Ata 1. Sena 4.
[Duncan, Malcom, Donalbain, Lenox e Servores entra.]
Duncan. Esce on ia esecuta Cawdor? Esce la encargadas ia reveni?
Malcom. Mea senior, los ancora no ia reveni. Ma me ia parla con un oservor de sua mori e el ia reporta ce Cawdor ia confesa franca sua tradis, ia suplica Tua Altia per pardona, e ia mostra repenti profonda. No cosa en vive ia cabe a el tan bon como parti de lo: el ia mori un mori praticada, dejetante sua posese la plu valuosa como un graneta.
Duncan. No capasia pote leje la mente sur la fas. El ia es un senior ci me ia fida asoluta.
[Macbet, Bancuo, Ros e Angus entra.]
O cusino la plu meritante! Me veni de senti descomfortosa sur la peca de mea nongrasiosia. Tu ia core tan distante ante me ce la venta la plu rapida de recompensa es tro lenta per egali tu. Me desira cuasi ce tu ia merita min, afin mea grasias e paia pote egali lo cual me debe. Tota cual resta per dise: me debe sempre plu ca tota pote paia.
Macbet. La servi e fida cual me debe a tu paia per se en fa. La rol de Tua Altia es reseta nosa debes—e nosa debes a tua trono e stato es como fies e servores ci fa lo cual los debe fa sola par fa cada cosa per proteje tua ama e onora.
Duncan. Bonveni asi. Me ia comensa planta tu, e me va labora per fa ce tu crese a alta e plen.—Bancuo nobil, tu merita no min, on debe sabe ce tu fa no min: ta ce me abrasa tu e teni tu en mea cor.
Bancuo. Si me crese ala, la recolie es la tua.
Duncan. Mea joias supraflue tan multe, tan estravagante en lor plenia, ce los atenta asconde se en larmas de tristia.—Fios, relatadas, tainos e vos de cual sua locas es la plu prosima a me: sabe ce pos nosa mori, nos intende ce nosa rena transfere a nosa fio la plu vea, Malcom, ci nos nomi Prinse de Cumberland. Ma el no va vesti solitar acel onora: marcas de nobilia va brilia como stelas sur cadun ci merita los—Aora, a Invernes, per lia nos an plu prosima a vos.
Macbet. Tota reposa cual no servi tu es labora. Me mesma va monta a ante como un eraldo e felisi la oreas de mea sposa con novas de tua prosimi. Alora me parti umil.
Duncan. Mea Cawdor meritante!
Macbet. [a se] La Prinse de Cumberland. Un ostaculo sur mea via—me debe o tropeza sur lo e cade o salta supra lo.
Stelas, asconde vosa focos! No lasa ce lus vide mea desiras negra e profonda. Ta ce mea oio diverje de lo cual mea mano fa, ma ta ce lo aveni, acel cosa cual la oio teme vide cuando fada.
[El sorti.]
Duncan. Vera, Bancuo meritante—El es tan corajosa e oia sua loda nuri me: lo es un banceta. Ta ce nos segue la om cui preconsidera ia monta a ante per prepara un bonveni per nos. El es un relatada sin egal.
[Los sorti.]