Capitol 4

Pos alga tempo, Amets ia ariva a casa, do Unai ia es espetante car el ia sabe ce sua padre vole parla con el de la libro.

“Unai, veni a la salon, ce me vole parla con tu”, Amets ia dise e, pos cuando ambos ia entra, el ia clui la porte.

“De do tu ia prende esta la libro?”, el ia demanda.

“De la casa de Etxeko”, Unai ia responde.

“E cua tu ia fa en sua casa?”

“Rexerca”.

“Rexerca cua?”

“Alga cosa de…”

“De la asasina?”

“Bon…”

“Vera? Un om es asasinada e tu e tua amis deside ce la plu bon es proba trova la asasinor?”, Amets ia comensa eleva sua tono.

“Nos no ia xerca alga proba per trova la asasinor, ma per trova…”

“Cua?”

“La Sosia de la Corvo”.

La fas de Amets ia deveni blanca.

“Cua… cual Sosia de la Corvo?”, el ia demanda.

“Me no sabe, padre, ma cisa tu sabe alga cosa…”, Unai ia comensa dise.

“Cua tu es inventante, Unai? Esta no es un bon momento per bromas!”

“Me no broma, padre! Esce tu vole parla vera?”

“Perce tu dise lo? Me no vole parla de asurdas!”

“E perce tu no parla plu bon de tua tatua? O de la tatua ce la padre de Oihan ave, cual es la mesma ca la tua?”

Amets no ia sabe cual dise.

“Me ia leje en la libro cual tu ia prende, de la Sosia de la Corvo, de la istoria de la Galduherri, e me ia trova en la casa de Etxeko un jornal con la foto de Julen Aberatsa, ci vole construi un otel en nosa vileta. Ma, lo coaveni, el es eritor de la familia ci es atacante nosa vileta e nosa popla de la eda medieval. Tu va parla o no?”

Amets ia senta se car el no ia sabe cua dise.

“Como tu ia descovre tota esta? Lo es un secreta de la vileta, solo la omes conose lo”.

“Bi aspikob boniki puki”¹.

La fas de Amets ia deveni tan blanca, ce Unai ia pensa ce alga mal pote aveni a sua padre.

“Como, como, tu…”

“Esce tu va parla?”, Unai ia demanda.

“Trae acua a me, me no pote crede esta”.

Pos bevi acua, el ia demanda.

“Esce tua amis sabe alga de la contenidas de la libro?”

“Me ia tradui lo a los”.

“Txa!”, el ia cria. E el ia prende sua telefoneta e ia envia alga mesajes. Pos sinco minutos, Aritz, Ipar e Argide ia es en sua casa, totas con sua enfantes e con la fas multe, ma multe seria.

Amets ia comensa parla:

“Me no sabe como tu ia pote aprende la lingua antica, ma tota cual tu ia leje en esta libro es la secreta de nosa vileta, cual ia resta gardada per sentenios…”.

“Julen Aberatsa vole destrui nosa vileta, me crede ce ance el conose la ‘secreta’, padre”, Unai ia dise.

“Esta es alga cosa cual nos ia sabe, e nos debe pensa a alga cosa per fa…”, Aritz ia comensa dise.

“Donce, tota vos es un parte de la Sosia de la Corvo”, Haizea ia dise.

“Xux”, Ipar ia dise, “esce tu vole ce Ane descovre lo?”

“Esce Ane no sabe lo?”, Unai ia demanda.

“Nosa sposas no sabe ce nos es un parte de la Sosia de la Corvo. Los crede ce nos ia abandona lo cuando nos ia sposi”, Argider ia ajunta.

“Mama sabe no cosa?”, Izar ia demanda.

“No, e el va segue sin sabe”, Aritz ia dise. “Nos sabe ce la familia Aberatsa vole destrui nosa vileta, car esta luta ia comensa en la eda medieval e pote fini sola cuando un de ambos familias fini con la otra”. La ricas sempre vole plu e plu, e nosa vileta es un esemplo contra tota cual es la sosia de acel tempo, e de nosa tempo, me ta dise”.

“Si, car nos vive sin consumisme, cual es la util usada par la ricas aora per controla la popla”, Amets ia dise.

“Par esta nos no ave la mercatos cual nos ave!”, Haizea ia dise.

“Me comprende perce tu no ia lasa ce me compra la mesma vestes como la xicas de la sites!”, Izar ia ajunta.

