BIBLIA
Atesta Vea — Jenese · Esodo · Levitico · Numeros · Deuteronomio · Joxua · Judores · Rut · Samuel · Res · Cronicas · Ezra · Nehemia · Ester · Tobi · Judita · Macabeos · Job · Salmos · Proverbos · Eclesiaste · Canta de Cantas · Sajia · Sirac · Isaia · Jeremia · Lamentas · Baruc · Ezeciel · Daniel · Hoxea · Joel · Amos · Obadia · Jona · Mica · Nahum · Habacuc · Sefania · Hagai · Zecaria · Malaci
Atesta Nova — Mateo · Marco · Lucas · Joan · Atas · Romanes · 1 Corintianes · 2 · Galatianes · Efesianes · Filipianes · Colosianes · 1 Tesalonianes · 2 · 1 Timoteo · 2 · Tito · Filemon · Ivris · Jacobo · 1 Petro · 2 · 1 Joan · 2 · 3 · Juda · Apocalise

Evanjelio de San Mateo
1 · 2 · 3 · 4 · 5 · 6 · 7 · 8 · 9 · 10 · 11 · 12 · 13 · 14 · 15 · 16 · 17 · 18 · 19 · 20 · 21 · 22 · 23 · 24 · 25 · 26 · 27 · 28

Mateo 8

Traduida par Chabi

Cuando Jesus ia desende de la montania, un fola grande ia segue el.
E alora un leprosa ia prosimi a el, ia proni e ia dise: “Senior, si tu vole, tu pote puri me.”
El ia estende sua mano, el ia toca el e ia dise: “Me vole, es purida.” Sua leprosia ia es purida.
A pos, Jesus ia dise: “Dise a nun, ma vade a la prete, e ofre la donada cual Moxe ia prescrive; esta va es un atesta per los.”
Cuando el ia entra a Caparnaum, un senturion ia prosimi a el e ia suplica el,
disente “Senior, mea servor es reclinada a casa, paraliseda, sufrinte a grado asustante.”
El ia dise: “Me mesma va vade per cura el.”
Ma la senturion ia responde: “Senior, me no merita ce tu entra a mea casa, ma dise sola un parola e mea servor va sani.
Car me ance es un om su autoria, con soldatos su mea comandas. E me dise a un ‘Vade’, e el vade, e a otra ‘Veni asi’, e el veni, e a mea sclavo ‘Fa esta’, e el fa lo.”
Cuando Jesus ia escuta esta, el ia mervelia e ia dise a los ci ia es seguente el: “Me dise a vos, me ia trova nun en Israel con tal fida.
Me dise a vos, multe va veni de la este e la ueste, e va senta con Abraham, Isac e Jacob en la banceta en la rena de la sielo,
ma la fios de la rena va es espulsada a la oscuria, do on va ave ululas e moles de dentes.”
E Jesus ia dise a la senturion: “Vade, como tu ia crede, tal lo va es donada per tu.” E en acel ora, sua servor ia sani.
Jesus ia entra a la casa de Pedro, e ia vide sua madre par sposi reclinante en leto con febre.
El ia toca sua mano, la febre ia abandona el e el ia leva e atende el.
Cuando lo ia es sera, multe posesedas par demones ia es traeda a el, e el ia espulsa la spiritos e sani tota la maladas,
completinte lo cual ia es diseda par Isaia la profeta:
“El ia sutrae nosa debilias
e ia porta nosa maladias.”
Cuando Jesus ia vide la fola sirca se, el ia comanda sua disiplos a traversa a la otra borda.
Un scriviste ia prosimi e ia dise: “Mestre, me va segue tu en cualce loca do tu vade.”
Jesus ia responde el: “La volpes ave cavas e la avias de la sielo ave nidos, ma la Fio de la Om ave no loca per reposa sua testa.”
Un otra de sua disiplos ia dise a el: “Senior, lasa prima ce me entera mea padre.”
Ma Jesus ia responde a el: “Segue me, e lasa ce la mores entera sua mores.”
El ia entra a un barceta e sua disiplos ia segue el.
Subita, un tempesta tan grande ia aveni tal ce la barceta ia es covreda par la ondas; ma el ia es dorminte.
Los ia veni e ia velia el disente: “Senior, salva nos! Nos es afondante!
El ia responde los: Perce vos es asustada, omes de poca fida! El ia leva, ia reproxa la ventas e la mar, e on ia ave calmia grande.
La omes ia mervelia e ia dise: “Ci es esta om, ci an la ventas e la mar obedi?”
Cuando los ia ariva a la otra borda, a la teritorio de la gadarenes, du demonidas ci ia veni de la tombas ia encontra el. Los ia es tan savaje ce nun ia pote viaja par acel via.
Los ia clama: “Cual tu vole de nos, Fio de Dio? Esce tu ia veni asi per tormenta nos ante la tempo asiniada?”
A alga distantia on ia ave un manada de porcos comente.
La demones ia suplica el: “Si tu espulsa nos, envia nos a la manada de porcos.”
E el ia dise a los: “Vade!” Los ia sorti e ia entra en la porcos, e tota la manada ia freta a la mar de la falesa do los ia afoca.
La porcores ia fuji, e cuando los ia ariva a la site, los ia reporta tota, incluinte lo cual ia aveni con la demonidas.
Tota la site ia sorti per encontra Jesus e los ia demanda ce el abandona sua teritorio.

