Capitol 1

“Txa, fandango!” – ia cexeta Auchoux, polisior militar xef, cuando pos du oras de demandas a tota abitores de Voiron, el ia vide final plu clar la caso e ia pote con sua colega, polisior Perelli, reposa per un momento en la taverna de la vileta.

E Perelli, multe contente ce aora ance el comprende, ia reconose, no sin orgulo, la susede profesal: “Fortunosa ce nos sabe combina e dedui! Los ta pote loci an la avocato la plu sobre par sua racontas babelada!”

Serta! Lo no ia es fasil, descasci de acel malparletas ostentosa la cor pico de veria. Tota viletanes ia interprete “la caso” en modos diversa, e a multes la investiga polisial ia dona mera un aveni bonvenida per airi desiras personal per venjas minor, cumulada tra anios. En loca de reporta sola fatos nuda e autentica, los ia diverje a un labirinto de suposas o de sujestas maldisposada. Algas ia es tro parlosa e ia erije un construida intera de rumores noncaturable; otras, plu cauta, pos suspetas inisial ia mudi subita. E otras no ia dise ce si, e no ia dise ce no.

Pos un peti engoli lenta – “esta blanca merita la bevi!” – Auchoux ia repone la vitro sur la table, ia limpi sua mustax densa par un jesti larga del dorso de mano e ia repete la parolas saja de Perelli: “Si, fortunosa ce nos sabe combina e dedui!”

E el ia continua, profitante sua colega plu joven: “Vide, Perelli, la importante en tal esploras es ce on reteni sola lo cual conserna la caso mesma. A cua lo pertine? Sémard, un cultivor en Voiron, ia cexa contra un ‘nonconoseda’, car acel nonconoseda, par lansa de petras, ia rompe tota fenetras en sua casa. Nosa taxe es trova la culpable. E nosa taxe es tan plu difisil car – suposable – cadun sabe la nom de la nonconoseda, ma no vole dise. Acel es tota. De aora, lo no interesa nos esce Grandidier dormi con sua fem servinte; esce Malroi a sinco anios pasada ia fura un gal o coneo de Thomas; esce la bove de Dupin ia creve par un encanta de Rouquier; esce la fia de Perlat ia es ensinta ja ante sua sposi, e tal plu … Tota de esta es venta! Ma si nos resta con la fatos, la situa deveni clar.

Tal: A la dia ante ier, dudes-un de agosto en la anio 1913, alga Albert Bignol, laboror de campos en Voiron, ia festi tro profonda la fini de la desgrani a casa de Sr Henrion. El ia es ja plen enebriada cuando el ia fa proposas vulgar de ama a Octavie Griotte, un fem servinte de Sémard. Asta aora tota es clar, no?”

“Clar como jus de pipa!” – ia confirma Perelli.

On pote opina diferente sur la claria de jus de pipa. Lo sufisi si on sabe ce Perelli a un ves per sempre ia adota esta compara, cual ave la sinifia de “transparente clar”, e, sin manca, el ia usa esta clixe per responde a la demanda manica “tota clar, no?” de Auchoux.

“Donce segue bon! Octavie Griotte no ia sede a la desiras nonmoral de Bignol, ma ia dona un palmi puminte a sua fas, ia core a via e ia clavi se en la cosina. Poi acel Bignol, furiada par sua fali e noncapas de entra forsada a la cosina, ia lansa petras a tota fenetras de la casa. A pos el ia desapare. Asta aora, on dise, el resta nontrovable. Sémard esije un repaia per la vitros rompeda. Acel es tota. E tota clar, no?”

“Como jus—”

“Un sola punto disturba me, per dise: do Bignol asconde? Me aposta ce cadun de los ta pote responde a acel demanda. Perce nun acorda parla? … He, padron!” – Auchoux ia clama la vea Brice, ci ia veni de reentra tra un peti porte retro – “He, padron! Nos nesesa parla con Bignol, con Albert Bignol. Do nos va trova el?”

