LA XERCA PER PAHOA
Introdui · Capitol 1 · Capitol 2 · Capitol 3 · Capitol 4 · Capitol 5 · Capitol 6 · Capitol 7

Capitol 6

Un soldato ia entra a la Salon Real.

“Mea re, pardona mea descortesia, ma lo es importante.” – la soldato ia dise.

“Cual ia aveni?” – la re Lizan ia demanda.

“Un armada, tan grande como nosa rena, veni de Tancuo en dirije a nosa rena.”

“Si? Prepara la soldatos! Ta ce tota es preparada per defende la rena! Envia alga soldatos a la viletas de la rena afin la abitores pote refuja en la castel.”

“Si, mea re.”

Un otra soldato ia entra:

“Mea re, un mesajor de la re Tazan de Tancuo desira parla con tu.”

“Ta ce el entra asi.”

“Alo, re Lizan de Lincuo.”

“Cual tu vole?” – la re ia cria.

“Me ia es enviada par la re Tazan, tua tio. El vole demanda ce tu sede afin el no destrui tua rena. El sabe ce tua soldato Joan no es asi e tu ave no posible de vinse.”

“Dise a tua re ce la rena Lincuo va sede nunca a tirania.”

“Como tu vole, ma tota tua sitadanes va mori par tua deside.”

“Vade a via!” – la re ia cria.

La mesajor ia sorti de la castel e ia envia la mesaje a Tazan.

“Oji es la dia en cual me va concista la rena Lincuo, e tal me va es la sola eritor de Jizan.” – la re Tazan ia pensa.

La armada de Tancuo ia avansa, en cuando la soldatos de la re Lizan ia sorti e ia ordina se ante la castel.

La soldatos de la nobiles de la Tre Familias ia avansa plu rapida, e la xefes ia ariva ante la re Tazan.

La re Lizan, ci ia oserva de sua fenetra, car el ia es tro vea per combate, ia pensa: “Como la re Tazan ia descovre ce Joan no es asi?”

En cuando el ia es pensante, el ia vide como la soldatos de la nobiles de la Tre Familias ia para en la media de la campo, en cuando la nobiles ia prosimi a Tazan.

“Ma cual aveni…?” – el ia pensa.

“Alo, re Tazan de Tancuo… e de Lincuo.” – Mizan ia dise.

“Alo, nobiles fidosa de Tancuo.” – la re Tazan ia responde. “Grasias a tua mesaje, me ia conose la situa de la rena Lincuo e, a fini, on va pote reuni ambos renas.”

“Recorda ce tu ia promete lasa ce nos es governores autonom de nosa munisipas.”

“Vos debe es mera fidosa a la re, me no vole la mone de tua viletas, ma cuando on nesesa soldatos per concista la teras ultra la Bosce Oscur, nos va nesesa vos.”

“Tal va aveni.” – Nizan ia dise.

E la tre nobiles ia turna e cria a sua soldatos, ci ia turna e comensa avansa contra la soldatos de la re Lizan.

Pos un batalia longa, en cual la soldatos de la re Tazan ia suporta la soldatos tradosa, la survivores de Lincuo ia fuji a la castel, ci ia clui sua portes e ia prepara per resiste.

La re Lizan ia regarda la sielo e ia dise: “Joan, veni pronto, car si no, tu va trova no rena per governa.”


La barco de Joan ia vola sur la Mar Triste, con ventas cual ia puxa lo.

“Como me va traversa la Bosce Sinvia?” – Joan ia pensa.

La barco ia traversa la Mar Triste en un dia, e el ia ariva a la plaia.

“Bon, aora la Bosce Sinvia.”

A esta ves, Joan ia ave no cavalo per traversa la Bosce, e el ia es temosa par lo cual ia aveni con Zanja.

“Acel vivente ia survive e es en esta bosce.” E ance lo ia noti.

Joan ia traversa pico e pico la bosce, escutante la silentia cual ia pleni tota.

Subita, el ia oia un ruido e ia desgaini sua spada. Esta ia comensa brilia con un lus azul cual ia lumina la zona sirca Joan. “Tal, traversa la bosce va es plu fasil.” – Joan ia pensa. “Ma ance totas va sabe do me es.”

