LETERATUR ROMANICA E ELEFEN
Introdui · Lingua latina · Linguas romanica: orijina e evolui · Leteratur medieval · Lingua franca mediteranean e la Renase · La baroca, la Lumina e romanticisme · Realisme e naturisme · Lingua franca nova

Leteratur medieval

La eda medieval comensa en la anio 476 con la cade de la Impero Roman Ueste e fini con la inventa de la primador par Gutenberg (1440) e la descovre de America (1492). Con la cade de la Impero Roman Ueste, la teritorios cual a ante ia es su un sola unia political ia es aora separada. Tal, an si on pote vide un cultur simil en Europa e un forma de vive simil, la leteratur ia comensa es scriveda en linguas romanica, cual ia comensa emerji de latina.

Temas comun

En la leteratur medieval romanica on pote trova alga temas comun en tota la linguas romanica. La xefes es:

Un tema comun en la leteratures medieval (franses, nederlandes, deutx e engles) es la volpe Renart, un trucor.

Leteratur medieval en la penisola Iberian

Leteratur medieval galego-portuges

Entre la sentenios 12 e 14 en la norde-ueste de la penisola iberian, un promove poesial ia flori en galego-portuges. Esta leteratur ia es scriveda en un forma detaliosa de galego-portuges, autonom de la orijina de la autor. A la otra lado, la prosa medieval galego-portuges, multe rara, es xef formida de traduis de obras scriveda en otra linguas, fada per es lejeda en Galisia. An tal, de la fini de la sentenio 15, la ambiente sosiolingual derivada de la resultas sosiopolitical de la eda ia favore la “nondepende” de portuges en relata a galego e la divide de la leteratur galego-portuges, comensante la Séculos Escuros (Sentenios Oscur) en Galisia e la nase de la leteratur portuges.

La documento de poesia galego-portuges la plu antica es la cantiga satira Ora faz ost’o senhor de Navarra par Johan Soarez de Pávia, scriveda en 1196. La colies la plu importante de la poesia medieval galego-portuges oji conservada es la Cancioneiro da Ajuda, la Cancioneiro da Vaticana, la Cancioneiro Colocci-Brancutti e la Cantigas de Santa María. La cantigas pote es divideda entre relijiales, como la Cantigas de Santa María e nonrelijiales, como la cantigas de amor, de escarnio e de amigo.

La documento la plu antica cual on conserva oji es la Notícia de Fiadores, de 1175, e de la comensa de la sentenio 13 on ave la documentos nonleteratural prima en galego-portuges: la Notícia de Torto (1211) e la Testamento de Afonso II de Portugal (1214). La testo la plu antica scriveda en Galisia en galego es la Foro do bo burgo de Castro Caldelas, de 1228.

En la sentenios 13 e 14, con la istoria diferente entre la rena de Galisia e lo de Portugal, la lingua galego-portuges ia comensa separa. A sude de la rio Miño, la lingua ia es normida e ia comensa es ofisial usada en maneja en 1290, ma a norde, la influe de castelian ia comensa en la sentenio 14.

En prosa, on trova libros sur la lejenda de Arturo como la Livro de Tristán, un tradui de la sentenio 14, e ance O Libro de Xosé de Arimatea e la Demanda do Santo Graal. On ave libros sur la gera de Troia, de cual la obra xef es la Crónica troiana (finida en 1373), un varia galego de la Roman de Troie. On ave ance la Crónica de Santa María de Iria (sentenio 15) e la Tratado de Albeitaria, un libro sur medica veterinar medieval.

En 1536 Fernão de Oliveira ia publici la gramatica portuges prima, e en 1540, João de Barros ia edita la gramatica du.

Leteratur medieval espaniol

La castelian ia evolui de la testos prima, como la Poesia de Mea Cid, asta sua model prescriveda con Alfonso 10. La re ia uni la tre dialetos sentral e ia promove la crea de leteratur e tradui. Pos el, en la sentenio 14, la lingua ia es modernida con scrivores como Don Juan Manuel e la Arciprete de Hita.

En la sentenio 15, on ia comensa scrive la poesias prima popular espaniol: la villancicos. Ante es scriveda, los ia es bocal transmeteda. La plu de la poesias medieval espaniol es conservada en cancioneros, scriveda de la sentenio 15.

