Capitol 9

La caro sta ante la castel con la Jonatan dorminte. Ma pos un momento el no dormi: el es veliada. “Cua! Me es ante la castel!” el pensa. El vide la castel en la note, e lo pare multe, multe grande. La castel pare interesante; lo interesa el. Ma lo es note, e Jonatan no es multe felis; el pensa sur la lupos e la mal cosas tra la viaja. Ma Jonatan es un pico felis, car el ia ariva a la castel. El pensa sur come e bevi, e sur dormi en un bon leto.

Pensante esta cosas, el vide la porte. Como on pote entra? La caror es a via, Jonatan es solitar, e la porte es grande. Pensante a un plu ves sur la caror forte, el vide la porte. Cua el debe fa? La porte es silente, e lo es multe grande. Stante ante la porte, Jonatan pensa sur lo cual el debe fa. Jonatan pensa: “Esce me dormi?” Ma no, Jonatan sabe ce el no dormi.

Jonatan sta ante la porte; el no sta pos la porte. Ante la porte es la note; pos la porte es la castel. Ma aora Jonatan oia un sona pos la porte: CRRRRR….. TXICCC…. La porte abri se (un person abri la porte).

Pos la porte, Jonatan vide un om. El es alta, vea, e ave un mustax longa e blanca (no un barba). Lo es la Conte Dracula.

“Bonveni, Jonatan! Per favore entra!” Dracula dise. Dracula prende la mano de Jonatan. O! Dracula es ance multe forte, e sua mano es fria. Jonatan dise a se: “Acel mano de Dracula no pare es vivente; esce el vive? Lo pare mor! …no, no ave pensas stupida, Jonatan! El vive; el es un om. El es un om vivente.”

Dracula continua parla: “Me es Dracula, e bonveni a mea casa. La note es fria, e tu debe come, e tu debe dormi. Per favore dona a me tua bagaje.”

Jonatan: “Mea bagaje? Ma tu es un senior, e en tua castel on ave otra persones ci…”

Dracula: “No, tu es mea ami, e mea persones dormi. Per favore dona a me tua bagaje.”

Dracula comensa vade con la bagaje; Jonatan segue el. La castel es multe grande, e seguente Dracula Jonatan vide multe cosas: scaleras, e fenetras, e otra cosas. Aora los sta ante un porte grande. Dracula abri la porte, e los vide un sala. En la sala Jonatan vide un foco (foco es multe flamas), e acua. Jonatan vole lava se con la acua, car la viaja ia es longa.

Dracula dise: “Per favore lava tu con la acua. E pos cuando tu ia lava tu con la acua, per favore veni en la otra sala per come.”

Jonatan pensa: “O, on ave comeda! Me debe lava me rapida. Me vole multe come.”

Plu tarda, pos lava se, Jonatan entra a la otra sala. El vide la comeda. Dracula senta ante un foco grande. El move sua mano e dise: “Per favore come. Me ia come ja.”

Jonatan dise: “Ante cuando me come, me ave un cosa per dona a tu. Asi un letera de London. Mea xef ia scrive la letera.”

Dracula abri la letera, leje lo, e es felis. El dona la letera a Jonatan e dise: “Tua xef dise bon cosas sur tu. Aora ance tu pote leje la letera.”

Jonatan leje la letera e vide ce si, sua xef en London ia scrive bon cosas sur Jonatan. En la letera la xef de Jonatan ia scrive ce Jonatan es intelijente, un bon om, e silente. Aora Jonatan pensa sur perce el es en la castel de Dracula. El es en sua castel car Dracula ia dise ce el vole compra casas en London. Dracula ave multe mone e vole compra casas, e el ia scrive leteras a la compania de Jonatan disente: “Per favore aida me a compra casas en London.”

Aora Dracula mostra la comeda: lo es gal con ceso. En cuando Jonatan come, la Conte demanda a el sur la viaja. La Conte vole sabe multe cosas sur England, sur la viaja, e sur Jonatan. Pos come, la Conte dona a el un sigar, e Jonatan prende lo. Ma Dracula dise a el ce el no fumi sigares, e Jonatan fumi la sigar solitar. Jonatan vide Dracula a un plu ves e pensa: acel om es multe, multe blanca, e multe forte. Un om multe blanca, e multe forte.

Aora la du omes es silente. Jonatan vide estra la fenetra; la matina va ariva pronto. Ma Jonatan pote ancora oia la ululas de la lupos. Dracula dise: “Escuta los! Los produi musica!” Jonatan pensa ce Dracula ia dise un cosa strana.

Dracula continua: “A, tu es un urban, tu veni de un urbe. La urbanes no pote comprende. Ma bon – tu ia fa un viaja longa, e tu debe dormi. Doman me ave multe cosas a fa. Me va vide tu plu tarda.”

Aora Jonatan entra a sua sala. El scrive en sua jornal: “Du oras a ante me ia es en un caro. Aora me es en la castel. Pos du oras me va es dorminte, car me va dormi pronto.” El scrive plu cosas, e a pos el dormi.