Capitol 3

Joan ia sorti de la rena Lincuo e ia segue sua via a la este. Ante entra a la Bosce Oscur, el ia turna e regarda la rena Lincuo. El ia dise esta parolas:

Adio, mea rena amada,
ta ce tua securia es gardada par la sielos,
ta ce tua lus brilia per sempre,
ta ce tu pote resiste oscuria.

Me vade,
me vade e me no sabe si me va reveni,
ta ce me pote revide tu,
ta ce me pote pasea tra tua stradas,
ta ce me pote velia sur tua solo.

Adio, rena Lincuo,
ta ce la re es protejeda e secur,
ta ce no trador, no enemi feri tu,
ta ce tua popla resta sana e secur.

Adio

E, turnante denova, Joan ia entra a la Bosce Oscur. Acel ia es la sola nom cual ia apare en la mapa cual la re Lizan ia dona a el. Pos esta, no cosa ia es scriveda sur acel paper vea e susia.

La arbores de la Bosce Oscur ia es multe alta, e sua folias ia es tan multe densa e compata ce no lus ia pote traversa los. No ruido ia pote es oiada: sola la venta movente la folias. Joan ia deside pasea tan reta como posible, afin el pote ariva a la otra lado de la bosce, ma, pos alga tempo, el ia perde sua espera car lo ia pare ce el no ia move de do el ia comensa. Tota la arbores ia es egal e la bosce ia es mera un colie de los, la un pos la otra, la un a lado de la otra, con apena spasio per traversa.

Joan, fatigada par la labora e la caldia de la bosce, ia comensa marea e ia cade a tera.

---

U-u u-u

Un murmura ia velia Joan. El no ia sabe cuanto tempo ia pasa de cuando el ia cade a tera. Manxada par la fango, el ia leva per xerca ci ia fa acel sona.

U-u u-u

“Ci pote es murmurante?” – Joan ia pensa. El ia ensende un foco per vide plu bon e ia trova, sur un ramo, un tito, ci ia es oservante el.

Joan ia sesa move. Cuando el ia regarda la tito, un recorda ia apare en sua mente. La tito es la simbol de la rena Lincuo, car esta ia es la avia ci ia gida la re Jizan asta la loca do la rena Lincuo va es fundida.

“Alo.” – Joan ia parla con la tito. “Como lo vade?” – el ia dise en prosimi a la avia.

La avia no ia move, e el no ia pare teme Joan. Subita, la avia ia comensa vola, ma el ia para sur un otra ramo e ia turna sua testa per regarda Joan.

“Lo pare ce el vole ce me segue el.” – Joan ia pensa. E car el ia ave no alternativa, el ia deside segue la avia. En cuando el ia es seguente la tito, el ia comensa canta:

Si tu es perdeda, la tito va apare,
segue lo ante ce lo desapare.
Si tu es perdeda e con apetito
per trova tua via, xerca la tito.
En esta oscuria en cual me es,
la tito ia apare per salva me.

“Ma vera,” – Joan ia pensa denova – “acel es un canta cual tota la sitadanes de la rena de Lizan conose, car lo es un canta tradisional. Lo ia veni de la eda en cual… en cual la re Jizan ia es migrante a un nova rena! Cisa la tito ia apare per aida el a trova la sorti de la bosce?”

El ia segue la avia ci, pos alga tempo, ia desapare cuando lo ia traversa la spasio entre du troncos de arbores. El ia segue lo e… ia sorti de la bosce.

“Me no pote crede esta!” – Joan ia cria. “Me ia sorti de la Bosce Oscur!”

El ia atenta trova la tito ma lo ia desapare.

Ante el ia es un campo verde, con erba e flores, cual ia estende asta un colina do el ia pote vide un castel. Asta ala Joan ia gida sua cavalo e ia ariva cuando la note ia es cadente.

“Alo!” – Joan ia cria. “Me es un cavalero ci xerca un loca per pasa la note. Esce vos pote aida me?”

No vose ia responde a el. An tal, pos alga minutos, un person ia apare e ia dise a el: “Ci es tu?”

“Me es Joan, cavalero de la rena Lincuo.”

“De do?”

“De la rena Lincuo, ultra la Bosce Oscur.”

“Resta per un momento.”

Pos des minutos, la porte de la castel ia abri e el ia pote pasa.

“Es bonvenida a la castel de Sancuo. La re vole conose tu.”

“Multe grasias. Esce tu pote dise a me cual es la nom de la re de Sancuo?”

“Sazan.” – la om ia responde. “Ma el no es la re, mera la senior.”

Joan ia vade a la salon de la castel e acel om ia presenta el: “Joan, cavalero de la rena Lincuo.”

Joan ia vide un om sentante sur la trono, ma con no corona no setro. A un lado, tre omes senesente ia reposa cuieta.