Poesia epica

La poesias epica castelian es formida par la Poesia de Mea Cid, la Mocedades de don Rodrigo e sento linias de la Cantar de Roncesvalles. De la arcivos medieval on pote reconstrui la Cantar de la siete infantes de Lara.

La Poesia de Mea Cid nara la esclui de Rodrigo Diaz de Vivar. La eroe abandona sua fem e fias en la monceria de San Pedro de Cardeña e comensa sua batalias, de cual el nara sua vinses a la re castelian. La eroe concista Valensia e la re pardona el. La eroe reuni con sua fem e fias e, a la demanda de la re, el casi sua fias con la infantes de Carrion, an si el no gusta los. La infantes mostra sua coardia e, sentinte desonorada, nudi e bate sua sposas. La Cid demanda justia de la re e, a fini, sua fias sposi la infantes de Navara e Aragon.

Poesia de corte

Jorge Manrique ia produi obras cual on pote divide entre poesia de ama, de burla e de moralia, ma sua obra xef es Coplas a la muerte de su padre. Esta obra ia es inspirada en la contemptu mundi, pd: despeta de la mundo. En esta tradision el valua la vive sur la tera e la idea de la bon mori: la vive es videda como un oportun per fa bon laboras e ateni salva. La Coplas es divideda en tre partes:

Marqués de Santillana es recordada per sua serranillas, poesias corta cual nara la encontra entre un cavalor e un fem-campanian. Asi el imita la poesias simil franses, ma inspirada par la propre folclor orijinal. El ia es la prima ci scrive sonetos en castelian, imitante la stilo italian. Sua obra xef es la Comedieta de Ponza, en cual el nara un batalia marinal.

Juan de Mena ia es famosa como poesiste en la sentenio 15. Sua du obras xef es Laberinto de Fortuna e Las trezientas, dedicada a Juan 2. La Laberinto es un poesia alegorial inspirada en la Paradiso de Dante. Lo ave un vide de unia nasional representada par Juan 2.

Nara en strofes

Mester de juglaría (Ministreria de menestreles) es la poesia cantada par la menestreles. On pote nota la Poesia de Mea Cid, la Poesia de Fernán González e Los siete infantes de Lara.

Mester de clerecía (Ministreria de eglesores) es testos scriveda entre la sentenio 13 e 15 usante la cuaderna vía, un strofe de orijina franses con cuatro linias alexandrin cual ave rimas consonante con lunlotra. Du esemplos de la mester de clerecía es la Milagros de Nuestra Señora par Gonzalo de Berceo e la Libro de Buen Amor par Juan Ruiz, Arciprete de Hita.

Prosa

En teatro, la sola frato cual nos ave de ante la sentenio 15 es la Auto de los Reyes Magos. Probable scriveda en la sentenio 12, la obra misca elementos de la tradision con propre creas.

Leteratur medieval catalan

La Homilies d’Organyà es regardada como la testos prima de intende leteratural cual on ia scrive en catalan. Los ia es scriveda a fini de la sentenio 12. Los es un tradui a catalan de un de la predicas de un eglesor nonconoseda ci ia prepara los per la fidosas de sua parocia.

En la eda medieval, la menestreles canta poesias sur temas de amor. Los es musicistes e scrivores e la poesia de la menestreles es musical e leteratural. La lingua comun usada es ositan, ma on trova ance menestreles ci ia usa catalan, como Guillem de Berguedà. Con la sentenio orosa valensian, on trova la poesistes Ausías March, de ci on conserva 128 poesias de temas de ama, mori, moralia e relijio, e Joan Roís de Corella.

En la sentenios 13 e 14, on vide un developa de cuatro arcivos istorial en catalan:

En prosa filosofial e moral on debe parla sur Ramon Llull, regardada como la creor de catalan leteratural. Sua obra (con 250 titulos en catalan, arabi e latina), e la crea de un scola per instrui a la misionores cristian, es esemplos de sua ojeto de estende la cristianisme. Sua obra la plu conoseda es Fèlix o Llibre de meravelles. Otra autores es Francesc Eiximenis e Sant Vicent Ferrer. Bernat Metge ia introdui la Umanisme de la Renase a la leteratur catalan con sua obra Lo somni.

De la sentenio orosa valensian es ance la novelas de cavalorias Tirant lo Blanc, par Joanot Martorell, regardada como la preambul de la novela moderna european, e Curial e Güelfa. On pote ance nota Jaume Roig con L’Espill.