“Par esta”, Argider ia responde. “Nos es libre, es nos vole continua es tal. Nos ave proprias comun, la…

“Dalabot kobadik!”, la cuatro amis ia dise a la mesma tempo.

“Esce vos sabe an acel?”, Aritz ia demanda.

“Mea fio es multe intelijente, como tu pote vide”, Amets ia dise, orgulosa.

“E acel pote es alga mal en esta momento!”, Ipar ia ajunta.

“En cuando vos es discutente cua nos debe o no debe fa, Julen es asasinante nosa popla!”, Izar ia cria. “Nos debe fa alga cosa!”

“Nos, la Sosia de la Corvo, no vos. Vos es la futur de la vileta, e nos no pote lasa ce vos fa alga cosa en relata a esta”, Ipar ia dise. E la otra padres ia aproba. “Nos no vole ce vos fa alga cosa fol, oce?”

Silenti….

“Oce?!”

“Si, oce!”, la cuatro ia responde.

“E no cosa a vosa madres”, Ipar ia ajunta.

“Oce”, la cuatro ia repete.

La tre amis de Unai e sua padres ia abandona la casa.

“Tu ia oia lo, ta ce vos oblida tota esta, e no cosa a tua madre”, Amets ia dise. E con acel frase, el ia fini la conversa.

La cuatro amis ia asembla denova en la cabana.

“Donce, nosa padres ave un asosia, cual esiste de la eda medieval, e a cual los no lasa ce on parteni”, Oihan ia comenta.

“Si, acel pare es lo cual ia aveni en la casa de Unai”, Haizea ia ajunta.

“E perce nos no crea nosa propre asosia?”, Izar ia demanda.

“Nosa propre asosia?”, Oihan e Unai ia es surprendeda.

“Si! Ta ce nos crea nosa propre asosia!”, Izar ia dise, multe serta de sua parolas. “Si me recorda coreta, en la comensa de nosa vileta, on ia ave egalia entre omes e femes, e nosa padres ia dise a nos ce nosa madres sabe no cosa de la Asosia de la Corvo, e, ance, los no vole ce nos proba aida nosa vileta contra la conspira de Julen Aberatsa. Perce nos cuatro no ave nosa propre asosia per defende nosa vileta?”

“Acel es un multe bon idea!”, Haizea ia cria.

“Me acorda”, Oihan ia ajunta.

“Ance me”, Unai ia responde.

“E como nos va es nomida?”, Haizea ia demanda.

“La Asosia de la Corvo es ja prendeda”, Oihan ia dise, con un rieta.

La cuatro amis ia silenti, cadun pensante sur un nomi cual pote es stilosa por la asosia. Alga minutos ia pasa e, a pos, alga minutos plu, ma nun ia trova un nom sasiante.

“Perce no… La Asosia de Galduherri?”, Unai ia demanda. “Nos vole salva nosa vileta, e nos no es parte de la Asosia de la Corvo…”.

“Me acorda”, Oihan ia ajunta. “Lo es simple e direta”.

“Me ance”, Izan e Haizea ia responde.

“Bon, nos ave ja un nom, e un loca per reuni”, Unai ia dise.

“Aora es la ora de comensa labora!”, Oihan ia cria. “E… cua nos pote fa?”.

“Me crede, ce la clave de tota esta es con Julen Aberatsa”, Unai ia dise. “Donce, ta ce nos vade visita Aberatsiri”.

“Bon, la Asosia de Galduherri comensa sua investiga!”, Haizea ia dise joiosa.

E la cuatro amis ia sorti de la cabana per prende la bisicles, con cual los va vade a la site prosima.

Aberatsiri no ia es como Galduherri. La du locas ia es tan simil como la note e la dia. En cuando Galduherri ia es un vileta peti, con poca persones, e poca construidas alta, Aberatsiri, per nosa amis, ia pare como New York. La distantia entre ambos locas no ia es multe grande, e la vista ia es stonante: la via ia es paveda a poca tempo pasada e, per vade en dirije a Aberatsiri, la xices ia debe desende, donce los no ia nesesa esforsa multe. Un susede de faias, cuercos e castanias ia depinta la vista con la colores de la fini de estate e la comensa de autono, en cuando la aira fresca ia caresa la fases de la cuatro amis, ci ia nesesa apena pedali.

