Týdysk ia continua cavalinte tra la bosce. La feri cual el ia ave en sua lado destra no ia es multe profonda, ma el ia es sanguinte per alga oras. Sin fortia per dirije sua cavalo, el ia lasa ce lo core tra acel bosce, tan multe spesa, tan oscur par causa de la ramos e folias cual no ia lasa ce la sol entra.
Pos alga minutos, el ia senti ce el va desmaia.
“Per favore, Dio, salva me,” ia es lo cual el ia pote dise. E, pos esta, el ia desmaia.
La frescia de la aira ia velia el.
“Do me es?” Týdysk ia demanda a se.
El ia leva la oculos e ia regarda sirca se. La cavalo ia porta el a un vale, un vale alga vasta cual el no ia conose.
“Pos acel batalia, tota la armada es destruida, car me ia es fujinte e me ia mori cuasi. Do me va vade aora?” el ia demanda a se. “Me ave no propre pais.”
Pos lava e sania sua feri, Týdysk ia comensa pasea tra la vale. Strana, en la sentro, el ia trova un arbor multe grande, sin folias, ma con un fora en la tronco.
“Lo pare ce on ave alga cosa a interna de la tronco,” Týdysk ia dise. E, prosiminte, el no ia pote crede cual el ia vide: un sculta peti de la Virjin Maria.
El ia prende lo, e puri lo, e pos esta, un vose, la vose de la Virjin, ia apare en sua testa:
“Esta es tua propre pais nova,” el ia dise. “Asi tu va dona refuja a los ci es persegueda par respeta la Senior. E entre los, en la fem la plu odiada, tu va trova un rea.”
Tremante, el ia posa sua testa en la solo e ia dise: “Ci tu es?”
“Me es la Virjin Maria, e car tu ia mostra respeta per la sculta, e fida en Dio, tu reseta oji esta pais como tua.”
“Grasias a Dio a e tu, Virjin Maria, per salva mea vive e dona esta tera a me.”
E, tal, Týdysk ia nomi acel tera la Contia de Goremy, cual en sua lingua sinifia “Dio salva a me”[¹].
A la dia seguente, Týdysk ia comensa construi un castel peti con la troncos de la arbores cadeda. Pos un mense, el ia ave alga cosa cual on ta pote cisa nomi un “castel”.
“La castel de Goremy,” el ia pensa. E, en la parte fronte de lo, supra la porta, el ia pone un crus multe simple, cual el ia fa con lenio de sandalo, la sola tronco de acel arbor cual ia es en acel loca. Alga cosa multe noncomun.
Esta es la comensa de la istoria de la contia de Goremy, creada par Týdysk, la conte prima de Goremy.
[¹] De africans God red my con la mesma sinifia.
Esta paje es presentada con la lisensa CC Attribution-Share Alike 4.0 International.
Lo ia es automatada jenerada de la paje corespondente en la Vici de Elefen a 28 novembre 2024 (08:56 UTC).