Ata 1. Sena 3.
[Sona de tona. La tre Sorsores entra.]
Sorsor Prima. Do tu ia es, sore.
Sorsor Du. Me ia mata porcos.
Sorsor Tre. Sore, do tu ia es?
Sorsor Prima. La sposa de un maror ia ave castanias sur sua vasto, e ia mastica, mastica, mastica.
“Dona a me alga,” me ia dise.
“A via, sorsor!” la culosa crostida ia cria. Sua sposo ia vade a Halab, capitan de La Tigre. Ala me va veleja en un tamis, e como un rata sin coda, me va fa esta, e esta, e esta.
Sorsor Du. Me va furni un venta.
Sorsor Prima. Tan amable.
Sorsor Tre. E me va furni un otra.
Sorsor Prima. Me controla ja la resta–cada porto visitada, cada dirije sur la carta de compas. Me va drena el tan seca como feno. A note o dia la sonia va reposa nunca sur sua palpebras. Per nove par nove semanas fatigante el va vive maldiseda: va peti, va maladi, va atrofia. E an si sua nave no es afondable, tempestas va bate lo. Vide lo cual me ave.
Sorsor Du. Mostra, mostra.
Sorsor Prima. U asi–la diton de un pilote naufragada en viaja a casa.
[Sonas de tambures estra la stadio.]
Sorsor Tre. Un tambur, un tambur!
Macbet veni.
Tota. La sores de destina, mano en mano, viajores de mar e tera, vade a sirca, a sirca tal: tre veses per tu, tre veses per me, tre veses plu es nove. Taze! Nos ia enrola la encanta.
[Macbet e Bancuo entra.]
Macbet. Me ia vide nunca un dia tan bon e mal.
Bancuo. Cuanto asta Forres?—Cual es estas, plietosas tan strana vestida. An si los no aspeta teran, los sta asi.—Vos vive? Vos es demandable? Vos pare comprende–simultan vos pone ditos torsosa sur labios magra. Vos pare debe es femes, ma vosa barbas contradise esta.
Macbet. Parla si vos pote.
Cual es vos?
Sorsor Prima. Cadun saluta, Macbet!
Me saluta tu, taino de Glamis.
Sorsor Du. Cadun saluta, Macbet!
Me saluta tu, taino de Cawdor.
Sorsor Tre. Cadun saluta, Macbet, la re futur!
Bancuo. Bon senior, perce tu salteta? Perce tu pare teme cosas cual sona bon?
[a la Sorsores] Vera, vos es fantasmas o lo cual vos pare? Vos saluta mea acompanior nobil con titulo presente e stona el con predises grande de onoras nova e esperas reial, ma a me vos no parla. Si vos pote esamina la semes de tempo e dise cual gran va crese e cual no, alora parla a me, algun ci no suplica vos per favores no teme vosa odia.
Sorsor Prima. Saluta!
Sorsor Du. Saluta!
Sorsor Tre. Saluta!
Sorsor Prima. Min ca Macbet, e plu.
Sorsor Du. Min felis, ma plu felis.
Sorsor Tre. Tu va jenita res ma no va es un.
Alora cadun saluta, Macbet e Bancuo!
Sorsor Prima. Bancuo e Macbet, cadun saluta!
Macbet. Espeta, vos parla partal - dise plu. Par la mori de Sinel, me es taino de Glamis. Ma como taino de Cawdor? La taino de Cawdor vive e flori. E es re es tan noncredable como es Cawdor. Dise a me do tu reseta esta informa strana e perce vos para nos sur esta landa fodeda con salutas profetosa. Parla–Me comanda vos.
[Sorsores desapare.]
Bancuo. U asi, como acua la tera ave bolas. A do los desapare?
Macbet. A aira. Lo cual pare corpida fonde como un sofla en venta. Ta ce los ia resta.
Bancuo. Esce esta cosas ia es vera asi como nos parla sur los o nos ia come de la radis loco cual prisoni razona?
Macbet. Tua fios va es res.
Bancuo. Tu va es re.
Macbet. E ance taino de Cawdor–tal lo vade.
Bancuo. Acel melodia e parolas esata. Ci es asi?
[Ros e Angus entra.]
Ros. Macbet, la re ia ensabe felis tua vinse e cuando el leje de tua osa contra la rebela, sua stona e loda compete sur cual es la tua e cual es la sua. Tal mudida, el regarda la resta de la dia e trova tu a profonda en la linias norsce forte, sin teme de la imajes strana de mori cual tu ia crea. Tan rapida como raconta lasa, mesajores pos lunlotra ia ariva, e cada ia porta loda per tua defende grande de sua rena, cual los ia versa ante el.
Angus. Nosa mestre reial envia nos per grasia tu–sola per escorta tu a ante el, no per paia tu.
Ros. E como un depone per un onora grande, el comanda ce me nomi tu taino de Cawdor, de el. Alora saluta en acel titulo nova, taino tan meritante–car lo es la tua.
Bancuo. Cua? La diablo pote parla vera?
Macbet. La taino de Cawdor vive. Perce tu vesti me en robas emprestada?
Angus. La om ci ia es taino respira ancora, un condenada ci no merita vive. Esce el ia alia se con la norsces o ia fore la rebela con aida furtiva o ia colabora con ambos per ruina sua pais, me no sabe. Ma tradis capital–confesada e demostrada–ia cade el.
Macbet. [a se] Glamis, e aora taino de Cawdor: la plu bon va segue.
[a Ros e Angus] Grasias per tua esforsa.
[a Bancuo] Tu espera aora ce tua fios va es res, no? Los ci dona a me la taino de Cawdor ia promete no min a los.
Bancuo. Si crededa, lo ta ensende tu a la corona, ultra la taino de Cawdor. Ma lo es strana: frecuente per destrui nos, strumentos de oscur parla onesta: los convinse con granetas e tradi en lo cual importa la plu.
[a Ros e Angus] Cusinos, ta ce nos parla, per favore.
[Ros, Angus e Bancuo move a un lado.]
Macbet. [a se] Du veras diseda, como la prologa felis a un drama estravagante cual fini con rena.
[a Ros e Angus] Grasias, seniores.
[a se] Esta tenta nonatural no pote es mal–ma no pote es bon. Si mal, perce lo garantia susede par comensa onesta? Me es taino de Cawdor. Si bon, perce me senti ce me sede a un sujesta cui imaje asustante oripila e bate mea cor contra costelas, contra cada cosa natural? La temes aora ante me es plu peti ca mea imajinas repulsante. La pensa mera de omiside–ancora fantasial–secute mea se tan multe ce specula sofoca ata, e no cosa senti real estra lo cual no esiste.
Bancuo. U asi, tan encantada es mea acompanior.
Macbet. [a se] Si fortuna vole ce me es re, alora fortuna pote coroni me sin ce me leva un dito.
Bancuo. Onoras nova reposa sur el, e como vestes nova, los no cabe asta bon usada.
Macbet. [a se] En cualce caso tempo e la ora perdura an tra la dia la plu mal.
Bancuo. Bon Macbet, nos espeta tu.
Macbet. Pardona me–mea serebro otusa ia luta con oblidadas. Seniores amable, vosa esforsas es scriveda sur folias dial lejeda. Ta ce nos vade a la re.
[cuieta, a Bancuo] Considera lo cual ia aveni, e poi, pos contempla, ta ce nos parla franca.
Bancuo. Bien volente.
Macbet. Asta alora, basta.
[a Ros e Angus] Veni, amis.
[Tota los sorti.]