LA XERCA PER PAHOA
Introdui · Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7

Capitol 7

La armada ia es frontinte la Bosce Oscur e, como la tito ia dise a el, Joan ia desgaini la spada Pahoa e ia mostra lo a la bosce. No cosa ia aveni.

“Esta es strana.” – Joan ia pensa. “La tito ia aida sempre me, ma a esta ves…”

Subita, la lus de la spada ia comensa es plu briliante e lo ia covre la bosce. La arbores ia deveni soldatos.

“Cual es esta?” – un de la cavaleros de la Planos Furtiva ia dise. “Nos debe combate contra los?”

Un de la soldatos ia vade a Joan e ia ajena, disente: “Alo, re Jizan de Jincuo. La Bosce Oscur ia espeta tu tra tota la tempo asta cuando la predise es realida. Oji la rena va reuni denova. Oji la rena Jincuo va es un denova.”

La soldatos ia abri un via en media e ia lasa ce Joan, la Cavaleros de la Planos Furtiva e la soldatos de Sancuo pasa. Los ia ajunta se pos los.

Tal, los ia monta rapida asta ariva a la campo de batalia. Joan ia envia la tito con un mesaje a la re Lizan.

Esta ia reseta lo cuando el ia es regardante tra la fenetra.

“Mea re: me, Joan, tua cavalero, reveni ja de la rena Jincuo, ultra la Mar Triste, pos oteni la spada Pahoa. Asi me es, mea re, per defende tua rena e la rena Jincuo. Comanda ce la soldatos sorti de la castel cuando tu vide la brilia azul a la otra lado de la campo do la tradores es situada.”

La re Lizan ia regarda tra la fenetra e ia vide un lus a la otra lado.

“Mesajor, prepara la soldatos, car oji la rena Lincuo va reseta sua re.”

“Pardona, mea re?”

“Me comanda ce nun dise ‘re’ a me, car on ave sola un re, Joan la re de Jincuo. Comanda ce la soldatos sorti de la castel.”

La poca soldatos ci ia resta en la castel de Lincuo ia sorti de la murones e ia ordina se ante la castel.

Cuando un lus azul ia traversa la campo, la soldatos de Lincuo ia ataca la armada de Tazan, cual ia es atacada en la otra lado par Joan.

En acel dia, la Batalia Grande ia aveni denova, car la rena Jincuo ia destrui tota sua tradores.

La soldatos de Tazan ia cade la un pos la otra, spesial cuando Joan ia ataca con sua spada, traversante la linias de la enemis. El ia xerca Tazan, per fini la trador ci ia vole destrui la rena de Lizan e ia profita de sua asentia per fa lo.

En la media de la batalia, el ia trova Tazan.

“Tu merita mori asi.” – Joan ia dise.

“Veni per mata me!” – Tazan ia cria.

Ambos cavaleros ia combate; la ruido de la spadas ia es plu alta ca lo de la armadas. Alga soldatos de Tazan ia atenta ataca Joan en cuando el ia es combatente la re Tazan, ma los ia es vinseda.

Pos alga oras de combate, Tazan ia cade a tera, e Joan ia pone Pahoa tra sua cor. En acel momento, un tito ia apare e ia ataca con sua beco la corpo de Tazan. Joan ia gania la batalia.

La armada de Tancuo ia sede e ia jura fida a Joan.

En esta momento, un caro ia veni de la loca do es la rena de Sancuo.


La porte de la castel de Lincuo ia abri, con un caro cual ia porta la re Lizan e la caror.

Cuando el ia ariva, la re ia desende e Joan ia ajena.

“Mea re,” – Joan ia comensa parla – “asi es tua cavalero, ci ia reveni tan pronto como posible…”

La re ia pone sua manos sur la spalas de Joan, e ia leva el. Pos esta, el ia ajena, disente: “Mea re Joan, eritor de la rena Jincuo, sola senior de la tera, asi es tua servor Lizan. Me ia manteni la rena asta cuando tu veni, como lo ia es prometeda par la casa de Linzan.”

La caro con Sazan ia ariva e el ia ajena ante Joan. “Mea re Joan, eritor de la rena Jincuo, sola senior de la tera, asi es tua servor Sazan. Me ia manteni la rena asta cuando tu veni, como lo ia es prometeda par la casa de Sanzan.”

La Cavaleros de la Planos Furtiva ia ajena e ia dise: “Nosa re Joan, eritor de la rena Jincuo, sola senior de la tera, asi es tua servores, la Cavaleros de la Planos Furtiva. Nos ia manteni la Planos, como los ia es prometeda a la re Jizan.”

E tota la soldatos ia ajena ante Joan, ci ia leva la spada Pahoa a la sielo.

Cuando el ia fa esta, la tito ia reposa sur la spada e un lampo ia colpa la spada, ma no cosa ia aveni a la avia.

La nom de Jizan ia apare scriveda a un lado de la lama, e “Jonan” ia apare en la otra.

“Perce ‘Jonan’ apare en loca de ‘Joan’?”

“Car nos no nesesa sutrae la -n- per indica ce la frates ia es separada, car la rena es ja unida denova.”

Tal, la rena Jincuo ia es refundida sur la tera su la re Jonan, ci ia governa con sajia e respeta per sua popla.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 19 setembre 2021 (08:26 UTC).