El ia comensa core traversante la bosce, e pico plu tarda, el ia ariva a la tronco sur la pantanes. “Bon, me ia ariva a la media de la bosce.” – Joan ia pensa.

Ma subita Zanja ia apare en la arbores con la membros de sua familia.

“Alo denova, stranjer, esce tu veni per reali tua destina?” – Zanja ia demanda.

“No, me veni per reali la tua.” – Joan ia dise. “La spada Pahoa ia comensa brilia multe forte.”

“O! Un spada majiosa!” – Zanja ia dise.

“Esce tu vola conose plu bon mea ami Pahoa?” – Joan ia demanda.

Subita, la fases de la viventes ia cambia. Tota de los ia comensa parla entre se.

“Cual tu ia dise?” – Zanja ia demanda.

“Me ia dise esce tu vole conose mea ami Pahoa?” – Joan ia repete.

“Tu refere a la spada? Esce lo es la spada Pahoa?” – Zanja ia dise.

“Si.” – Joan ia responde. “Esce tu conose lo?”

“La lejenda es vera!” – Zanja ia dise. “La fini de la Bosce Sinvia va veni!” – el ia cria a la suas. E el ia reveni e regarda a Juan e ia dise: “Prende la spada a la xico e mata el!”

Acel viventes ia comensa lansa petras a Joan, ci ia traversa la tronco de la arbor e ia entra a la bosce denova, cuando un animal ia sorti de la pantan. Lo ia es un spesie de gato enorme, ci ia comensa par dise: “Donce tu es la eritor de la rena Jincuo.”

“Como tu sabe esta?” – Joan ia dise.

“Me ia abita asi, multe ante cuando tua asendentes ia traversa esta bosce.”

La viventes ia sesa lansa petras e ia asembla sirca la animal.

“Gato Grande, tu no debe, tu no debe —” – Zanja ia comensa dise.

“Silenti!” – la gato ia cria. “Tota tua spesie ia mata la plu de la umanas ci ia traversa la bosce en acel tempo. E vos ia es cambiada a lo cual vos es aora.”

“Cual?” – Joan ia es stonada. “Esce los no ia es sempre tal?”

“No, los ia es umanas.” – la Gato ia dise.

“Gato Grande, cisa esta no es la momento per —” – Zanja ia dise.

La Gato ia cria e tota la bosce ia silenti.

“Vos sabe ja perce nos es tal. La Bosce Sinvia no ia es sempre tal. Esce vos ia oblida la encanta?”

“Ma, la encanta dise ce —”

“Cual? Ce nos debe fura la spada?”

“Si…”

“Tu sabe ce la encanta no dise esta.” Gato Grande ia salta sur Zanja e ia crase el contra la tera. “Tu vole sola la potia de Pahoa per tu.”

Zanja ia silenti e ia atenta fuji, ma el no ia pote move. Gato Grande ia turna e ia parla a Joan: “Me va mostra a tu la otra lado de la Bosce Sinvia. Si la predise es vera, tu no ave multe tempo. Salta sur mea dorso.”

Joan ia fa lo cual Gato Grande ia dise e el ia comensa core.

“Cual es acel predise?” – Joan ia demanda.

“Tota de nos ia es umanas ci ia abita en un bosce, ma cuando tua asendentes ia traversa lo, los ia demanda per aida. Zanja ia vole fura los e mata los per oteni cualce ricia cual cisa los ave, e el ia gida los a la pantanes, finjente gida los a la otra lado de la bosce. Cuando cuasi totas ia mori en la pantanes, un tito ia apare subita e ia salva la resta. A pos, el ia encanta nos e ia converti nos a esta.”

“Donce tu es umana?” – Joan ia demanda.

“Si, me es. E la encanta ia dise: ‘Per multe tempo vos va paia per tua crimin, ma cuando la eritor de la rea con lus azul veni denova, vos pote salva vos par aida el.’”

“Par esta, tu es aidante me.” – Joan ia dise.

“Me ia fa multe tempo de vive en un pantan. Me vole ja es umana e continua mea vive.”

En cuando los ia parla, la animal ia para.

