Lingua franca mediteranean e la Renase

Lingua franca mediteranean

La lingua franca mediteranean, ance nomida sabir (“sabe”) o Petit Mauresque (franses: “lingua peti de la moros”), ia es un pijin usada en la Mar Mediteraneo entre la sentenios 11 e 19. La nom veni de arabi faranğī (“franca”), cual sinifia european o cristian.

Sur la nom

La nom de la lingua ia es lingua franca, referente a la lingua usada par la francos cuando los ia estende sua comersia tra la Mediteraneo. Lo ia es tal nomida asta la comensa de la sentenio 19, cuando la nom ia es abandonada pos la concista franses de Algiers. Pos esta, en la dui de la sentenio 19 la termas “sabir” e “petit mauresque” ia apare per refere a formas de parla nativa prosima a franses en Jazair.

Formi

On pote divide la formi de lingua franca en tre partes:

• De la sentenios 10 a 15, on vide la developa inisial de lo cual va deveni la “lingua franca”, cual on pote nomi “lingua franca orijinal”. Lo ia apare pos la contata entre la poplas de lingua romanica en la norde e la poplas arabi e berber en la sude de la costas mediteranean par la estende de la comersia franco. Lo ia estende a este, do lo ia ave contata con otra linguas como elinica, turces e otra dialetos italian como venezian.
• De la sentenio 16 asta la comensa de la sentenio 19, en la eda de luta entre la statos colonial de Europa este e la ejemonia osmanian en la Mediteraneo. Asi la nom lingua franca ia es instituida. Lo ia evolui e ia divide en dialetos, par influe de la linguas colonial diferente: a este on ia ave un lingua plu italianida e a ueste e sentro, plu espaniolida. La influes franses e portuges es minima en esta periodo.
• De la tri prima de la sentenio 19 (pd. con la coloni european de Africa norde, cual ia comensa con la ocupa militar de Algiers en 1830), la lingua franca desapare car la poplas de Africa norde aprende la linguas colonial. Alga partes de la lingua franca resta, ma la usa de esta nom per los no es coreta, e, per nomi esta cambia lingual, en la dui de la sentenio 19 la termas “sabir” e “petit mauresque” apare per formas de parla nativa prosima a franses en Aljeria.

Linguas sur cual lo es fundida

Lo es fundida xef sur italian, con multe parolas de ositan e catalan, e plu tarda de espaniol e portuges. Lo ave ance parolas de franses, elinica, e arabi. La lingua ia es usada per comunica par mercatores e comersiantes de la Mediteraneo a la costa de Africa norde e Asia sude-este, e par sclavos, piratas, e criminores de la area. Lingua franca ia comensa mori sirca 1830, cuando la franseses invade Jazair. Pos esta, franses deveni la lingua comersial de la area.

La orijina de la lingua franca es la latina nova con cualias neutrida par contata con parlores de linguas diversa romanica e pijinida (pd. simplida) par contata con poplas de linguas nonromanica, spesial de Africa norde. On pote divide la influe de cada lingua en la mesma fases como a supra:

• De la sentenio 10 a la 15, on pote considera ce la “lingua franca orijinal” es ositan-catalan e genoves en relata a la vocabulo, e ositan en relata a fonetica, ma con alga influes de Africa norde.
• De la sentenio 16 a la tri prima de la sentenio 19, la lingua franca ia divide en du formas xef: en la este lo es italianida (este de la Mediteraneo, este de Algiers e Tunis), e en la ueste de la costa de Africa norde lo es plu espaniolida.
• En la dui du de la sentenio 19, la sola restas de la lingua franca es un misca con funda romanica, e formas de parla berber e arabi. En esta periodo la parlas de la nativas ia prosimi a la linguas de la colonistes, spesial la franseses.

Leteratur

La testos en lingua franca es o disionarios e notas de viajores, o alga esemplos en otra leteratures.

La esemplo la plu conoseda apare en Le bourgeois gentilhomme, un comedia par Molière. En la comensa de la selebra turces, la mufti canta la parolas seguente:

Se ti sabir
Ti respondir
Se non sabir
Tazir, tazir.

Mi star Mufti:
Ti qui star ti?
Non intendir:
Tazir, tazir.

La eda orosa de la lingua franca es la sentenio 17, e la leteratur usa esta lingua de forma comedial. Alga autores es Carlo Goldoni en Italia con L’Imprésario de Smyrne (1759), Molière en Frans, e ance Jacques Caillol con sua sena de la xarlatan en sua teatro en provensal Le marché de Marseille vo lei doues coumaires.

Otra testos es la Contrasto della Zerbitana de 1284/1305 e La Zigana par Gigio Artemio Giancarlis. En 1830 un disionario de lingua franca a franses ia es editada en Marseille per la colonistes vadente a Aljeria, con un gida de conversa e un vocabulo ajuntada de arabi jazairi a franses.

