Capitol 5

Sra Bertringer, un mestresa consensa de sua taxes e debes, en la dias presedente ia esperia a ves pos ves en sua mente la serie del organizas festal, con la sola desira de serti lor desenrola egal; an tal, el no ia es sufisinte serta de se per rejeta la pensa ce en alga detalias probable no tota va vade esata longo sua calculas. Total justida. En acel momentos de repetes preparante, el ia vide se stante a la ora fisada a la limina del cabana do la banceta va aveni, e dirijente per ordina la flue del arivores, cadun coreta a sua loca definida. Ma el ia fali previde la fato ce la consentas per aperitivos va bambola ja la disiplina, no sola per la jovenes, ma ance entre la veas. E aora, cuando la state maturinte del carnes rostada ia consela ce, per conserva tota lor jus e gusta, on no ta pospone ataca la platos prima, aora en efeto on no ia pote ateni ce totas leva a la mesma tempo per vade direta a la garaje.

An entre clamas e invitas repeteda, la visitores en la bon sala ia separa de sua sejas sola gradal, como si con regrete. E cuando final los ia sta, grupos zelosa discutente ia reformi instante. Algas ia comensa an senta se denova! Otras ia vade furtiva en dirije a la stalas, xercante per nesesas personal un posible de isoli oportun. Ancora otras ia debe asoluta consulta sua sposa e no ia trova el, en cuando la jovenes, ja sur la patio, ia resta sorda a la urjes “A la table!” e ia continua core corposa pos xicas xamante asta la campos visina. Sola Bignol no ia fali oia la invita jentil. Nonpausante, el ia repone sua strumento en la contenador e ia acrupi espetosa ante la porte del cosina, como la prima ja preparada per labora sua mandibulas.

Tal alga tardi ia aveni en la program.

“Mea dio! La rostas va es tro coceda!” – ia cexa Sra Bertringer en suspira ante la forno grande. Vidente sua espresa misera, la femes presente ia declara consolante – “No problem! Nos vade!” – e los ia comensa puia la omes a la garaje, cortes ma sin esita, tal como on asembla un manada sperdeda, un ata per cual esta femes-cultivores solida ia ave alga capasia.

La garaje ia es ja plen de tumulta cuando Sra Bertringer ia ariva con intendes organizante. Tro tarda! El ia susede apena fisa un conca protejente sirca la nucleo del duple festal Lisette e Louis, ci ia ocupa la sentro de la table. Sirca los Sra Bertringer ia senta senior prete, Sr e Sra Touchard, mestre Bertringer, la tio-avocato de Compiègne e alga relatadas ci, spesial esijosa per un aplica rijida de protocol, ia espeta vidable la loca obligada a lor grado de relata, e ci per esta razona ia presenta se par volunta libre a la sejas coreta. Ma la otras ia senta se, si no par metodos acaso, a la min seguente lor simpatias. La simetria bela, laborosa calculada par Sra Bertringer, ia malversa – sin cualce dana, en fato.

Cuando totas ia senta, lo cual no ia aveni sin ruido e perde de tempo, la mestresa del casa ia lasa ce sua regarda inspetante flota sur la ordina improvisada de la table. Vera, la sena ia conforma sola partal a sua projetas, ma per compensa, el ia ave la plaser de pensa ce cualce noncontentes imajinable no va pote dirije reproxas contra el a pos, si los mesma ia instala se par propre moves entre visinas nonplasente. Dédé e Julot ia es cavaleros a lado de la du portores del coda en la matina. Sola Museta, sempre desfavoreda par la fortuna, no ia sabe bon manobra per oteni un loca plu oportun. El ia senta como un escluida a un fini de la table, entre jovenes bufoninte. De sua surie cuieta, ma intera neutra, on no ia pote divina esce el prende joia o noia de la conversas caososa sirca se. Sra Bertringer, ci ia nesesa par natur crea per se a cada momento curas nova, ia demanda ja a se esce acel om vea no va es frustrada, e esce lo conveni ce on lasa el tan distante. Ja el ia scema como on va pote discreta transplanta el asta persones ecuilibrada de la mesma eda. Ma alora la platos sirculinte con la comedas prima ia para esata ante Museta, e el ia recolie tan asidua tota boles de salada, ajuntante talias larga de jamon, salsix e tarte, ce multe evidente el va ave instante un ocupa interesante. Vera, el ia comensa come nonpausante con tal enerjia del mandibulas ce, contra vole, Sra Cécile ia debe pensa a un coneo entre folios joven de col.