Traduida par Simon Davies de la testo elinica

La prea de la leprosa

1. E con el desendente de la montania, folas grande ia segue el.

Καταβάντος δὲ αὐτοῦ ἀπὸ τοῦ ὄρους, ἠκολούθησαν αὐτῷ ὄχλοι πολλοί.

2. E vide, un leprosa prosiminte ia proni ante el, disente: «Senior, si tu vole, tu pote puri me.»

καὶ ἰδοὺ, λεπρὸς προσελθὼν, προσεκύνει αὐτῷ, λέγων, Κύριε, ἐὰν θέλῃς, δύνασαί με καθαρίσαι.

3. E estendente la mano, el ia toca el, disente: «Me vole; deveni pur.» E direta sua leprosia ia es purida.

Καὶ ἐκτείνας τὴν χεῖρα, ἥψατο αὐτοῦ, λέγων, Θέλω· καθαρίσθητι. καὶ εὐθέως ἐκαθαρίσθη αὐτοῦ ἡ λέπρα.

4. E Jesus dise a el: «Atende ce tu dise a nun. Ma parti, mostra tu a la prete, e ofre la donada cual Moxe ia prescrive, per atesta a los.»

καὶ λέγει αὐτῷ ὁ Ἰησοῦς, Ὅρα μηδενὶ εἴπῃς. ἀλλὰ ὕπαγε, σεαυτὸν δεῖξον τῷ ἱερεῖ, καὶ προσένεγκον τὸ δῶρον ὃ προσέταξεν Μωϋσῆς, εἰς μαρτύριον αὐτοῖς.

La fida grande de la senturion

5. E con el entrante a Cafarnahum, un senturion ia prosimi a el, suplicante el,

Εἰσελθόντος δὲ αὐτοῦ εἰς Καφαρναοὺμ, προσῆλθεν αὐτῷ ἑκατόνταρχος, παρακαλῶν αὐτὸν,

6. e disente: «Senior, mea xico reclina en la casa, paraliseda, xocante tormentada.»

καὶ λέγων, Κύριε, ὁ παῖς μου βέβληται ἐν τῇ οἰκίᾳ, παραλυτικός, δεινῶς βασανιζόμενος.

7. E el dise a el: «Me, veninte, va remedia el.»

Καὶ λέγει αὐτῷ, Ἐγὼ ἐλθὼν, θεραπεύσω αὐτόν.

