Capitol 6
La cuatro amis ia vade a casa de Unai, do sua jenitores ia es preparante la come de sera.
Amets ia saluta la xices:
“Alo, como vos es asi!”
“Papa, nos vole parla de un cosa importante con tu”, Unai ia dise, fante sinias con la testa indicante ce el no vole ce sua madre escuta los.
“Mea ameta”, Amets ia dise, “me vade parla con la xices per un momento”.
“Bon!”, Nahia ia responde de la cosina.
La cuatro amis e Amets ia sorti a la jardin.
“Sur cua vos vole parla?”, Amets ia demanda.
“Nos ia entra en la portable de Julen Aberatsa…”, Unai ia comensa.
La oios de Amets ia comensa abri…
“…e nos ia trova demostras ce el es la person ci ia paia la asasinas de la du visinas de Galduherri matada…”
Amets ia comensa ave problemes per respira…
“… e nos ia trova un projeta per fini con la omes de la vileta, per espulsa poi la femes e la enfantes, e construi un otel asi, pos destrui tota la casas”.
“No tan rapida…”, Amets ia proba respira. “Esce vos ia pote entra en la portable de Julen Aberatsa?”.
“Si, Oihan ia fa lo”.
“E vos ia trova demostras ce el ia paia la asasina de nosa visinas?”
“Si”.
Amets ia envia un mesaje a la padres de la amis de Unai, ci ia ariva en des minutos a la jardin de la casa. Los ia entra tra la porta retro, car Amets no ia vole ce Nahia descovre los.
“Esce lo es vera, cua tu ia dise a nos en la mesaje?”, Aritz ia demanda. “Esce Oihan ia pote entra en la portable de Julen?”
“Si”, Oihan ia responde orgulosa.
“Bon, nos va envia esta informa a la polisia e nos va proba prisoni Julen Aberatsa”, Aritz ia ajunta. Ipar e Argider ia suporta acel idea.
“Ta ce Dio aida nos!”, la cuatro amis ia dise.
Pos un semana, Julen Aberatsa ia es prendeda par la polisia, e sua casa ia es esplorada. Los ia trova demostras ce el ia soborna an plu politicistes de la provinse, e sua tentaculos ia ariva an a la capital de la rejion.
En la prosede legal, el no ia pote defende se, car la demostras ia es multe clar, e an si los ia es furada, el ia pote fa no cosa. Multe persones en otra locas de la provinse ia vole fini con el, par causa de la multe furas cual el ia fa longo tota la rejion.
La condena ia apare en la jornales local, car usual no cosa aveni en acel rejion:
En la site Aberatsiri, a 29 de agosto 2025, esta Corte Provinsal furni un declara de culpablia contra Julen Aberitsi, de eda legal, comersiste, como autor respondosa de la atas demostrada seguente:
Atas demostrada
- Lo ia es instituida ce la acusada ia paia sobornas entre 2014 e 2019 a ofisiores publica, per oteni lisensas manejal per construi la xeferia de sua compania, Aberatsa SA, en locas do lo no es permeteda, en un viole clar de la lege de urbanisme.
- Lo ia es ance demostrada ce la acusada ia paia volente un membro de un grupo de crimin organizada per esecuta la asasina de du individuas, la senior Etxeko Galduherrian, e Ander Galduherrian, con la intende de elimina ostaculos personal e economial a sua interesas comersial. Esta asasinas ia es esecutada susedosa, e un lia causal direta entre la paia e la matas ia es concluinte mostrada.
- La corte trova ance ce la acusada ia ave projetas de proba espulsa la viletanes de sua vileta, par menasa, menasa covreda, presa economial, e malusa de sua potia economial, per clari tera per construi un otel lusosa.
- A fini, lo es ia demostrada ce la acusada ia promove e ia esecuta la construi de un comersia en tera non-urbanible, en viole de regulas de urbanisme e ambiente, par reportas falsida e permete otenida de forma frodante.
Fundas legal
La atas diseda a supra constitui la crimines de:
- Sobornas continuada
- Solisita e soborna per comite asasina (a du veses)
- Menasas e forsa
- Malusa de potia economial
- Crimines contra usa de tera e regulas ambiental
Tota la ofendes ia es fada per benefica economial, e con iniora consensa per la lege e la vives uman.
Judi
La Corte par esta condena a Julen Aberitsi a:
- 45 anios de prisoni
- Un multa de €6,000,000
- Desconstrui de tota la construidas nonlegal
- Compensa a la familias de la vitimes
- Restora de la teras afetada a su propriores legal
La condena es declarada final, con custas enforsada a la acusada.
“Lo no ia es un mal estate”, Oihan ia dise a sua amis en la cabana.
“Me no crede ce lo va fini tan pronto”, Haizea ia ajunta. “E tu ancora va dise no cosa a me…”
“No cosa sur cua?”, Oihan ia demanda.
“Sur cua tu crede ce me es parlante?”, Haizea ia demanda.
“Bon, me… no sabe… sur cua…”, Oihan ia comensa dise, nervosa.
“Silenti e besa me, stupida!”, Haizea ia dise en cuando el ia besa Oihan.
Izan, turnante se en dirije a Unai, ia enspira, ma Unai no ia lasa ce el parla, el ia besa Izan direta.
A la dia ultima de estate, la cuatro amis ia reuni con sua jenitores:
“La Asosia de Galduherri ia solve la crimin”, Unai ia dise. “Cisa lo es la ora de lasa a nos la proteje de la vileta, esce no?”
“Ci debe ‘lasa a vos’ acel taxe?”, Amets ia demanda.
“La Asosia de la Corvo”, Oihan ia responde.
Nun de la jenitores ia parla.
“Cisa…”, Amets ia dise pensosa. “Cisa…”