Transcrive de nomes tasonomial
La tasonomia de Lineo, ance nomida la clasi biolojial, es un metodo par cual biolojistes clasi organismes par tipos biolojial, como jenero o spesie.
La sistem es internasional asetada par biolojistes, en la forma latina, usante la 26 leteras de la alfabeta roman completa, e sin la usa de sinietas. Multe linguas ave un sistem paralel cual usa sua propre spele e pronunsia. La sistem paralel per elefen segue esta regulas:
Consonantes
- ch → c
- ph → f
- rh → r
- th → t
- c pronunsiada como s → s
- g pronunsiada como j → j
- k → c
- q → c
- x es retenida e pronunsiada como x en elefen, no como cs
Vocales e semivocales
- ae → e
- ei → e
- oe → e
- ou → o
- w → u
- y → i
Finis
La finis de la nomes siensal per animales es tipal cambiada a -o, con la plural en -os. Alga finis comun:
- -ata → -ato
- -formes, -formia → -formo
- -idea → -ideo
- -idae → -ido
- -inae → -ino
- -ii, -ia → -io
- -morpha, -morphia → -morfo
- -ptera → -tero
Finis de nomes de spesies o jeneras segue esta regulas:
- -us, -um, -u, -os, -on → -o
- -a, -as → -a
- -e, -es → -e
Nomes cual fini con “-is”, “-ix”, o “-ex” no cambia.
Un caso spesial:
- -zoa → -zon, adotante la singular -zoon en elinica
La finis de la nomes siensal de grados alta de plantas, etc, es jeneral cambiada a -a, con la plural en -as. Alga finis comun:
- -phyta → -fita
- -idae → -ida
- -acea → -asea
- -doneae → -donea
- -ales → -ala
Finis per spesies e jenera de plantas, bateria, etc segue la mesma regulas como animales.