Proba la vici nova

En esta paje, nos reporta cualce problemes o proposas cual leva se de la vici nova, en cuando nos esplora lo.

La vici nova es asi.

Alga notas inisial: — Simon 2025/09/27 16:52

Me ia converti e carga tota pajes e imajes asta 15:00 UTC oji (27 setembre). Ma esta es per proba. Per favore, edita cualce pajes cual tu vole, an en modos comica, simple per esperimenta, aprende e cisa trova defetos. Cambias fada en la sistem nova no va permane. Continua usa esta DokuWiki per cambias cual tu vole reteni en la futur. Cuando nos es contente con la vici nova (esperable a alga tempo en novembre), me va converti e carga denova, e alora esta DokuWiki va deveni noneditable.
Pos crea un conta, tu va pote vide e edita sola tua paje de usor (e la pajes de aida). Si tu reusa la nom de un conta cual ave ja un paje de usor asi en DokuWiki, tu va vide acel paje, esata como lo es. Si la nom es completa nova, tu va vide un paje corta con instruis per prosede. (Mixel, tua usor en la sistem nova ave la nom mixel. Tota otras es la mesma como en DokuWiki, ma zero de los esiste ja.)
Creas de contas nova apare en la lista de cambias resente. Cuando me vide un conta nova ala, me va dona rapida a lo plu diretos. Tu va pote leje la pajes de aida (asedable de la menu Vici) en cuando tu espeta!
La pajes per crea un conta e entra a la vici mostra un bara de progresa per alga secondos. Esta es mera un modo de defende contra robotes. Un secreta peti: si on presa la clave de cansela Esc a du veses cuando la bara es progresante, lo fini multe plu rapida :)
La xercador de la disionario funsiona ja en la servador nova, e (si on ave diretos sufisinte) on pote recompila sua datos sur funda de la pajes nova de disionario.

Como on pote suscrive en la vici nova?

Me ia comensa proba la vici nova (con estasia!), sur mea paje de foro. Cual es la metodo per suscrive? — Mixel 2025/09/28 08:41

Me ia responde ja ala, en fato, ma on tape simple cuatro tildes: ~~~~. Me veni de ajunta esta a la paje de aida. — Simon 2025/09/28 08:55
Grasias! Me no ia recorda plu… — Mixel 2025/09/28 09:00
Tua probas es ja multe usosa. Los ia atrae mea atende a tre o cuatro problemetas, cual me veni de repara. Per esemplo, pajes en la salon ia reteni la tildes en loca de la suscrive. Aora los mostra la ora en UTC. E la du colonas en la table de diferes ia deveni asurda larga en la istoria de tua paje de foro – ance coretida. Avansa! — Simon 2025/09/28 09:06
Si tu vole ce tua suscrive es Mixel e no mixel (cual es tua nom de usor), tu pote ajusta lo en Vici → Mea preferes. — Simon 2025/09/28 10:07

U+202F

La spasios cual ia desapare en la panel de naviga per Rio de luna ia es U+202F, pd. spasios nondividable e streta. Esce tu sabe perce los ia es ala? A presente la convertador dejeta los, ma cisa lo ta es bon si lo ta cambia los a spasios comun. La editador nova dejeta los, an no presentante los en la panel de previde, tal ce si on va introdui los sin intende en la futur, on va vide direta ce alga cosa es mal. — Simon 2025/09/28 10:01

Lo pare ce tu comensa coreti esta era par mano en multe pajes. Esta es futil, car ultima me va debe fa un plu converti de tota en la DokuWiki, e tua cambias en la vici nova va es perdeda. Natural, si tu fa esta editas mera per esperimenta con la sistem, esta es multe bon! — Simon 2025/09/28 10:53
O! serta! u la distraeda ci me es! La vici nova pare tan familiar e tan plasente usable ce me ia crede ce me es a casa! — Mixel 2025/09/28 11:55
🙂 🙏 — Simon 2025/09/28 12:09

un demandeta (tota riable) sur la loca de botones “fisa” e “clui”

Me vade a pare riable e pedante, sin alga duta. Cuando on vole fisa un cambia en un paje de la vici nova, esta caxa apare:

  Fisa cambias
   Resoma:
   Normal
   Cambias minor [-]
   Demanda [?]
   Anunsia [!]
Fisa        Clui

Esce me ta pote sujesta ce la boton “Clui” ta es a sinistra e la boton “Fisa” a destra? Esta ordina pare plu lojical (al min a me! – cisa car “Clui” implica un spesie de returna a retro, regresante, e “Fisa” sinifia ce on vade a ante, progresante). Tal:

  Fisa cambias
   Resoma:
   Normal
   Cambias minor [-]
   Demanda [?]
   Anunsia [!]
Clui        Fisa