8. Ma respondente, la senturion ia dise: «Senior, me no merita ce tu entra su mea teto; ma dise sola un parola, e mea xico va es sanida.

Ἀποκριθεὶς δὲ, ὁ ἑκατόνταρχος ἔφη, Κύριε, οὐκ εἰμὶ ἱκανὸς ἵνα μου ὑπὸ τὴν στέγην εἰσέλθῃς· ἀλλὰ μόνον εἰπὲ λόγῳ, καὶ ἰαθήσεται ὁ παῖς μου.

9. Car ance me es un person su autoria, asiniada, avente su me soldatos; e me dise a esta, Parti, e el parti; e a un otra, Veni, e el veni; e a mea sclavo, Fa esta, e el fa.»

καὶ γὰρ ἐγὼ ἄνθρωπός εἰμι ὑπὸ ἐξουσίαν, τασσόμενος ἔχων ὑπ’ ἐμαυτὸν στρατιώτας· καὶ λέγω τούτῳ, Πορεύθητι, καὶ πορεύεται· καὶ ἄλλῳ, Ἔρχου, καὶ ἔρχεται· καὶ τῷ δούλῳ μου, Ποίησον τοῦτο, καὶ ποιεῖ.

10. E oiante, Jesus ia mervelia, e ia dise a la seguores: «Vera me dise a vos, en nun en Israel me ia trova un fida tan grande.

Ἀκούσας δὲ, ὁ Ἰησοῦς ἐθαύμασεν, καὶ εἶπεν τοῖς ἀκολουθοῦσιν, Ἀμὴν λέγω ὑμῖν, παρ’ οὐδενὶ τοσαύτην πίστιν ἐν τῷ Ἰσραὴλ εὗρον.

11. Ma me dise a vos ce multes ia viaja de este e ueste, e va reposa con Abraham e Isac e Jacob en la rena de la sielos;

λέγω δὲ ὑμῖν ὅτι πολλοὶ ἀπὸ ἀνατολῶν καὶ δυσμῶν ἥξουσιν, καὶ ἀνακλιθήσονται μετὰ Ἀβραὰμ καὶ Ἰσαὰκ καὶ Ἰακὼβ ἐν τῇ βασιλείᾳ τῶν οὐρανῶν·

12. ma la fios de la rena va es espulsada, a la oscuria plu esterna, e ala va es un plora e un raspa de dentes.»

οἱ δὲ υἱοὶ τῆς βασιλείας ἐκβληθήσονται, εἰς τὸ σκότος τὸ ἐξώτερον, ἐκεῖ ἔσται ὁ κλαυθμὸς καὶ ὁ βρυγμὸς τῶν ὀδόντων.

13. E Jesus ia dise a la senturion: «Parti: tal como tu ia fida, lo va aveni per tu.» E sua xico en acel ora ia es sanida.»

Καὶ εἶπεν ὁ Ἰησοῦς τῷ ἑκατοντάρχῃ, Ὕπαγε, ὡς ἐπίστευσας, γενηθήτω σοι. καὶ ἰάθη ὁ παῖς αὐτοῦ ἐν τῇ ὥρᾳ ἐκείνῃ.

Jesus sani a la casa de Pedro

14. E Jesus, veninte en la casa de Pedro, ia vide sua madre-par-sposi reclinante e febrosa.

Καὶ ἐλθὼν ὁ Ἰησοῦς εἰς τὴν οἰκίαν Πέτρου, εἶδεν τὴν πενθερὰν αὐτοῦ βεβλημένην καὶ πυρέσσουσαν.

15. E el ia toca sua mano, e la febre ia sorti de el; e la fem ia leva se e ia atende el.

καὶ ἥψατο τῆς χειρὸς αὐτῆς, καὶ ἀφῆκεν αὐτὴν ὁ πυρετός· καὶ ἠγέρθη καὶ διηκόνει αὐτῷ.

