Capitol 5

La sielo ia es negra ma plenida con stelas. La tito ia desapare denova, e Joan ia reclina sur la arena con sua cavalo.

“Lo es bizara.” – el ia dise a sua animal. “Tota la cantas tradisional de nosa rena es relatada a la istoria de cuando Jizan ia migra per fundi nosa rena. Tra tota esta tempo, me ia canta los e me ia sabe nunca sua sinifia vera.”

Joan ia adormi pensante a sua re.

---

Lizan ia velia en media de la note. El ia es suinte pos un malsonia. El ia vide se mor, en cuando sua rena es ardeda par un armada enemin. An tal, sua corpo ia ave no feri. Esce sua tempo ia ariva? En acel dia, el va fa un reuni con la xefes de la Tre Familias e, a la ves prima, el ia es temosa. El ia sabe ce Joan ia parti a cuatro menses pasada per xerca la spada Pahoa, e la xefes ia comensa insinua ce la cavalero ia mori.

---

A la dia seguente, Joan ia velia con la lus de la sol. El ia comensa colpa alga petras la un contra la otra per crea un axa. El ia vole talia alga arbores per construi un barco. Pos alga oras de labora, el ia pote fa un axa e talia alga arbores. Fatigada, el ia ave famia.

La cavalo ia es comente alga erba de la bosce, ma el ia fini tota sua comeda.

“Cual me pote fa aora?” – el ia demanda a se. “Cisa me pote trova alga en la bosce?”

Ma reveni a la bosce no ia es un idea bon. El ia deside continua sua labora, ma pos alga oras, el no ia pote continua.

“Me nesesa come alga cosa.” – Joan ia pensa. En acel momento, la tito ia apare con alga fruta en sua garas.

Joan ia come e ia continua construi la barco. Pos alga dias, lo va es finida.

---

Mizan, Nizan e Xizan ia saluta la re Lizan cuando los ia ariva a la Consilio.

“Alo, mea re.” – los ia dise.

“Alo a totas.” – Lizan ia responde. “Senta vos, per favore.”

“Grasias, mea re.” – los ia responde.

“Esce nos sabe alga cosa sur Joan, mea re?” – Mizan ia demanda.

“On sabe no cosa de cuando el ia traversa la Bosce Oscur.” – la re Lizan ia responde.

“Me crede, mea re, ce nos no pote espera sempre un cavalero ci es… cisa ja mor.” – Nizan ia dise.

“On ave no atesta ce el ia mori o ce el es vivente.” – la re Lizan ia responde. “On sabe ce la viaja es longa, car el ia debe vade estra nosa rena. Esce algun conose alga cosa ultra la Bosce Oscur?”

“No, mea re.” – Xizan ia dise. “Ma nos no sabe cual pote aveni si a alga dia tu va… mori. Cual nos va fa si la cavalero Joan no va es asi? Cual va aveni a la rena? E si la re Tazan va descovre lo?”

“Me ancora no intende mori.” – Lizan ia responde. “Tu no debe ajita tu sur esta.”

“Ma, cual pote aveni si la re Tazan descovre ce la cavalero Joan no es asi?” – Xizan ia demanda forte.

“Cisa el va atenta concista la rena.” – la re Lizan ia responde. “En acel caso, nos va debe e luta e gania, car si on vole luta, on fa lo sola per vinse.”

“Donce cual es la sujesta cual mea re ave per nos?” – Mizan ia demanda.

“On debe espeta plu, afin la cavalero Joan trova la spada Pahoa e reveni con lo, la plu pronto posible.”

“Ta ce la parolas de mea re es realida.” – la tre ia dise. E los ia sorti de la salon.

La re ia regarda tra la fenetra. “Me no sabe cual ia aveni a tu, Joan” – el ia dise – “ma me espera ce tu reveni con acel spada, car si tu no fa lo, la futur de nosa rena es menasada.”

---

Pos alga dias, la barco ia es finida. An si lo no ia es multe grande, lo ia ave spasio per Joan e sua cavalo, e an la tito si el ta vole veni con los.

Acel dia ia es multe clar, sin nubes en la sielo.

Joan ia puxa la barco a la acua e el ia entra con la cavalo. No tito ia apare a esta ves.

El ia abri la velas e un venta favorable ia fa ce el no nesesa remi. La Mar Triste ia estende tan distante como el ia pote vide, asta do la azul de la sielo ia junta con la blu de la mar. Tota ia ave un sola color.

Pos alga oras, el ia comensa nota ce la color de la acuas comensa cambia. La acuas ia deveni plu e plu oscur, ma sola los cual ia es prosima a la barco. La venta ia para e la barco ia para. El ia prende la remo e ia comensa remi cuando, subita, un serpente maral ia morde la remo, fendente lo en du.

“Ma cual es esta?” – Joan ia cria.