Vidable Papa Brice ia pensa ante responde. Lenta el ia estrae sua muxador, un tela enorme, roja a tempos pasada, e ia frota suo imajinada de sua fronte con la sola intende de gania tempo. “Vos desira parla con Bignol? … Con Albert Bignol … Do el es aora? Vos no ia vade a sua casa? El abita con sua sore. En la caseta a lado del fonte.”

“Esta nos sabe, Papa Brice! Bignol es serta un conoseda vea. Ma el no es a casa. Bon, dise a la min perce totas de vos pare teme revela sua asconderia? An Sémard, la consernada xef, finje no sabe. Alora, esce esta Bignol ave tal potia ce on debe parla sur el sola con cautia estrema? El es un nonavor ci labora sola a veses, no?”

“Bon, diseda sin menti, Bignol es vera importante en nosa comunia. El pote fa servis a totas. No sola aidante en laboras de campo. El es la sola capelor en la vileta. El es la person ci rasa la mores. El escava la tombas. Nun es plu profitosa capas ca el de mata porcos e talia los a pesos. El sabe repone telias sur la tetos. Si nesesada, el pote estrae un dente dolosa e repara bucos en casoletas. El castra coneos e gatos. En autono el trae sestos plen de xampiniones de Dio-sabe-do, e en inverno el xasa per fura lepres. Como vos vide, el es un fatota. A un ves o un otra, cadun de nos nesesa el.”

“Si! Aora ance nos nesesa el,” – ia rie Auchoux – “ma par otra causas! … Nos ta parla seria. Escuta, Papa Brice. Tu es un tavernor: un om nondependente. Tu no ave campos per aradi e tu no eleva porcos. Donce tu pote iniora servis posible de Bignol. E an si a ves futur el ta refusa dona a tu la rasa final … ma tan tarda como posible, natural … esta no ta disturba multe tu. Donce bon. Tu pote parla sin risca, no?”

Poi Papa Brice ia surie pico rusosa: “He, senior polisior xef, tu oblida ce Bignol es mea cliente la plu bon!”

“La diablo ta catura el!” – Auchoux ia resinia grimante. “En cualce caso nos sabe sufisinte per fa nosa reporta. La dia va es calda. A la sela, Perelli! Plu temprana nos vade a casa, plu bon!”

Con la mesma move, ambos polisiores ia leva, ia puia sua xapetas per reti los a sua frontes, ia botoni sua uniformas e ia sorti del taverna.

Sua cavalos, liada par bridas a un nozo ante la construida, an si gustante la ombra, a contra ia es despasientida par la atacas sin sesa de moscas e tabanos. Prosima, Sra Brice, sposa del tavernor, ia veni de rompe lenio seca de faxos de bastetas pilada per nuri la forno de cosina. “Ja vos parti, seniores? Sin duta vos cavali aora a Autrecourt?”

“E perce a Autrecourt?” – ia desembla Auchoux, instalante se sur la cavalo.

“Cisa vos no sabe ce on va ave oji un sposi grandiosa en Autrecourt? Bertringer, la proprior, fa la sposi de sua fia a la veterinar de Mussey.”

“Oji, si? Me ia oblida lo!” – Auchoux ia menteta, car, per dise vera, ja tra alga dias el ia incuba la intende de – en alga modo, como si par debe – trova se en Autrecourt a esta dia. Como representores de un autoriosa usosa, la polisiores militar, par abitua firma fundida en familias bonordinada, va es serta invitada a un bevi festal. Ma Autrecourt situa oji estra la rede del program de esamina. Los ta nesesa un escusa conveninte per justi sua apare en la vileta, e Auchoux ancora no ia trova un tal escusa.

“Asta revide, Sra Brice!”

La polisiores ia trota a via, con lado a lado. Sin parla. No sin pensa.