— Mixel 2025/09/28 10:21

Esta es probable un idea multe bon. En la pasada distante, cuando me ia aprende programi, la norma ia es ce un dialoga mostra sua botones xef en la ordina Aseta Cansela, ma aora programes, pajerias e produidas difere entre se sur esta. Me va atenta reali tua idea. — Simon 2025/09/28 10:42

Fada. — Simon 2025/09/28 11:11
Grasias! — Mixel 2025/09/28 11:21

Xerca par lingua

Cuando on vole trova un obra orijinal scriveda en lfn, en la paje Obras , on debe tape “—”; cisa on ta pote permete tape “lfn”, o “orijinal” o “elefen”, en ajunta? — Mixel 2025/09/28 11:21

A, si, natural! Fada. — Simon 2025/09/28 11:39
La paje “Obras” es vera sasiante e consisa. Lo colie en un sola paje tota la informas cual on nesesa per xercas en modos diversa. Lodas! Un labora bela! — Mixel 2025/09/28 13:00

Crea de pajes nova

La menu Paje ave aora la comanda Nova asi cual gida a un formulario per crea un paje nova en la mesma arcivo como la paje presente, o como la paje xef de un suarcivo. — Simon 2025/09/28 18:40

La vide en telefoneta

Me ia visita la vici nova a la note de ier (a sirca 12 oras aa.), e atenta edita mea propre page. Me ia usa un telefoneta, e cuando me ia clica la boton mostra per vide la menu estendeda, la parte destra de la menu ia vade ultra la scermo de mea telefoneta, donce me no ia pote vide la letera solitar M en Malspeles ✓ M. Me ia atenta rola orizonal, ma esta move no ia susede. — Iarve 2025/09/29 01:59

Grasias per proba esta. Tua reporta sujesta ce la scermo de tua telefoneta ave min ca 350 pixeles de largia. Esta pare alga limitante. Ma me veni de fa un pico de ajustas. Aora en scermos min larga ca 640 pixeles cada menu ave un aspeta min larga, lo no mostra sua teclas rapida (como la M) e la menu xef (estra la editador) es aliniada a sinistra. — Simon 2025/09/29 06:17
Me ia redui aora ance la grandia de la “cuxin” (padding) sirca la pajes sur scermos streta, afin lo no peri spasio. Ma en un aparato estrema streta, me ta recomenda usa la editador lejera en loca. La editador xef es intendeda per sistemes en cual on pote mostra du paneles a lado de lunlotra sin torpia. — Simon 2025/09/29 07:16
Me ia fa alga plu ajustas de aspeta: aora la menu pare usable en en scermos con sola 300px de largia. Ma me ia descovre un problem en pajes cual conteni imajes o videos larga: si la scermo es tro streta per conteni los, la surfador diminui la paje intera e la testo pote deveni tro peti per leje. Me va atenta trova un solve. — Simon 2025/09/29 13:12
Acel problem con imajes e videos larga es aora coretida. — Simon 2025/09/29 19:52
La cambias es multe usosa, e aora me pote fa editas plu fasil con mea telefoneta. Grasias! — Iarve 2025/10/01 01:45

La testo orijinal

Cisa mea scermo es spesial (o mea oios), ma, cuando me clica sur Mostra la testo orijinal, la testo apare, ma lo pare a me vera pal e alga difisil per leje. — Mixel 2025/09/30 08:28

Me veni de cambia sua color de #AAA a #888. Esce plu bon? — Simon 2025/09/30 08:47
En nosa vici presente, sua color es color: #333. Entre #333 e #888, cisa? — Mixel 2025/09/30 08:59
Tu razona bon. Me ia cambia lo a #555 e ia ajunta un borda per distingui plu clar tal testo de la resta. La color #AAA ia es fasil lejable en mea scermo, ma me ia esperia en otra locas ce me vide testo “pal sur pal” con min difisilia ca otra persones 🙂 — Simon 2025/09/30 09:20
- Lo es perfeta lejeble, aora, an con mea ocios vea! #555 es multe bon. #666 ia ta es, cisa, un otra causa de perturba… 🙂 — Mixel 2025/09/30 10:30

Color de un nota basa

Esce un color gris es nesesada per la notas basa? Si tu pensa tal, alora la color #555 ta es un bon eleje. — Mixel 2025/09/30 10:37
Mentes grande pensa simil. Me veni de fa acel cambia, direta ante leje tua solisita 🙂 — Simon 2025/09/30 10:43

Metadatos

Cuando on crea un paje nova, esce, longo tu, cisa un caxa de metadatos vacua ta pote apare en la parte edita afin on completi lo? — Mixel 2025/09/30 08:28

