivo, an cuando los no comensa con : o /. E en labora sur la converti, me ia trova, con mervelia xocada, ce la mesma lia pote vade a du pajes diferente, dependente sola de la esiste o no de un de los. Un lia como esta:acel: vade a esta/acel/xef si acel paje esiste, ma a esta/acel – iniorante la dupunto final! – si no. Apena credable como un sistem. — Simon 2025/09/23 19:03
Simon, escusa me denova: me ia debe fa un otra paje de naviga per la album La Cimeras, par causa de la defeto presedente descriveda (un crea erante, en curso de publici, de un lia bizara leteratur/usor/… ) cual ia impedi la publici de otra pajes. — Mixel 2025/09/24 23:40
La paje vea de naviga a usor/michel_gaillard/la_cimeras esiste ancora. Me sujesta ce tu sutrae lo, car lo conflita aora con la converti de la nova. Me no comprende la problem de la lia bizara, ma me no intende spende tempo per investiga e repara lo, car la vici nova es tan prosima a comensa sua vive… — Simon 2025/09/25 06:55
🙂 Fada. Me espera ce, aora, tota es bon per la albumes. — Mixel 2025/09/25 08:01
Si, tota es bon! — Simon 2025/09/25 08:19

Scema de ramos

Me veni de fa un esplora detaliosa de nosa ramos presente. Me pensa ce en la vici nova nos pote organiza tota nosa pajes xef en sola du ramos: Desinia e Obras.

La ramo Desinia va conteni la disionario e la gramatica, ma ance la eras comun, la introduis en multe linguas (ance viajores e vocabulo fundal e la arciveria de discutes vea. Nos pote ajunta nosa pajes de foro presente a acel arciveria, en un parte nova a la fini, simil a la “Sujestas diversa” ja listada ala. (Esce Desinia es un bon nom? Me considera ance Lingua: elefen.org/lingua/gramatica/eo/03.html, per esemplo.)
- Personal, me comprende plu bon Lingua. — Mixel 2025/09/19 18:04
- Ance me es convinseda a favore lo. Eselente. Lo va es tal. — Simon 2025/09/19 18:11
La ramo Obras coresponde a Leteratur, ma sua nom es cisa plu conveninte a sua contenidas. Tota scrives creosa en elefen va abita ala, incluinte Aora oji, la testos relijial, la divertis, la obras grande de Jorj e Chabi sur psicolojia, istoria etc, e la presentas de tocipona e kotava. Me proposa sutrae la prefisas “relijio/” e “divertis/”, tal ce la obras en acel ramos va apare simple su “obras/”. La Biblia va es su “obras/biblia/”. Me pote automata ajunta un metadato #.categoria a cada paje moveda, afin nos no perde la grupos.
La ramo Bricabrac no va esiste plu. Sua paje de logos pote move a Obras, car los es multe creosa.
La ramo Usores va resta. Lo es esensal, car cuando un person nova crea un conta, el va vide inisial sola sua paje en acel ramo, con un mesaje de bonveni solisitante ce el scrive un presenta corta de se per reseta plu diretos. Cada usor va ave sua propre ramo su Usores, en loca de la situa presente, do nosa pajes xef es direta su usor: (pe. simon) ma la pajes acompaniante abita plu profonda (pe. esta paje, ramos). En fato, me va proibi ce on ave un paje e un arcivo con la mesma nom. usor:simon va deveni /usores/simon/xef.
La pajes cual abita aora la nivel la plu esterna, como la demandas comun, la presenta xef e la paje prima, pote trova un casa nova su Desinia, an la paje prima. (Lo va debe usa alga truco per publici a /index.html, ma esta es serta posible.) E probable la pajes de aida (esplicante la vicitesto e otra aspetas de la vici mesma) va ave sua propre ramo Aida. — Simon 2025/09/19 16:04

Un pico de pasos plen de progresa plasente

Oji me ia reali la paje xef nova per la obras. La table ave sinco colonas: titulo, autor, traduor, lingua orijinal e categorias, e on pote xerca en cualce campo, filtrinte la contenidas de la table. On pote ance ordina la table longo cualce colona.

Me ia reali ance un sistem per publici tota pajes, o tota pajes en un rejion. Per publici tota pajes la servador nova usa sola 30 secondos. Per publici tota obras, 11 secondos. Cuando on edita e fisa un paje, si lo conteni la comenta #.publici (e tota pajes esistente ave aora lo), la varia en la salon publica es automata refrescida.
E me ia carga la vici intera, en sua forma nova, a la servador nova, do me va fa multe probas con lo en la dias veninte. Ma tota pare funsiona bon a esta momento 🙂
Me ave un lista de taxes relativa minor cual me debe ancora fa, ma me espera ce pos esta fini de semana, me va pote abri la vici a vos per esamina e esperimenta. Cisa vos va trova problemes cual me va debe repara, o sujesta ideas per bonis usosa. En otobre me va programi la foro, e la sistem per maneja imajes. Si tota vade bon, nos va pote move a la vici nova en novembre.
La servador vea va clui en febrero, e me va debe alora paia per la domina elefen.org e asosia lo con la servador nova. (Esperable me no va encontra problemes causada par la fato ce la posesor presente de la domina es mor.) Me va fa plu esploras sur acel pos cuando nos ia comensa usa la sistem nova – e nos va pote fa esta usante la nom tempora de la servador, sin problem. — Simon 2025/09/25 17:08

U+200B

Bon dia, Mixel. Me veni de pasa du oras profonda confondeda pos vide ce du lias, parente identica, converti diferente. Los es la lias a gramatica.pdf en la lista de gramaticas descargable e en la paje xef de la gramatica. La prima es normal, ma la lia du ave la sinia U+200B (un spasio de zero largia) pos https://. Me no comprende perce esta sinia es presente, o como lo ia apare ala. Ma me ia xerca tra la vici intera e ia trova lo en multe otra locas, pe. en la gramatica nepali, ma ance en alga postas par tu en la foro, como pos la abrisita en «Si on “diverje alga cosa”» en tua propre paje de foro. Esce cisa esta sinia es automata insertada par tua teclador franses? Lo no pare aida multe, e vera on debe usa lo sola en sistemes de scrive cual no ave spasios entre la parolas. — Simon 2025/09/26 09:58

Bon dia, Simon. Bizara, bizara. La sola cosa cual un teclador franses pote posible fa es la ajunta de un spasio nondividable pico (U+202f) o nondividable grande (U+00a0) ante la sinias : o ; o ! o ?, ma nunca pos / o :. Donce me no pote esplica la presentia de esta spasio U+200B, an en mea propre foro, e lo disturba me, como lo disturba tu. 🤔 — Mixel 2025/09/26 11:02
Me ia ajusta la convertador per sutrae los, e ance U+200C e U+2060. E cuando on edita un paje en la vici nova, la previde va iniora esta sinias, e cuando on fisa la paje, los va es sutraeda. Si on desira un separador nonvidable entre sinias, nos ave la sintatica (vidable!) (|), usada asta aora sola en la parola radiograf‌iste en la gramatica su spele e pronunsia. Grasias per tira mea atende a U+202F – me va defende la sistemes ance contra lo! — Simon 2025/09/26 11:56