“Tota esta vole Julen Aberatsi vole fura de nos”, Unai ia dise.

“Esce esta zona entre la du vilas parteni a Galduherri?”, Izan ia demanda.

“Si”, Unai ia ajunta. “La vileta ia compra multe teras en la eda moderna, car los ia vive de cultiva. Aberatsiri ia vive de comersia e, a pos, de industria; par esta, los no ia nesesa multe teras, spesial car la comersia ia es dirijeda en loca oposante a la situa de Galduherri, car cuando la comersiores ia proba usa nosa vias sin paia, la abitores de Galduherri ia defende sua teras como sua asendentes ia fa en la pasada. Tu debe considera ce, en la sentenio prima de Galduherri, la vileta ia sufri multe atacas de la familia Aberatsi, car los no ia pote permete un vileta libre; a causa de esta, la popla de Galduherri ia aprende la arte de la gera, e los ia es e multe bon gerores e multe bon conosores de la montes. Par esta, tota esta teras ia resta sola monte, car los ia parteni a nosa vileta, e sua abitores ia usa los, su la leges de dalabot kobadik”.

“Nosa vileta ancora dedica se a cultiva”, Oihan ia ajunta. “Ma no tota nosa familias fa lo”.

“Si, me sabe lo”, Unai ia responde. “La plu de nosa jenitores labora aora en la sites visina, an en Aberatsiri. Lo es normal ce la sites crese e, la site la plu grande engoli la plu petis. Aberatsiri ia fa acel con la viletas a otra lado, e par esta ia crese multe en la comensa de la eda contempora. Ma sua limita en nosa lado no ia move de la momento cuando nos asendentes ia compra la teras prosima e, esta la familia Aberatsi no ia gusta; ci ia proba e con ofres de compra e con menasas prende nosa teras. An tal, nosa asendentes no ia cura de mone, vos sabe lo multe bon”.

“Si”, Haizea ia spesifia. “Lo pare ce, de la comensa de Galduherri, sua abitores no cura de mone, e de cuando nos es peti nos aprende la valua de un vive simple. En ajunta, nos ave fama de es ostinosa!”.

E la cuatro ia rie en cuando los ia ariva a Aberatsiri.

La site ia es modernida a poca tempo pasada. La vias ia es renovida, e tota la veculos ia es eletrical.

La zona industrial, par la cual los ia entra a Aberatsiri, ia ave construidas multe alta, plen de vitros, como en la sites grande. La xices, ci no ia vade ja a Aberatsiri de cuando los ia es peti, car los ia ave “no cosa per fa ala” (tota la jovenes de Galduherri ia repete acel frase de cuando los ia es enfantes, cisa car los ia aprende lo de sua padres).

“Cuando Aberatsiri ia deveni New York?”, Oihan ia demanda.

“Lo no es tan impresante!”, Izan ia dise.

“Bon, ta ce nos no perde tempo con la vistas de cuatro construidas”, Unai ia dise. “Me ia trova en interede la loca do la compania de Julen es locada, Aberatsa SA. Nos debe vade a destra e, a pos, a sinistra”.

“Esce tu sabe ce lo sempre aveni tal?”, Oihan ia comenta. “Prima a destra e, a pos, a sinistra”. E el ia rie.

“E cua tu vole ce me fa?”, Unai ia demanda. “Me no ia deside construi la compania, esce no?”

La cuatro ia vade en dirije a la construida ma Izan ia para subita.

“Para! Cua nos va fa cuando nos ariva ala?”, el ia demanda.

“Me no ia pensa a alga cosa”, Oihan ia responde.

“Mmm… lo es un bon demanda”, Unai ia ajunta. “Cua me ia pensa es…”

“Cua tu crede, ce nos es ‘La Club de la Marcia’ e nos va solve la problem?”, Haizea ia rie.

“A! Me no ia recorda acel naras!”, Oihan ia ajunta. “La autor ia para scrive a alga tempo, esce no?”.

“Si”, Unai ia responde. “Me no sabe perce el ia fa acel, la racontas ia es interesante. Me ia vide ce el ia publici otra libros, ma por me, la plu interesantes ia es acel naras per enfantes cual tota de nos ia leje cuando nos ia es peti. Cisa el va comensa scrive los denova?”