Acel es posible, ma on no ta desira lo en la capitoles de un obra de plur pajes. Esce tu ia descovre la funsiona Utiles → Inserta? Lo ave un boton Metadatos cual inserta un bloco vacua de metadatos. — Simon 2025/09/30 08:47
En Utiles → Inserta on ave ance un boton per inserta un panel vacua de naviga. Lo es probable plu bon si tota paneles de naviga usa la mesma stilo per estas, pd. :•:•:•\::naviga – analoja a <WRAP naviga> en DokuWiki. — Simon 2025/09/30 08:51
🙏 — Mixel 2025/09/30 08:59
On no nesesa lasa campos cual no pertine. Per esemplo, en un obra orijinal, la campo #.traduor pote (o an debe) desapare completa. — Simon 2025/09/30 09:57
Comprendable. — Mixel 2025/09/30 10:07

Listi un obra nova

Como on fa per ajunta un obra nova en la lista de la obras? Esce la ajunta debe es fada con mano o lo va es automata fada? — Mixel 2025/09/30 08:28

Vade a Vici → Maneja. Ala on ave un lia per Compila la metadatos. Cadun ci pote edita obras pote asede acel lia. Manejores de la vici (cual inclui tu, a presente) pote vide ance un monton de lias a otra utiles. — Simon 2025/09/30 08:48
🙏 — Mixel 2025/09/30 08:59
Me veni de atenta publici un nara nova, La petra ascondeda, sin susede… Me xerca do me ia malmaneja, ma, per aora, me no ia trova. — Mixel 2025/09/30 10:51
Tu debe ajunta #.publica a la metadatos. Sola pajes “publica” es publicida. (A presente, cuasi tota pajes es tal marcada, car los es ja publica vidable tra multe anios. Ma cuando on es a media de sua labora sur un projeta, probable on ta prefere no publici lo asta la fini. Pos ajunta #.publica, la paje copia se a la salon sempre cuando on fisa lo. La utiles de publici en la paje Maneja es intendeda per relimpi rapida la salon si lo cade en un caos par alga causa.) — Simon 2025/09/30 11:12
- Lo es un bon cosa cual me va usa! On pote alora comensa labora sur un obra como en un libro de proba ([fr] cahier de brouillon, ou cahier d’essai ([it] brogliaccio, o scartafaccio). — Mixel 2025/09/30 11:43
- Esata. E si algun va fa, per esemplo, un tradui nova de la gramatica, el no va vole publici sua labora asta completi lo, car (a la min) multe lias ta es rompeda. — Simon 2025/09/30 12:09
Tua obra nova aspeta bon! Tu nesesa ancora usa la stilo :•:•:•\:: naviga en la panel. — Simon 2025/09/30 11:18
Un descovre bela! Grasias! — Mixel 2025/09/30 12:04
En pasa, esce, per publici un obra con plur pajes, cada paje de la colie debe es marcada #publica o sola la paje xef? (Apriori, me pensa ce, si esta marca fa parte de la metadatos, lo ta es sola sur la paje xef.) — Mixel 2025/10/03 11:03
Cada paje publica debe es tal marcada. Ma la metadatos debe apare sola en la paje xef – car cada paje con metadatos apare como un entrada en la table de obras. An tal, cisa tu ia pensa a un boni usosa: si la sistem trova ce la paje xef es publica, lo pote suposa ce tota pajes en la mesma arcivo es ance publica. En teoria. Ma cisa on va encontra esetas a esta. Per la momento me pensa ce nos debe marca cada paje. — Simon 2025/10/03 12:25
Un otra demanda: si on ia marca #publica un paje, a un ves, esce on pote despublici la mesma paje si on sutrae la marca #publica de esta paje, a un otra ves, a pos? — Mixel 2025/10/03 14:17
Interesante. A presente, la sola metodo per esta es la utiles de maneja, par cual on pote republici un rejion intera. Esta utiles comensa par sutrae acel rejion intera de la salon, poi los (re)crea la pajes publica. Afin un fisa ta pote despublici la paje, nos ta nesesa un comanda dedicada, pe. #.despublici o #.nonpublica o #.publica no. Me no es serta ce esta merita la labora de crea lo, a la min a presente. — Simon 2025/10/03 14:32
Me ia demanda esta sola per proba la publici, per vide la resulta de esta ata. Ma, car me no vole ce un paje de proba resta publica pos esta proba, me ia demanda a me esce lo pote es despublicida. — Mixel 2025/10/03 15:19
Acel es serta un desira valida. Me va reapone mea xapo de pensa 🙂 — Simon 2025/10/03 15:29
Cauti ce esta xapo no ta es acel de Athanasius Pernath! — Mixel 2025/10/03 16:28
Fortunosa, no cosa tan malsonin ia aveni! Pos alga pensa su la xapo, me ia vide un solve clar: un comanda nova per (des)publici en la menu de la editador. Me veni de ajunta esta. Como con Move e Sutrae, si on aplica lo a la paje xef de un arcivo, on pote eleje publici o despublici la arcivo intera. — Simon 2025/10/03 17:35
Me veni de proba Publici/Despublici. Lo funsiona bon! Ma on no debe oblida, an tal, marca #.publica sur cada paje de la arcivo. — Mixel 2025/10/03 19:19
Vera? Me ia proba mesma (en mea sistem local, no en la servador), e cuando me eleje publici “la arcivo intera”, tota pajes en la arcivo es publicida, sin depende de esce los es #.publica. La codigo conteni un regula per iniora #.publica cuando lo publici un arcivo intera, en fato. — Simon 2025/10/03 19:42