Leteratur medieval asturian

A fini de la sentenio 12 e comensa de la 13 on comensa usa la lingua romanica en loca de la latina per scrive. En Asturias, on distingui entre la leteratur legal e nonlegal.

La leteratur legal asturian inclui fueros, ordenances municipales e documentos notariales. De la fueros, on ave la Fueru Xulgu, la Fueru d’Uviéu e la Fueru d’Avilés. La ordenances municipales es regulas de la vileta. La plu importantes es la Ordenances del Conceyu d’Uviéu.

On trova esemplos de leteratur nonlegal con copias tarda e con multe influe de la castelian, como la Llibru d’Alexandre o la Disputa d’Elena y María.

En 1230, castelian comensa es la lingua xef en la scrive.

Leteratur medieval aragones

En la dui du de la sentenio 13, on vide como la usa de aragones en documentos es plu jeneral. Alga obras es la epica Cantar d’a Campana de Uesca, o Liber Regum, un de la testos prima de istoria en aragones, e otra testos cual misca castelian e aragones como Razón feita d’amor, Lo Libre dels Tres Reys d’Orient o la “Vida de Santa María Egipciaca”.

En la sentenio 14 on pote nota Johan Ferrández d’Heredia, Gran Mayestre d’o Espital, ci ia comensa tradui obras a aragones en Avignon, con la ojeto ce esta lingua va deveni un lingua de cultur. Otra traduores es Johan de Balbastro e Johan de Tudela. Alga libros traduida es Ceremonial de Consagración e Coronación d’os reis d’Aragón, la Cronica de Sant Chuan d’a Penya, la Libro del Trasoro, la Libro de Marabillas d’o Mundo. La dui du de la sentenio 14 es la eda orosa de la leteratur en aragones.

En la sentenio 15, la casteliani de Aragon ia comensa, spesial con Alfonso 5 a fini de la sentenio en la uni de la Coronas de Castelia e de Aragon. De esta sentenio on ave un poesia de Eximén Aznariz, un colie de refrenes nomida Romancea Porverbiorum e alga poesias.

De la sentenio 15, on vide la nase de leteratur scriveda en alfabeta arabi, do aragones ia resiste la influe castelian asta sua desapare en 1610. Un esemplo de esta leteratur es la Poesia de Yuçuf.

Leteratur medieval ositan

Un de la testos prima en ositan es la Cançon de Santa Fe de la sentenio 11.

De la sentenio 12, Guilermo 9 de Aciten (Guilhem 9) ia comensa la eda de la menestreles (troubadours per omes e trobairitz per femes) ci ia fa ce la lingua brilia tra Europa.

Entre otra menestreles famosa, on pote refere a Marcabru, Bernard de Ventadour, Bertran de Born, Cercamon, Pèire Cardenal e Raimbaut de Vaqueiràs.

La menestreles ia scrive en un lingua ositan comun cual los ia nomi provençal, lemosin (sin refere spesial a acel rejiones) o lenga romana.

En junta a la poesia, alga menestreles ia lasa a nos obras naral como la nara de Flamenca, un obra mestral cual dona sua nom a Castia gilos (la jelosa reproxada) par Raimon Vidal de Besalú. A esta tema ance Las novas del papagay (la novas de la papagaio) par Arnaut de Carcassés pertine.

En la eda medieval, la ositan ia ave un de la academias moderna prima (Consistori del Gay saber), un concurso leteratural (Jocs Florals) e un gramatica (Leys d’Amors).

Esta periodo fini con la concista de la sude par la Crusada Catar, fatos narada en la Canso de la crosada par du narores enemin, prima par Guilhem de Tudela, ci ia favore la crusadores, e segueda par un otra anonim, ci ia favore la lutores de la sude. En la Ositania concistada, pico e pico, franses ia comensa sustitui per la ositan en maneja (an si, en Bearn, ositan ia resta asta la Revolui franses).

Leteratur medieval franses

La testo prima conoseda cual es scriveda en frases es un testo nonleteratural, la Juras de Strasbourg (Serments de Strasbourg, 842), e la testo prima leteratural es la Salmo de San Eulalia, cual es un ajusta en 29 linias de un poesia latina, de evoca relijial e instrual, un scriveda de la leteratur feudal entre 881 e 882. Plu tarda, on ave La Vie de saint Léger (sentenio 10) e La Vie de saint Alexis (sentenio 11).

