Linguas romanica: orijina e evolui

En la sentenio 1 EC, la latina ia deveni la lingua de un impero cual ia governa tota la Mediteraneo. Pos la cade de la Impero Roman Ueste (476 EC), la latina de la ricas ia es usada como lingua leteratural, ma la lingua parlada par la popla ia deveni latina demotica. Esta latina, con multe parolas veninte de la poplas nativa, ia evolui diferente en la teritorios de la Impero, dividente en multe dialetos cual ia deveni la linguas romanica.

Evolui de latina demotica a linguas romanica

Evolui en la penisola Iberia

La linguas romanica cual ia apare en Iberia ia es la seguentes:

• Galego-portuges ia es la lingua cual ia evolui de latina en la eda medieval en la norde-ueste de la penisola Iberia. On considera ce la lingua ia es formida en la sentenio 8 e ia es la plu importante de la fini de la sentenio 12 asta la media de la 14. Lo es la orijina de galego, portuges, la fala de Estremadura e eonaviego.
• Astur-leones ia evolui en la rejion conoseda como Asturias e Leon. Lo es divideda en tre dialetos: ueste, sentral e este, e on pote ance parla de asturian (parlada en Asturias), leones (parlada en la Rena de Leon antica) e mirandes (en Portugal). En la rejion ueste, eonaviego es un lingua naseda pos misca entre galego e asturian.
• Aragones ia nase sirca la sentenio 8 en la Montes Pirineo sentral e norde sur un sustrato euscara. La linguistes nomi aragones medieval “navaro-aragones” par causa de la depende de Aragon de la Rena de Navara. Con la concista de la Val de la Ebro, la lingua ia estende a sude e ia deveni la plu grande en la sentenio 14. Oji lo es parlada en la norde de Aragon.
• Catalan es un lingua parlada en la este de Iberia, en la teritorio de la rejiones espaniol de Catalunia, Comunia Valensia, Isolas Baleare, en la site italian Alghero, en Andora e en la Pirineo Este. Lo es divideda en du grupos dialetal xef: este e ueste. La atesta prima de catalan scriveda es de la sentenio 9, e la testo leteratural prima es la Homilies d’Organyà, de la sentenio 13.
• Castelian (espaniol). De la concista muslim en 711 asta la sentenio 10, la mosarabi ia es la dialeto romanica xef en la penisola Iberia. A pos, asturian e leones ia es plu importante con la avansa de la cristianes a sude. La castelian ia nase en la contia medieval Castelia (a sude de Cantabria e a norde de Burgos) con influe euscara e visigoto. La testos la plu antica con parolas simil a castelian es la Cartularios de Valpuesta, de la sentenio 9. Los ia es scriveda en latina con parolas de lingua demotica. Entre la sentenios 12 e 15, castelian ia estende a zonas cual ia es areas de parla mosarabi, leones e aragones.

Evolui en Frans

En Frans on pote parla de du linguas xef cual ia nase a norde e a sude:

A norde, franses ia nase de la evolui de latina demotica a galo-roman. La evolui de latina a franses es multe conoseda par la cuantia de atestas cual ia ariva a nos, e, par causa de esta, on pote divide la periodos de sua jenese en esta modo: entre la sentenios 1 e 5, on vide un interata entre latina demotica e galo; de la sentenio 5 asta la 9, on pote parla de galo-roman; e entre la sentenio 9 e la 13 on parla de franses antica.

La Juras de Strasbourg (Serments de Strasbourg) es la testo prima conoseda cual es scriveda en franses. Los ia es scriveda a 12 febrero 842. Franses ia deveni un lingua manejal con la Proclama de Villers-Cotterêts en 1539.

A sude, ositan ia apare. De la sentenio 5 asta la 11, on vide la apare de termas e frases en ositan en testos de latina tarda o protoroman. De sirca 880, on ave un manoscrito con un poesia corta en latina de 15 linias de cual sua refren es en ositan.

Entre la sentenios 10 e 11, on trova la testos leteratural prima en ositan “clasica”: la Passion de Clermont (sirca 950), la Poesia sur Boetio (sirca 1000), poesias relijial de San Martial de Limoges (sentenio 11), la Canta de la San Fida (sirca 1040). Los es segueda par testos legal de 1034.

Entre la sentenios 10 e 15, ositan ia es la lingua dominante de cultur, maneja e siensa, e la apico de sua poesia ia aveni entre la sentenios 11 e 13. A fini de la sentenio 15, la franses ia entra a Ositania e ia deveni la lingua de prestijia; tal, la suordina lingual ia comensa cual ia es asentuada en la sentenio 16 par la obliga de parla franses.