Auchoux ia razona silente: En Autrecourt, como en otra locas, nun conose nosa program de patrulia. Lo ta surprende nun si nos ta presenta nos a la xef de vileta ala como ja a sento veses presedente. Ma cua nos ta raconta a el? Nos ia fa la inspeta rutinal ala en la semana ancora pasada. On no pote simple apare e confesa naive ce on veni per la sposi! E Perelli! Ta ce el no crede ce me es nondiniosa un parasito de bancetas! El sabe, si nos segue la projeta de nosa program, ce pos Voiron nos debe visita Chenicourt, Ajoncourt e Lixières. Ma cada de acel nidos distanti nos de Autrecourt … Hm … Pos corta on va ave la ora 11. Pos un ora, un ora e dui, los va sorti de la eglesa …

E Perelli, a sua lado, ia mastica e remastica un reproxa amarga: Cua afeta la xef oji? Lo pare ce nos no va vade a Autrecourt. An tal, un sposi de acel tipo no aveni a cada dia … ma lo no es mea taxe, sulini esta.

Ja la polisiores ia lasa pos se la casetas ultima de Voiron. Aora la via ia rampe min vivosa a un loca alta. O, un via misera a mediadia de agosto! A ambos lados on ia ave pomos bordante, con decoras pesosa, si, ma no sufisinte vasta per presta proteje contra la arde atacosa de un sol cuasi a zenite. Ance la sepes de prunel cual ia acompania la via asi e ala, poi a destra, poi a sinistra, ia es probable nunca usosa estra per proposa un inspira complis a duples de pastores joven o un refujeria a familias de caracoles!

Tra alga tempo ja la cavalos, seguente sua propre vole, ia trota tro. Plu e plu lenta los ia segue la sinta blanca de la via. E aora, preparada per para pronto en parleta, los ia regarda con alga espetosia Bellette, la vijilor de oveas de Voiron, ci ia sta a lado del via, sempre zelosa per aborda pasores acaso. Con surie tisante, Bellette ia saluta: “He, seniores polisiores, en via a Autrecourt!”

Auchoux ia responde sola par leva despetosa sua spalas, un jesti cual Perelli ia imita par disiplina automata, e los ia viaja plu. Auchoux ia finje casualia: “Cua afeta totas oji? Cua los vole dise par refere a acel Autrecourt? Me comensa cuasi suspeta ce ala no tota es en ordina.”

“Si,” – Perelli ia catura la idea nasente – “si, ance me ave acel impresa. Esce tu no crede, xef, ce Bignol, la rompefenetra, asconde en Autrecourt?”

“Tal, tal!” – ia dise Auchoux vinsente. “Me nota felis ce ance tu ia ariva a la mesma conclui. Bon! Ta ce nos vade pico en dirije a Autrecourt. On no ta dise ce nos descura un taxe profesal, an si lo longi nosa tempo de labora. Tota clar, no?”

“Como jus de pipa!” – ia afirma Perelli. “Comprendable, la debe ante tota.”

Entretempo los ia ariva a un loca do un buco sufisinte larga en acel bosceta de pruneles, cual asta aora ia masci la campania a destra del via, ia lasa un vide libre. E ala, a lado del monton grande de feno oro jala, sur la campo de Henrion, a apena dusento metres, ala un cosa roja par un penduli rapida ia atrae la atende de la cavalores. Lo ia es Bignol! Bignol en propre corpo, ci, veninte de persepi la polisiores, ia reti subita de un posa acrupinte, ia tira sua pantalon a supra, ma no ia prende la tempo nesesada per reenvolve la sintur de flanela roja sirca sua taie. El ia refuja se a via pos la monton de feno, secutente la tela roja par jestis del brasos, simil a remi, como si per fa un puxa plu eficas a ante.

A la momento oportun, ambos polisiores ia susede sofoca un cria peti de surprende. E con la mesma move, los ia turna a lunlotra, curiosa esce la otra ia vide. Car si el ia vide – esta ia es spesial sentida en la suconsensia de cada – si el ia vide, la viaja a Autrecourt no ave plu un escusa. Lor oios, en cual un sintil del joia de xasor ia brilieta ancora, ia encontra se per apena un tempo de lampo, e direta, longo un acorda mutua, muda e nonsabeda, la sintil ia estingui. En ambos duples de oios ia es refletada mera la noncura neblosa de un fol bondiseda, tan perfeta imitada ce cada ia pote de aora suposa ce la otra no ia vide Bignol.

