Traduida par Chabi
Capitol 16
- La fariseos e saduseos ia veni e, per proba el, ia demanda ce el mostra un sinia de la sielo.
- El ia dise a los: “A la sera vos dise ‘Doman on va ave un bon clima, car la sielo es roja’;
- e, a la matina, ‘Oji va es tempestosa, car la sielo es roja e menasante.’ Vos sabe judi la aspeta de la sielo, ma no pote judi la sinias de la tempos.
- Un jenera malvolente e nonfidosa xerca un sinia, ma no sinia va es donada a los estraa la sinia de Jonas.” Alora el ia parti de los e ia vade a via.
- Pos pasa a la otra lado de la mar, la disiplos ia oblida trae pan.
- Jesus ia dise a los: “Atende e garda vos contra la fermentante de la fariseos e saduseos.”
- Los ia conclui entre los, disente: “Lo es car nos no ia trae pan.”
- Cuando Jesus ia comprende esta, el ia dise: “Vos de poca fida, perce vos conclui entre vos ce lo es car vos no ave pan?
- Esce vos ancora no comprende, e no recorda la sinco panes per la sinco mil, e cuanto sestos vos ia recolie?
- O la sete panes per la cuatro mil, e cuanto sestos vos ia recolie?
- Como vos no comprende ancora ce me no ia es parlante a vos sur pan? Garda vos contra la fermentante de la fariseos e saduseos.”
- Alora los ia comprende ce el no dise ce los ta garda se de la fermentante de la pan, ma de la ensenias de la fariseos e saduseos.
- Cuando Jesus ia vade a la region de Cesarea de Filipo el ia demanda a sua disiplos: “Sur ci la popla dise ce el es la Fio de la Om?”
- Los ia responde: “Algun dise Joan la Batiste, otras Elija, e otras Jeremias o un de la profetas.”
- El ia dise a los: “Ma ci vos dise ce me es?”
- Simon Pedro ia responde: “Tu es la Maxia, la Fio de la Dio vivente.”
- Jesus ia dise a el: “Bondiseda es tu, Simon fio de Jonas. Car carne e sangue no ia revela esta a tu, ma mea Padre sielal.
- E me dise a tu: “Tu es Pedro, e sur esta roca me va construi mea eglesa, e la portes de inferno no va domina lo.
- Me va dona a tu la claves de la rena de sielo. Cualcun ci lia sur la tera va es liada en la sielo; e cualcun ci tu deslia sur la tera va es desliada en la sielo.”
- Alora el ia comanda sever la disiplos ce los dise a nun ce el es la Maxia.
- De acel tempo, Jesus ia comensa mostra a sua disiplos ce el va debe vade a Jerusalem e sufri multe de la decanos, la pretes xef e la scrivistes, e es matada e revive a la dia tre.
- Alora Pedro ia porta el a lado e ia comensa reproxa el: “Ta ce Dio no permete lo, Senior! No tal cosa debe aveni a tu.”
- El ia turna e ia dise a Pedro: “Vade a retro, Satan! Tu es un ostaculo per me car tu pensa no como Dio, ma como la umanas.”
- Alora Jesus ia dise a sua disiplos: “Cualcun ci vole veni pos me debe nega se mesma, prende sua crus, e segue me.
- Car cualcun ci salva sua vive va perde lo, ma cualcun ci perde sua vive per me va trova lo.
- Cual profita ta veni a el ci gania la mundo intera e perde sua vive? O cua un om pote dona par intercambia per sua vive?
- Car la Fio de la Om va veni con sua anjeles en la gloria de sua Padre e el va repaia cadun longo sua condui.
- Me serti vos ce algas ci sta asi no va mori ante vide la Fio de la Om veninte en sua Rena.”