Capitol 7
Traduida par Andrew Burns
La caro vade, e vade; lo continua vade. Jonatan vide multe cosas estra la caro. El es en la caro, e la cosas no es en la caro; el vide los estra la caro. El vide cruses, multe cruses. Jonatan demanda a la caror: “Esce me pote desende de la caro?” La caror: “No. On ave multe canes. Tu no pote.” Jonatan: “Cua? On ave multe canes?” La caror: “Si. E ance estra la caro, tu va vide multe canes.” La caror rie. Jonatan pensa: “Perce el rie?”
Aora lo es note; on no ave sol. La caro vade sempre plu rapida. La persones en la caro dise a la caror: “Vade plu rapida!” Jonatan pensa: “Perce vade tan rapida?” Jonatan vide montes multe grande de la caro. Jonatan vide ce la persones en la caro es multe stimulada; los parla multe. La persones en la caro dise stimulada: “Vade plu rapida!”
Aora la caro para. Los es en un colo de monte. Jonatan sabe ce asi el va vide la caro per vade a sua ami Conte Dracula ma… do el es? Ante Jonatan es la via, e sola la via. La persones en la caro es felis. Ma Jonatan no es felis. “Perce veni asi do on no ave la caro per vade a mea ami Dracula?”
La caror parla a un person en la caro: “Nos ia es rapida. Nos ia ariva asi con un ora de avansa.” La caror ia parla con un vose peti, ma Jonatan ia oia el. Jonatan pensa: “Perce ariva asi con un ora de avansa es bon?”
Aora la caror parla a Jonatan con un vose grande. El dise: “Jonatan, la Herr (deutx: la Senior) no va veni asi oji. El va vade a un otra site, la site Bukovina. Cisa doman la Herr va veni asi. Cisa si, cisa no. Me no sabe. Nos debe parti.”
Jonatan es triste e pensa: “Perce la Senior Dracula no es asi? Perce me debe parti?”
Ma, cua es acel? La cavalos es stimulada. Ance la persones en la caro es stimulada. Jonatan vide, e ala el vide un otra caro, plu grande, con cuatro cavalos. La caro nova es plu rica, e plu grande ca la caro en cual Jonatan senta. La cuatro cavalos es negra, e multe grande. En la caro nova Jonatan vide un otra caror. La otra caror es grande, e alta, e ave un barba. La barba e la manos forte de la caror fa ce Jonatan pensa ce el es un om multe forte. Ma Jonatan no pote vide la fas de la otra caror.
La otra caror dise: “Tu ia veni asi rapida, mea ami.”
La caror: “A… la Herr engles ia vole vade rapida…”
La otra caror: “Me sabe, ce tu ia vole vade a Bukovina. Si, me sabe lo cual tu pensa. Me es plu intelijente ca tu. Dona a me la bagaje de la senior engles.”
La caror dona la bagaje de Jonatan a la otra caror. La otra caror es multe forte; Jonatan vide ce el es forte cuando el vide sua manos. La otra caror prende la bagaje con sua manos forte, e multe rapida la cosa es finida.
Aora Jonatan senta se en la otra caro. Oji ia es un dia longa per Jonatan. Ma aora comensa la otra viaja.