La testos prima importante de la leteratur franses veni de la eda medieval. Cronolojial, on reteni la epicas de la chansons de geste, cual alti la vinses de la cavalores (pe: la Canta de Roland, sentenio 11); a pos, on ave la leteratur de cortea, aparente en la sentenio 12, cual vide la menestreles cantante la ama perfeta en sua poesias, e Chrétien de Troyes ci ia scrive la Romans de la Table Ronde; e la fini de la periodo ofre un poesia lirica autentica con Rutebeuf, en la sentenio 13, e xef François Villon, en la media de la sentenio 15.

A lado de la jeneros nobil, otra jeneros popular ia apare como la fabliaux, la satira Roman de Renart, o en teatro la farsas comica a lado de la misterios relijial.

La chansons de geste es epicas longa destinada a es cantada en publica. Los nara, miscante istoria e lejenda, atas de gera pasada, marcante la ideal cavaloral. La plu antica conoseda es la Canta de Roland (Chanson de Roland), scriveda en la sentenio 11, cual nara, idealinte, la atenis de la armada de Carlo la Grande. Otra esemplos es La Chanson des quatre fils Aymon, ance nomida la Chanson de Renaud de Montauban e Li Coronemenz Looïs (La coroni de Luis).

La leteratur de cortea ia apare en la sentenio 12; sua tema xef es la ama unica, perfeta e nonfortunosa. Lo ave sua orijina en la Anticia, con influes este par los ci ia reveni de la Crusadas, e lo ia es inspirada par la lejendas celta. Tal, la lejenda de Tristan e Isolda nara la istoria de ama asoluta e nonposible cual fini con la mori trajedial de ambos. Esta poesias ia es cantada en la corte de la prinses par la menestreles.

Chrétien de Troyes (1135?–1190?) es la noveliste prima de la leteratur franses. Entre sua obras on pote nota Yvain ou le Chevalier au lion, Lancelot ou le Chevalier de la charrette et Perceval ou le Conte du Graal, cual es un parte de la mito de Arturo. Le Roman de la Rose, un poesia longa de la comensa de la sentenio 13, de cual sua parte prima ia es scriveda par Guillaume de Lorris, es un de la poesias ultima sur esta tema de la ama de cortea. La resta de la poesia, continuada par Jean de Meung, ave partes cual presenta misojinia, miscada con critica sosial.

En la mesma tempo, la Roman de Renart es un colie de poesias cual nara la aventuras de animales con razona. La volpe, la urso, la gal, la gato – cada ave un cualia umana: nononestia, naivia, astutia, etc. La autores anonim burla en esta poesias la valuas feudal e la moralia de corte.

Rutebeuf, un poesiste de la sentenio 13, ia parla sur la debilia umana, de la nonsertia e la povria, oposante los a la valuas de cortea.

Pos la Gera de Sento Anios, la poesiste François Villon (1431–1463?) ia nara la viole de esta epoca. Sua obra popular revolta contra la nonjustias de sua tempo.

La teatro relijial ia developa longo la eda medieval. On pote nota la Misterios, cual nara istorias relijiosa como Pascua o Natal. La manoscrito prima de teatro veni de la dui du de la sentenio 12: Le Jeu d’Adam, de tema relijial e sosial.

En la sentenio 13, la teatro ia distanti de la relijio, e on vide la apare de teatrales nonrelijial. Los ave sua orijina en obras juada entre la obras santa, e los ia cambia, inspirante se en la comedia antica ma con monologo poesial e par influe de la menestreles. La comedia prima importante de la eda medieval es Le Jeu de Robin et Marion (sentenio 13), scriveda par Adam de la Halle, (Adam le Bossu).

Leteratur medieval italian

Documentos prima

La atestas prima scriveda en italian demotica es documentos nonleteratural. La documento la plu antica es la Indovinello veronese, un rompetesta scriveda par un eglesor-copior de un scriptorium de Verona en un documento de la sentenio 8.

En esta documento es scriveda:

Se pareba boves, alba pratalia araba,
albo versorio teneba, et negro semen seminaba.

Seguente la interprete la plu estendeda, la rompetesta parla de un scrivor (scriptor), comparante la pen a la arado (albo versorio) cual es liscada per semi sinias negra (negro semen), pd: la leteras. La documento prima vera en italian demotica es, an tal, la placito capuano, un formula de jura insertada en un testo de 960, con cual la judor de Capua, Arechisi, reconose ce la abaderia de Montecassino ave la direto de posese alga teras:

Sao ko kelle terre, per kelle fini que ki contene, trenta anni le possette parti Sancti Benedicti.
(So che quelle terre, entro quei confini di cui si parla, li ha posseduti per trent’anni l’abbazia di San Benedetto.)