La serpente ia salta supra la barco e ia cade a la otra lado. De color azul oscur, la serpente ia ataca la barco de su, e ia rompe lo a fratos. La cavalo e Joan ia cade a acua, e el no ia sabe cual el va fa. El ia atenta trova la serpente, ma la color de la acua ia es multe oscur e la dia ia avansa ja multe: la note ia prosimi e, con pico lus, trova la cosas ia es multe difisil.

Subita, la serpente ia emerji e ia engoli el, ma Joan, con sua daga en la mano, ia cloi lo a la garga e ia resta suspendeda, torsente la daga con tota sua fortia.

La serpente ia sofoca e ia atenta espulsa Joan, ci, a sua ves, ia comensa abri un buco en la garga per sorti. A fini, el ia sorti, e la serpente ia vade a la profonda de la mar.

Fatigada, covreda con sangue e saliva de la serpente, Joan ia gari un frato de lenio de sua barco e ia atenta xerca sua cavalo, ma el no ia trova lo. El ia comensa move sua gamas, ma el ia deveni tro fatigada e no ia pote resta tal. El ia sumerji.

“Esta es la fini. Pos mea viaja, pos tota cual me ia fa, la predise ia menti. Me va ariva nunca a Jincuo, e la re Lizan va perde sua rena. Pardona me, mea re, car me no ia es la elejeda.”

Un lus ia apare distante: un lus multe briliante, cual ia comensa deveni plu forte e cual ia prosimi.

“Joan. Escuta mea parolas.”

“Un fe de mar?” – Joan ia pensa.

“Esce tu crede ce me va lasa tal tu? Ci ia aida tu, tu crede? Me es la tito ci aida sempre. Me es el ci ia aida Jizan pos cuando el ia perde la Batalia Grande.”

Joan ia nota como un fe de mar con forma de tito ia apare nadante ante el. Acel vivente ia prende el e ia comensa asende, ia estrae el de la acua e ia porta el tra la sielo.

Pos alga minutos, acel vivente ia lasa el sur la arena.

“Me es la protejor de la popla de Jincuo. Tu es la elejeda per reali la predise, Joan. An si la rena Jincuo ia es perdeda, la fios de Jizan va vive per sempre. Tu va es la re de un rena multe plu importante ca Jincuo, car lo va covre tota la tera ultra la Mar Triste. Tu no va nesesa reveni asi cuando tu ia trova Pahoa.”

“E do es acel spada?”

“Vade a Jinzin, e ala tu va trova lo cual tu xerca.”

La vivente ia comensa vola e ia desapare en la sielo.

“E como me va vade a la site Jinzin si me no conose esta tera?” – Joan ia pensa.

Joan ia regarda e ia vide un deserto. Lo ia ave restas de arbores cual ia es taliada a multe tempo pasada. No erba ia crese, e no rio ia es ala: sola la restas de lo cual ia pare un bosce.

Joan ia comensa pasea tra acel loca e ia ariva a un via cual ia dirije el a un castel.

“Un castel?” – Joan ia pensa. “Me ia crede ce tota esta ia es un campo de batalia e ce nun ia survive.” Pos comensa vade a la castel, el ia vide du cavaleros ci prosimi a el.

“Alo, stranjer.” – un de los ia dise.

“Alo.” – Joan ia responde.

“Nos es la vijilores de la Rena.”

“De cual rena?”

Ambos ia rie. “La vijilores de la Rena. Sola un rena esiste sur la tera pos la Batalia Grande.”

“A… Cual Batalia Grande?” – Joan ia demanda, per sabe plu sur los.

“Esce tu no conose la Batalia Grande?” – la otra om ia dise.

“No.” – Joan ia responde.

“La Batalia Grande ia aveni entre la re Zanji de Cuojin e la re Jizan de Jincuo. Ambos ia combate en un batalia cual ia destrui cuasi tota la tera.”

“E ci ia vinse?” – Joan ia demanda.

“La re Zanji de Cuojin.” – un de la omes ia responde.

“E cual ia aveni a la otras?”

“Los ia es lansada a la Mar.”

“A la Mar Triste?” – Joan ia demanda.

“Cual Mar Triste? A la Mar, la sola Mar cual on ave. Esce tu veni de ala?”

“Me ia es pasante longo la costa de la Rena,” – Joan ia menti – “cuando mea barco ia es destruida par un vivente strana.”

“Lo no es multe comun ce on trova omes ci usa un barco. Esce tu no conose la periles de la Mar?”

“Tu debe es un abitor de la otra lado de la Rena.”

“A, si.” – Joan ia dise.

“Los no veni asi. Perce tu veni?”

“Me ta vole conose la re, car on ave multe naras sur el en nosa vileta e nos vole conose el. Me ia porta donadas, ma totas ia es perdeda en la mar.”

“A, esta persones de la viletas. Totas vole conose la re. Veni con nos. Tu es bonvenida a la castel de la re de Cuojin. Cual es tua nom?”

“Mea nom es Joan.”

“Oji tu va conose tua re, Joan.”