16. E con la sera esente, los ia trae a el multe demonidas, e el ia espulsa la spiritos par un parola, e ia remedia tota los con maladias,

Ὀψίας δὲ γενομένης, προσήνεγκαν αὐτῷ δαιμονιζομένους πολλούς, καὶ ἐξέβαλεν τὰ πνεύματα λόγῳ, καὶ πάντας τοὺς κακῶς ἔχοντας, ἐθεράπευσεν,

17. afin lo ta es realida cual ia es vosida tra Isaia la profeta: «El ia sutrae nosa debilias, e ia porta a via nosa maladias.»

ὅπως πληρωθῇ τὸ ῥηθὲν διὰ Ἠσαΐου τοῦ προφήτου, λέγοντος, Αὐτὸς τὰς ἀσθενείας ἡμῶν ἔλαβεν, καὶ τὰς νόσους ἐβάστασεν.

La costa de segue Jesus

18. E Jesus, vidente un fola sirca se, ia comanda traversa a la otra borda.

Ἰδὼν δὲ ὁ Ἰησοῦς ὄχλον περὶ αὐτὸν, ἐκέλευσεν ἀπελθεῖν εἰς τὸ πέραν.

19. E prosiminte, un scriviste ia dise a el: «Ensenior, me va segue tu sempre do tu ta vade.»

Καὶ προσελθὼν, εἷς γραμματεὺς εἶπεν αὐτῷ, Διδάσκαλε, ἀκολουθήσω σοι ὅπου ἐὰν ἀπέρχῃ.

20. E Jesus dise a el: «La volpes ave nidos, e la avias de la sielo ave perxas; ma la Fio de umanas no ave do el ta reposa la testa.»

Καὶ λέγει αὐτῷ ὁ Ἰησοῦς, Αἱ ἀλώπεκες φωλεοὺς ἔχουσιν, καὶ τὰ πετεινὰ τοῦ οὐρανοῦ κατασκηνώσεις· ὁ δὲ Υἱὸς τοῦ ἀνθρώπου, οὐκ ἔχει ποῦ τὴν κεφαλὴν κλίνῃ.

21. E un otra de sua disiplos ia dise a el: «Senior, permete prima ce me vade e entera mea padre.»

Ἕτερος δὲ τῶν μαθητῶν αὐτοῦ εἶπεν αὐτῷ, Κύριε, ἐπίτρεψόν μοι πρῶτον ἀπελθεῖν καὶ θάψαι τὸν πατέρα μου.

22. Ma Jesus dise a el: «Segue me, e lasa ce la mores entera lor mores.»

Ὁ δὲ Ἰησοῦς λέγει αὐτῷ, Ἀκολούθει μοι, καὶ ἄφες τοὺς νεκροὺς θάψαι τοὺς ἑαυτῶν νεκρούς.

Jesus calmi la tempesta

23. E con el entrante a la barco, sua disiplos ia segue el.

Καὶ ἐμβάντι αὐτῷ εἰς τὸ πλοῖον, ἠκολούθησαν αὐτῷ οἱ μαθηταὶ αὐτοῦ.

24. E vide, un tempesta grande ia aveni sur la mar, tal ce la barco ia es covreda par la ondas; ma el ia dormi.

καὶ ἰδοὺ, σεισμὸς μέγας ἐγένετο ἐν τῇ θαλάσσῃ, ὥστε τὸ πλοῖον καλύπτεσθαι ὑπὸ τῶν κυμάτων· αὐτὸς δὲ ἐκάθευδεν.

25. E prosiminte, los ia velia el, disente: «Senior, salva, nos va es destruida!»

καὶ προσελθόντες, ἤγειραν αὐτὸν, λέγοντες, Κύριε, σῶσον, ἀπολλύμεθα!

26. E el dise a los: «Perce vos es asustada, poca fidosas?» Alora, levante, el ia reproxa la ventas e la mar, e un calmia grande ia aveni.