Auchoux ia es el ci ponti la embarasa del momento par esta declara neutra: “Esta anio va fa un bon recolie de pomas.”

Poi ance Perelli ia trova un cosa sinifiosa per dise. Pos sta sur la stribos, el ia frota delicata sua gluteo destra e ia oserva simple: “Me crede ce me ia reseta un aseseta en un loca nonoportun.”

En esta modo los ia ateni la culmina del colina. Esta colina Perelli ia conose bon. Sempre cuando lor via ia gida los ala, sempre e sin manca la polisior xef Auchoux ia para la cavalos. E sempre Perelli ia aseta sedente en sua interna: Me no va pote evita la leson de la frontera!

La tema ia es cara a Auchoux, ci ia polisi en Mussey tra des anios ja e ci ia malusa pico esta superioria per intrui alga partes noiante de la istoria jeografial a Perelli, arivante en esta distrito de frontera a sola poca plu ca un anio pasada. Lo es vera ce de esta loca alta, cual, en modo coreta an si tro asentuante, Auchoux ia nomi un punto stratejial importante, on ia ave un vista vasta a este. Pos leva supra la ondas de la tereno ensircante, on ia pote regarda ultra la limitas del departe Meurthe-et-Moselle asta plur cilometres interna de la pais visina. Acel tera mesma, asta 1871, ia parteni a Frans. Lo ia es alora un parte del departe Moselle. Ma pos la gera, pos la contrata de pas de Frankfurt, Deutxland vinsente ia propri acel departe, como ance Bas-Rhin e Haut-Rhin plu sude, e par junta esta tre lo ia formi un nova provinse deutx su la nom Reichsland Elsass-Lothringen.

Usual, Auchoux ia comensa sua leson con la parolas – “E ala, Perelli, la colina de Delme estende a este. Lo es ja en Prusen.” – par cual frase el ia viole alga la jeografia. Ma en acel epoca, franseses de tota clases ia abitua dise en loca de Deutxland la nom prefereda Prusen, suposable car esta, par causa de sua sona sisante, ia permete espresa plu evocosa un despeta definida a la vinsor. “La viletas cual tu vide ala sur sua inclina e sur la plano es Aulnois, Craincourt, Delme, Puzieux, Alaincourt, Liocourt, Foville, Chanzy … e ala, plu distante, perdeda entre forestas, Luppy …” – e tota nomes el ia sulini par un dito puntada. E sempre Perelli ia defia: “Ma acel nomes no es prusen! Los es nomes como nosas!”

Poi Auchoux ia judi seria: “Esta demonstra bon ce la prusenes ia fura acel tera de nos. A alga tempo nos va reprende lo.” E nonevitable el ia continua: “Acel linia negra es la ferovia de Metz a Château-Salins. Me ia segue de asi la progresas de la labora cuando on ia construi lo. A ves prima lo ia opera en 1905. On dise ce la deutxes espera un profita grande de lo en la gera seguente; ma lo va es poca usosa a los. Lo es tro vidable esposada a nosa colpas. Un pico de oras va sufisi a nosa artileristes de Nancy per coxea acel ferovia. Lo pasa en alga locas tan prosima a nosa propre postos ce an nosa 75s[¹] nova va destrui fasil cada tren. E vide do la frontera es. On ave ala Autrecourt; lo es la vileta final en acel dirije sur tera franses. A pos, acel foresta multe prosima es ja prusen …” – e tal plu. Ma oji Auchoux no ia senti la nesesa de instrui la colega plu joven. Sin parla, ambos oji ia cavali ultra la “punto stratejial importante” e ia ariva a acel loca do la via forci. Sur un palo de lenio un indicador ia sinia a destra:

CHENICOURT 1 km
AJONCOURT 4 km

La braso sinistra ia mostra:

THEZEY 2 km
AUTRECOURT 8 km

La polisiores no ia opina oportun an un finje de esita sur la dirije de via. Speroninte la cavalos los ia galopa a sinistra, car lo ia es asoluta nesesada, tan vera, ce los esplora esce acel Bignol asconde en Autrecourt.

---

[¹] Canones lejera con calibre de 75 mm.