LA XERCA PER PAHOA
Introdui · Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7

Capitol 1

Joan ia es un cavalero en la rena Lincuo. Amada par tota la sitadanes, el ia es la plu saja de tota la cavaleros de la re e, par esta, el ia consela el sur problemes de la rena.

La re Lizan ia es un re saja, ci ia reseta un rea povre e ia es atacada a cada anio par la rena visina, Tancuo. Par esta, lo cual la re Lizan ia fa prima pos deveni re ia es parla con la re visina, Tazan, ci ia es sua tio. El ia oteni pas con la constrinje ce la rena Lincuo debe paia a la rena Tancuo la dui de sua recolie anial. La re Lizan ia aseta, car el no ia vole ce Tazan destrui la rena, e el ia ave no alternativa.

An tal, la re Lizan ia deveni multe vea e, car sua enfantes ia mori en la gera ultima ante oteni pas, la re Tazan ia vole profita e oteni la rena (car el ia es la membro major de la familia la plu prosima). La re Lizan no ia vole ce esta aveni: el ia ama sua popla e ia cura los, en cuando la rena Tancuo ia es un tirania.

Per esta, la re ia clama a Joan e ia dise a el: “Joan, como tu sabe ja, me es vea e me no ave enfantes ci pote erita la rena Lincuo. Par esta, me ia deside ce tu va es la re prosima de Lincuo.”

“Me?” – Joan ia demanda. “Ma, mea re, tu sabe ce me es sola un cavalero, me no ave sangue real. Como tu crede ce la nobiles de la Consilio va reata?”

“La Consilio debe segue como la re comanda, Joan.”

“Me no es serta esce la nobiles va aseta esta, ma, car lo es tua desira, me va fa como tu vole, mea re.”

A la dia seguente, la re ia asembla la Consilio de la rena Lincuo, do la xefes de la Tre Familias reuni a cada mense tre.

“Mea re, nos es asi, car tu ia demanda per nosa presentia.” – Mizan ia dise.

“Cual es la tema sur cual tu vole parla con nos, mea re?” – Nizan ia demanda.

“Como tu sabe ja,” – la re Lizan ia comensa parla – “me ia deveni vea e, car on ave no eritor per la rena, me ia debe pensa sur lo cual me va fa afin la re Tazan no ajunta nosa rena a la sua.”

“E cual es tua proposa, mea re?” – Xizan ia demanda.

“Pos pensa multe, me ia deside ce la cavalero Joan va deveni re pos mea mori.” – la re Lizan ia responde.

“Joan?” – Mizan ia demanda con vose confondeda. “Esce tu refere a la cavalero Joan, comandor de la armada real?”

“Si.” – la re Lizan ia responde.

“Ma, mea re…” – Nizan ia comensa dise. “Como tu sabe ja, Joan no es un nobil e, como nosa lege dise, sola nobiles asede a trono. Esta es nosa lege, cual ia es scriveda de la comensa de nosa rena.”

“Me conose la lege, nobil Nizan.” – la re Lizan ia responde. “Ma me debe remente tu ce la re pote sempre cambia lo cuando lo es nesesada. Lo cual me vole es manteni nosa rena unida e protejeda contra la ataca posible de la rena Tancuo, e tota sabe ce si me eleje un de vos como mea seguente, nun de la otras va aseta lo, car la Tre Familias ave la mesma diretos.”

Los ia resta cuieta. Pos alga tempo, Mizan ia parla.

“Cisa, mea re, lo cual ta es plu bon es ce, pos tua mori, la Consilio ta deveni la sola forma de governa.”

“Tu sabe, nobil Mizan, ce lo es nonposible, car nosa rena ia es fundida como rena e, como la predise nara: ‘Sola como rena tu pote survive, sola su un sola testa la rena Lincuo pote survive.’”

“Ma, mea re, acel es un predise multe antica. On no sabe esce lo es vera…” – Xizan ia dise.

“Nos ia segue esta tra tota nosa istoria e, ance, lo ia es scriveda en la lege de la rena ce sola un re pote governa.” – Lizan ia dise. “Me ia deside ce la cavalero Joan va es la re, e me vole ce vos aseta el e aida el como vos ia fa con me.”

