Capitol 5

Cuando la cuatro amis ia ariva a la cabana, Unai ia demanda a Oihan:

“Oihan, esce tu no ave conoses de informatica?”

“Si”, el ia responde. “Me ia studia informatica a universia”.

“Donce tu ave conoses de pirata de rede?”

“Bon… en teoria… si”.

“Nos es sola asi, e nun pote oia tu…”, Unai ia ajunta.

“Si, me ave conoses de siberocupor, en fato, me es un de la plu bones de mea scola”.

“Bon, me va nesesa ce tu, prima, crea un paje ueb per mea compania, Aseres Trikimailu SA”.

“Oce, me pote vade a casa”.

“No! Tua padre va es ala e el va vole sabe cua tu fa. Prende tua portable e veni asi. Me sabe ce nos ave no interede asi ma me es serta ce tu va pote fa alga cosa”.

“Si, no problem. Alga cosa plu?”, Oihan ia demanda.

“Si, me ia demanda me esce tu ta pote entra en la portable de Jon Aberatsa. Me vole sabe esce el ave alga projetas en sua portable sur cual el vole fa en nosa vileta. Cisa el ia contata otra persones, o otra companias, o el ave alga cosa susia…”

“U, cua tu vole trova de susia en sua portable?”, Oihan ia demanda con un rieta.

“Tu sabe a cua me refere”, Unai ia responde sarcasmosa.

Oihan ia sorti de la cabana per vade per trae sua portable. En cuando el ia es asente, Unai ia demanda a la xicas:

“Me no sabe multe bon cua nos pote fa aora”.

“Perce nos no vide cua Oihan trova en la portable de Julen, e proba comunica con la posible comprores? Si on indica a los alga susia cual nos trova, on pote deteni la investi de otra companias, e tal, Julen no va ave probable sufisinte mone per la compra e per la construi…”, Izan ia dise.

“Cisa… ma, cua aveni si nos no trova alga cosa susia?”, Unai ia demanda.

“E si nos pote relata la asasinas con el?”, Haizea ia demanda.

“Nos an no sabe esce el es la asasinor o si el ia comanda la asasina…”, Una ia ajunta.

“Tu no es multe positiva oji, Unai!”, Izan ia responde. “On va vide prima cua Oihan trova en la portable de acel om e, a pos, nos va vide cua nos va fa”.

“Bon, bon, tu no nesesa cria a me”, Unai ia responde a Izan. An si el ia cria, per Unai, Izan sempre ia es multe bela. El ia sempre es enamada de acel xica.

Oihan ia ariva con la portable, e pos ensende lo e lia lo a interede, el ia comensa codigi alga cosa.

“Me ia crea tua paje ueb en mea casa, profitante ce mea padre no ia es ala”, el ia dise. “E me ia crea un adirije de eposta relatada con tua compania. Ance, me ia envia un eposta a Julen, ci ia abri lo”.

El ia comensa tecli per fa alga cosa sur cual la otra amis no ia sabe cua lo es e, pos alga tempo, el ia dise:

“Nos es en la portable de Julen!”

“E esce el va sabe ce nos es ala?”, Haizea ia demanda temosa.

“No, no, me ia es multe cauta”, Oihan ia ajunta. “Si el descovre alga cosa, el va pensa ce algun de Rusia ia pirati sua portable”.

“Bon”, Unai ia dise, plu calma. “Esce tu pote trova alga cosa susia? E me no vole bromas!”

“Lasa ce me vide”, Oihan ia dise. E el ia comensa tecli rapida per alga tempo, cual, per la otras, ia pare nonfinable. Pos alga minutos (plu ca des-sinco), el ia trova un documento cual ia pare es interesante.

“Regarda!”, el ia cria. “Me ia trova un documento cual demostra ce Julen ia soborna alga politicistes per pote construi en la loca do la compania es aora. A ante, lo ia es un loca protejeda do nun ia pote construi.

“Bon!”, la otra tre ia cria.

“Esamina la faturas”, Haizea ia dise a Oihan. “Cisa nos pote trova alga cosa sur la asasinas”.

“Si, clar!”, Oihan ia dise. “Me va trova la fatura cual indica ce el ia paia alga asasinor per mata la du omes de nosa vileta: 500 euros per person, e cisa el va pote evita paia la imposta de corpora”.

“Lo ia es sola un idea, Oihan!”, Haizea ia dise. “Me no sabe como nos pote solve la crimines cual ia aveni en nosa vileta…”.

“No cura per acel, nos va trova la asasinores”, Unai ia dise, en cuando el ia abrasa Haizea.

La vose de Oihan ia velia los de sua silentia triste.

“Tu, tu, tu!”, el ia cria. “Totas, veni vide esta! Esta om ave un arcivo nomida ‘Aberatsiri’ e, a en, otra nomida ‘Galduherri’. Ta ce nos vide cua es a interna”.

El ia abri la arcivo, e el ia trova un mapa de como Gelduherri ta deveni: un otel jigante, con un campo de tenis, con otra cosas. On ia ave no cosa de la vileta. En la arcivo de Aberatsiri, la cuatro amis ia trova un otra arcivo nomida “Aberatsi-famul”.