Me veni de ajunta un plu cosa: aora, cuando on fisa un paje, esta refresci ance la metadatos en la table de obras. — Simon 2025/10/03 19:42
Si, me ia nota lo: ier, an si la paje “la_petra_ascondeda/index.html” ia susede apare en la salon, sua nom no ia es aparente en la lista de obras. Oji, si! Ma, cuando me clica sur la nom listada en la lista de la table de obras (cual lia a la paje xef de la arcivo), la paje no apare car sua adirije ia deveni “…/xef.html” en loca de “…/index.html””. En la salon, la mesma problem apare cuando on clica sur la lia a la paje xef en un caxa de naviga. Per esemplo, si me es sur la paje xef de la arcivo “la_petra_ascondeda”, si me clica sur sua propre lia en la caxa de naviga, lo xerca “la_petra_ascondeda/xef.html” e… no trova lo. — Mixel 2025/10/04 08:10 O, me nota ce tu ia fisa la problem entretempo. — Mixel 2025/10/04 09:00
Me ia repara la problem sola pos leje tua reporta de lo. Grasias! (Lo es alga iritante ce “xef” en la vici debe coresponde a “index” en la salon, car esta complica plur partes de la codigo. Me va investiga si me pote ajusta la servador per suposa “xef.html” e no “index.html” cuando on solisita sola la arcivo.) — Simon 2025/10/04 09:06
- Me ia susede ajusta la servador en acel modo. Alora “xef.html” es la paje implicada cuando on indica mera un arcivo. Esta ia sutrae un fonte posible de defetos sutil 🙂 — Simon 2025/10/04 16:08
Me ancora no ia pote reprodui la otra problem cual tu ia reporta, pd. ce pajes sin #.publica no publici cuando on eleje “Publici la arcivo intera” en la editador. Me veni de proba en la servador, sutraente #.publica de du capitoles de La can de la Baskervilles, poi despublicinte la arcivo intera (e me ia confirma ce lo ia desapare de la salon), poi republicinte lo. Tota capitoles ia reapare en la salon. E esta es lo cual la codigo spesifia. Me vide aora ce tu ia posta oji un plu comenta sur esta, ma tu ia sutrae lo pos tempo corta. Donce me suposa ce ance esta funsiona aora bon per tu. — Simon 2025/10/04 09:11
Esata tal! La publici de tota la pajes de un arcivo, an no marcada #.publica, funsiona bon aora. 🙂 Lodas! — Mixel 2025/10/04 09:59 Mmm… aora, lo no funsiona plu… La publici de la arcivo intera no permete mostra pajes no marcada #.publica. — Mixel 2025/10/04 10:22
Me ia era credente ce la problem es solveda. Me ia proba usante un obra de cual sua capitoles #.inclui un panel de naviga cual mesma ia es marcada #.publica. Esta marca en la paje incluida ia fa ce la vici regarda ance la paje incluinte como publica. Vera la paneles de naviga no debe porta esta marca. Ma difisil… Me no vole ave modos diversa de publici cual condui diferente de lunlotra: esta ta es tro confusante per usores – e per me, como la programor! Nos ave aora tre modos:
1. Maneja → Publici un rejion. Esta considera cada paje individua e publici lo si lo conteni #.publica (o, como me veni de descovre, si lo inclui un tal paje).
2. Edita → Publici un paje o arcivo. Me ia intende ce esta va forsa tota pajes en la arcivo a publici, ma me trova ce en fato lo condui esata como la util su Maneja.
3. Edita → Fisa cuando la paje conteni #.publica. Esta publici la paje, ma on no pote despublici lo par esta metodo.
Cisa la paje xef de un arcivo debe dise #.publica arcivo. Alora, cuando on ta fisa cualce paje en la arcivo, e lo no ta conteni un marca #.publica, la sistem ta regarda la paje xef per vide esce lo spesifia ce la arcivo intera es publica. Ma esta comensa ja deveni orible complicada.
Cisa la sistem debe suposa ce cada paje es publica, e on debe marca #.privata la pajes cual on prepara ancora.
O cisa on debe simple marca #.publica cada paje publica. Esta ia es mea intende orijinal, e me no vide lo como iritante per usores. Ma cisa un inversa per spesifia #.privata en loca ta es plu bon. — Simon 2025/10/04 10:34