“Bonveni a la rena Sancuo, Joan.”

“Grasias per tua cortesia, senior Sazan.”

“On ia informa me ce tu veni de la rena Lincuo, ultra la Bosce Oscur. Esce lo es vera?”

“Si, lo es vera.”

Subita, la tre omes senesente ia regarda confondeda e surprendeda lunlotra, e murmuras ia es oiada en la salon.

“Esce me ia parla alga noncoreta, senior?” – Joan ia demanda.

“No.” – la senior Sazan ia responde. El ia leva de la trono e ia comensa vade en dirije a Joan. “Nos espera ce tu resta per alga dias con nos. Nos no recorda la ves ultima cuando nos ia ave un visitor en nosa rena, e lo es un tradision de la rena de Sancuo ce nos aida la viajores. Ma, Joan, me vole mostra alga cosa a tu. Segue me.”

La re ia abri un porte e ambos ia es introduida a un salon cual ia es… un copia esata de la Biblioteca real de Lincuo!

Stonada, Joan ia para subita.

“Cual aveni a tu?” – la senior Sazan ia demanda a el.

“Esta Biblioteca es un copia esata de la Biblioteca real de Lincuo, mea senior.”

“O, donce cisa mea teoria es vera. Per favore, prende acel libro azul.”

Joan ia asende un scalera e ia prende la libro.

“Asi lo es, mea senior.” – Joan ia dise en dona lo a la senior.

La senior Sazan ia abri lo e ia xerca alga en la libro.

“A! Asi lo es! Esce tu sabe leje, cavalero Joan?”

“Si, mea senior.”

El ia mostra do el ia vole ce Joan leje.

“E pos un via multe longa, me, Jizan, re de la rena Jincuo, pos la destrui de mea rena en la Batalia Grande, ia ariva a la loca cual es nomida Bosce Oscur en nosa arcivos. Car me no sabe esce me va pote traversa lo, mea fio Sanzan va resta en esta feudo e me va traversa la Bosce Oscur con mea fio plu vea, Linzan. Tal, a la min un de mea fios va resta secur.”

“Tu ia dise ce tu veni de un rena ultra la Bosce Oscur e ce acel rena es nomida…”

“Lincuo.”

“Lincuo…” – la senior Sazan ia dise pensante. – “Si tu conose nosa lingua, tu pote vide ce la nomes de la renas fini sempre par -ncuo: tua rena es Lincuo, mea rena es Sancuo, la rena de nosa asendentes es Jincuo.”

“Si. Lo es vera.” – Joan ia responde.

“Ance, la letera prima de cada rena es la mesma como la letera prima de la nom de sua re prima. Per dise, nosa rena, la rena de Sancuo, es tal nomida per Sanzan, e donce me vole pensa ce tua rena Lincuo veni de la re Linzan.”

“Si, lo es multe interesante.” – Joan ia responde.

“Esce tua re es nomida Lizan?”

“Esce tu conose el?” – Joan ia demanda stonada.

“No, e me ia oia nunca acel nom, ma lo segue la regulas de nosa lingua.”

“Cual es acel regula?”

“La re Jizan ia ave du fios: Linzan e Sanzan. Pos cuando ambos ia mori, la seguentes en la trono ia reseta un nom. Como tu sabe, la coda -an mostra nobilia, e la leteras prima segue la regula de manteni la letera prima de la re prima. Ma ambos ia perde la letera -n-, cual es praticada en tua rena, me vide. Esta es un tradision per recorda ce la rea Sanzan ia perde sua frate e ce el no pote es completa.”

“Nos ave ance acel tradision en nosa rena!” – Joan ia dise.

“Oji es un dia per selebra, Joan, car tu veni de la rena ultra la Bosce Oscur, e tu va reali la predise.”

“Cual predise?” – Joan ia demanda confondeda.

“El ci va veni ultra la Bosce Oscur, la eritor de la rena Jincuo, ante segue sua viaja per trova la spada Pahoa, va para en la rena de la frate, afin los conose ce ambos ia survive. Cuando el oteni la spada, el va demostra ce el es la eritor vera e la du renas va es reunida, e la tradores va es eliminada. Tal, unia e pas va rena per sempre sur la tera.”

“Me no ia conose esta predise.” – Joan ia responde.

“Esta predise ia es diseda a Sanzan e ia es mantenida en la libros. Me no sabe ci es la trador a ci el refere, ma lo es clar ce tu es la elejeda, la eritor de la rena Jincuo. Tu va xerca la spada Pahoa, coreta?”

“Si, mea senior. La re Lizan ia envia me per xerca lo, car el no ave enfantes. Tota de los ia mori en la gera contra la rena Tancuo, governada par sua tio.”

“A! Donce nos sabe ja ci es la trador de la predise.”

