Alga semanas a pos.
Ambos armadas ia comensa desende de la bosces e ia concista la tri viletas en poca tempo: Abaurg, Saurg e Taurg ia es ardeda e sua abitores ia fuji a Ryki, la sola loca con mures resistente.
Triste ia es la dia en cual acel viletas ia arde. Sua abitores, ci ia vide como acel es la ves du cuando sua casas ia es destruida, ia fuji a la castel de Ryki, do la conte e sua spos ia reseta e ia aida los.
En Goremy sola pico plu ca des-tre persones ia resta, la familia real e la prete. La comables no ia es multe, ma a la min los ia ave ancora acua, par causa ce la rio ia vade prosima a la site.
En acel matina, Tẃrik ia entra en la salon xef e ia demanda a Týdysk: “Cual tu crede ce on pote fa, mea Senior?, car me no pote trova un solve a esta. La enemis es tro multe, e nos es asi, con 30 persones si on conta omes e femes.”
Týdysk ia resta en silentia en cuando la jeneral ia parla. Pos ce el ia fini, Týdysk ia leva de la seja e ia comensa pasea tra la salon, disente: “Lasa ce me pensa e prea a nosa Dio per vide cual pote es la solve a nosa situa.”
Sabente la fida cual la conte ia ave, Tẃrik no ia dise plu e ia abandona la salon.
A poca minutos plu tarda, Týdysk ia fa la mesma e ia vade a la eglesa, do el ia senta e ia comensa prea.
“Per favore, Senior, no permete ce nosa rena es destruida par los ci no reseta tua Fio como Salvor de la mundo. Per favore, aida nos, dona sajia a me per sabe cual fa.”
Fatigada par la poca veses ce el ia dormi ja en la semanas ultima, Týdysk ia adormi. En sua sonias la Virjin ia apare a el, disente:
“No teme, Týdysk, car Dio no ia oblida la contia de Goremy, ma El ia envia me afin me dona a tu un solve a la situa en cual la contia es vivente.”
E lo ia es como si Týdysk ia reseta un projeta per fini la enemis de Goremy.
El ia abri sua oios e, vidente ce la note es prosima, el ia vade a la castel e ia demanda per la presentia de Tẃrik, ci ia ariva tan rapida como posible.
“Mea senior,” Tẃrik ia dise en cuando el ia ariva a la salon xef.
“Lo es vera ce la situa no es bon,” Týdysk ia dise, “ma nos pote ancora fa alga cosa.”
“Cual cosa nos pote fa?” Tẃrik is dise, surprendeda.
“Si tu regarda tra la fenetra, tu va vide la campas de nosa enemis, e los es tan multe stupida ce la tenda de la jenerales es de otra color. Per ariva a el, lo es multe fasil, car los es en la sentro de la campa, a sola sincodes metres de la entra, cual es vijilada per du persones.”
“E cual tu vole fa?” Tẃrik ia demanda.
“Me vade a la campa de la rena de Ejustirisia, e tu a la campa de la Republica de Frynkisia. Nos va secuestra la jenerales xef en esta note e reveni a Ryki. Pos esta, los va debe negosia.”
“Bon, lo es un bon idea.”
Cuando la note ia cade, ambos Týdysk e Tẃrik ia sorti de Ryki tra un pasaje cual sola la re ia conose. Cadun ia vade a la campa de la enemis e, pos mata la vijilores, ia ateni la tendas de la jenerales xef.
Los ia fa la mesma: on ave flor en Goremy cual, miscada con otra elementos secreta, adormi persones ci respira lo. Esta ia es usada per ambos afin los pote secuestra la du jenerales, ci no ia pote crede do los es cuando los ia velia a la matina seguente, con sua manos e pedes liada.
“Do me es?” Dolfen, la comandor de la armada de Ejustirisia ia demanda.
“Tu? Cual tu fa asi?” la comandor de la armada de la Republica de Frynkisia ia demanda.
“Tu? Como la armadas de Goremy ia pote secuestra nos?” ia es la responde de Dolfen.
Týdysk ia apare ante los, e con sua spada en sua mano, ia dise: “Tẃrik, on ave invitadas asi, cisa nos ta debe mostra a los cual nos fa con los ci ataca nosa teras e arde nosa viletas.”
“Esce me pote destesti los?, mea senior?” Tẃrik ia demanda.
“O cisa nos pote tortura los a ante?” Týdysk ia dise.
La du jenerales ia cambia sua fas cuando los ia vide la utiles de tortura cual ambos omes ia mostra a los.
“On ta vole negosia,” Dolfen ia dise.
“E perce vos vole negosia?” Tẃrik ia dise. “Vos es ja mor e, pos esta, vosa armadas ave no otra jeneral, fini con los va es fasil. Cual vos pote ofre per salva vosa vives?”
“Nos pote reconose la nondepende de esta teras…” la comandor xef de Frynkisia ia ajunta.
“… de la Contia de Goremy,” Týdysk ia completi. “Týdysk, trae la trata.”
Ambos jenerales xef ia suscrive la trata e los ia sorti con la promete de fa ce on respeta la acordas en sua paises.
Pos la sorti de los, la conte Týdysk ia asembla tota la popla de Goremy e ia dise: “Mea popla, popla amada de Goremy, pos esta luta nos ia ateni nosa libria e la reconose de la nondepende de Goremy. A fini, nos es libre per pote vive como nos vole, e per adora nosa Dio sin es persegueda. Ta ce Goremy vive!”
“Ta ce Goremy vive!” la popla ia responde.
“Aora nos debe reconstrui nosa tera, e me demanda per vosa aida, popla de Goremy, afin on pote vide denova, tan pronto cuando posible, la viletas de Abaurg, Saurg e Taurg denova construida. Ma no crede ce me no va aida vos, car me, como conte de Goremy, va es la prima ci talia lenio e ci labora afin vos pote ave denova vosa casas.”
E tota la abitores de Goremy, incluinte Týdysk e la jeneral Tẃrik, ia reconstrui la tre viletas de Goremy, cada con un eglesa de lenio e cada con sua mures per defende los en caso ce la teras visina ta atenta concista los denova.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 11 agosto 2024 (12:40 UTC).