“Esta es la fini de la Bosce Sinvia, tu va pote continua tra la Planos Furtiva, ma me no sabe cual es ala.”

“Grasias, mea ami.” – Joan ia dise, e el ia abrasa la Gato, ci no ia sabe reata.

“Grasias a tu, car si la predise es vera, tu va salva nos, e par aida tu, nos ia aida nos e nos ia aprende nosa leson: cuando on aida la otras, on aida ance se.”

Joan ia sorti de la Bosce Sinvia, e el ia nota un lus briliante cual ia sorti de la bosce, cual ia comensa brilia como si la sol ta apare en lo. Esta ia es la encanta, cual ia fini.

Ma aora Joan ia debe segue sua via, e la Planos Furtiva, cuando traversada a pede, ia es multe longa. De la ramos de la bosce un tito ia apare e ia atera sur sua braso.

“Alo denova.” – Joan ia dise.

La avia ia turna sua testa a destra, do el ia vide la cuatro cavaleros ci avansa rapida en dirije a el. Joan ia atenta reveni a la bosce ma, par alga razona, el no ia pote entra. Lo ia es como si un muron nonvidable ia apare.

“E aora? Esce tu va porta me como tu ia fa a ante?” – Joan ia parla con la tito.

Joan ia comensa core traversante la campo, ma la cuatro cavaleros ia ensirca el.

“Alo, stranjer. Nos ia vide tu a alga menses pasada.”

“Perce tu ia vade tan rapida? Nos no ia ave la posible de presenta nos.”

Joan ia regarda los.

“Cual vos vole?”

“Ci es tu, stranjer? Tu traversa nosa teritorio como si lo parteni a nun.”

“Me es Joan, cavalero de la re Lizan de la rena Lincuo, ultra la Bosce Oscur.”

“La rena Lincuo?” – un de los ia dise. “Esce vos conose acel rena?”

“No, me no conose lo.” – la un ia dise.

“No me, no la otras.” – la otra ia dise.

“Nos conose la rena de Sancuo, do la re Sazan governa, ma sua cavaleros ia traversa nunca la Planos Furtiva.”

“La Bosce Oscur” – Joan ia esplica – “es ultra la rena de Sancuo. E cuando on traversa la Bosce Oscur, on trova la rena Lincuo.”

“E tu dise ce tu es un cavalero?” – la otra om ia demanda. “Do es tua cavalo?”

“Me ia perde lo en la Mar Triste.”

“Cual es la Mar Triste?” – la otra cavalero ia demanda.

“La Mar cual es ultra la Bosce Sinvia.” – Joan ia responde.

“La Bosce Sinvia! Tu ia traversa la Bosce Sinvia! Cual es esta? Un broma? Tu dise ce tu ia traversa acel Bosce…”

“A du veses, la un per vade e la otra per reveni.” – Joan ia responde.

“Si on ave alga cosa cual la cavaleros de la Planos Furtiva no aseta, lo es engana. Tu va paia per tua mentis.”

“Ma lo es vera!”

“Desgaini tua spada car la fini de tua mentis ariva ja.”

La cuatro cavaleros ia desmonta e Joan ia desgaini Pahoa, cual ia comensa brilia.

“Atende! Lo es… la spada briliante!”

“Esta pote sinifia sola —”

“No, lo no pote, multe anios ia pasa ja.”

Joan, surprendeda par la reata de la omes, ia demanda: “Cual vos es disente?”

“De do tu prende acel spada?”

“De la rena Jincuo, cual ia es convertida en Cuojin cuando la re Zanji ia vinse mea asendente Jizan.”

“El es la eritor de la predise!” – los ia dise. E la cuatro cavaleros ia ajena ante el. “Pardona nos, nosa re, nos no ia reconose tu. Multe anios ia pasa, e un jenera pos un otra ia nara la istoria de la re Jizan e como el ia perde sua rena. La predise ia parla: ‘E la eritor va pasa ma vos no va reconose el. Ma a un tempo el va reveni, per asembla la fidosas de la re Jizan e per restora la rena Jincuo.’ La ora ia ariva per nos, e nos es preparada per segue tu, nosa re.”