“Espeta!”, Unai ia esclama. “Abri acel documento!”

Pos abri la documento, Oihan ia esclama:

“Perce!? Perce lo debe es en la lingua antica!? Ma ci parla el oji!?”

“Lasa ce me leje lo”, Unai ia dise calmida.

“Bon, a radis, lo nara la istoria de la familia, de como los ia compra tota la teras importante de Aberatsiri, de como los ia ave un gera istorial con Gelduherri, de la projeta de… espeta…, si, de destrui la vileta e converti lo a un vacanseria… Ma cua el vole fa con la persones?”

“Esce el dise alga cosa de la persones?”, la otra ia demanda.

“No, me trova no cosa asi. Oihan, esce on ave un otra documento?”, Unai ia demanda.

“Me va xerca con la nom de nosa vileta entre tota la documentos, cisa me pote trova alga cosa”.

La xerca ia dona un documento, cual ia ave un codigo.

“U! Si lo ave un codigo, esta sinifia ce lo es alga cosa importante!”, Oihan ia ajunta.

“Ma nos no ave la codigo”, Haizea ia comenta.

“No cura per esta”, Oihan ia dise alga bravatosa, “lasa me ocupa”.

Pos alga tempo, el ancora no ia pote trova la codigo.

“Ancora no?”, Haizea ia demanda.

“Si vos vole, vos pote vade per pasea en la vileta, me va consentra plu bon si me es solitar”.

La du xicas ia sorti, ma Unai ia resta con el.

“Cua aveni? Esce lo es difisil?”, el ia demanda a Oihan.

“Si, me no sabe perce, ma esta documento debe es multe importante car me ia proba tota cual me ia fa con la otras e lo es clar alga cosa cual Julen no vole ce otras sabe”.

“Me crede ce lo va es relatada con la asasinas de nosa vileta”, Unai ia dise, ma a se mesma plu ca a Oihan.

“Ance me crede lo”, Oihan ia ajunta.

Pos alga atentas, el ia susede.

“Brava!”, el ia dise. “A fini!”

“Lodas!”, Unai ia ajunta.

“Me crede ce lo es bon ce la xicas no es asi, me no sabe cua nos va trova asi”, Oihan ia ajunta.

Los ia trova un documento, du faturas per paia la asasina de du persones, e un conversa con algun ci ia pare alga mafior.

“Nos ave la probas”, Unai ia dise. “Regarda, la datas es prosima a cuando la asasinas ia aveni. Abri la fotos”.

Oihan ia abri prima la documento e ia clica a la fotos, cua ia mostra la du corpos mor de la visinas de Galduherri ci ia es asasinada.

“U!, grasias a Dio la xicas no ia es asi per vide esta”, Oihan ia dise.

“Tu ta es joiosa de consola Haizea, esce no?”, Unai ia dise con un rieta.

“Ma… cua tu dise?”, Oihan ia comensa parla turbosa.

“O, me ia vide como tu regarda el, no atenta asconde lo a me!”, Unai ia dise suriente.

“Bon, lo es serta. Me gusta Haizea”, Oihan ia confesa. “Ma tu es enamada de Izan, e de cuando nos es mera peti!”

“Si, me no ave problemes per reconose lo”, Unai ia responde.

“E perce tu no ia dise alga cosa a el?”, Oihan ia demanda.

“E cua me va dise: ‘Izan, me es enamada de tu de cuando nos es peti?’ E cua si a pos el no senti la mesma? Cua va es la situa entre nos?”

Lo cual ambos no ia sabe es ce la xicas ia veni ja e los ia oia la parte ultima de la conversa entre los.

Haizea ia covre sua boca cuando el ia oia la conversa de la xicos. A pos, en vose basa, el ia dise a Izan:

“Esce tu ia oia cua Unai ia dise?”

Izan ia comensa roji.

“Silenti!”, el ia pote dise poca a pos.

“Atende”, Haizea ia comenta. “Me recorda ce en la comensa de la estate tu ia dise a me ce tu vole pasa plu tempo con…”

Izan ia covre la boca de Haizea.

“Silenti, Haizea! Los va oia tu!”

“U, Izan es enamada de Unai! Unai es enamada de Izan!”

“Silenti, Haizea! E me remente tu ce Oihan es enamada de tu!”

“Si, me es surprendeda. El es sempre amin con me, ma me ia pensa ce lo es sola car nos es amis”.

“El no es tan amin con me, Haizea!”, Izan ia responde.

“Esce no?”

“No!”

“Bon, Unai es sempre amin con tu…”

“Silenti, nos fini esta conversa aora!”, Izan ia dise probante resta calmida.

El ia bate la porte e ia dise:

“Xicos, como vos vade con la desifri?”

Los ia entra e ia vide la du suriente.

“Nos ia pote abri la arcivos, e nos ia trova demostras cual indica ce Julen Aberatsi es la person ci ia paia la asasinor de nosa du visinas. E, ance, el ave un projeta de asasina tota la omes prima, car el pensa ce los ta pote es parte de la Asosia de la Corvo. A pos, es va espulsa la femes e enfantes, o asasina los si los deside ‘no coopera’, como diseda par la documento”, Oihan ia esplica.