Ata 1. Sena 2.
[Un trompeta e sonas de batalia estra la stadio. Re Duncan entra con sua fio Malcom e Donalbain, e la Duxe de Lenox e plur servores. Los encontra un Capitan ferida.]
Duncan. Ci es la om sanguinte? Par sua aspeta, lo pare ce el pote informa nos fresca sur la rebela.
Malcom. U asi la sarjento ci, como un soldato bon e forte, ia batalia contra mea catura. Bonveni, corajosa! Informa la re sur la batalia a sua parti.
Capitan. En duta lo ia resta, como du nadores fatigada ci teni lunlotra e afonda se. Macdonwald, nonpardonosa e un rebela de nase a ci cada vilia de natur ia xama, ia reforti se con cernes e galoglas de la Isolas Ueste, e como un puta de rebela, Fortuna ia surie sur sua causa fodeda. Ma lo no ia sufisi. Macbet, la corajosa–un nom bon meritada–ia despeta Fortuna. Con spada sanguosa e favoreda par Coraje, el ia talia pasaje asta fronti la vil–sin presa manos o dise txau el ia fende el de ventre a boca e ia fisa sua testa sur nosa merlones.
Duncan. O cusino corajosa! Senior meritante!
Soldato. Ma como tona temosa e tempestas naufragante pote veni de do la sol leva, tal de la fonte mesma de nosa comforta veni un onda nova de turba. Escuta, Re de Scotland, escuta: pronto pos ce justia, armada con coraje, ia forsa la fuji de la cernes scaramuxante, la re norsce, vidente un vantaje, ia ataca fresca con armas briliada e soldatos nova.
Duncan. Esce esta ia ansia nosa capitanes, Macbet e Bancuo?
Soldato. Si, como pasaros agilas o lepres leones. Vera me reporta ce como canones duple cargada, los ia colpa duple duple la enemi: esce los ia intende bani se en feris jetante o eterni un otra Golgota, me no sabe–Me senti debil, mea talias clama per aida.
Duncan. Tua parolas conveni a tu como tua feris, ambos odori de onora.
Veni–veni surjistes per el.
[Servores aida la Capitan a sorti.]
[Ros e Angus entra.]
Duncan. Ci veni?
Malcom. La taino meritante de Ros.
Lenox. U la oios urjente! Oios de un om con un raconta strana.
Ros. Ta ce la re vive.
Duncan. De do tu veni, taino meritante?
Ros. De Fife, bon re, do banderas norsce burla la sielo e vani nosa popla a fria. La re norsce mesma, con fortes cuantiosa e aidada par la trador vil, la taino de Cawdor, ia comensa un batalia sombre, asta ce, Macbet, como la sposo de Belona, total blindada, ia fronti el con fas a fas: punto contra punto, spada rebelosa contra spada–el ia frati sua spirito savaje. Breve, nos ia vinse.
Duncan. Tan felisia!
Ros. Tal ce Sweno, la re norsce, suplica nos per un trata de pas. Nos no ia lasa la entera de sua omes asta ce el ia paia des mil dolares a la Intx de San Colme per nosa usa.
Duncan. Nunca denova la taino de Cawdor va tradi nosa fida. Declara ce el va mori pronto–e con acel titulo saluta Macbet.
Ros. Serta.
Duncan. Sua perdeda es la ganiada de Macbet nobil.
[Tota sorti.]