“Me debe vade a la rena de Sancuo, do la re Sazan governa.”

“Prende un de nosa cavalos, e un de nos va vade con un otra.”

Tal los ia comensa traversa la Planos Furtiva, gidada par la tito. La sol ia brilia en un sielo vacua.


La rena Lincuo no ia pote resiste multe plu. No multe comeda e no multe acua, e multe persones en la castel. La lansapetras ia pote rompe la murones prima de la castel, e la sola murones cual ia resta ia es defendeda par pico e pico plu soldatos a cada dia.

Un mesajor ia es enviada de la tendas de Tazan.

“Re Lizan de Lincuo, la re Tazan no vole vide como sua sobrino resta encluida en sua castel, con la popla faminte. El vole pas: el no vole destrui la rena.”

“Si el ta vole pas,” – la re Lizan ia responde – “perce el ia ataca mea rena? Nosa rena no va sede. Libria o mori!”

“Parolas cual sona e resona en la murones de un castel cual oia sola la crias de la popla encluida e faminte. Cuanto plu tu crede ce tu va pote resiste? Esce tu crede ce Joan va reveni?”

“On va vide.” – Lizan ia responde. “Vade a via.”

La mesajor ia sorti e Lizan ia regarda tra la fenetra. El ia fa la mesma a cada dia de cuando la aseja ia comensa, ma, a esta ves, un tito ia vola distante.

“Joan es prosima, me senti lo.” – la re Lizan ia dise.


Joan e la cavaleros ia ariva a la castel de Sazan, senior de Sancuo.

Joan e… alga cavaleros.

“Alo, Joan! Me joia en vide tu… Ci es acel omes?”

“Los es la cavaleros de la Planos Furtiva.” – Joan ia dise.

“Ma, soldatos!”

“Mea senior, ave no ansia! Los veni per aida me. La rena Lincuo va es pronto atacada. Los ia es desendentes de la armada de Jizan, cual ia resta sur la Planos Furtiva.”

“Me no ia sabe esta.” – Sazan ia dise. “Me ia pensa ce los es un popla ci Jizan ia trova.”

“No,” – un de la cavaleros ia dise – “acel popla ia ataca la armada de la re Jizan, e nosa asendentes ia resta ala per combate. Los ia promete no move de ala asta cuando la re reveni per prende los. Oji es la momento en cual esta ia aveni.”

“E me vide ja ce tu ave con tu la spada Pahoa.”

La tre veas ci ia es sentada prosima a la senior ia comensa parla entre se. Un de los ia leva e ia dise: “Desgaini la spada, Joan, afin nos pote vide esce lo es Pahoa.”

Joan ia desgaini la spada e sua lus ia covre la salon. En acel momento, la tre veas e la senior Sazan ia ajena ante Joan.

“La momento ia ariva. La predise ia reali. Tu, eritor de Jizan, veni per reuni la popla ci ia sperde tra la tera, afin Jincuo pote reveni a esiste.”

Joan, ci no ia es abituada a tal trata, ia demanda ce totas ia leva. “Nos no ave tempo: nos debe ateni la rena de la re Lizan.”

“Me no pote vade con tu, car me es ja vea, ma me va envia la soldatos la plu bon per aida tu. La sola menasa cual nosa rena ia ave es acel cavaleros, donce nos no nesesa multe soldatos e tu va nesesa los. Ma, per favore, porta esta a la re Lizan.”

El ia dona a Joan un daga con la simbol de un tito en sua manico, la mesma cual Joan ia ave con se.

“Multe grasias, mea senior.” – Joan ia dise.

“No dise ‘mea senior’, car sola tu es la re de tota nos.” – Sazan ia dise.

A acel note, Joan ia dormi en la castel de la re Sazan. Un tito ia apare en sua sonias: “Doman tu va traversa la Bosce Oscur. Ma ante entra, desgaini la spada Pahoa e mostra lo a la bosce. Tal, tua armada va pote traversa lo.”

E la tito ia desapare.

A la dia seguente, pos cuando la armada ia es asemblada, los ia parti per traversa la Bosce Oscur.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 19 setembre 2021 (08:26 UTC).