Pos plu pensa, lo pare a me ce la ajunta ier de Edita → Publici ia es un mal paso. Un de la intendes xef de la vici nova es fasili tan multe como posible la manteni de la pajes publica: on nesesa mera fisa un paje, e u ala! lo apare en la salon. Cuasi tota pajes es tal. La pajes privata, o pajes cual on es en curso de construi, es esetas. Donce me pensa aora ce un marca #.privata es la bon via, e ce me pote sutrae Edita → Publici. Per controla esce un paje apare en la salon, ta ce on usa sola esta marca. Ma esta marca ave la vantaje (supra #.publica) ce si on sutrae lo de la paje e fisa, la paje publica va reapare: on no va trova se en la situa ce on no pote reversa la publici/privati. Nos no nesesa un funsiona spesial per “despublici”. Si algun crea un obra nova e oblida marca lo #.privata, la mundo no va fini. E si el nota subita ce el ia oblida esta, el pote fasil ajunat #.privata a la capitoles en un minuto o du. Apena un problem. Tu acorda? — Simon 2025/10/04 11:16

La solves la plu simple es frecuente la plu bon, longo Ocam e sua rasador. Me acorda ce un nonpublici es min comun ca un publici. Donce, la marca #.privata ta permete garda per se un paje nonfinalida, como en un libro de proba. Me es oce per esta solve! — Mixel 2025/10/04 14:29
Multe bon. Me vade a reali lo. — Simon 2025/10/04 16:08
Lo es fada, e la resulta plase multe me. — Simon 2025/10/04 16:53
Me ia proba lo, e lo es multe fasil usable. Adotada! — Mixel 2025/10/04 18:56

Renomi un paje

Si, per esemplo, me ia fa un paje nomida ‘capitol_1’, e (si) me vole renomi lo a ‘paje_1’, esce on ave un modo spesial per renomi esta paje? En la menu ‘Paje’, cisa on ta pote trova: ‘Renomi esta paje’? — Mixel 2025/09/30 08:42

Usa Paje → Move en la editador. Esta move ance la istoria de la paje (lo cual DokuWiki no fa). — Simon 2025/09/30 08:50
🙏 — Mixel 2025/09/30 08:59

Descomuta simboles spesial

En un de la pajes en cual tu labora, tu ia scrive , suposable per preveni ce la vici interprete la stelas como marcas de testo spesa. Apostrofes duple es intendeda per usa cuando on sita un parola o peseta de codigo, o alga cosa simil – tal los dona un color fondal a la testo entre se. Per descomuta un simbol spesial en la vici nova, scrive \\ ante lo: \**\**. Esta es esplicada en la parte “Protejes” de la paje de aida. Lo es simil a la usa de sinias duple de persento en DokuWiki, ma min fea e plu familiar, me opina. — Simon 2025/09/30 10:24

🙏 — Mixel 2025/09/30 12:05

Un bloco stilida en un otra

Si on vole pone un tal bloco en un otra, on pote usa plu ca cuatro dupuntos per serci la bloco interna:

:::: densa
multe parolas
:::::: sentrida
∴
::::::
::::

A cualce profondia, en fato. Ajunta du dupuntos a cualce paso pare clar. Con sola un plu dupunto, la difere es difisil per vide en regarda la vicitesto. — Simon 2025/09/30 12:14

Stilos “separada” e “preseparada”

En loca de trucos con spasios nondividable, on pote usa blocos de stilo :•:•:•\:: separada o :•:•:•\:: preseparada. La prima ave spasio vertical pos se, la otra ante se. On pote ance combina la du en un sola bloco: :•:•:•\:: preseparada separada. — Simon 2025/09/30 18:10

