Capitol 6
Traduida par Andrew Burns
5 de maio – La Castel
Oji Jonatan va vade a la castel de sua ami Conte Dracula. La viaja a la castel comensa aora. Jonatan sta ante la caro e espeta la caror. “Do es la caror?” el pensa. “A, u asi la caror – el parla con la otelor. Sur cua los parla? Me no ave tempo e me debe parti.”
Jonatan vide sirca la caro, e vide multe persones. La persones parla multe, ma el no comprende la persones. Jonatan pensa: “Perce los es triste? Me no es triste. Me pensa ce asi es un loca strana, ma me no es triste.” El vide ce la persones parla, e move la manos. El vide lor manos… cua los fa con lor manos? A! Aora el comprende. Los move lor manos como un crusifis. Lor manos no es crusifises, ma cuando los move la manos, lor manos es como crusifises.
La caror veni. Aora la viaja comensa. Jonatan senta se en la caro. Ance la otra persones senta se en la caro. Jonatan vide la pais sirca el, e pensa ce lo es bela. On ave multe arbores. En acel pais on ave multe pomas, e multe prunas, car on ave multe pomos e prunos. El dise: “Mm! La pomos es multe bela, e me vole come lor pomas.” El vide ance peras, car on ave multe peros en acel pais. El dise: “Multe bon! La peros es multe bela, e me vole come lor peras. Me ama la arbores de la foresta.” Ma la caro continua, e continua… lo es un caro multe rapida! Perce la caro vade rapida? El vide la via, cual no es un bon via; lo es vea. Ma la caro vade rapida! “Esce la caro debe vade rapida si la via es vea e no es un bon via?” el pensa. La caror ama vade rapida, el pensa.
Aora la caro vade en un foresta. Distante el vide montes. La montes es multe grande, e ance la foresta es multe grande. Jonatan pensa sur la montes en England. El pensa ce la montes en England es multe peti, plu peti ca la montes en Romania.
Sirca la caro Jonatan vide, de ves a ves, otra persones. Los es persones de esta pais. Esta pais ave persones diferente ca la persones en acel pais England. La persones en esta pais vive en la foresta, ma la persones en acel pais, England, vive en la sites grande. E el pensa sur la crus e la crusifis. Si, la persones en esta pais, Romania, ama crusifises, ma la persones en acel pais, England, ama cruses.
Cual ora lo es? Lo es la ora ses. Cuando Jonatan ia senta se en la caro lo ia es la matina. Plu tarda mediadia ia veni. Mediadia es la ora des-du (12). A pos posmedia ia veni; posmedia es la tempo pos la ora des-du. Ma aora lo es sera. Cua es sera? Sera es la ora cuando la sol no es alta, ma basa. Aora la sol es multe basa.
Cuando Jonatan ia es en la caro a mediadia, lo ia es calda. A mediadia Jonatan ia pensa: “Me es calda! Me debe bevi!” Ma aora, cuando lo es la ora ses, la sol es basa, e lo no es calda; lo es fria. Aora el pensa: “Me es fria! Do es la sol?” Cuando Jonatan senti caldia, lo es calda, e cuando el senti fria, lo es fria. Jonatan no vole es calda, ma el ance no vole es fria.
Jonatan dise denova: “Do es la sol?” e el dise: “Cuando la viaja va fini? Do es la castel de mea ami Conte Dracula?”