Du otra atestas en lingua demotica es de la fini de la sentenio 11, e ave temas relijial: un formula de un confesa umbrian trovada en la abaderia de San Eutizio en Norcia, e un enscrive sur un fresco en la eglesa de San Clemente en Roma, cual representa un sena de la vive de la santa.

De la sentenio 12, on ave un letera de Calabria e un scriveda simple cual pote es lejeda en la Duomo de Ferrara: Li mille cento trenta cenqe nato – fo questo templo a San Gogio donato – da Glelmo ciptadin per so amore – e mea fo l’opra. Nicolo scolptore.

On ave ance la Ritmo di Travale, de 1158: Guaita guaita male, no mangiai ma’ mezo pane.

On pote nota en la sentenio 13 fratos de un manoscrito de alga bancores fiorentin, e, ance en Toscana, otra documentos consernante temas privata o de instituidas publica.

Usa de la lingua demotica en la leteratur

En la cortes de Italia norde, on ia usa la lingua d’oc e la lingua d’oïl. De estas on pote nota la Tresor par Brunetto Latini, la Milione cual Marco Polo ia dita a Rustichello da Pisa en franses, e la cantas de ama de Sordello da Goito.

A pos, la Libro de cantas (Canzoniere) sisilian ia estende a Toscana, xef par Guittone d’Arezzo, do lo ia adota cualias lingual e poesial su la influe de la preumanisme cual ia fa plu tarda un cambia en la poesia en toscan e bolonian, traente la poesia italian a temas clasica, e distantinte lo de la mundo de cavaloria franses-normande cual lo ia atenta ja copia.

Do, la leteratur en lingua demotica en Italia ia comensa a un sentenio plu tarda ca en Frans, en la eda nomida Duecento en italian, en cual la leteratur mostra la influe de la tradision clasica, como ance la influe de latina medieval e la linguas d’oc e d’oïl.

Per trova en Italia testos leteratural en lingua demotica, on debe vade a la dui prima de la sentenio 12 con la Ritmo laurenziano (1150–1157), trovada en un manoscrito de la biblioteca Medicea Laurenziana de Firenze, cual es un cantin de un bufon toscan, o la Ritmo di Sant’Alessio o la Ritmo cassinese.

Leteratur en la Duecento

En la Duecento, on pote divide la leteratur entre:

Poesia relijial

On ave obras de San Francesco de Assisi en latina, e un canta, scriveda en demotica de Umbria, conoseda como la Cantico delle Creature o Il Cantico di Frate Sole. Pos sua mori, un leteratur fransescan ia nase cual ia segue ance en la Trecento. On vide la produi de biografias de la santa en latina e traduida a la lingua demotica, pd: Legenda prima par Tommaso da Celano, solisitada par la Pape Gregorio 9 en 1229, la Legenda secunda e la Legenda trium sociorum, scriveda como un segue de episodios spesial de San Francesco e sua tre acompaniores (Leone, Rufino e Angelo); la Speculum perfectionis.

La biografia ofisial du es lo scriveda par San Bonaventura, Legenda maior, regardada como la fonte prima de “I Fioretti di San Francesco” en demotica. On pote nota un obra scriveda como alegoria en 1227 con la titulo Sacrum commercium sancti Francisci cum domina Paupertate (La rituo de sposi de San Francesco con Sra Povria).

La apico de la poesia relijial ariva con Jacopone da Todi e sua Pianto della Madonna, un loda en dialogo scriveda en un misca de latina con demotica de Umbria.

Scola Sisilian

Con Federico 2 de Xvaben en Sisilia, la imperor, pos reveni de un viaja de Deutxland do el ia conose la menestreles deutx (Minnesänger), el ia comensa en 1220–50 un scola sisilian de poesias inspirada par modeles provensal. Esta scola ia ave un ativia leteratural asta la mori de la fio de Federico, Manfredi, en la batalia de Benevento. La poesistes de esta scola ia scrive en un sisilian cultal, influeda par latina e provensal. La tema xef ia es la ama inspirada par modeles provensal; la formas ia es la canta e la soneto, un inventa de Giacomo da Lentini.

