Capitol 8
Traduida par Andrew Burns
Aora Jonatan senta en la caro grande con la caror. La caror parla en deutx eselente: “La note es fria, mea Herr (senior). Ala es acuavit, un bevida fada de prunas. Per favore bevi lo, si tu vole bevi.”
Jonatan no ia bevi. Ma el ia pensa ce lo ia es bon ce el ia ave acuavit per bevi. Jonatan espeta e pensa sur la viaja.
La caro vade rapida. A pos, la caror verje la caro (el ia verje lo a un ves). E el verje la caro – a du veses. Cua? El verje la caro… a tre veses! El verje lo a un plu ves, e a un plu ves. Jonatan pensa: “Esce nos no pasa la mesma via, denova e denova? Tan strana!” Ma Jonatan no ia demanda a la caror, ci es multe grande, e multe forte.
Jonatan demanda a se cual es la ora. El vide sua orolojo. La orolojo mostra la tempo: lo es la ora des-du (12). A… la ora des-du, lo es medianote. Jonatan sabe ce la persones en Romania ia parla a el sur medianote, sur la ora des-du, e los ia dise ce la ora des-du es un mal tempo .
Aora Jonatan oia un sona, la sona de multe canes. La sona es multe grande! La canes dise: U-u! U-u! Si, la canes ulula. La cavalos no ama ce la canes ulula. A pos Jonatan oia la ululas de lupos. La ululas de la lupos es an plu grande ca la ululas de la canes. La cavalos multe no ama ce la lupos ulula.
La caror dise a la cavalos: “Es calma.” E la cavalos calmi. La cavalos es calmida, e continua vade.
Aora Jonatan vide un foresta: el vide multe arbores, e sabe ce lo es un foresta. E el oia la venta. Ance la venta dise: U-u! U-u! Asi en la foresta, an la venta ulula. Jonatan no ama la ululas de la venta.
Aora Jonatan vide un otra cosa: la neva. Lo es multe fria! On vide la neva sola cuando lo es fria.
Cua la caror fa? El gida la caro. El no parla sur la lupos, el no parla sur la monte, el gida sola la caro. Ma a un ves Jonatan vide un flama blu, e la caror para la caro e vade per vide lo. Plu tarda Jonatan vide la flamas, a un ves, a du veses, a multe veses. Jonatan no sabe lo cual es la flamas blu.
A un ves la caror para la caro e vade distante. Aora Jonatan es solitar con la cavalos. El vide la lupos a un plu ves. La lupos no ulula; los es silente. Jonatan vide la luna, e pensa: “Do es la caror? Perce el no veni?” La cavalos no ama la lupos silente.
Vidente la luna, la lupos comensa ulula. Oiante la lupos ululante, la cavalos comensa move. Jonatan colpa la caro. Colpante la caro, el dise: “Do es tu, caror? Do tu ia vade?”
Jonatan oia un vose; lo es la caror. La caror dise: “Vade a via, lupos!” E la lupos vade a via; aora la lupos es a via e Jonatan no vide la lupos. Vidente la caror movente, el pensa: “La caror es multe, multe forte.”
La caro continua. Aora on no pote vide la luna, car on ave nubes. Jonatan senta en la caro continuante. La caro vade plu alta, e plu alta. Vidente la nubes, e pensante sur la viaja, Jonatan vole dormi aora.
Aora Jonatan sabe no cosa. El comensa dormi, e no sabe lo cual la caror fa. La Jonatan dorminte no vide ce la caro ia ariva a la castel de Dracula.