“Tua parolas es comandas, mea re.” – Mizan ia responde. “Nos va fa como tu vole, an si lo no es scriveda en nosa leges, ma la futur de la rena es plu importante e nos sabe ce tua deside es la plu saja.”

“Grasias, nobil Mizan. Me no espeta un otra responde de tu. La Consilio ia fini sua reuni: vos pote vade.”

La nobiles ia sorti de la salon e de la castel de Lizan, ma los ia reuni en la castel de Mizan.

“Me no sabe vosa opina,” – Mizan ia comensa – “ma me no vole aseta un cavalero como nosa re. Nosa familias ia aida la re de la comensa de nosa rena, e si el no ave eritores, donce un de nos debe erita la governa. Si lo no es posible, me crede ce lo es plu bon ce on reuni la Consilio.”

“Vos sabe” – Xizan ia dise – “ce nosa rena es peti e ave sola tre munisipas: Linzin, nosa capital, Xenzin e Minzin. Cada de nos pote governa un e, a pos, reuni la Consilio, per problemes jeneral.”

“Un idea multe bon!” – Nizan ia dise. “Ma cual nos pote fa per oteni potia? Car la armada va segue la parolas de la re e donce va suporta Joan.”

“E cual pote aveni si Joan no es asi per reseta la trono?” – Xizan ia demanda.

“Cual? Esce tu vole —” – la otra du ia dise.

“No, me no vole mata el, ma nos pote envia el estra nosa rena, convinse la soldatos ce el es un trador, e, cuando el reveni, fini el.” – Xizan ia responde a los.

“E como nos va convinse la re per envia el estra la rena?” – Nizan ia demanda.

“Atende! Me crede ce me sabe ja como on va fa lo.” – Mizan ia dise. “Esce nos no ave un nara en cual la re-fundor de esta rena ia perde sua spada en sua tera e, pos multe aventuras, ia veni asi per fundi la rena Lincuo?”

“Tu ia comprende mea projeta.” – Xizan ia responde. “La lejenda dise ce sola la eritor vera de acel re pote trova la spada. Si nos envia el per xerca lo, el va es perdeda e no va reveni, car lo es nonposible ce on trova la spada. E, si el ta oteni la spada, nos va pote convinse entretempo la armada ce el es un trador, ce la spada no parteni a la re-fundor, e ce el vole sola oteni potia.”

“Nos nesesa un reuni urjente con la re.” – Xizan ia dise.


“Mea re, multe grasias per aseta la demanda de tua servores umil.” – Mizan ia dise en cuando el ia entra a la Salon Real de la castel de la re Lizan.

“Cual es acel proposa cual vos ave?” – la re Lizan ia demanda.

“Nos ia revide la Libros Antica e nos ia trova la nara de la fundi de la rena Lincuo. La fundor de nosa rena, tua asendente Jizan, ia debe abandona sua rena pos la Batalia Grande. Pos vaga tra la tera, el ia fundi esta rena.”

“Me conose la istoria de mea asendentes, nobil Mizan.” – la re Lizan ia responde. “Cual tu vole dise con esta?”

“Tu debe recorda ce el ia perde sua spada e ce on predise ce sola la eritor vera de la rena pote trova la spada. Afin la popla aseta la cavalero Joan como re, nos ia pensa ce lo va es un vantaje grande si el pote oteni la spada. Tal, la lege no va es desobedida.” – Nizan ia dise.

La re Lizan ia silenti. El no ia pensa sur acel posible, e lo ia es vera ce si la cavalero Joan pote trova la spada, el va trova no compete (car el no ia pote fida la parola de la nobiles sur sua suporta a Joan como re).

“Me crede ce esta es un idea eselente!” – la re Lizan ia dise. “Me va organiza tota afin la cavalero Joan comensa sua viaja, tan pronto como posible. Me vole grasia vos, nobiles de la Tre Familias, car vos ia aida trova un solve a la problem, e ance per tua fida a la rena.”

“Nos fa sola lo cual es nosa obliga, nosa re.” – los ia responde. E los ia parti de la castel.

“Me nesesa ce la cavalero Joan es asi aora!” – la re Lizan ia opina.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 19 setembre 2021 (08:26 UTC).