E on ia ave ala Sra Perrin con sua dentes nova desaponable. Ancora el no ia oteni un sertia bastante sur esta suite nova, aora sin buco, e donce, a cada esplode de rie, sua mano ia continua scermi protejente ante sua boca, an si no plu motivada. Dio sabe par cual rus el ia susede afisa se a lado de Sr Denique, acel cuatrodes-sincan potiosa, lejendin conoseda como nonsedente nonsposida! “E bon,” – Sra Bertringer ia jemi pico – “nunca me ia ta pensa asosia acel du, la vidua joiosa e la nonsposo ostinosa! Ma vera elo no pare desplaseda par lo.”

Pos la platos prima, stimulante acompaniada par la zelo creosa de un vino blanca de Pouilly versada de un botela con eticeta de bon anio, la asembladas ia deveni plu comunicosa. Aora vibrante, nonpersepida, tra persones ci a un pico de oras pasada ancora no ia conose lunlotra, on ia ave un esflue de unia corajinte. Los ia ave esperias comun, serta, donce temas de interesa comun per parleta. Lo ia sufisi ce algun mensiona la intercambia del xapos silindre, afin totas ia revive la sena comica a la sorti del eglesa, e ondas de rie vososa ia sperde instante. An la plu diniosas de acel vitimes, ci ia pardona ja longa la duple enganante Dédé e Julot, ia junta se a la ries nonfrenida.

Un spetaculo tan bela e bondiseda lo es, cuando en acorda armoniosa ance la conversa progresa par pasos egal a la serie de platos! Lo es vera ce ance par pasos egal on ia progresa un deseveri de la vestes. Ma perce on ta regrete? “En condui perfeta, on no pote banceta!” – Bertringer ia confida corajinte a sua visinas, ci ance a sua lado ia es cuasi sofocada par la caldia cumulada en la cabana. E sin pospone, Bertringer ia desapone sua jaca, poi imitada par cuasi tota omes, con ce la femes, ci ja a ante ia libri la botones alta de sua robas, ia ave aora no plu modo conveninte de venti se.

Totas ia acorda per loda la salmon en maiones, un regala rara en acel rejion campanial. En acompania eselente de lo on ia ave un xabli pico bruta. Cuando la bove rostada ia ariva, en talias majeste cual su un esterna alga crostida ia conserva sua jus vivente de carne ros, la omes ia desapone sua colares de camisa, a custa del protocol, serta, ma a profita del comforta.

Con la carne de bove on ia traversa a la vinos roja, sin protesta, como conveninte entre persones natural nondisposada a eresias gastronomial. An si lo ia es comun – on ia presenta lo en carafas anonim – la roja densa aljerian, como Bertringer ia dise, ia plase a la palatos, e senior prete Lanternois ia solisita discreta la informa de do Bertringer ia compra lo. “Un vino de misa ideal!” – el ia atesta, lo cual ia pote es sola e nondutable un loda.

Poi la tre femes aidante, gidada par la felisia radiante de Augustine, ia fa un entra rituin, cuasi en prosegue, la un pos la otra, cadun portante du platos sur brasos estendeda, con carne de gal ancora fuminte. Los ia es segueda, egal formal, par Bignol, ci – sentinte en se un velia subita de talentos de servor – ia vole forte colabora. El ia susede porta, intera nonaidada, la cuatro contenadores jigante de pisos fresca, usante per esta no un platon de servi, cual ta es nonorijinal, ma mera sua manos e brasos. Sua jinastia ia es videda e recompensada par aplaudis. Veninte final ia es Biqui, la pastor orfan, ci ia teni la portasalsas.