Evolui en Italia

En Italia on no pote parla de un sola “lingua demotica”, car on ave diferes entre la dialetos de rejiones variosa e on no ave un model demotica per refere. La dialetos romanica parlada en Italia, an oji, difere multe de italian en tota niveles (fonolojia, morfolojia, sintatica, vocabulo) e alga es clasida como linguas separada.

La italian model ave un orijina poesial e leteratural en la scrivedas de la scrivores de Toscana en la sentenio 12, e, an si la gramatica e la vocabulo es xef noncambiada de los usada en Firenze en la sentenio 13, la model moderna ia es influeda par avenis resente. An tal, la demotica romanica parlada en la penisola italian ave un istoria longa.

La documento prima en demotica italian es la Placito cassinese (ance nomida Placito di Capua o Placito capuano), un declara notarial de 960, conservada en la abaderia de Montecassino. Esta documento es segueda par otras como la Placito di Sessa Aurunca e la Placito di Teano, an si la Rompetesta de Verona, de la sentenio 9 temprana, ave formas de latina demotica cual on pote vide como esemplos de un dialeto romanica italian.

La lingua cual ia deveni italian ia developa en Toscana, e ia es prima normida en la sentenio 14 temprana con la obras de Dante Alighieri, scriveda en sua propre lingua de Firenze. Sua obra “La Comedia divin” ia es lejeda en tota Italia e ia deveni la “norma autoriosa” cual tota la italianes ia pote comprende. En ajunta a esta esposa ganiada tra la leteratur, la prestijia par causas political e cultural de Firenze en acel tempo, como ance la fato de es un dialeto media entre la norde e la sude, ia aida en la crea de un norma fundida sur esta dialeto, cual ia deveni la funda de lo cual ia deveni la lingua ofisial de Italia.

Italian ia es ofisialida en la plu de la statos italian ante sua uni, an si la popla ia manteni sua dialetos.

Evolui en la este

En la este de la Impero, la lingua romanian ia es separada de la resta de la linguas romanica ueste e ia segue sua propre evolui.

La influe de la linguas nativa en romanian es peti, ma on trova lo en alga parolas como:

• Nomes propre: Jiu, Lotru, Oituz, Olt, Siret, Turda, Bucur
• Nomes comun: abur, baci, balaur, barză, brad, brânză, brâu, buză, ceafă, cioară, copil, fluier, gard, ghimpe, groapă, grumaz, mazăre, mânz, mărar, moș, pârâu, rață, viezure, zer
• Verbos: a băga, a (se) bucura, a cruța, a scăpăra
• Sufisas: -esc, -ește, -andru, -ăni

Influe ia veni ance de linguas con cual romanianes ia ave contata. En la sentenio 6, la lingua romanian ia ave ja sua strutur gramatical e un vocabulo xef latina, e donce la influes plu tarda ia es sola a la nivel de vocabulo:

• Influe slava. La migras de slavicas en la sentenio 6 e 7 ia trae vocabulos de cultiva a romanian, con parolas como blid, brazdă, căpiță, ciocan, cireadă, claie, clește, coasă, coș, coteț, grajd, greblă.
• Influe magiar. La influe magiar ia comensa en la sentenio e 10 cuando esta popla migrante ia entra a Panonia, arivante entre la sentenio 10 e 11 a Transilvania e lasante parolas como alean, gând, gingaș, hotar, imaș, meșter, sămădău, sălaș, oraș.
• Influe turces. De la sentenio 16, la concista turces ia trae vocabulos nova a romanian: caimacam, capuchehaie, geremea. Multe parolas es relatada a cosini: acadea, baclava, chiftea, ciulama, halva, iahnie, iaurt, magiun, mezel, musaca, rahat, sarailie e ance sufisas como -agiu (scandalagiu), -liu (hazliu) e -lâc (savantlâc).
• La influe elinica vade de la sentenio 6 a la 15 con parolas como a agonisi, arvună, catastif, diac, flamură, molimă, omidă, plapumă, trandafir, zodie, zugrav.
• Influe de otra linguas: En la sentenio 19 la lingua romanian ia moderni, prendente parolas de otra linguas romanica, xef de franses, an si lo ave influe italian en parolas relatada a musica, bancos e cosini.

Alga cualias de romanian es:

• La sinco declinas de latina ia deveni tre.
• La jenero neutra es mantenida.
• Como en otra linguas romanica, la article apare, ma lo es ajuntada a fini de la nom.
• 60% de la vocabulo es de orijina latina.