Otra autores importante es Guido delle Colonne, Pier della Vigna di Capua, Rinaldo d’Aquino, Giacomo Pugliese e Stefano Protonotaro da Messina, a ci on debe la sola composa conservada en la lingua sisilian orijinal. On pote nota ance Cielo d’Alcamo, ci ia scrive en 1231 sua Rosa fresca aulentissima.

Poesia en Italia norde

En Italia norde un leteratur demotica ia nase con ojeto instruinte, inspirada o par la tradision provensal per comprende la enueg (lo cual produi irita) e plazer (lo cual produi plaser) o par la tradision biblial e apocalisal.

La autores la plu importante es:

La scrivor la plu importante de la sentenio 13 ci ia scrive en lombard es Bonvesin de la Riva, con sua Libro delle tre scritture, scriveda sirca 1274 e divideda en tre partes con la temas Inferno, Passione di Cristo e Paradiso. Lo es la testo prima de la leteratur en demotica lombard, e la autor es regardada como la presedor de Dante.

Poesia toscan

Pos la batalia de Benevento, la ativia cultural ia pasa de Sisilia a Toscana, do la poesia toscan ia nase, simil a la sisilian, ma ajustada a la demotica nova e insertada en la clima de luta de la sites: con la tema de ama on trova ance temas political e moral.

La poesistes toscan es Bonagiunta Orbicciani da Lucca, Monte Andrea, Chiaro Davanzati, Compiuta Donzella e Fra Guittone dal Viva da Arezzo.

Dolce Stil Nuovo

Entre la fini de la sentenio 13 e la comensa de la 14, la Dolce Stil Nuovo ia nase, un promove poesial cual, asentuante la tema de ama de la poesia de corte, ia gida lo a un maturi plu refinada.

Naseda en Bologna e florinte en Firenze, lo ia deveni sinonim de alta cultur filosofial, e par esta la poesistes de esta scola ia ave despeta per la grupo toscan, ci los ia acusa de manca de puria e stilo en sua poesia.

La poesistes de la Dolce Stil Nuovo presenta ama como la momento sentral de la vive de la spirito e ave un lingua plu rica ca lo de la poesistes de scolas presedente.

La comensor de esta scola ia es Guido Guinizelli, e otra poesistes ia es Guido Cavalcanti, Dante, Cino da Pistoia e otras min importante como Lapo Gianni, Gianni Alfani e Dino Frescobaldi.

Leteratur medieval romanian

En la eda medieval, la rejion de la Danubio es la frontera entre la cultur ueste, dominada par la usa de latina e la cultur este, developada par Bizantio, sur influe elinica par traduis a elinica e a linguas slavica. Esta ia causa ce la testos prima es scriveda en alfabeta slavica.

Manoscritos scriveda en linguas slavica inclui:

La testos scriveda en romanian ia apare tarda: la Scrisoarea lui Neacşu din Câmpulung (1521) es la testo la plu antica. Lo es un letera cual nara la moves de turceses en la Rio Danubio e la traversa de Valahia par Mohammed-Beg, e es adirijeda a Johannes Benkner, judor de Brasov. On pote vide como la lingua romanian no ia segue la otra linguas romanica, cual ia comensa es scriveda a multe sentenios ante la romanian.

La promoves de Reformi cual Luther ia comensa en la dui prima de la sentenio 16 ia ave du resultas:

En Romania, la testos prima en romanian es la resulta de fatores diversa:

En 1643, la bispo urban Varlaam ia publici un libro Cazanul, dedicada a la educa de la romanianes. En 1648, la bispo urban Simion Ștefan ia fa la tradui prima de la Atesta Nova a romanian, cual es importante per la developa de la lingua leteratural, car lo proposa sutrae la rejionalismes e serti la unia de la lingua. Lo es conoseda como la Noul Testament de la Bălgrad. La labora per introdui la romanian en la culto ia es continuada par la bispo urban Dosoftei, la autor de la testo relijial prima en strofes, un libro de salmos nomida Psaltirea pre versuri tocmită.

La naras istorial medieval es importante en la leteratur romanian. On pote nota cuatro autores:

Entre la obras relijial, on trova Cuvânt de învățătură la Duminica Vameșului par Antim Ivireanul e Viața lumii par Miron Costin.

Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 7 setembre 2020 (19:54 UTC).