Capitol 1

Los no ia sabe cua fa. Oihan ia ariva ja la prima, ma la otras ia segue el poca tempo a pos.

“Cua nos va fa?”, Haizea ia demanda.

“Me no sabe”, Oihan ia responde a el, con sua mente en otra cosa.

Los ia vade ja a pasea a la montania e, cuando los ia reveni a la vileta, a la vileta peti de Galduherri, los ia trova du autos de la polisia, e tota la vileta ensircante alga cosa cual los no ia pote vide… asta cuando Izar ia dise:

“Esce acel es… sangue?”

Sangue, si, lo ia es sangue. Un rio peti de sangue ia sorti de la loca ensircada par totas.

Etxeko, la om la plu vea de la vileta, ia resta reclinante sur la solo, con un xuta cual ia fora ja sua testa. Unai ia vide ce acel om ia ave alga cosa en sua mano, cual ia resta cluida con fortia.

“Perce nun ia abri sua mano?”, Unai ia pensa e, profitante ce la polisia ia es distraeda parlante con la visinas de la vileta, el ia prende con rapidia la paper cual la vea Etxeko ia ave en sua mano; e el ia sorti de ala. Strana, Etxeko ia ave en sua braso un tatua de un corvo, cual Unai no ia recorda vide a ante. Unai no ia pote fa otra cosa per el… estra trova ci ia fa acel crimin cual ia turba la vive calma de Galduherri.

La cuatro amis ia reuni en la cabana cual ia es situada en la limita de la vileta con la bosce.

“Perce tu ia dise ce un reuni ia es urjente?”, Izar ia demanda.

“Silenti!”, Unai ia clama. “Regarda cua me ia trova en la mano de Etxeko”, el ia dise en cuando el ia mostra la paper.

Oihan ia prende lo, e ia estende lo sur la table. Lo no es ia multe grande, ma lo ia ave un desinia bizara, con un testo an plu bizara.

Deadod ad Galduherri, dup vindita ekomonom. Deadod ad krov-vilag!¹

“Esce esta no es…”, Izea ia comensa dise.

“… la lingua antica de nosa provinse?”, Haizea ia completi la frase.

“E como nos va sabe cua la testo dise?”, Oihan ia demanda.

Unai, ci ia sembla perdeda en sua mente, ia dise:

“Mori a Galduherri, la ora de venja ia ariva ja. Mori a la vileta de la corvo!”

“Cua?”, la otra tre ia cria a la mesma tempo.

“Mori a Galduherri, la ora de venja ia ariva ja. Mori a la vileta de la corvo!”

“E cua acel parolas vole dise?”, Haizea ia demanda.

“En cual anio nos es?”, Unai ia demanda. El ia pare es en transe.

“2025”, Izar ia dise. “Perce tu demanda lo?”

“No cosa”, Unai ia responde, ancora transin. “No cosa”.

Cuando los ia ariva a sua casas, la come de sera ia es preparada.

“Unai!”, Nahia, sua madre, ia cria a el cuando el ia entra tra la porte de la casa. “Esce tu sabe la ora? Esce tu no ia sabe cua ia aveni a Etxeko?”

“Me ia vide el, madre”, Unai ia responde en cuando el ia senta a la table.

“Esce tu ia vide… la corpo…?”, Nahia ia comensa dise.

“Si, con la xuta traversante sua testa”, Unai ia dise en cuando el ia comensa come la sopa.

“Esce tu es xocada?”, la padre ia demanda.

“No, a esta dias on pote vide cosas simil en la televisador”, Unai ia responde.

La du jenitores ia regarda lunlotra, e ia dise no cosa.

“Un demanda, jenitores…”, Unai ia comensa dise, “esce la corvo ave alga relata con nosa vileta?”

Amets, sua padre, ia comensa tose. Pos bevi alga acua, el ia dise:

“Perce tu ia demanda acel?”

“Me ia vide ce Etxeko ia ave un tatua de un corvo en la braso”.

La du jenitores ia oserva lunlotra ma los ia dise no cosa.

“Cua aveni?”, Unai ia dise. “Perce vos ia regarda lunlotra?”

“Bon”, Amets ia dise. “On pote parla pos la come de sera…”

Unai ia vade a la salon, do sua jenitores abitua a vide la televisador pos la come de sera.

“Cua tu ia vole dise a me sur la corvo?”, Unai ia dise.

Nahia ia regarda sua sposo, e ia dise: “La dia ia ariva, me vade a leto”. E el ia sorti de la salon.

“Bon, Unai”, Amets ia comensa dise. “La corvo es un simbol cual sola alga persones de nosa vileta ave tatuada en la braso”.

“E cua sinifia?”, Unai ia demanda.

“Bon… la corvo es la simbol de un asosia cual ia esiste en esta vileta de sua comensa. Tu sabe ce la vileta Galduherri es conoseda como un de la viletas la plu antica de la provinse ma la nom veni de la lingua antica de la abitores orijinal: galdu herri, popla perdeda”.

“Si, me ia conose acel istoria”, Unai ia responde.

“Bon, la razona de acel nom no ia es ce la vileta ia es perdeda en la montes, ma par causa de la abitores, ci ia es “perdeda”, car los no ia vole segue la normas de la sosia medieval. Los ia respeta no la res no la pretes, los ave egalia entre omes e femes, los no ia vole paia la impostas reial, los no ia teme la nobiles cuando los ia ariva… La otra persones ia crede ce los ia es loco e “perdeda”. Los ia es espulsada de tota viletas de la provinse, e los ia ariva a esta loca do nosa vileta ia es construida. Esce tu sabe perce los ia eleje esta loca?”

“No”, ia es la responde a Unai.

“Car los ia vide un corvo en media de la plano”.

“Plano? Nos es entre montanias!”, Unai ia cria.

“Si, ma nos es en un plano entre montanias, e en esta spasio peti los ia construi Galduherri, la vileta perdeda, de la popla perdeda e, como simbol, los ia eleje la corvo”.

“E perce los ia tatua se con la corvo?”, Unai ia demanda.

“Alga persones eleje tatua se con la corvo car los vole, on ave no otra razona”, Amets ia dise.

“Tan strana!”, Unai ia dise.

“Vos la jovenes fa multe cosas strana!”, sua padre ia responde. “E vade ja a dormi!”

Unai ia vade a sua leto. Pos cambia sua vestes, el ia pensa: “La tatua de la corvo es alga cosa cual mea padre no ia revela a me”. Amets no ia nota lo, ma Unai ia vide como el ia estende la manga de sua camisa cuando el ia mensiona la corvo.