Los ia porta el a la castel e ia presenta el en la Salon Real: “Joan, de la vileta de la otra lado de la rena.”

“O!” – la re ia dise. “Me no pote crede lo. A la plu resente cuando un person de la otra lado de la rena ia veni, me ia es multe plu joven. Veni, per favore.”

“Alo, mea re.” – Joan ia dise.

“Par cual causa tu ia veni?”

“Me ia es enviada par mea vileta car on ia ave un discute sur esce la castel e la re esiste o no, car multe tempo ia pasa de cuando un viletan ia veni asi.”

“Lo es vera. E tu ia vole vide lo?”

“Si, mea re.”

“Donce, tu vide ja ce lo es real. Esce tu ave alga otra desira?”

“Em, mea re, me no sabe multe bon dise lo, car me es un viletan stupida…” – Joan ia comensa dise. El ia menti multe bon a la re per convinse el e sua soldatos.

“Ave no ansia sur como tu va pare. Tua re es asi per aida tu.”

“En la vileta on ave un lejenda sur un spada nomida… emmm… Pardona, mea re, me no recorda multe bon sua nom. Me crede ce lo comensa con P.”

“Pahoa?” – la re ia demanda.

“Si! Pahoa.”

“Esce la spada Pahoa es conoseda en tua vileta?” – la re ia demanda.

“Lo es un lejenda narada par la veas de la vileta, sur un spada cual ia aida la re Zanji a vinse sua enemis.”

“A! Vera la spada esiste, ma lo ia parteni a la re Jizan de Jincuo. Nosa re ia vinse acel re e ia oteni la spada pos esclui sua enemis.”

“Donce lo esiste?” – Joan ia demanda.

“Si! Ma la re Zanji ia usa nunca lo. El ia comanda sola ce on prende lo, car lo ia es multe pesosa, e porta lo a nosa castel. Lo es aora en la tesoreria real, car nun pote move lo. Ma Joan, tu debe es fatigada par la viaja. On va fa la come de sera e, pos esta, tu va pote vide lo.”

“Grasias, mea re. Ta ce tu pote vive per multe anios per garda la rena contra sua enemis.”

Ambos ia vade a la comeria, e Joan ia pote come, pos tan multe tempo sin come alga cosa bon. La re ia fa no demandas a el, car el ia vide cuanto famia el ave.

Pos come, ambos ia vade a la tesoreria real.

“Do tua vileta es situada, Joan? Me no recorda ce tu ia dise sua nom. Esce tu veni de Minzin?”

“A… si. De Minzin.”

“Acel es un vileta multe distante! Tra cuanto tempo tu ia es navigante?”

“Me no recorda multe bon, mea re. Me crede ce tre menses. Un vivente ia ataca mea barco e me ia es flotante tra dias…”

“O! E tu fa tota esta per conose tua re! Me va envia con tu alga cavaleros, afin los pote ave mesajes de sua re.”

“Multe grasias, mea re. Nos no merita tan multe.”

Los ia entra a la tesoreria, e Joan ia vide la spada. Lo ia ave un manico e un lama multe strana. La lama ia es curva, e la manico ance. Lo ia ave la forma de un letera S.

“Nun ia pote leva lo.” – la re ia dise. “Me ia atenta lo a multe veses, ma lo es nonposible.”

“O, lo pare pesosa.” – Joan ia menti.

“Perce tu no atenta leva lo?” – la re ia dise.

“Me? No, mea re, como me va pote…”

“Si, si, vade, tua rea comanda tu.”

Joan ia prende la manico de la spada e ia atenta leva lo, ma, sin ce el sabe como, la spada ia es multe plu lejera ca cualce otra arma cual el ia porta.

“Donce la lejenda es vera!” – la re ia dise. “Tu es la eritor de la trono de Jincuo e la predise ia deveni completida.”

“Ma cual predise?”

“Pos multe anios la venjor de Jincuo va veni, de ultra la mar el va veni per venja la perde de la rena, per regania la spada e securi la trono.”

“Cual trono?”

“No la mea. Soldatos!”

La soldatos de la re ia comensa pleni la tesoreria.

“Mata el.” – la re ia comanda. “E lansa sua restas a la mar como nos ia fa con sua asendentes.”

La soldatos ia comensa ataca el, ma la spada ia comensa move solitar, no par la mano de Joan.

La ajilia con cual la spada ia move ia es noncredable e, pos alga minutos, la tesoreria ia es plenida con corpos mor de la soldatos de la re.

La re Zanji ia fuji, ma la spada (si, la spada) ia move en dirije a el, e Joan, ci no ia pote relasa lo, ia segue el. A fini, el ia cloi la cor de la re par lo.

La tito ia apare ante el: “Aora, la predise es realida.”

“A cual trono la predise refere? A la trono de Cuojin?”

“No, a la trono de Jincuo, cual va es restorada ultra la Mar Triste. Tu debe reveni a tua rena, car lo va es atacada par multe enemis.”

Joan ia prende la spada e ia vade a la plaia.