Capitol 12

1 E Job ia parla e ia dise:

2 O si, vos es la popla,
e con vos sajia va mori!

3 Ma ance me ave un mente como vos,
me no es min ca vos,
e ci no sabe tal cosas?

4 Un burlable a sua amis es me,
ci clama a Dio e es respondeda,
un burlable de un om nonculpable e justa.

5 La pensa de la autosasiada despeta desastre,
preparada per los ci tropeza.

6 La tendas de la sacores es calma,
provocores de El¹ es secur,
ci Dio ia gida par la mano.

7 Ma demanda de la bestias, los va instrui vos,
la avias de la sielos va dise a vos,

8 o parla a la tera, lo va instrui vos,
la pexes de la mar va informa vos.

9 Ci no ia sabe en tota estas
ce la mano de Iaue ia fa esta?

10 En la mano de ci es la ruah de cada cosa vivente,
E la nefex de tota carne umana.

11 Esce la orea no distingui parolas,
la palato proba comeda?

12 En la vea es sajia,
e en la longia de dias comprende.

13 Con El es sajia e fortia,
El posese consela e comprende.

14 Vide, El destrui e on no reconstrui,
trapi un person, lasa no abri.

15 Vide, El freni la acuas e los seci,
envia los e los inversa la tera.

16 Con El es potia e cautia,
El es la enganada e la enganor.

17 El malgida conselores,
e El loci judores.

18 El laxe la lias de res,
e sinturi sua lombos.

19 El malgida pretes,
El suverti la potiosas.

20 El sutrae parla de la fidosas,
e prende bon judi de la veas

21 El versa despeta sur prinses,
e laxe la sintur de la nobiles,

22 nudi la profondas de oscur,
e trae lus a la ombra morin,

23 alti nasiones e destrui los,
estende nasiones e gida los a via,

24 priva xefes de mundo de mentes,
fa ce los vaga en vacua sin via—

25 los xerca sieca en oscur sin lus,
El fa ce los vaga como enebriadas.