Bon notada. Me veni de proba combina preseparada e sentrida, e lo funsiona bon! — Mixel 2025/09/30 18:43
Me joia. Si tu encontra plu casos simil, de spasios spesial o efetos encantante, dise mera, car me pote multe fasil ajunta los a la sistem. Cisa preseparada e separada ajunta pico tro multe spasio? — Simon 2025/09/30 19:22
En efeto, me pensa ce un spasio de un linia a supra e a su ta pote sufisi. — Mixel 2025/09/30 20:04
Me ia redui la spasio. Un otra idea cual veni aora a me es un stilo cual ta crea un spasio orizonal, como a comensa de la linia “Mea ami dulse”. Nos ta pote ave \::spasio|\::, per esemplo. Ma an plu simple ta es usa spasio nondividable de la tipo ja suportada. On pote ave plur en serie: (~)(~)(~)(~). Esta pare plu bon ca usa spasios de tipos noncomun, como la U+2001 (“cuadro em”) cual tu usa en acel linia a presente. Tipografia en la vici debe usa la metodos de vicitesto, me pensa, ma esta metodos es flexable e estendable. — Simon 2025/09/30 20:11
Me va usa de aora la spasio non dividable (~) en loca de U+2001 (en pasa, la nom de U+2001 en [fr] es un cadratin o quadratin, e en [it] quadratino, cual, cisa, ta pote es elefenida en cuadratin). Consernante tua sujesta, me pensa, en efeto, ce lo ta es usosa ce on ave un tal spasio longo, usable como un sinia de tabli (per esemplo un spasio avente un valua de 3 o 4 spasios nondividable). — Mixel 2025/10/01 08:56
Me ta pote permete (~~), (~~~), (~~~~) etc como cortis de (~)(~), (~)(~)(~), (~)(~)(~)(~) etc. Cuadratin o cuadrato? — Simon 2025/10/01 11:12
- Un bon idea! Lo ta es min pesosa. — Mixel 2025/10/01 11:41
  - Realida! — Simon 2025/10/01 12:45
  - Eselente! — Mixel 2025/10/01 14:56
  - Me ia ajusta la convertador. Aora lo deteta cuadratos e cambia los a (~)(~)(~)(~). — Simon 2025/10/01 16:21
- Si, cuadrato, plu corta, ta pote es bon; me vide ce acel parola es usada en engles, en tipografia: [en] quadrat, o quad, o em quad, o em quadrat. En catalan, on trova quadratí. En espaniol, cuadratín (o eme). En portuges: quadratim. Sua valua (en largia) es la mesma ca la altia; per esemplo, en un tipo de letera de 12 pt, el ave la valua de 12 pt. — Mixel 2025/10/01 11:22

Titulos

Probable cada paje debe ave sua propre titulo. A presente, cada capitol de La petra ascondeda porta acel mesma titulo, e si on abri plur de los a lado de lunlotra, tota ave la mesma nom en la surfador e on deveni confusada. La panel de naviga presenta la titulo de la obra, do cisa acel sufisi, e la titulo xef de la paje pote es usada per tituli o numeri la capitol. Tal nos ia fa en DokuWiki, a la min. — Simon 2025/10/01 13:02

Bon notada. — Mixel 2025/10/01 13:27

En pasa, me ia fa un coreti peti afin la avisa “Per vide la testo incluida, deseleje Previde instante en la menu” no apare como parte de la titulo de la previde. Me no ia imajina ce on va scrive #.inclui en la linia direta pos la titulo 🙂 — Simon 2025/10/01 13:02

Un sola “” sufisi ante un paragraf

Me ia nota ce si on pone sola // ante un paragraf, acel es tota italicida, E on no nesesa clui la paragraf con un otra //. Lo lejeri la marcas. — Mixel 2025/10/01 13:27

Si. Esta ia es par intende. Un de la cualias la plu iritante en DokuWiki es ce cuando on oblida clui un tal efeto, la resta de la paje aspeta ruinada! Esta aveni car DokuWiki no leje cada sinia de la vicitesto en ordina. Lo an no regarda la testo como un serie de linias. Lo es mera un bloco grande, en cual lo trova alga stensiles espetada (como //…//) e converti los a HTML sin sabe cua lo fa. Contrastada, la vici nova leje la linias e sinias en ordina e donce pote prosede los en modo plu intelijente e usosa, car a cada momento lo sabe cual e cuanto efetos es ativa. Lo trata la vicitesto en modo simil a un compilador de codigo, en fato. — Simon 2025/10/01 13:32
Efetos como italica e spesa es permeteda en lias e titulos, ance. Ma me recomenda evita los en titulos, estra si los es esensal. — Simon 2025/10/01 14:17

Rapidia de la previde instante

Me veni de ajunta un cosa nova en Vici → Mea preferes. On pote aora dise cuanto milisecondos debe pasa ante la colori de leteras nova tapeda en la editador e ante lor apare en la previde. Si la computador es sufisinte capas, on pote redui esta retarda a sola 1 milisecondo, e alora on no ave la senti pico ce on vada en melasa cuando on tape. La valua zero fa ce la sistem funsiona como a ante, pd. lo pospone refresci la scermo per un sinci de un secondo. — Simon 2025/10/01 15:46

Istoria de cambias minor

Me considera alga bonis a la sistem de istoria en la vici nova.

A presente, cada fisa de paje lasa un entrada en la istoria e arcivi la revisa presedente de la paje. Me pensa ce cuando la mesma usor fa un serie de cambias minor a un paje, lo ta es bon si la istoria presenta los como un sola cambia e reteni sola la revisa final en la serie. En esta modo, la lista de cambias resente va es min pesosa, e – plu importante – la servador no va pleni se con revisas vea cual difere apena entre se. La entrada combinada en la istoria va ave la ora de la fisa final en la serie, e sua resoma va consiste de la resomas de tota editas composante lo. Regardante la diferes, on va vide tota modifias de la serie en la mesma presenta.