“Alo! Esce nos pote consentra en lo cual nos ia veni per fa asi?”, Haizea ia demanda.

“Si, padron!”, Oihan ia ajunta.

“Txa!”, Haizea ia responde. “Silenti!”.

Los ia ariva a la construida de la compania Aberatsa SA. Multe moderna, con un stilo simil a tota la construidas moderna cual es difusada tra la mundo. La construida ia es covreda con paneles grande de vitro, cual ia estende de la solo a la teto. Acel paneles, limpa e briliante, ia refleta la sielo como si los ia proba desapare en lo. La construida ia pare fria e distante, an si la sol ia traversa lo sin resiste, inondante lo con un radia blanca cual ia permete vide la marmo de la solo cual, en ajunta a la estetica de la interna, ia sembla plu un clinica dental ca cualce otra cosa.

“E cua nos pote fa aora?”, Izan ia demanda.

“Espeta per vide!”, Unai ia dise en cuando el ia desende de sua bisicle e ia entra en acel construida. “Reveni pos un duiora”.

“Bon dia”, un fem joven ia dise de la otra lado de la table cual ia es en la entrada. “Bonveni a Aberatsa SA. Como me pote aida tu oji?”, el ia demanda con un vose cuasi automata.

“Me vole parla con la senior Julen Aberatsa. Mea nom es… Aitor Trikimailu, de la familia Trikimailu (si, me sabe ce la nom familial ia es traduida de la sua orijinal en eres cuando nosa familia ia veni a un sentenio pasada). Mea padre ia envia me car el vole parla de negosias con la senior Aberatsa. Me crede ce el es interesada en compra fabricerias de aser, e totas sabe ce on no ave plu bon aser ca Aseres Trikimailu SA”².

“Bon, bon”, la fem ia dise, sin sabe cua responde a la parolosia de Unai. El ia prende la telefon e ia parla con algun ci, en teoria, ia es Julen Aberatsa.

“La senior Aberatsa no ia oia parla de Aseres Trikimailu SA, ma el ia es interesada en fa negosias con totas ci vole. Per favore, segue me”.

Acel fem ia gida Unai asta la ofisia de Julen Aberatsa e el ia colpa la porte.

“Senior Aberatsa”, el ia dise en cuando el ia abri la porte, “la senior Aitor Trikimailu es asi”.

“A! Bon”, el ia dise en cuando el ia leva se de la seja. “Per favore, entra e prende un seja. Me no ia conose tua compania, e me no ia pote trova lo a interede. Esce tu pote parla a me plu de lo, per favore?”

Unai, pos presa manos con Julen Aberatsi, ia senta se e ia comensa parla, inventante en la mesma momento cuando la parolas ia sorti de sua boca. Grasias a Deo el ia leje multe libros, e ia conose la vocabulo de negosias.

“Alo, senior Aberatsi. Me va es direta, car nos parla tal en Aseres Trikimailu SA. Nos ia es un compania peti, ma nos ave un projeta de crese par 70% en esta anio, cual segue un crese par 50% en la anio pasada. Mea padre mesma ia vole veni, ma el ia deveni malada a la ora ultima e me ia debe veni en sua loca. Me sabe ce nos ta debe envia un eposta, ma tu no ia espeta nos probable. Ance, nos prefere un trata plu personal, per conose plu bon la persones con ci nos va fa negosias”.

“Me debe dise ce me es stonada. Me ia oia nunca parla de tua compania, e me no trova lo en interede. Plu, la nom, no es multe bon elejeda…”

“Me sabe lo, e me ia dise lo a mea padre, ma lo es nosa nom familial traduida de la eres orijinal: cleasaí. Nosa familia, en la eda medieval, ia es conoseda tal, me no sabe la razona. Ma… bon… me crede ce nos ave cosas plu importante per discute, esce no?”.

“Si, si. Esce tu vole alga cosa? Cafe? Te?”, Julen ia dise.

“No, no, multe grasias. Esta es un contata prima e, cuando me ariva a casa, me va envia a tu un folio con tota la informa nesesada. Ance, me va crea un adirije ueb car, an si mea padre no gusta lo, me sabe ce lo crea un bon senti a la contatas futur”.

E, pos dise adio a Julen Aberatsa, el ia sorti de la construida, do sua amis ia es esperante el con la bisicles per reveni a Galduherri.

“On ave cosas per fa”, Unai ia dise.