LA XERCA PER PAHOA
Introdui · Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7

Capitol 2

Joan ia entra a en la castel. Un mesajor ia ariva a sua casa, situada en la munisipa Linzin, e ia dise ce la re nesesa sua presentia, tan pronto como posible. Temosa ce la re va es cisa la vitim de un atenta de asasina, Joan ia vade direta a la castel.

“Asi me es, mea re.” – Joan ia dise en cuando el ia entra a la Salon Real.

“A! A fini, tu ariva! On debe parla sur un cosa multe importante, Joan.”

“Cual lo es, mea re?”

“Me ia reuni con la nobiles de la Tre Familias e nos ia fa un conversa multe interesante. Los ia parla sur la lejenda de la fundi de Lincuo.”

“Sur la re Jizan? Cual aveni?” – Joan ia demanda.

“Tu sabe ce la re ia debe migra de sua rena orijinal pos perde la Batalia Grande, coreta?”

“Si, ala el ia perde sua spada… Como lo ia es nomida?” – Joan ia demanda.

“Pahoa.” – la re Lizan ia responde. “La spada Pahoa.”

“A si, Pahoa…”

“Tu sabe ce un predise esiste cual dise ce el ci pote trova la spada es la eritor vera de la rena…”

“Mea re, tu no vole ce me —” – Joan ia comensa dise.

“Si, me vole ce tu xerca acel spada e trae lo, e tal tu pote es coronida como la re legal de Lincuo.”

“Ma, mea re, si me vade per xerca la spada, ci va proteje tu e la rena? Me crede ce esta es un idea de la Tre Familias per teni me estra la rena e mata tu.”

“Tu sabe ce la armada es sempre fidosa a la re de Lincuo e la nobiles no va atenta mata me.” – la re Lizan ia dise.

“Ma ance, tu sabe ce on no conose la situa de la rena de la re Jizan. Me an no sabe como la rena es nomida.”

“Sola la membros de la familia real conose la nom de la rena Jincuo.”

“Jin… Jincuo?”

“Si, acel es la nom de la rena de la re Jizan.”

“E do es acel rena?” – Joan ia demanda.

“Ta ce on vade a la Biblioteca Real. Ala on pote trova tota la informa cual on nesesa.”

E ambos ia sorti de la Salon Real per vade a la Biblioteca Real de la rena Lincuo.


La Biblioteca Real de la rena Lincuo ia es un de la salones la plu importante de la castel de la re Lizan. En lo, la manoscritos la plu importante de la rena, como ance mapas, leteras e libros variosa, ia es mantenida afin los ci vole aprende sur la pasada pote usa los. La biblioteca ia ave du portes: un porte secreta par cual la re ia pote entra de sua castel, e un otra porte, gardada par vijilores, par cual eruditas ia pote entra. Sur sua scafales on ia trova no polvo, car la re ia asinia un limpor de ci sua sola taxe ia es manteni la biblioteca limpa.

La re Lizan ia vade a la zona de mapas de la Biblioteca, e ia prende un mapa de la tera. Pos estende lo sur la table en la sentro de la biblioteca, el ia parla tal: “Regarda, Joan, esta es la mapa de la tera. Nosa rena Lincuo es asi, a la ueste, car nosa asendentes ia debe fuji pos la destrui de Jincuo. Per ariva ala, tu debe sola vade a la este.”

“E cual me va trova ala?” – Joan ia demanda.

“Esta es nonposible per sabe. On no ave mapas de teras estra nosa rena, car nos ave no esplorores, no cavaleros per esta taxes. Tu sabe ce, con la menasa de la rena Tancuo, on no pote permete perde un sola cavalero.”

“Donce, perce tu envia me? Sola car la nobiles ia crea esta escusa afin me pote es —”

“Me sabe lo, Joan, ma on ave no alternativa. Nun va sabe ce tu es estra la rena, e la re Tazan no va atenta ataca la rena si el crede ce tu es asi. Aora, prende esta mapa, e vade per trova la spada Pahoa e reveni asi tan pronto como posible. Me espera vive per vide tu denova.”

“Mea re, me va fa como tu dise, e me va atenta fini esta taxe, tan pronto como la destina permete me.”

“Vade, Joan! E recorda ce tota la rena depende de tu.”

Tal, Joan ia asende a sua cavalo e ia vade a sua casa per prepara la viaja a la este.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 19 setembre 2021 (08:26 UTC).