“Cisa. Me debe xerca la spada afin me pote es asetada par la popla e la nobiles de la rena.” – Joan ia esplica.

“Nos es espetante la ora en cual la du renas uni, afin la enfantes de Jizan pote es denova un. Tu es la elejeda, Joan; par esta tu ave acel nom. La letera J en la comensa de tua nom, e la coda -an, cual es la simbol de nobilia…”

“Ma me no es nobil, mea senior. Me es sola un cavalero.” – Joan ia responde.

“Ci es tua padre?” – la senior Sazan ia demanda.

“Me no sabe lo. Me no conose mea jenitores.” – Joan ia responde.

“Tu es la espera de ambos poplas Joan, e tu debe completi la predise. Tu pote resta asi per alga dias, ma tu debe parti tan pronto como posible.”

Tal, Joan ia resta per tre dias en la castel de Sancuo. El ia trova la imaje de un tito sur la porte de la salones privata de la re.

“Mea senior,” – Joan ia dise a la senior Sazan en un come – “me ta vole demanda sur la tito cual apare depintada sur la porta de tua salones privata.”

“La tito es la simbol de nosa casa, car esta avia ia gida Jizan e sua fios cuando los ia xerca un loca per situa sua rena. Cuando ambos frates ia separa, la tito ia es lo ci ia gida Jizan e Linzan tra la Bosce Oscur.”

Joan ia dise no cosa: el ia es sola perdeda en sua mente, recordante la tito ci ia apare cuando el ia es en la Bosce Oscur.

Post tre dias, el ia parti denova.

“Me ia demanda a la scrivores ce los desinia un mapa per tu. Tu debe vade a la este, e, an si nos no conose tota la teritorios, nos sabe ce la frontera es en la Mar Triste. An tal, per ariva ala, tu debe traversa la Bosce Sinvia. Ma prima tu debe traversa la Planos Furtiva.”

“La Planos Furtiva?”

“Un popla abita ala de multe tempo ante aora. Los es la popla prima ci Jizan ia encontra pos traversa la Bosce Sinvia.”

“E la Mar Triste?”

“Lo es nomida car, seguente la lejenda, Jizan ia parti de sua rena e ia traversa acel mar pos sua defeta en la Batalia Grande.”

“E la Bosce Sinvia?”

“Nos vade nunca ala, car la lejendas dise ce sua abitores es viventes nonconoseda par la umanas.”

“Donce, me va conose los. Multe grasias per tua bonveni. Me va continua mea viaja.”

“Vade, Joan, e recorda ce tu es la espera per du frates ci a multe tempo ante nun ia debe separa.”

Joan ia parti, seguente la mapa. La planos ia es verde, con flores de multe colores. La sielo ia ave un color azul sin nubes e la sol ia brilia. El ia recorda un canta:

A, oji la sol lumina la campos plenida con flores,
oji nos es contente, oji la cavaleros surie,
car nos ia sorti de acel labirinto
nos sempre segue la instinto
de la tito cual parti nunca
de el a ci el dona sempre sua aida.

“Donce, la labirinto de la canta es la Bosce Sinvia.” – Joan ia pensa. La Bosce Sinvia ia es ancora distante, ma el ia pote vide la arbores alta. En cuando el ia es asendente a sua cavalo, un agila ia apare a sua sinistra e ia segue el, ma pos alga minutos esta ia retira.

“Lo es strana.” – Joan ia pensa. “On ave no cosa sur la Planos Furtiva. No arbores, no rios. De do acel agila ia veni?”

Subita, a sua sinistra, un grupo de omes ia apare. Los ia es cuatro, totas con armures, lansias e arcos. Un de los ia ave la agila en sua mano.

“Lo no pare ce los vole fa un conversa amin con me.” – Joan ia pensa, e el ia speroni sua cavalo en dirije a la Bosce Sinvia.

Acel omes ia speroni ance sua cavalos, cual ia pare como si los ia vola tra la planos.

“Me crede ce aora me comprende perce esta planos ave acel nom.” – Joan ia pensa en cuando la cavalo ia core.

Un pluve de flexas ia cade sur el, ma, miraclosa, an no un ia toca el. An tal, cuando el ia es prosima a la Bosce Sinvia, la agila ia ataca el e la cavalo. El ia atenta usa sua spada, ma lo ia cade a tera. El no ia pote reveni per prende lo, car la omes ta catura el, donce el ia continua sin la sola arma cual el ia ave.

La agila ia cloi la colo de Joan par sua garas e el ia colpa la avia, cual ia atenta fa la mesma a la cavalo. Joan ia es multe prosima a la Bosce Sinvia, e un tito ia apare de ala, e ia ataca la agila. Joan ia vide como ambos ia luta en cuando el ia entra a la Bosce Sinvia.

La omes armada ia para e no entra a la bosce. A fini, Joan ia pote reposa.