Lingua latina

Per comensa la istoria de lingua franca nova, on debe vade a la comensa de la lingua cual ia orijina los cual es fontes de elefen. Per esta, nos comensa nosa viaja en la Anticia, con la lingua latina, cual es la funda de la linguas romanica. De esta linguas romanica, la lingua franca mediteranean ia nase cual es la funda de lingua franca nova.

La nom “latina” veni de la tribu italian nomida Latini ci ia abita sirca la sentenio 10 en Latium, e la dialeto parlada par esta tribu. La lingua latina ia estende en junta con la concista de teras nova par la romanes, ci ia comensa un politica de romani – pd: estende la cultur roman (e ance la lingua) tra la Impero – ma en la este, latina no ia sustitui per elinica.

La leteratur latina survivente ia es cuasi intera scriveda en latina clasica.

La lingua latina ia evolui longo la istoria e on pote divide tal sua edas:

• Latina antica (prisca latinitas) es la periodo de la lingua ante 75 aec.
• Latina clasica (lingua latina) es la forma usada en la leteratur latina clasica. Lo ia estende de la sentenio 1 aec asta la sentenio 1 ec. Lo difere de latina antica en formas variosa, pd: la codas -om e -os ia cambia a -um e -us.
• Latina tarda (latinitas serior) es la lingua manejal e leteratural de la Anticia tarda en la Impero Roman tarda e la statos cual ia segue la cade de la Impero Roman ueste. Lo estende de la sentenio 3 asta la 4 o 6.
• Latina demotica es un terma cual refere a la sosioletos de latina parlada en la Mediteraneo en e pos la periodo clasica de la Impero Roman. Lo ia evolui asta deveni la linguas romanica, de cual la scrivedas ia comensa apare en la sentenio 9. Lo difere de la latina clasica en sua gramatica e vocabulo.
• Latina medieval (latina mediaevalis) es la latina usada entre la sentenios 4 e 14. Lo es relatada con la latina eglesal, ma esta es usada sola per temas relatada a cristianisme.
• Latina de la Renase (lingua latina renascentiae) es la latina usada entre la sentenio 14 e 16 en la Renase european, spesial lo usada par la umanistes. La umanistes ia fa cambias en la latina cual ia es introduida en la eda medieval, como la spele (pd: etiam ia es scriveda eciam en la eda medieval, e la umanistes ia prende denova la forma antica). Ma, an si la latina umaniste ia es un lingua leteratural sofisticada, lo ia deveni plu difisil ce on scrive obras sur siensa, oservante la normas instituida par la umanistes. Tal, par causa de la manca de vocabulo esata, esta cambias ia aselera la cambia de latina de un lingua laborante a un lingua de museo.
• Latina nova (latina nova) es lo cual ia developa de la latina de la Renase e ia es usada entre la sentenios 16 asta la fini de la sentenio 19.
• Latina contempora (latinitas viva) es la forma de latina usada de la fini de la sentenio 19 asta oji.

Cualias de la lingua latina

Latina es un lingua en cual la nomes, ajetivos e pronomes cambia sua codas per espresa la relata semantical con la resta de un frase. La colie de formas cual un nom, ajetivo o pronom pote ave es nomida un declina. Cada de la formas infletada es nomida casos: en latina on ave ses casos e sinco declinas. Tal, on clasi la nomes par la declina cual los segue. Ance, la nomes ave jenero, cual pote es masin, femin o neutra.

La verbo no ave formas composada e ave tre troncos:

• Tronco presente o infectum
• Tronco perfeta o perfectum
• Tronco supina

La verbo es divideda en cuatro conjugas (con un otra peti e miscada) en relata a la tempo o formas cual deriva de la infectum (tronco presente).

La ordina de la parolas en latina es SOV (sujeto–ojeto–verbo), diferente de lingua franca nova, cual ave SVO (sujeto–verbo–ojeto).

Leteratur latina

La leteratur latina pote es divideda en la periodos seguente:

• periodo de orijina (753 aec, fundi de Roma – 241 aec, fini de la Gera Punica Prima): mostras simple, tipal anonim
• periodo antica (241 aec – 78 aec): en esta periodo la obras prima en prosa e poesia comensa es scriveda
• periodo oro (78 aec – 14 ec), divideda en:
  • periodo de Cicero (78 aec – 43 aec): con Cicero como figur xef.
  • periodo de Augusto (43 aec – 14 ec), con autores como Vergilio, Horatio, Ovidio, Augusto e Tito Livio.
• periodo arjento (14 – 550 ec) con autores como Apuleio, Floro e Suetonio (eda de Impero media, 117–192), Ammiano Marcellino, Ambrosio e Tertulliano (eda de Impero basa, 192–395) e Orosio e Claudiano (eda de la divide de la Impero, 395–550).

Lingua latina demotica

An con la varia dialetal, la linguas de Espania, Frans, Portugal e Italia ia ave un unia notable en sua sonas e developas, suportada par la influe de un cultur cristian comun. Sola con la ariva de la muslimes en 711 a Espania, cual ia rompe la comunicas entre la rejiones romanica xef, la linguas ia comensa separa. La dialeto de latina demotica cual ia deveni romanian ia es plu separada, car lo ia es multe plu distante de la influes cual ia uni la parte ueste de la Impero.

En la sentenio 9, la latina demotica ia comensa diverje a linguas separada. En esta sentenio on trova la scrivedas romanica prima, ma esta formas ia es sola parlada, car la latina medieval ia es xef usada en scrive.

Contra la latina clasica, la latina demotica ia ave otra cualias:

• La sinco declinas de la latina ia es reduida a du.
• La tre jeneros ia deveni du, con la jenero neutra uninte con la masin.
• Alga sonas consonante a finis de parolas ia es perdeda (como -m o -t).
• Per espresa la sintatica, la preposadas ia es prefereda ca la casos.
• Developa de articles en la linguas romanica.
• La latina clasica ia ave des sonas vocal, distinguinte la longia de la sona, donce clasida como longas e cortas. La latina demotica ia ave sete sonas vocal, distinguinte vocales abrida e cluida.