Renase

Umanisme

Umanisme es un corente cultural cual ia apare en la sentenios 15 e 16, prima en Italia e estendente a tota Europa a pos. Lo coresponde con la Renase. En la Italia divideda en multe statos peti lutante entre se, la umanisme ia sinifia reveni a la orijina, pd. a Anticia clasica de Elas e Roma, cual ia trae un comprende nova de la relata entre umanas e la mundo e ance entre umanas e Dio.

Contra la pensa medieval en cual la person ia es videda como un parte de un grupo, la person de la Renase es un individua ci ave un prosede de libri, forminte sua personalia.

La umanistes ia studia la linguas latina e elinica antica e ia fa un studia critica e filolojial de la testos antica. Latina ia deveni un lingua de cultur e ance un lingua universal. Tota obras scriveda par la umanistes ia usa la latina, en cualce pais do los ia es. Ma ance un interesa sur la linguas nasional ia comensa.

Esta interesa per Anticia ia crea un comunia inteletosa ultra etnicia. En ajunta a la umanistes italian, on trova en Europa otras como Juan de Valdés en Espania (1509–1541), Guillaume Budé en Frans (1467–1540), Thomas Morus en England (1480–1535) e Erasmo de Rotterdam en Nederland (1467–1536).

Leteratur de la Renase

La presedor de la Renase es Dante Aligheri (1265–1321). En sua obra xef, La Comedia Divin, el descrive un viaja tra la Enferno, la Purgatorio e la Paradiso usante imajes cristian. Un otra poesiste xef es Petrarca (1304–1374), conoseda per sua poesias. Giovanni Boccaccio (1313–1375) ofre un nara a en otra nara en sua obra Decameron.

En Frans, on pote parla sur la franses François Rabelais (1494–1553) con sua obras Pantagruel e Gargantua, sur Montaigne, con sua Esajos en cual el considera umanas e la mundo, e cual cosa el, como umana, representa. El considera ance multe temas diversa: la vive e la mori, la veria e nonveria de alga siensas, la posiblia de conose la mundo. Sua umanisme no es tan zelosa como lo de Rabelais: el duta la forsa umana e consela educa la judi de un person afin el pote organiza sua vive.

La poesistes franses la plu importante en la Renase ia es Pierre de Ronsard con obras como Les Odes, Les Amours, Les Hymnes, Les Discours e sua epica La Franciade; e Joachim du Bellay, con sua manifesto Défense et illustration de la langue française e la colie de sonetos elejial e satirin Les Regrets.

En Espania, de la fini de la sentenio 15, on pote nota La Celestina, un novela en dialoga scriveda par Fernando de Rojas, prima publicida en 1499 e en sua varia final en 1502, con sinco plu atas. Lo es un obra situada entre la eda medieval (sua fini, con la mori de Calisto e Melibea par causa de sua peca de desira sesal, es medieval) e la eda moderna (multe temas es videda de un punto de vista plu abrida). Alga temas de la obra, estra desira sesal, es avaria, astutia nesesada per survive en la clases basa, e la educa de la fem per evita desonora.

En la sentenio 16 la lingua espaniol fini sua prosede de moderni. La Renase espaniol, con la entra de umanisme a Espania en la comensa de la sentenio 16, es divideda en du grupos:

• La dui prima de la sentenio ia aveni, su Re Carlo 1 de Espania e 5 de Deutxland. En leteratur on ave la influe de la poesia de ama italian con Juan Boscán e Garcilaso de la Vega.
• En la dui du, con Re Felipe 2, on ave un leteratur relijial, divideda en leteratur asteninte cual xerca Dio tra la perfeti de la umana, representada par Fray Luis de León con poesias como Noche serena, Profecía del Tajo, Oda a la vida retirada, Al salir de la cárcel e Oda a Salinas; e la leteratur mistica, cual espresa la uni con Dio como un vive intima e intensa e es representada par San Juan de la Cruz con tre poesias (Cántico espiritual, Noche oscura e Llama de amor viva) e Santa Teresa de Jesús.

En la leteratur en catalan, la eda entre la sentenio 16 e 19 es conoseda como Decadencia (Dejenera). La move de la potia a Castelia ia sinifia la usa de la espaniol en la corte e la cambia de la comersia de la Mar Mediteraneo a la Mar Atlantica. La leteratur popular ia contribui a la survive de la lingua catalan. Alga autores es Pere Serafí, Cristòfor Despuig, Joan Timoneda e Miquel Comalada.

En Romania, la naras istorial par Grigore Ureche, Miron Costin, Ion Neculce, e ance la obras par Dimitrie Cantemir es un esemplo de obras influeda par umanisme. On vide un interesa a la etnojenese de la popla romanian como relatada a la romanes. La scrivor xef de la Renase romanian es Dimitrie Cantemir (1673–1723). Sua obra ave libros filosofial, istorial (Nara de la anticia de la romanianes-moldovanes-valahes), siensal (Descriptio Moldaviae de 1716, e la mapa prima de Romania.

La leteratur de la Renase fini con du autores en Europa: William Shakespeare en England (1564–1616) e Miguel de Cervantes en Espania, con un de la obras la plu importante de la leteratur universal, Don Quijote de La Manga.