Lo pare alga difisil per fa, no? Lo debe sutrae la revisa presedente e ajunta la cambias nova a la cambias presedente… an si la cambias nova conserna un otra cambia de la mesma cosa. — Mixel 2025/10/02 15:56
En fato lo es fasil. Imajina ce tu fa esta serie de editas:
1. Crea un paje con du paragrafes.
2. Ajunta alga plu paragrafes.
3. Coreti un era de tape: un cambia minor.
4. Modifia la ordina de du parolas en un frase: un cambia minor.
5. Rescrive partes grande de la testo.
La sistem sabe la istoria, donce lo sabe ce la edita 4 es un cambia minor par la mesma usor como edita 3. Me proposa mera ce lo no copia revisa 3 a la arcivo ante fisa revisa 4. La efeto va es ce la istoria mostra revisas 3 e 4 como fada en un sola sesion de edita. E me proposa ce lo combina la resomas per editas 3 e 4, afin acel entrada en la istoria de la paje mostra ambos. Ance esta es fasil: apena plu ca resoma3 = resoma3 + resoma4. (E a multe veses cuando persones fa cambias minor, los an no tape un resoma.) — Simon 2025/10/02 16:10
La revisas vea es conservada como sua testo completa. Cisa tu suposa ce me conserva mera la diferes entre los, ma no. Ance DokuWiki conserva la testos completa (en un arcivo cual lo nomi la “suteto” 🙂) Serta, jogla la diferes ta es multe difisil, e me no ta vole emprende lo! — Simon 2025/10/02 16:24
😮 Me amira esta destrosia tua! — Mixel 2025/10/02 16:33
Realida! Lo pare funsiona bon. Esperable me no ia rompe otra partes de la sistem. — Simon 2025/10/02 17:49

Me intende ance ce la lista de cambias resente mostra 21 dias de ativia. La razona xef per conserva revisas vea en la servador es ce esta permete regarda la diferes pertinente a editas resente. On pote ance regarda la propre istoria de cada paje a cualce tempo, ma me pensa ce nos no nesesa reteni la testo de revisas plu vea ca 21 dias.

(La mesma es vera en nosa DokuWiki: revisas vea es automata sutraeda pos du menses. Per alga razona strana, cuando on fisa un paje en DokuWiki, lo arcivi instante esta revisa nova. Tal nos ave un problem peti cuando nos recomensa labora sur un paje pos plu ca du menses: DokuWiki no pote mostra la diferes nova fada, car lo no posese plu la testo de la revisa presedente. Ma en la vici nova, me no arcivi la revisa presente asta cuando lo sesa es la revisa presente, pd. asta cuando on edita e fisa la paje. Donce la problem no va aveni: cualce fisa, an pos multe anios, va arcivi la revisa direta presedente lo, e la sistem va pote sempre presenta la diferes entre lo e la revisa nova.) — Simon 2025/10/02 12:42

A esta matina, me ia labora sur la paje sete de La petra ascondeda, fisante cambias minor a plur veses. An tal, en la istoria de cambias resente, cada cambia minor apare, separada. Me ia ta pensa ce sola la ves final ta apare, conteninte tota la cambias minor presedente. Esce me ia mal comprende la tua boni? — Mixel 2025/10/03 09:56
No, tu ia comprende coreta. Plu temprana oji, me ia atenta fa un plu boni, ma me ia introdui un era en la lojica, cual me ia vide e coreti sola pos (alga de) tua cambias. On pote indica ce la crea de un paje es minor (cisa esta es alga strana?), ma la istoria presenta un tal crea como un entrada separada de cambias minor cual segue pos lo. E si plu ca 24 oras ia pasa pos la cambia minor presedente, la istoria comensa un entrada nova. — Simon 2025/10/03 10:11
Grasias. E tu ia responde a un demanda cual me ia vole fa a tu: «cuando on labora denova sur un mesma paje a la doman, esce on crea un entrada nova en la istoria de cambias resente?». Donce, «si» si 24 oras ia pasa; «no» si min ca dudes cuatro oras ia pasa. (O, me pensa ce un crea de paje nova pote es un cambia minor, si esta paje es ancora vacua, sola per prepara la segue.) — Mixel 2025/10/03 10:28
Lo funsiona perfeta, vera perfeta! Lodas! Lo es multe pratical, aora! On pote coreti a multe veses sin suprafoli la istoria. 🙂 Lo es un util eselente per scrive e crea naras nova. Multe grasias! — Mixel 2025/10/03 11:31
Bon bon bon! Me veni de fa un plu ajusta peti. Aora, si on eleje “Cambia minor” sin tape un resoma, la sistem combina la cambia nova con la presedente, an si la presedente ia es un cambia major. En esta modo on pote fasil eleje esce on vole “asconde” un cambia minor o presenta lo con un resoma. Un aveni comun en la foro en DokuWiki, a la min per me, ia es ce me ia posta un comenta e ia trova instante en lo un era de tape. Pos esta ajusta nova, on pote coreti tal eretas en modo cuasi silente, cual es multe oportun. (Si on parla de la foro, me comensa aora programi la foro en la vici nova.) — Simon 2025/10/03 14:25
Pos 24 oras, an tal, cualce cambia crea un entrada nova. Cuando un cambia minor combina se con la presedente, la sistem fresci la data e ora de la entrada esistente – a pos, lo indica cuando la cambia minor ia aveni. La restrinje de 24 oras serti ce la data resta onesta. — Simon 2025/10/03 14:37

Modula la largia de un caxa?