On ia ateni la culmina de un banceta bondiseda. De alora la conversas ia es puntuada par crias peti de rie sempre plu xiliante. E la jovenes ia deveni sempre plu ruidosa. La enfantes, ja plen sasiada par come, ia comensa move e ata con desbridi perilosa, spesial la asosia asustante Dédé-Julot. Lor descovre la plu resente ia consiste en rampe su la table longa per pinsi gamas nonconoseda. Inisial esta malcondui ia es bonumorosa tolerada, ma la repetes ia irita. Final, car la reproxas suave del jenitores ia resta sin eco, Sra Bertringer ia consela: “Ta ce los jua sur la patio. Los no pote senta tan longa sur la mesma loca. Core a estra, enfantes! Vos va reveni per la deser.”

Finida ia es la armonia bela del comensa. De acel momento cuando la enfantes ia sorti, la grupo ia es nunca plu completa. Lo ia aveni sempre ce un o un otra manca. Sra Bertringer mesma, contra vole, ia dona la esemplo. El ia parti de la table car el ia debe asoluta regarda pico en la cosina. Poi la madres del enfantes sortida ia vade, pos lunlotra, per serti ce la fie cara no ia susi sua vestes formal. De ves a ves ance esta o acel om ia desapare con intende tan fasil divinable ce vera los no ia nesesa indica un escusa, como los ia fa par clixes gastada: “On no pote sempre versa la vino sola a en …” o “Alga pluve sur la carotas de Bertringer no va nose!” o par otra formulas, cisa plu estrema ma no min sufisinte.

Sola per la deser la grupo de table ia deveni denova densa. Totas ia espeta con fases joiosa la apojeo. Lo ia es anunsiada par la tapos forte saltante de botelas de xampania cuando la servores ia posa sur la table acel tortetas de crema e moca, de cual per sua prepara perfeta e presenta artal Sra Bertringer ia es ja longa famosa en la rejion. Poi senior prete, pos un tintina avertinte de sua vitro, par cual el ia ateni un silentia cuasi instante, ia leva e ia dise, conveninte a la situa, la brinda nonevitable. El ia comensa par asentua la vive cristian de la familia Bertringer, traversante a remente como a dudes anios pasada el ia ave la plaser de bondise Lisette, batizante el supra la trogo santa en la eglesa de Autrecourt, car “en acel epoca la madres en nosa viletas ia pari ancora en sua propre casa, tal ce la enfantes ia nase su la teto del jenitores, an si oji nosa femes joven sede plu e plu a la moda nova. Cuando lor tempo veni, los fa ce on gida los a un ospital o clinica de la urbes per reveni con un enfante ci ia reseta la rituo del batiza estra sua vileta de casa. E an tal, esce lo no ta es bela, reserva la ata cristian prima a sua parocia?” Sr Lanternois no ia insiste plu pesosa sur esta tema, multe cara a el, per no dona a pensores libre, cisa presente, ci, ance sin esta, tende tro frecuente egali la ofisia de prete a un emprende comersial, la posible de suspeta ce el atribui a sua colegas urban un competosia nonfidosa. El ia continua, disente como, plu tarda, el ia ave la onora grande de prepara Lisette per la Eucaristia Prima e, aora, lia el par sposi a un om joven de bon familia de ci sua avis, a lado del madre, ia es asta la mori conoseda con respeta en la rejion. No tro detaliosa el ia parla sur la momento prosiminte del separa, cuando la Sra Touchard nova va parti de la ximineria del jenitores per fundi mesma, en un vila visina, sua propre casa, ma esta mensiona ia atrae an tal un pico de larmas a la oios de Sra Cécile, e la padre ia masci sua emosia pos un vitro levada. La prete ia fini en formi desiras per un vive longa e felis en ronda de multe enfantes. Totas ia aplaudi forte, contente ce Sr Lanternois no ia sorti del strutur de retorica sobre e no ia malusa sua direto de parocior per parla plu longa. On ia sta, ia puieta la vitros a lunlotra e ia bevi, a un plu ves, per la sania de la duple nova con multe crias de “vive!”