Καὶ λέγει αὐτοῖς, Τί δειλοί ἐστε, ὀλιγόπιστοι; τότε, ἐγερθεὶς, ἐπετίμησεν τοῖς ἀνέμοις καὶ τῇ θαλάσσῃ, καὶ ἐγένετο γαλήνη μεγάλη.

27. E la persones ia mervelia, disente: «De cual tipo es esta om, ce an la ventas e la mar escuta el?»

Οἱ δὲ ἄνθρωποι ἐθαύμασαν, λέγοντες, Ποταπός ἐστιν οὗτος, ὅτι καὶ οἱ ἄνεμοι καὶ ἡ θάλασσα αὐτῷ ὑπακούουσιν?

Demones enviada a porcos

28. E con el veninte a la otra borda, en la tera de la gadarenes, du demonidas ia encontra el, vadente de la tombas, estrema violente, tal ce nun ia es capas de viaja longo la via.

Καὶ ἐλθόντος αὐτοῦ εἰς τὸ πέραν, εἰς τὴν χώραν τῶν Γαδαρηνῶν, ὑπήντησαν αὐτῷ δύο δαιμονιζόμενοι, ἐκ τῶν μνημείων ἐξερχόμενοι, χαλεποὶ λίαν, ὥστε μὴ ἰσχύειν τινὰ παρελθεῖν διὰ τῆς ὁδοῦ ἐκείνης.

29. E vide, los ia cria, disente: «Cua on ave entre nos e tu, Fio de Dio? Esce tu ia veni asi ante la tempo asiniada, per tormenta nos?»

Καὶ ἰδοὺ, ἔκραξαν, λέγοντες, Τί ἡμῖν καὶ σοί, Υἱὲ τοῦ Θεοῦ? ἦλθες ὧδε πρὸ καιροῦ βασανίσαι ἡμᾶς?

30. Ma distante de los ia es un manada de multe porcos, comente.

Ἦν δὲ μακρὰν ἀπ’ αὐτῶν ἀγέλη χοίρων πολλῶν, βοσκομένη.

31. E la demones ia suplica el, disente: «Si tu espulsa nos, envia nos a la manada de porcos.»

οἱ δὲ δαίμονες παρεκάλουν αὐτὸν, λέγοντες, Εἰ ἐκβάλλεις ἡμᾶς, ἀπόστειλον ἡμᾶς εἰς τὴν ἀγέλην τῶν χοίρων.

32. E el ia dise a los: «Parti.» E sortinte, los ia vade en la porcos; e vide, la manada intera ia rapidi longo la presipe a en la mar, e los ia mori en la acuas.

Καὶ εἶπεν αὐτοῖς, Ὑπάγετε. οἱ δὲ ἐξελθόντες ἀπῆλθον εἰς τοὺς χοίρους· καὶ ἰδοὺ, ὥρμησεν πᾶσα ἡ ἀγέλη κατὰ τοῦ κρημνοῦ εἰς τὴν θάλασσαν, καὶ ἀπέθανον ἐν τοῖς ὕδασιν.

33. E la porcores ia fuji, e vadente a la site, los ia reporta tota, an la cosa de la demonidas.

Οἱ δὲ βόσκοντες ἔφυγον, καὶ ἀπελθόντες εἰς τὴν πόλιν, ἀπήγγειλαν πάντα, καὶ τὰ τῶν δαιμονιζομένων.

34. E vide, la site intera ia sorti a un encontra con Jesus. E vidente el, los ia suplica ce el ta parti de lor fronteras.

καὶ ἰδοὺ, πᾶσα ἡ πόλις ἐξῆλθεν εἰς ὑπάντησιν τῷ Ἰησοῦ. καὶ ἰδόντες αὐτὸν, παρεκάλεσαν ὅπως μεταβῇ ἀπὸ τῶν ὁρίων αὐτῶν.