Capitol 1

1 On ia ave un om en la pais Uz, ci ia es nomida Job. Acel om ia es sin culpa e reta, e un ci ia teme Dio, e ia vade a via de malia. 2 Sete fios e tre fias ia nase a el. 3 Sua posesedas ia es ance sete mil oveas, tre mil cameles, sinco sento duples de boves, sinco sento asinos fema, e un familia multe grande; tal ce esta om ia es la plu grande de tota la fies de este. 4 Sua fios ia vade e ia fa un festa en la casa de cadun a sua aniversario; e los ia envia e clama per sua tre sores per come e bevi con los. 5 Lo ia es tal, cuando la dias de sua festas ia fini, ce Job ia envia e santi los, e ia leva temprana a matina, e ia ofre ofres ardeda seguente la numero de tota los. Car Job ia dise: “Cisa mea fios ia peca, e ia renunsia Dio en sua cores.” Job ia fa tal continuante.

6 Aora lo ia aveni a la dia cuando la fios de Dio ia veni per presenta se ante Iaue, ce Satan ia veni ance entre los. 7 Iaue ia dise a Satan: “De do tu ia veni?” Alora Satan ia responde a Iaue, e ia dise: “De vade a asi e ala en la tera, e de pasea a supra e a su en lo.”

8 Iaue ia dise a Satan: “Esce tu ia considera mea servor, Job? Car on ave nun como el en la tera, un om sin culpa e reta, un ci teme Dio, e vade a via de malia.”

9 Alora Satan ia responde a Iaue, e ia dise: “Esce Job teme Dio per no cosa? 10 Esce tu no ia crea un sepe sirca el, e sirca sua casa, e sirca tota lo cual el ave, a tota lados? Tu ia bondise la labora de sua manos, e sua sustantia ia aumenta en la pais. 11 Ma estende tua mano aora, e toca tota lo cual el ave, e el va renunsia tu a tua fas.”

12 Iaue ia dise a Satan: “Vide, tota lo cual el ave es en tua potia. Sola a el mesma, no estende tua mano.” Donce Satan ia vade a via de la presentia de Iaue. 13 Lo ia aveni a un dia cuando sua fios e sua fias ia come e bevi vino en la casa de sua frate la plu vea, 14 ce un mesajor ia veni a Job, e ia dise: “La boves ia aradi, e la asinos ia come a lado de los, 15 e la sabeanes ia ataca, e ia prende los a via. Si, los ia mata la servores con la borda de la spada, e me sola ia evade per dise a tu.”

16 En cuando el ia parla ancora, un otra ia veni ance, e ia dise: “La foco de Dio ia cade de la sielo, e ia arde la oveas e la servores, e ia consuma los, e me sola ia evade per dise a tu.”

17 En cuando el ia parla ancora, un otra ia veni ance, e ia dise: “La caldeanes ia fa tre bandes, e ia ataca rapida la cameles, e ia prende los a via, si, e ia mata la servores con la borda de la spada; e me sola ia evade per dise a tu.”

18 En cuando el ia parla ancora, un otra ia veni ance, e ia dise: “Tua fios e tua fias ia come e bevi vino en la casa de sua frate la plu vea, 19 e vide, un venta grande ia veni de la deserto, e ia colpa la cuatro angulos de la casa, e lo ia cade sur la jovenes, e los es mor. Me sola ia evade per dise a tu.”

20 Alora Job ia leva, e ia lasera sua roba, e ia rasa sua testa, e ia cade a tera, e ia adora. 21 El ia dise: “Nuda me ia sorti de la utero de mea madre, e nuda me va reveni ala. Iaue ia dona, e Iaue ia prende a via. Bondiseda es la nom de Iaue.” 22 En tota esta, Job no ia peca, no ia acusa Dio de malcondui.