A la mesma tempo, en cuando alga senioras ia versa la cafe, la femes aidante ia trae la “pos-cafe” tal nomida. Lo ia consiste xef de acel coniac de mirabel distilada a propre casa, un spesiali de la campania de Loren. Ma per la importa de la situa, Bertringer ia ajunta oji ance botelas de otra fontes. Asi un coniac de tre stelas de un sentro nobil de vinos prosima a Bordeaux; asi un coniac de serisas de Fougerolles en la montania Vosges; asi Calvados, acel coniac pal jala de pomas de Normandia, de cual sua gusta de fungos mofosa pote es respetada par sola un palato educada; asi la botelas de formas strana, simil a lanternas, con la Cointreau Triple Sec famosa, e otras, de taies ancora plu larga, con la Benedictin no min famosa, un produida autentica de la monceria de Fécamp, ambos delicata dedicada a la senioras. Tal, a la aveni del sposi su teto de Bertringer, multe provinses de Frans ia partisipa la banceta, cada en sua sustantia la plu bon.

Cuando Sra Bertringer ia proposa a senior prete – “Un pos-cafe, no?” – esta ia responde partal protestante, partal acordante – “Sola du ditos, per favore” – e, ilustrante sua parla par un jesti, el ia pone du ditos orizonal, la un sur la otra, contra la vitro peti per marca la mesura coreta, a la vide de cual, Dédé, ancora su la influe de un vino blanca, furtiva bevida en alga modo, ia comenta subita: “El ave ditos spesa, senior prete!”

“Tu no va silenti?” – la madre ia reproxa embarasada, ma ja on ia rie a tota lados, notante ce Sr Lanternois ave vera ditos plu spesa ca normal, de calibre aprosima la mesma como acel salsixes de sangue de porco, multe gustada e nomida en esta pais boudins. E Sra Bertringer ia confesa riente e rojinte: “Serta, per conforma a tua mesura la altia de nosa vitros peti no sufisi!”

Sr Lanternois mesma ia es tan jentil ce el ia secute en rie e ia remete la noncortesia del xico par parolas moderada: “He, un farsor peti! El ave un capasia agu de oserva.” Ma el ia comprende ance ce, per el ci no gusta jua la rol de intruor, la momento de retira ia ariva. No causada par la comenta de Dédé. Sr Lanternois es tro clar de mente per vide en lo cualce plu ca mera la parla naive e donce comica de un enfante. Otra sintomes es lo cual ia averti el. Cuando on ia rie sur la spesia de sua ditos de boudin, esce el no ia persepi un ironia, an si diseda sola a duivose: “Acel ditos pote distribui bondises solida!” Plu ca la sinifia, la tono ia indica un cuantia de burla, e donce de desrespeta. Plu, la conversa del omes ia lisca a veses a tal referes de cual lor asentua ia es impedida par sola sua presentia. E la xicas! Esce los no espeta sin pasientia asta sua parti per vosi cantas frivol e per comensa la dansas? En tal eserses, pos tal bancetas, alga esedes de parla o jesti es serta nonevitable. “Pecetas pico,” – la bon prete ia conclui – “ma mea loca no es plu asi. Ta ce on maturi sin me la recolie per confesas futur confidable.”

Donce, pos bevi la cafe e “saborea” la pos-cafe – como el mesma ia dise, car el ia sabe distingui entre la modos diversa de consuma – senior prete Lanternois ia solisita la permete de retira se. El ia dise adio a Sr e Sra Bertringer, trovante sin difisilia la formula conveninte de grasia; a Lisette e sua sposo el ia desira un viaja plasente, car on ia sabe ce la duple nova va viaja a via, en ancora la mesma posmedia, a la costa euscara, per reveni natural pasante tra Paris. “… e no fali visita Lourdes cuando vos es en la sude. Lo es alga prosima a Biarritz. En vosa preas a la pedes de la Virjin Miraclosa, per favore no oblida me!”

A la otra persones presente el ia dirije un sinia discreta de saluta par mano e ia sorti con evidente la intende de no interompe la ritmo del joia.