Esce lo ta es posible ce on ta pote modula la largia de un caxa? Per esemplo un testo con linias corta ta pote entra en un caxa de largia corta, par la ajunta de un persento plu peti ca 100%? Per esemplo tal:

Manouna Orti
via de la Molin vea
Portofranca
Isola Franca

Serta posible. La nom no pote es 20% car lo deveni simple un clase CSS, e estas no pote comensa con dijitos. En fato, mea codigo cual leje la vicitesto insiste ce tal nomes consiste sola de leteras minor (per simpli alga aspetas tecnical). Ma on debe recorda ce la largia de la paje no es fisada. Si on leje un paje en telefoneta, lo va es multe plu streta, e 20% de la largia de la paje no ta sufisi per conteni la testo en la caxa. Me va considera per xerca un solve. — Simon 2025/10/03 12:30

Me ia ajunta la stilo cabente cual fa ce la caxa es no plu larga ca sua testo. — Simon 2025/10/03 13:29
Lo conveni multe bon! 🙏 — Mixel 2025/10/03 14:03

Grandia de leteras

Esce la grandia de la testo es bon? Me spesifia font-size: 16px, ma cisa 15px ta es plu bon: alora la leteras en Literata ta aspeta min larga en relata a sua altia. DokuWiki spesifia 14px, cual pare tro peti. 16px es la norma en surfadores si on no cambia lo en la preferes. — Simon 2025/10/04 19:34

Personal, 16px es bon per me. Multe plu bon ce en la vici “vea”, do la “grandia” de leteras es un “petia” per me. Me va atenta compara la grandias 16px e 15px en un fix estralinia, e me va responde con plu sertia. Me reveni subita. — Mixel 2025/10/05 07:56
Me ia cambia tempora la vici nova a 15px afin tu vide como lo ta aspeta. Evidente surfadores permete ajusta la grandia, donce cada usor pote ajusta esta a supra o a su, seguente sua prefere. — Simon 2025/10/05 08:15
Me leje plu bon la grandia 16 ca la 15, personal. Lo cual me ia nota es ce la grandia 16 aspeta plu “airida”, pd. ce la leteras aspeta plu separada, e tal, lo pare plu larga en relata con sua altia. Si on nomi la spasio entre la leteras “interleteri” ([en] letter spacing, character spacing [fr] interlettrage), me ta dise ce, cisa, on ta pote conserva la grandia 16, con ce on redui la *interleteri par 0,5pt (interleteri normal min 0.5pt)? Esce lo es fasil per fa? — Mixel 2025/10/05 08:24
No problem: me ia restora 16px. Ance me gusta lo, ma me ta pote egal aseta 15px. Modifia la interleteri es fasil (CSS ave letter-spacing), ma surfadores difere en sua capasia de reali lo sin presenta un aspeta orible. Con Literata la sola ajusta cual aspeta bon es estrema pico (-0.01em); ma lo es apena distinguable de la aspeta nonajustada, e en un surfador cual me veni de proba, an esta ia es rendereda en manera alga fea. — Simon 2025/10/05 08:51

contrasti plu ativa/nonativa

En la menus, alga funsiona apare pal cuando los no es ativable, per esemplo si me ia eleje ce un paje es #.privata, lo pali la parola Salon en la menu Paje. Per aora, lo no es fasil vidable cua es pal e cua es nonpal en la menu, car la constrastia no es multe forte. Cisa on ta pote contrasti plu? Si no par la palia, cisa par la spesia, o par ambos? — Mixel 2025/10/05 11:41

Bon punto, e me acorda completa. Me pensa ce orijinal la itemes pal ia es plu pal, ma me ia ajusta los cuando tu ia dise ce la testo orijinal ia es tro pal 🙂 Aora me ia cambia los a un gris multe pal. — Simon 2025/10/05 14:01
👍 Aora lo es perfeta, on vide multe bon la distingui entre ativa e nonativa. — Mixel 2025/10/05 15:48

Proba la foro!

La foro en la vici nova es aora abrida per esperimentas e probas.

Me ia pone ala un copia de tota nosa discutes fada en esta paje, afin on ave alga cosa per regarda e puieta.

La aida ave un paje nova, esplicante la foro.

Per favore reporta cualce cosa cual pare malfunsionante o bonable.